Hadia sindruhu-ndruhu laʼila ira ilmuwan hezo moroi mböröta mbanua si yawa awö danö hegöi faʼauri? Sindruhunia löʼö. So zangumaʼö wa tola itutunö kosmologi (sambua moroi ba gotalua ilmu astronomi) hezo moroi mböröta mbanua si yawa awö danö. Hizaʼi, lö fao dödö Marcelo Gleiser, samösa agnostik hegöi profesor astronomi ba Dartmouth College. Imane, ”Irugi iadaʼa, lö manö maʼila matutunö hezo moroi mböröta mbanua si yawa awö danö.”

Iwaʼö göi zimane daʼö majalah Science News sanandrösa ba mböröta waʼauri. So sambua artikel moroi ba majalah daʼö imane, ”Abua khöda wotatugöi hewisa mböröta waʼauri ba gulidanö. No ara tekiko ngawalö fosil hegöi kara sangoromaʼö hadia zindruhunia zalua me tewöwöi gulidanö.” Rahu-rahunia, lö hadöi iʼila ibeʼe wanema li ilmu pengetahuan ba wanofu daʼa: Hewisa mböröta mbanua si yawa awö danö hegöi faʼauri?

Te ömane tödöu, ’Na sindruhu-ndruhu niwöwöi waʼauri ba gulidanö andre, haniha zomböi daʼö?’ So zangumaʼö wa faʼauri andre niwöwöi Zomböi yaʼita fondrege zatua-tua ba sangomasiʼö niha gulidanö. Te so wanofumö tanö böʼö: ’Na sindruhu so Zomböi yaʼita, hana wa itehegö tefakao niha? Hana wa itehegö oya sibai agama sameʼe famahaʼö si faböʼö-böʼö? Hana wa itehegö ba niha si so agama wamalua si lö sökhi?’

Lö laʼila labeʼe wanema li ira ilmuwan ba wanofu-nofu daʼö. Hewaʼae simanö, tenga zi lö hadöi fanema linia. Ato niha si no manöndra fanema li si tola tafaduhusi tödö ba Zura Niʼamoniʼö.

So ösa ndra ilmuwan si no mamahaʼö yaʼira ba Zura Niʼamoniʼö sangumaʼö wa sindruhu so Zomböi yaʼita. Hadia mbörö? Na omasiʼö öʼila wanema linia, bokai situs web jw.org, ba ketik ”pendapat tentang asal mula kehidupan” ba kotak pencarian.