Bua Me No Taʼila Zindruhunia
Me no öʼila zindruhunia ba majalah daʼa, te awena faduhu dödöu wa sindruhu-ndruhu so Zomböi yaʼita. Na simanö, te omasi göi ndraʼugö öʼalui hadia sindruhu wa moroi khö Lowalangi Zura Niʼamoniʼö. Ba na faduhu dödöu wa tola mufaduhusi tödö Zura Niʼamoniʼö, tola örasoi samösa mbuania, yaʼia daʼö:
Itugu sökhi waʼaurimö
IMANE SURA NIʼAMONIʼÖ: ”Lö tebulö [Lowalangi] ba wamaduhuʼö sanandrösa khönia ba ifalua zi sökhi yaʼia daʼö ibeʼe khömi deu hegöi baŵa wamasi, ba iʼabusoiʼö ami faoma ö si möi fangomuso dödömi.”—Halöwö Zinenge 14:17.
ELUAHANIA: Fefu hadia ia zi sökhi ba gulidanö andre no buala moroi khö Zomböi. Daʼö dandra wa iʼomasiʼö sibai ita. Na aboto ba dödöu daʼö, itugu öʼandrö saohagölö ba mbualania andre.
Ösöndra wanuturu lala soguna ba waʼauriu sero maʼökhö
IMANE SURA NIʼAMONIʼÖ: ”Ba aboto dania ba dödöu zindruhu ba satulö, ba fefu lala si sökhi.”—Amaedola 2:9.
ELUAHANIA: Börö me yaʼia Zomböi yaʼugö, aboto ba dödö Lowalangi hadia zoguna khöu enaʼö ösöndra waʼohahau dödö. Na öfareso Zura Niʼamoniʼö, oya wamahaʼö si tola ösöndra soguna ba waʼauriu sero maʼökhö.
Tola ösöndra wanema li moroi ba wanofu-nofumö
IMANE SURA NIʼAMONIʼÖ: ”Ba ösöndra waʼaboto ba dödö sanandrösa khö Lowalangi.”—Amaedola 2:5.
ELUAHANIA: Na no aboto ba dödöu wa so Zomböi yaʼita, tola ösöndra wanema li moroi ba wanofu-nofu sabölö moguna, simane: Hadia lua-lua waʼauri? Hana wa oya sibai gabula dödö iadaʼa? Hadia zalua na mate ita? Tola ösöndra waʼahono dödö ba wanema li nibeʼe Zura Niʼamoniʼö.
Tola öʼokhögö dötönafö sanandrösa ba zi so miföna
IMANE SURA NIʼAMONIʼÖ: ”ʼUʼila sa hewisa dödögu khömi,’ iwaʼö Yehowa. ’Omasido ubeʼe khömi waʼahono dödö tenga famakao, enaʼö so khömi dötönafö si sökhi ba zi so föna.’” —Yeremia 29:11.
ELUAHANIA: No ifabuʼu khöda Lowalangi wa ba zi so miföna hasambalö iheta waʼalösökhi, abula dödö, hegöi faʼamate. Buʼusa linia andrö zameʼe khöda fanötöna. Na faduhu dödöu ba mbuʼusa li Lowalangi, tola ötaögö gabula dödöu salua khöu.
