Tötönafö​—Hadia Sindruhu-ndruhu So Mbuania?

AWENA fulu fakhe ndröfi Daniel me göna ia kanker. No göna ia kanker ba zi döfi faʼara. No aetu saʼae wanötöna ndra doto, simanö göi niha böʼö si fahatö khönia. Hizaʼi, lö aetu dötönafö Daniel. Faduhu dödönia wa samuza inötö dania tola döhö ia ba fao ia wangalui dalu-dalu kanker. Itötöna sibai göi enaʼö so doto si tola mamadöhö fökhö si göna khönia. Hizaʼi, ba ngaluo nidöna-dönania andrö, lö alua tohare doto daʼö, börö me abölö-bölö sibai deu. Afatö dödö Daniel ba atata dölania. Ba zi hauga hari aefa daʼö mate ia.

Salua khö Daniel andre itutunö si samösa matiri sangalui hadia mbua nitema zi samösa niha na so khönia wanötöna mazui faʼafatö dödö. Te no irai örongo zimane daʼö. Duma-dumania, na so samösa niha si no atua ba sarakhagö mate, tola manö alio mate ia na lö alua nidöna-dönania, te menaʼö omasi ia na möi niha niʼomasiʼönia ba wamaigi yaʼia mazui so ngaluo somasi ia itörö tödö. Hadia niʼilada moroi ba zalua andrö? Hadia sindruhu-ndruhu so mbuania khöda dötönafö simane nifaduhusi tödö niha böʼö?

Itugu ato ndra doto hegöi matiri sangumaʼö wa tötönafö hegöi fangera-ngera si sökhi so lua-luania ba waʼauri hegöi ba waʼabölö zi samösa niha. Hizaʼi, lö fefu niha fao dödöra ba daʼö. Duma-dumania, ira peneliti lawaʼö wa lö atulö daʼö fefu ba ha manö-manö. Abölö fao dödöra wa fökhö andrö alua ia börö waʼatebai mboto.

Tatu manö tenga sawena alua na tarongo so zi lö faduhu dödö sanandrösa ba dötönafö. Ngahönö fakhe silalö, laʼandrö khö zi samösa filsuf Yunani sotöi Aristoteles ba wanutunö eluaha dötönafö. Imane, ”Daʼö fefu ha fangifi.” Ba götöda göi andre, imane si samösa niha sosalahini banua Amerika sotöi Benjamin Franklin, ”Niha sauri börö dötönafö hasambalö mate ia lö fanötöna.”

Na simanö, hadia zindruhu sanandrösa ba dötönafö? Hadia ha anga-anga daʼö enaʼö tola terara dödö niha ba wangifi si lö eluaha? Mazui hadia so dane-dane saro irege tola faduhu dödöda wa tenga ha fangifi daʼö, hizaʼi si lö tola löʼö taʼokhögö enaʼö tasöndra waʼomuso dödö ba faʼabölö, dane-dane niʼila niha ba bua si tola tarasoi?