Tola Ölawa Waʼaombö-aombö Dödö

HEWISA na lö aʼozu niʼera-eramö? Ato niha sagatua-tua zi faduhu tödö wa fanema li ba wanofu daʼö zangoromaʼö hadia niha si so fanötöna ndraʼugö mazui niha saombö-aombö tödö. Fefu ita no faböʼö-böʼö wanandraigö nitaögöda. Tola manö asese alua khöda moroi ba niha böʼö. So niha salio afatö tödö na göna ia abula dödö, hewaʼae no ide-ide gabula dödö andrö. Hizaʼi, so göi zi terou tödö mangawuli hewaʼae no alua khönia gabula dödö, ba omasi ia ifuli itandraigö ifalua daʼö. Hadia mbörö wa simanö?

Duma-dumania, khalaigö na möi ndraʼugö wangalui halöwömö. Lawawancarai ndraʼugö, hizaʼi lö latema. Hewisa dödöu? Tola manö afökhö dödöu ba tobali abula dödö sebua. Te ömane khöu samösa, ’Lö latema niha simane yaʼodo andre. Lö hadöi halöwö si tola ubabaya.’ Mazui, te öwaö tödöu wa lö saʼae eluaha waʼauriu ba lö niha somasi khöu. Ba zalua andre, lala wangera-ngera simane daʼö fagölö ira nifotöi faʼaombö-aombö dödö.

Lala ba Wolawa Faʼaombö Dödö

Hewisa wolawamö faʼaombö dödö? Si oföna sibai, haogö nehegö lala wangera-ngera si lö baga simane daʼö. Aefa daʼö, lawa ia. Alui hadia mbörö wa alua daʼö. Duma-dumania, hadia sindruhu wa lö latema ndraʼugö börö me lö niha somasi mameʼe khöu halöwö? Mazui so nasa danö böʼö niʼaluinia sabölö onekhe moroi khöu?

Na no öʼila hadia mbörö, ogunaʼö daʼö ba wangoromaʼö faʼaombö-aombö dödö sebua nirasoimö. Hadia sindruhu-ndruhu lö eluaha waʼaurimö ha börö me lö latema ndraʼugö ba halöwö daʼö? Mazui, hadia tola öʼangeragö danö böʼö si tola ökhamö, simane halöwö ba wamati, fahuwusa ba nösi nomou mazui fariawösau? Fahaʼö ndraʼugö ba wanimbagö fangera-ngera si fasala wa hasambalö abula dödö fefu zalua khömö mazui nifaluamö. Baero daʼö, hadia sindruhu-ndruhu no öʼila wa lö irai ösöndra halöwöu? So nasa zi tola öfalua ba wolawa fangera-ngera si fasala.

Lala Wangera-ngera si Sökhi ba Osambuaʼö Dödöu ba Gohitö Dödömö

Ba zi hauga fakhe silalö, so nisöndra ndra sagatua-tua sanandrösa ba dötönafö. Lawaʼö wa tötönafö eluahania faʼafaduhu dödö wa tola ökhamö gohitö dödöu. Simane nitutunöda dania ba artikel aefa daʼa, oya nasa zi tefarahu ba wanötöna. Hizaʼi, eluaha nisöndra ndra sagatua-tua andre, tola muʼogunaʼö ia. Na taʼosambuaʼö dödöda ba wanötöna, tola taʼokhögö lala wangera-ngera si sökhi ba tafalua gohitö dödöda.

Enaʼö faduhu dödöda wa tola tafalua gohitö dödöda ba zi so miföna, moguna taʼalui waö-waö sanandrösa ba wotatugöi ohitö dödö hegöi lala wamalua yaʼia. Na lö irai örasoi zimane daʼö, haogö angeragö hadia manö gohitö dödöu samösa. Si oföna, hadia so gohitö dödöu? Tola manö ha si toʼölö daʼö, mazui börö me arörö ndraʼugö ba halöwöu si ero maʼökhö, lö saʼae inötöu ba woʼangeragö hadia zindruhunia niʼaluimö ba waʼauri andre hegöi sabölö moguna khöu. Sanandrösa ba wotatugöi hadia zabölö taʼofönaiʼö, no ibeʼe khöda mene-mene si sökhi Sura Niʼamoniʼö ngaotu fakhe silalö. Imane, ”Mitatugöi hadia zabölö moguna.”—Filifi 1:10.

Na no tatatugöi hadia zabölö moguna, aoha khöda ba wamili hadia zi lö tola löʼö tafalua ba waʼaurida, simane ba wamati, ba nösi nomo mazui ba halöwöda. Hizaʼi, böi talafo oya gohitö dödö nitatugöida ba wamobörö. Datafili gohitö dödö si tola takhamö. Na talafo alawa gohitö dödöda, tola manö ide-ide dödöda ba awuwu ita. Börö daʼö, dataföfögö, hezo nifaluada iadaʼa, ba hezo nifaluada ba zi so miföna.

”Na so waʼedöna, hasambalö so lala.” Manö-manö si no ara daʼö, hizaʼi te atulö ia andrö. Na no tatatugöi hadia gohitö dödö sabölö taʼofönaiʼö, moguna so khöda wamorege, faʼedöna ba taʼosambuaʼö dödöda ba wogamö yaʼia. Tola taʼaroʼö dödöda na taʼangerönusi hawaʼamoguna daʼö ba hadia mbuania na no takhamö. Tatu manö, so gabula dödö, hizaʼi böi tabaliʼö taha-taha daʼö.

Moguna göi taʼangeragö hadia manö lala si tola tafalua ba wogamö ohitö dödöda. Sanura sotöi C. R. Snyder, si no mangalui hawaʼamoguna dötönafö, ifarou niha enaʼö laʼangeragö ngawalö lala si tola lafalua ba wogamö gofu hadia ia. Buania, na lö mofozu lala si sambua, so nasa lala tanö böʼö.

Ibeʼe göi wamarou dödö Snyder enaʼö lafahaʼö ira niha hawaʼara ginötönia labulöʼö gohitö dödöra. Na lö lala böʼö si tola tafalua ba wogamö yaʼia, hasambalö ide-ide dödöda na lö mamalö taʼangeragö daʼö. Baero daʼö, na tabulöʼö ia ba zi tola takhamö, tola so zi bohou nidöna-dönada.

No ibeʼe khöda duma-duma Sura Niʼamoniʼö yaʼia daʼö Razo Dawido. No iʼera-era Dawido ba wamazökhi omo Lowalanginia sotöi Yehowa. Omasi sibai ia wamalua daʼö. Hizaʼi, ifatunö khönia Yehowa wa ononia Selomo zangokhögö töi si sökhi ba wamazökhi daʼö. Moroi na abao dödö Dawido ba ifaso enaʼö tebeʼe khönia halöwö andrö, ifaböʼöni gohitö dödönia. Ihorigö waʼabölönia ba wangowuloi kefe hegöi gama-gama niʼogunaʼö nononia ba wangasiwai halöwö andrö.—1 Razo 8:17-19; 1 Ngaʼötö 29:3-7.

Hewaʼae na mofozu ita ba wondrouʼö tötönaföda börö me talawa waʼaombö-aombö dödö, tadouʼö lala wangera-ngera si sökhi ba taʼosambuaʼö dödöda ba gohitö dödöda, te nasa moʼamböta ita sanandrösa ba wanötöna. Hadia mbörö? Sasesenia, faʼafatö dödö zabölö oya tarasoi ba gulidanö andre börö me lö ikhamö faʼabölöda. Na taʼangerönusi gabula dödö sebua nitaögö niha gulidanö andre, duma-dumania faʼatosasa, fasuwöta, falöʼatulö, fökhö hegöi lumö waʼamate, hewisa wa tola taʼokhögö wangera-ngera si sökhi safönu fanötöna?

[Gambara]

Na lö latema ndraʼugö ba halöwö somasiʼö, hadia ömane tödöu saʼae lö niha somasi manemaʼö yaʼo ba halöwö?

[Gambara]

Iforomaʼö wangide-ngideʼö Razo Dawido sanandrösa ba gohitö dödönia