1, 2. Hadia mbörö wa isura Faulo zura ba niha Keriso si so ba mbanua Heberai’o?

ME DÖFI 61, la’okhögö wa’ohahau dödö ndraono Gizara’eli ba gangowuloa. Ba mbanua Roma lakuru Waulo. Hiza’i, idöna-döna ena’ö alio la’efasi ia. Awönia Dimoteo göi bohou mu’efasi moroi ba gurunga, ba latötöna ena’ö lafalukhaisi ndra talifusö si so ba Yudaia. (Heb. 13:23) Barö zi lima fakhe, niha Keriso si so ba Yudaia hegöi ba Yeruzalema moguna lafa’anö ira. Hadia mbörö? No ihenaigö ifatunö Yesu khö ndra nifaha’önia ena’ö la’anemai’ö lalau moloi na so zaradadu samasui Yeruzalema.​—Luk. 21:20-24.

² No 28 fakhe wa’ara me ifangelama ndra nifaha’önia Yesu. Me luo da’ö, hewa’ae so zolohi niha Keriso si so ba Gizara’eli, lö hadöi faröi ira. (Heb. 10:32-34) Hiza’i, ihenaigö ifa’anö ira Faulo ba wanaögö fanandraigö si lö aratö alua. Lö aratö latörö wanandraigö sabölö-bölö sanandrösa ba wamati. (Mat. 24:20, 21; Heb. 12:4) Moguna so khöra wangodödögö falöfaröi hegöi famati saro ena’ö moloi ira simane niwa’ö Yesu. Ba da’ö te’odaligö wa’aurira. (Baso Heberai’o 10:36-39.) Börö da’ö, ibe’e Yehowa gehehania khö Waulo  ba wanura sura khö ndra talifusö. Sura da’ö nifotöi buku Heberai’o, musura ia ba wangaro’ö ndra talifusö sanandrösa ba zi lö aratö alua.

3. Hana wa moguna adöni dödöda ba mbuku Heberai’o?

³ Börö me ya’ita andre ono mbanua Lowalangi, moguna adöni dödöda ba mbuku Heberai’o. Hadia mbörö? Börö me arakhagö fagölö zalua khöda simane zalua ba niha Keriso ba Yudaia. So ita ba ”götö safuria”, ba ato zi lö faröi ba wanaögö famakao mazui folohi. (II Tim. 3:1, 12) Hiza’i, ato ba gotaluada zi lö manörö fanandraigö. Hewa’ae simanö, moguna tafa’anö ita simane niha Keriso ba götö Waulo. Hadia mbörö? Lö aratö tatörö wanandraigö sabölö-bölö sanandrösa ba wamati!​—Baso Luka 21:34-36.

4. Hadia ayati si no mufili ba ndröfi 2016, ba hana wa tefaudu sibai ayati da’a?

⁴ Hewisa ena’ö tola tafa’anö ita sanandrösa ba zalua miföna? Oya nitutunö Waulo ba mbuku Heberai’o, si tobali fanoloda ena’ö aro ita ba wamati. Sambua wamasugi ba dödö si tola ta’ame’egö tödö ya’ia da’ö nisura ba Heberai’o 13:1. Ifarou ita, ”Fangomasi’ö talifusö andrö, böi yatebulö.” Ayati andre no mufili tobali ayati ba ndröfi 2016.

5. Hadia nifotöi fangomasi’ö talifusö?

⁵ Hadia nifotöi fangomasi’ö talifusö? Ngawua wehede ni’oguna’ö Waulo ba li ndrawa Heleni eluahania ”fa’omasi soroi ba dödö ba dalifusö”. Fangomasi’ö talifusö ya’ia da’ö fangomasi’ö soroi ba dödö ba gotalua nösi nomo mazui ba zi fahuwu khöda. (Yoh. 11:36) Tenga ha ba mbewe ta’omasi’ö ndra talifusöda, ya’ita andre oi si fatalifusö. (Mat. 23:8) Imane Faulo, ”Fangomasi’ö talifusö andrö, ba ya moroi ba dödömi, faoma mihulö nawömi, wamosumange ya’ia.” (Rom. 12:10) Ngawua wehede andrö zangoroma’ö hawa’ebua wa’omasida khö ndra talifusöda. Fangomasi’ö ndra talifusö andre te’odane-dane ia ba goi-goi niha Keriso. Da’a zi möi fanolo ba nono mbanua Lowalangi ena’ö so wahasara dödö ba faoma fahuwu ira khö nawöra.

6. Hadia geluaha wangomasi’ö talifusö molo’ö niha Keriso sindruhu?

⁶ Asese tesöndra ngawua wehede ”fangomasi’ö talifusö” ba mbuku niha Keriso. Ba niha Yehuda meföna, ”talifusö” andrö tola lafo’eluaha ia talifusö ba wa’aniha mazui si tenga ösi nomora. Hiza’i, lö la’otalifusögö zi tenga niha Yehuda. Iada’a, gofu hezo so mbanua toröi niha Keriso sindruhu ba lö tebulö wa ”talifusöda” ira. (Rom. 10:12) Ifaha’ö ita Yehowa ba wangomasi’ö ndra talifusöda. (I Tes. 4:9) Hadia mbörö wa lö aetu-aetu ta’omasi’ö ndra talifusöda?

7. (a) Hadia mbörö wa moguna sibai taforoma’ö wa’omasi ba dalifusö? (b) Tutunö hana wa faoma moguna ta’aro’ö wa’omasida khö nawöda.

⁷ Fangomasi’ö talifusö moguna sibai börö me Yehowa zango’ou ya’ita. Tebai ta’omasi’ö Yehowa na lö ta’omasi ndra talifusöda. (I Yoh. 4:7, 20, 21) Baero da’ö, faoma tatolo nawöda börö me no so ita ba ginötö safuria. Me isura zurania Faulo ba niha Keriso si so ba Heberai’o, aboto ba dödönia wa lö aratö laröi nomora hegöi gokhötara fefu. No  ifatunö Yesu hewisa wa’atosasa niha ba luo da’ö. (Mrk. 13:14-18; Luk. 21:21-23) Börö da’ö, fatua lö alua ginötö wa’atosasa andrö, moguna la’aro’ö wa’omasira khö nawöra.​—Rom. 12:9.

8. Hadia zinangea tafalua iada’a fatua lö tohare wamakao sabölö-bölö?

⁸ Lö aratö tohare wamakao sabölö-bölö. (Mrk. 13:19; Fam. 7:1-3) Moguna ta’o’ö mene-mene andre, ”Ba mi’ae si bakha, ya’ami banuagu, ba mbate’e andrö khömi, ba milazi mbawandruhö furimi! Mibini’ö ami, ha mamö’i hörö wa’ara, irege alö wönu andrö.” (Yes. 26:20) Eluaha ”mbate’e” ya’ia da’ö banua niha Keriso. Da’a nahiada wefao khö ndra talifusöda ba wamosumange Yehowa. Hiza’i, tenga ha asala owulo ita ero migu. Ifarou niha Keriso si so ba Heberai’o Faulo ena’ö faoma lafarou dödö nawöra ba wa’omasi ba lafalua zi sökhi. (Heb. 10:24, 25) Iada’a, ta’aro’ö wa’omasida khö ndra talifusöda ena’ö tola tataögö gofu hadia ia wamakao salua ba zi so föna.

9. (a) Hadia manö ginötö si tola ta’oguna’ö iada’a ba wangoroma’ö fa’omasi khö ndra talifusöda? (b) Be’e duma-duma hewisa nono mbanua Yehowa ba wangoroma’ö fa’omasi khö ndra talifusöda.

⁹ Iada’a, oya ginötö si tola ta’oguna’ö ba wangoroma’ö fa’omasi khö ndra talifusöda fatua lö tohare wamakao sabölö-bölö. Ato ndra talifusöda si göna abula dödö börö ndruru danö, molö sebua, angi sabölö-bölö, tsunami mazui tanö bö’önia. So ösa zi göna folohi. (Mat. 24:6-9) So göi zi tosasa ba wangalui soguna börö me so ita ba gulidanö si lö atulö. (Fam. 6:5, 6) Hewa’ae simanö, itugu oya gabula dödö ndra talifusöda, itugu oya göi ginötöda ba wangoroma’ö fa’omasida khöra. Hewa’ae so ita ba gulidanö si lö fa’omasi, moguna böi aetu-aetu taforoma’ö wa’omasi khö ndra talifusöda.​—Mat. 24:12 ^[1]

10. Hadia nifatunöda iada’a?

¹⁰ Hewisa ena’ö böi aetu-aetu ta’oroma’ö wa’omasi ba dalifusö hewa’ae oya gabula dödö salua khöda? Hewisa wangoroma’öda wa so khöda fangomasi’ö dalifusö? Me iwa’ö Faulo, ’fangomasi’ö talifusö andrö, böi yatebulö’, no izara-zara khöda wangombakha hadia zinangea tafalua ya’ita niha Keriso ba wangoroma’ö fa’omasi khö ndra talifusöda. So önö ngawalö zinangea tafalua.

11, 12. Hadia geluahania lö abua gölöda ba wotema’ö dome? (Faigi gambara ba wamobörö wamaha’ö.)

¹¹ ”Böi mi’olifugö ami, faböi abua gölömi ba dome.” (Baso Heberai’o 13:2.) Hadia geluaha ”böi abua gölömi ba dome”? Ngawua wehede ni’oguna’ö Waulo andre, eluahania ”tafalua zi sökhi ba niha si lö ta’ila”. Te itörö tödöda zalua khö Gaberahamo hegöi Loti. Si darua niha andre, laforoma’ö gamuata si sökhi me so zangondrasi ya’ira si lö irai falukha khöra. Hiza’i, ba gafuriatania awena aboto ba dödöra wa mala’ika zangondrasi ya’ira. (I Moz. 18:2-5; 19:1-3) Duma-duma andrö zamarou dödö niha Keriso si so ba mbanua Heberai’o ba wangoroma’ö fa’omasi ba dalifusö, ena’ö lö abua gölöra ba wanema’ö tome.

¹² Hadia zi tola tafalua ba wangoroma’ö wa lö abua gölöda wanema’ö tome? Tola takaoni ndra talifusöda ena’ö falulu manga ira ba nomoda mazui faoma tafarou dödö nawöda.  Hewa’ae ambö fahatö ita khö pengawas wilayah mazui khö wo’omonia, hiza’i tola takaoni ira ba nomoda ba ginötö la’ondrasi gangowuloada. (III Yoh. 5-8) Tenga ha balazi oya gö mazui dali ebua gefeda awena takaoni ira ba nomoda. Ohitö dödöda tenga ena’ö lasuno ita, tobali ena’ö tafarou dödö ndra talifusöda. Nikaonida böi ha niha si tola mosulöni nifaluada. (Luk. 10:42; 14:12-14) Sinangea tatörö tödöda, böi ha börö wa’oya halöwö olifu ita ba wokaoni ndra talifusöda ba nomo!

13, 14. Hewisa ena’ö ’tatörö-törö tödöda nikuru andrö’?

¹³ ”Mitörö-törö tödömi nikuru andrö.” (Baso Heberai’o 13:3.) Fehede Waulo andre manandrösa ia khö ndra talifusöda nikuru börö wamati. l’andrö saohagölö Faulo ba nono mbanua niha Keriso börö me ’lahakhösi tödö nikuru’. (Heb. 10:34) So ba gotalua ndra talifusö sanolo Faulo me lakuru ia öfa fakhe wa’ara. Hiza’i, so ösa ndra talifusö si toröi ba danö saröu. Hewisa ira ba wanolo Faulo? Lö aetu mangandrö ira salahinia.​—Fil. 1:12-14; Heb. 13:18, 19.

¹⁴ Iada’a, ato ndra Samaduhu’ö Yehowa nikuru börö wamatira. Ira talifusöda sahatö ba mbanua andrö tola labe’e khöra wanolo. Hiza’i, so göi ba gotaluada si töröi ba mbanua saröu. Hewisa ena’ö tatolo ira ba lö olifu ita khöra? Fangomasi’ö talifusö da’ö zame’e famarou dödö khöda ena’ö lö aetu mangandrö ita salahira. Duma-dumania, tola ta’angöndröi ndra talifusöda hegöi ndraono si gide-ide nikuru ba mbanua Eritrea, simane dalifusöda Paulos Eyassu, Isaac Mogos, hegöi Negede Teklemariam. No töra 20 fakhe ira ba gurunga.

15. Hewisa lalada ba wangosinangegö farongasa?

¹⁵ ”Dozi sa, ba ndramu’onangegö warongasa.” (Baso Heberai’o 13:4.) Tola taforoma’ö wa’omasi khö ndra talifusöda na tahaogö mbua-buada. (I Tim. 5:1, 2) Duma-dumania, na tafalua gamuata wohorö khö ndra talifusöda si sara lala wamati khöda, no tafawukaisi wa’aurinia hegöi ösi nomonia. Lö sa’ae lafaduhusi tödö ita ira talifusöda. (I Tes. 4:3-8) Angeraigö göi hewisa dödö wo’omo ira alawe na i’ila wo’omonia ira matua ifaigi-faigi gambara zohorö. Hadia faduhu dödönia wa i’omasi’ö ia fo’omonia ba i’osinangegö wongambatöra?​—Mat. 5:28.

16. Na ahono dödöda ba zi no so, hewisa wangoroma’öda wa’omasi ba dalifusö?

¹⁶ ”Ya’abönö khömi zi ho so.” (Baso Heberai’o 13:5.) Na faduhu dödöda khö Yehowa, da’ö zanolo ya’ita ena’ö ahono dödöda ba zi no so. Tobali, hewisa wangoroma’öda fa’omasi ba dalifusö na so khöda gamuata da’ö? Na abönö khöda zi no so, itörö tödöda wa abölö moguna ndra talifusöda niha Keriso moroi ba gefe mazui tanö bö’önia. (I Tim. 6:6-8) Lö mukökö ita börö ndra talifusöda mazui börö zalua ba wa’aurida. Ba lö olohu ita mazui so khöda gamuata fakhögusa. Sindruhunia, na ahono dödöda ba zi no so, tola oböwö ita.​—I Tim. 6:17-19.

17. Na ’aro dödöda’ ba wamati, hewisa wa tola taforoma’ö wa’omasi khö ndra talifusöda?

¹⁷ ”Tola abe’e dödöda.” (Baso Heberai’o 13:6.) Na faduhu dödöda khö Yehowa tola aro dödöda ba wanaögö fanandraigö. Da’a zanolo ya’ita ena’ö so khöda gamuata si sökhi. Na tafalua da’ö, tola taforoma’ö wa’omasi ba dalifusö  na tabe’e khöra wondrara dödö ba famarou dödö. (I Tes. 5:14, 15) Hewa’ae na alua wamakao sabölö-bölö, tola aro dödöda börö me ta’ila no ahatö wangefa’ö andrö.​—Luk. 21:25-28.

18. Hadia zinangea tafalua ena’ö aro wa’omasida khö ndra satua sokubaloi?

¹⁸ ”Mitörö-törö tödömi zolohe ya’ami andrö.” (Baso Heberai’o 13:7, 17.) Labe’e ginötöra ira satua sokubaloi ba gangowuloa ba wanolo ya’ita. Na ö’angeraigö fefu nifaluara, tumbu ba dödöda wa’omasi hegöi fangandrö saohagölö khöra. Lö omasi ita na lö khöra fa’omuso dödö mazui abu dödöra börö gamuatada. Omasi ita ta’o’ö niwa’öra. Na tafalua da’ö, no ’tafosumange, ba ta’omasi’ö sibai ira, börö halöwö nifaluara andrö’.​—I Tes. 5:13.

19, 20. Hadia zinangea ta’angerönusi ba wangoroma’ö fa’omasi khö ndra talifusöda?

¹⁹ Aboto ba dödö niha wa ya’ita andre ono mbanua Yehowa börö me so khöda wa’omasi. Simane da’ö zalua me götö Waulo. Ifarou Faulo ndra talifusöda ena’ö laforege wamalua fa’omasi. Imane, ’Ena’ö tedou-dou manö wa’omasi ba nawömi.’ (I Tes. 4:9, 10) Börö da’ö, moguna tadou’ö wa’omasida khö ndra talifusöda!

²⁰ Na no tafaigi ayati si so ba Balai Kerajaan barö ndröfi da’a, data’angerönusi wanofu-nofu andre: Hadia tola aoha gölögu ba wanema’ö tome? Hewisa wanologu ndra talifusöda nikuru? Hadia u’osinangegö warongasa nihonogöigö Lowalangi? Hadia zanolo ya’o ena’ö ahono dödögu ba zi no so? Hewisa ena’ö itugu ufaduhusi tödö Yehowa? Hewisa ena’ö abölö u’o’ö li ndra talifusöda sangai halöwö ba gangowuloa? Na tahaogö wo’angerönusi fefu wanofu si önö ngawalö andre, ayati nisura ba ndröfi da’a tenga ha asala lafalemba ba dowa. Da’ö zamasugi ba dödöda ena’ö ta’o’ö li Waulo me imane, ’Fangomasi’ö talifusö andrö, böi yatebulö.’​—Heb. 13:1.