1, 2. (a) Hadia manö ’mbuala Lowalangi si tebai tawa’ö fa’ebua andrö?’ (b) Hadia wanofu-nofu nifatunöda ba duho da’a?

OROMA wa’omasi Yehowa me ifatenge Nononia, Yesu ba gulidanö. Da’a no sambua buala sebua böli! (Yoh. 3:16; I Yoh. 4:9, 10) Ifotöi mbuala andre Faulo ’buala si tebai tawa’ö fa’ebua’. (II Kor. 9:15) Hana wa iwa’ö Faulo wehede da’a?

² Aboto ba dödö Waulo wa höli nibe’e Yesu andrö si tobali tandra wa hasambalö alua fefu nifabu’u Lowalangi. (Baso II Korindro 1:20.) ’Buala si tebai tawa’ö fa’ebua andrö’ ya’ia da’ö höli nibe’e Yesu ba fefu wa’ebua dödö Yehowa hegöi fa’omasi niforoma’önia khöda. Lö ikhamö fangera-ngerada ba wokhalaigö hawa’ebua mbuala andrö. Hewisa dödöda ba mbuala sebua böli andrö? Ba börö mbuala andrö, hewisa ena’ö tefarou dödöda ba wama’anö ya’ita  ba Wanörö Tödö fa’amate Yesu ba luo Rabu, 23 mbaŵa si Tölu 2016?

3, 4. (a) Hewisa dödöu na so zame’e khöu mbuala? (b) Hewisa wa tola tebulö’ö wa’auriu moroi ba mbuala sebua böli andrö?

³ Omuso sibai dödöda na so zame’e khöda buala. So mbuala si fagöna ba dödö si tola mombulö’ö lagu wa’aurida. Duma-dumania, khalaigö atö na no öfalua gamuata si lö sökhi. Hukumamö ya’ia da’ö fa’amate. Hiza’i, ba zi lö ödöna-ödöna, so niha somasi mosalahini ya’ugö ba wanema hukumamö andrö. Itehegö mate ia salahimö! Hewisa dödöu ba nifaluania andrö?

⁴ Moroi ba wa’omasi hegöi buala sebua simane da’ö, tola manö öbulö’ö lala wa’auriu. Na ö’angeraigö fefu da’ö, tola tefarou dödöu ena’ö itugu obowö ndra’ugö, ö’omasi’ö niha bö’ö ba ö’efa’ö zala niha si fasala khöu. Tola öforoma’ö ba wa’aurimö wa ö’andrö sibai saohagölö me no te’asogö höli andrö.

5. Hana wa’abölö sökhi mbuala höli nibe’e Lowalangi andrö moroi ba mbuala tanö bö’ö?

⁵ Abölö sökhi mbuala höli nibe’e Lowalangi moroi ba duma-duma mbuala nifatunöda no mege. (I Fet. 3:18) Angeraigö da’a: Fefu ita tatema horö gondröita moroi khö Gadamo, ba lua-luania ya’ia da’ö fa’amate. (Rom. 5:12) Börö me so khö Yehowa wa’omasi, andrö ifatenge Yesu ba gulidanö ena’ö ”itandra wa’amate, salahi niha fefu”. (Heb. 2:9) Hiza’i, so zabölö ebua nifalua Yesu dania! Iheta wa’amate sagötö fa’ara. (Yes. 25:7, 8; I Kor. 15:22, 26) Fefu niha samati khö Yesu tola la’okhögö wa’ohahau dödö, he si fao awö Keriso tobali razo ba zorugo hegöi si tobali ono mbanua moroi ba Mbanua Lowalangi. (Rom. 6:23; Fam. 5:9, 10) Hadia howu-howu danö bö’ö nasa moroi ba mbuala nibe’e Yehowa?

6. (a) Hadia howu-howu moroi ba mbuala nibe’e Yehowa somasi ötema ba zi so föna? (b) Börö me ta’osinangegö mbuala Lowalangi, tutunö tölu ngawalö zinangea tafalua.

⁶ Buala Lowalangi tanö bö’ö ya’ia da’ö tobali faradaiso gulidanö andre ba zi so föna, tefadöhö wökhö, ba tesusugi niha si no mate. (Yes. 33:24; 35:5, 6; Yoh. 5:28, 29) Ta’omasi’ö Yehowa hegöi Nononia börö me no ibe’e khöda ’mbuala andrö, si tebai tawa’ö fa’ebua’. Moroi ba mbuala andrö, hadia zinangea tafalua? Tefarou dödöda ba (1) wolo’ö khö Yesu Keriso, (2) wangomasi’ö ndra talifusöda, ba (3) wangefa’ö zala niha bö’ö soroi ba dödö.

7, 8. Hewisa dödöda ba wa’omasi Keriso andrö, ba hadia zinangea tafalua?

⁷ Si oföna, ena’ö tefarou dödöda ba wangoguna’ö fa’aurida ba wamosumange Yesu. Imane Faulo, ”Fa’omasi Keriso andrö sa zango’ou ya’aga.” (Baso II Korindro 5:14, 15.) I’ila Faulo wa terou dödöda ba wangomasi’ö hegöi ba wamosumange Yesu na tatema wa’omasinia. Na aboto ba dödöda hadia zi no ifalua Yehowa ba wa’aurida, tefarou dödöda ba wangosinangegö Yesu. Hewisa lalada ba wamalua da’ö?

⁸ Fa’omasida khö Yehowa da’ö zamarou ya’ita ba wolo’ö hegöi ba wotara lahe Yesu. (I Fet. 2:21; I Yoh. 2:6) Na ta’o’ö li Lowalangi hegöi Keriso, da’ö dandra wa ta’omasi’ö ira. Imane Yesu,  ”Si so oroisa andrö khögu, solo’ö ya’ia, da’ö zomasi ya’o. Ba ni’omasi’ö Namagu zomasi ya’o; ba ya’o göi u’omasi’ö ia ba u’oroma’ö ndra’o khönia.”​—Yoh. 14:21; I Yoh. 5:3.

9. Hadia manö si tola mondrönisi tödöda?

⁹ Barö mbaŵa Wanörö Tödö fa’amate Yesu, moguna ta’angerönusi zinangea tafalua ba wa’aurida. Börö da’ö, sofu khöu samösa: ’Hezo oroma wa no u’o’ö Yesu? Hadia zinangea ubulö’ö ba wa’aurigu?’ Moguna ta’angerönusi wanofu andrö börö me omasi niha gulidanö na ta’o’ö zomasi ira. (Rom. 12:2) Na lö khöda famangelama, tola adöni dödöda ba wolo’ö niha sagatua-tua ba gulidanö andre, artis, hegöi si tehöngö ba olahraga. (Kol. 2:8; I Yoh. 2:15-17) Hewisa ena’ö lö ta’o’ö zomasi gulidanö andre?

10. Hadia wanofu-nofu si tola ta’angerönusi barö mbaŵa Wanörö Tödö fa’amate Yesu? Ba hadia zinangea tafalua? (Faigi gambara ba wamobörö wamaha’ö.)

¹⁰ Barö mbaŵa Wanörö Tödö andre, moguna ta’angeraigö lagu wonukhada, film nifaigida, musik nifondro-ndrongoda, hegöi fefu ngawalö zi so ba komputer, HP, mazui ba tablet. Sofu khöu samösa: ’Na so Yesu ba da’a, hadia lö aila ndra’o na i’ila nukha nifakegu?’ (Baso I Timoteo 2:9, 10.) ’Moroi ba lagu wonukhagu, hadia oroma wa ya’odo andre solo’ö khö Keriso? Hadia omasi Yesu wamaigi film nifaigigu? Hadia omasi ia wamondro-ndrongo musik nifondro-ndrongogu? Na ifiza Yesu HP mazui tablet-gu, hadia lö ailado ba ni’ilania andrö? Hadia abua khögu ba wamatunö khö Yesu hana wa omasido video game da’ö?’ Fa’omasida khö Yehowa zamarou tödöda ba wanibo’ö gofu hadia ia ngawalö zi lö faudu ba mbua-bua niha Keriso, hewa’ae na ebua mbölinia. (Hal. 19:19, 20) Na talulu wa’aurida khö Yehowa, no tafabu’u wa ta’oguna’ö wa’aurida ba wamosumange Keriso. Böi ta’irö’ö gofu hadia ia zi tobali daha-tahada ba wolo’ö khö Yesu.​—Mat. 5:29, 30; Fil. 4:8.

11. (a) Börö wa’omasida khö Yehowa hegöi khö Yesu, hadia zinangea tafalua ba halöwö fanuriaigö? (b) Börö me so khöda wa’omasi, hadia nifaluada ba wanolo ndra talifusöda si so ba gangowuloa?

¹¹ Fa’omasida khö Yesu zamarou tödöda ena’ö owölö-ölö ita ba wanuriaigö hegöi ba wamaha’ö. (Mat. 28:19, 20; Luk. 4:43) Barö mbaŵa Wanörö Tödö fa’amate Yesu, hadia tola öbe’e ginötöu 30 mazui 50 za ena’ö tobali perintis ekstra? Imane samösa talifusöda ira matua si 84 fakhe, si no mate donga, wa tebai merintis ia börö me no alawa ndröfinia ba börö me asese mofökhö ia. Hiza’i, latolo ia ira perintis si so ba mbanuania. Labe’e lalania ba lafili mbanua si tola möi ia manuriaigö. Lua-luania tola ikhamö 30 za talifusöda andre ba zi sara waŵa. Hadia tola ötolo samösa dalifusöda si so ba gangowuloa ena’ö merintis ekstra ia ba mbaŵa si Tölu mazui ba mbaŵa si Öfa? Sindruhu sa wa lö fefu niha tola merintis. Hiza’i, tola ta’oguna’ö ginötö hegöi fa’abölöda ba wondrou’ö halöwöda khö Yehowa. Na tafalua da’ö, no taforoma’ö wa no terou dödöda börö wa’omasi Yesu, simane nifalua Waulo. Moroi ba wa’omasi Lowalangi, hadia nasa zi tola tafalua?

12. Börö wa’omasi Lowalangi andrö, hadia zinangea tafalua?

¹² Si dua, fa’omasi Lowalangi zamarou tödöda ba wangomasi’ö ndra talifusöda. Imane Yohane, ”He ya’ami ni’omasi’ö! Na no imanö wangomasi’ö ya’ita Lowalangi, ba mo’ömö göi ita fangomasi’ö awöda.” (I Yoh. 4:7-11) Tobali, na tatema wa’omasi Lowalangi, moguna ta’omasi’ö ndra talifusöda. (I Yoh. 3:16) Hewisa wa tola taforoma’ö wa’omasi khöra?

13. Hadia duma-duma nibe’e Yesu si tobali tandra wa i’omasi’ö niha gulidanö?

¹³ Moroi ba duma-duma nibe’e Yesu ba da’ö ta’ila hewisa ena’ö tola ta’omasi’ö niha bö’ö. Me so ia ba gulidanö, itolo niha si so fangide-ngide’ö. Ifadöhö niha sofökhö, sakela-kela, sau’a, safiso, hegöi si lö hede. (Mat. 11:4, 5) Omasi Yesu wamaha’ö niha somasi manöndra fa’aboto ba dödö sanandrösa khö Lowalangi, tenga simane sondrönia’ö ba agama. (Yoh. 7:49) I’omasi’ö ba itolo niha si so fangide-ngide’ö.​—Mat. 20:28.

14. Hadia dandra wa ö’omasi’ö ndra talifusöda?

¹⁴ Tola tobali inötö si sökhi khöda baŵa Wanörö Tödö andre göi ba wo’angeraigö hewisa lalada ba wanolo ndra talifusöda si so ba gangowuloa, mendrua manö ndra talifusöda si no atua mboto. Hadia tola möi’ö khöra ba nomo? Hadia tola ö’ohe öra gö, ölului halöwöra yomo ba nomo, öfaondragö ira we’amöi ba gangowuloa, mazui fao’ö khöra ba wanuriaigö? (Baso Luka 14:12-14.) Yaterou dödöu ba wangomasi’ö ndra talifusöda börö me no ötema wa’omasi Lowalangi!

15. Hadia zinangea ta’ila?

¹⁵ Si tölu, fa’omasi Yehowa zamarou tödöda ba wangefa’ö zala ndra talifusöda. Fefu ita no ta’okhögö horö ondröita ba fa’amate moroi khö Gadamo. Tobali, samösa lö si tola manguma’ö, ”Lö moguna khögu höli.” Niha si lö faröi khö Lowalangi manö moguna khönia höli. Fefu ita no te’efa’ö moroi ba gömö sebua! Hana wa moguna ta’ila da’ö? Ta’ila wanema linia moroi ba gamaedola nidunö-dunö Yesu.

16, 17. (a) Hadia wamaha’ö si tola tahalö moroi ba gamaedola nibe’e Yesu sanandrösa khö razo hegöi zawuyunia? (b) Me no ö’angerönusi gamaedola nibe’e Yesu, hadia gangetula nihalömö?

¹⁶ Ifatunö Yesu sambua gamaedola  sanandrösa khö razo sangefa’ö fo’ömö zawuyunia, si 60.000.000 hua suku fa’ebua. Hiza’i, so zawuyu si lö mangefa’ö fo’ömö nawönia sawuyu si ha 100 hua suku fa’ebua. Sindruhunia, tola i’efa’ö wo’ömö nawönia sawuyu andrö börö me no i’efa’ö wo’ömönia razo. Mofönu sibai razo me irongo wa lö i’efa’ö zawuyu andrö gömö nawönia sawuyu hewa’ae lö ebua. Imane, ”He sawuyu si lö sökhi! Ömö no andrö fefu, ba no ube’e bualagu khöu, me no mangandrö ndra’ugö khögu; ba hadia lö öhakhösi tödö göi nawöu sawuyu, simane ya’o, me no uhakhösi tödö ndra’ugö?” (Mat. 18:23-35, NW) I’efa’ö Yehowa gömöda sebua, simane nifalua razo andrö. Börö da’ö, hadia zinangea tafalua?

¹⁷ Gasa-gasa wombaloida baŵa Wanörö Tödö andrö, tola tasofu khöda samösa, ’Hadia no u’afökhöi’ö dödö dalifusö si sara lala wamati khögu? Hadia abua khögu wangefa’ö zalania?’ Na simanö, no inötö si sökhi da’a ba wolo’ö Yehowa ”somasi mame’e aefa horö”. (Neh. 9:17; Zin. 86:5) Na ta’andrö saohagölö börö wa’ebua wa’omasi Yehowa, tola ta’efa’ö zala ndra talifusöda soroi ba dödö. Na lö ta’omasi’ö ba ta’efa’ö zalara, tebai tadöna-döna wa i’omasi’ö ba i’efa’ö zalada Yehowa. (Mat. 6:14, 15) Na ta’efa’ö zalara, tenga da’ö geluahania lö irai la’afökhöi’ö dödöda. Hiza’i, na tafalua da’ö so khöda wa’ohahau dödö ba zi so föna.

18. Börö wa’omasi Lowalangi, hana wa tola so wa’ebolo dödö khö dalifusöda Lily hewa’ae lö mo’ahonoa dalifusöda nitolonia?

¹⁸ Börö me lö mo’ahonoa ndra talifusöda, tola manö lö khöda fanaha tödö. (Baso Efeso 4:32; Kolose 3:13, 14.) So samösa dalifusöda ira alawe sotöi Lily. ^[1] Itolo dalifusöda lakha mbanua sotöi Carol. Duma-dumania, ifasao Carol gofu hezo möi ia, itolo na i’öli zoguna khönia, ba oya danö bö’önia nasa. Hewa’ae oya itolo ia talifusöda Lily, i’alu-alui zalania Carol. Lua-luania, abua khö Lily ba wanolo ya’ia. Hewa’ae simanö, i’ila Lily wa so gamuata si sökhi khö dalifusöda Carol, ba lö iböhöli wanolo Carol ba zi hauga fakhe fa’ara irege mofökhö Carol ba mate ia. Hewa’ae abua khönia ba wanolo Carol, imane Lily, ”Omasido falukha khö Carol na tesusugi ia dania. Omasido u’ila ia ba ginötö mo’ahonoa ia.” Moroi ba duma-duma da’a, tola so khöda wa’ebolo dödö khö ndra talifusöda börö wa’omasi Lowalangi, ba tadöna-döna ginötö na no mo’ahonoa fefu niha.

19. Börö ’mbuala Lowalangi si tebai tawa’ö fa’ebua’ andrö, hadia zinangea tafalua?

¹⁹ No ibe’e khöda Yehowa ”mbualania andrö, si tebai tawa’ö fa’ebua”. Böi awöli-wöli ita ba wangandrö saohagölö börö mbuala andrö! Baŵa Wanörö Tödö andre no inötö si sökhi sibai ba wo’angerönusi fefu zi no ifalua Yehowa hegöi Yesu ba wa’aurida. Börö me no la’omasi’ö ita, yaterou dödöda wanara lahe Yesu, wangomasi’ö ndra talifusöda, hegöi ba wangefa’ö zalara soroi ba dödö.