Hadia niwöwöi Lowalangi mbanua si yawa awö danö hegöi faʼauri mazui so manö ia lö börö-börö? Sindruhu-ndruhu no faböʼö sibai wehede zi darua ahli fisika andrö moroi ba ayati siföföna ba Zura Niʼamoniʼö. So zi faduhu tödö ba wehede ahli fisika si darua andrö. So göi zi faduhu tödö ba niwaʼö Zura Niʼamoniʼö. Hizaʼi, ato göi zi lö faduhu tödö ba niwaʼö ahli fisika hegöi Sura Niʼamoniʼö. Asese lafadunö-dunö duho daʼa ba ngawalö mbuku si tehöngö hegöi ba acara fabuʼa-buʼasa.

Tola manö lafahaʼö ira guru ba zekola wa lö hadöi somböi banua si yawa awö danö ba so manö waʼauri lö börö-börö. Hewaʼae simanö, hadia tola lafaduhuʼö wa lö hadöi Somböi? Tanö böʼönia, lafahaʼö göi ira sondröniaʼö ba agama wa so Zomböi yaʼita. Hizaʼi, hadia tola lafaduhuʼö wa atulö wamahaʼö daʼö? Mazui, ha asala lawaʼö ba niha enaʼö lafaduhusi tödö mazui ”mamati” manö ira ba wamahaʼö daʼö?

Te no irai öʼangeragö duho daʼa. Tola manö ömane tödöu wa lö hadöi sangila hadia so Zomböi yaʼita mazui löʼö. Tola manö göi ömane, ’Hadia moguna uʼalui wanema linia?’

Ba majalah daʼa, itutunö khöda hadia manö zindruhu si tola mufaduhusi tödö irege ato niha si faduhu tödö wa so Zomböi. Itutunö göi khöda ba majalah daʼa hadia mbörö wa moguna taʼila hezo moroi mböröta waʼauri.