1. Hewa’ae Yehowa andrö no Fondrege Zebua, hadia ni’andrönia ba niwöwöi dangania?

YEHOWA no Fondrege Zebua. So khönia wa’atua-tua ba fa’abölö, ba tola ifazökhi gofu hadia ia. Me aboto ba dödö Yobi da’ö, imane wanguma’ö, ”U’ila, wa lö hadia ia, si tebai ndra’ugö, awö wa lö tödöu, si tebai öfalua.” (Yob. 42:2) Tola ifalua Yehowa gofu hadia zomasi ia, hewa’ae lö sanolo ya’ia. Hiza’i, börö wa’omasinia ba niwöwöi dangania, i’andrö khöra ena’ö falulu fohalöwö ira khönia ba wamalua ohitö dödönia.

2. Hadia halöwö si sökhi nibe’e Yehowa khö Yesu?

² Si oföna nifazökhi Lowalangi moroi ba danö bö’ö, ya’ia da’ö Ononia, Yesu. Aefa da’ö, i’andrö Yehowa khö Nononia ena’ö fao ia ba wamazökhi fefu hadia ia. (Yoh. 1:1-3, 18) Imane Faulo sanandrösa khö Yesu, ”Ba khönia sa mbörö wamazökhi hadia ia, fefu, he si so ba zorugo, ba he si so ba gulidanö, soroma ba si lö oroma, he si dadao, ba he so’aya, ba he samatörö, ba he salawa andrö. Fefu, hadia ia, ba oi ya’ia zamazökhi, ba oi ba khönia, wa tefazökhi, ba ya’ia, ba no föna danö bö’ö fefu, ba  ba khönia aro fefu, hadia ia.” (Kol. 1:15-17) Tenga ha asala ibe’e Yehowa halöwö si sökhi khö Nononia, ifatunö göi ba danö bö’ö sanandrösa ba halöwö andrö. Sindruhu wa no töi sebua da’ö!

3. Hadia ni’andrö Yehowa khö Gadamo, ba hadia mbörö?

³ I’andrö göi Yehowa ba niha gulidanö ena’ö falulu fohalöwö ira khönia. Duma-dumania, itehegö khö Gadamo ba wame’e töi gurifö. (I Moz. 2:19, 20) Khalaigö atö hawa’omuso dödö Gadamo ba halöwö andrö! Ihaogö inehesi zikhala hegöi gamuata gurifö andrö, ba awena ibe’e döira zamösana. Sindruhunia, tola manö ibe’e Yehowa döi gurifö andrö, börö me ya’ia zamazökhi. Hiza’i, börö me i’omasi’ö Gadamo, andrö wa itehegö khönia wame’e töi gurifö. Ibe’e nasa Lowalangi halöwö khö Gadamo ba wombali’ö ulidanö andre tobali faradaiso. (I Moz. 1:27, 28) Hiza’i, ibato Gadamo falulu fohalöwö khö Lowalangi, ba lua-luania i’asogö gabula dödö khönia samösa hegöi ba nga’ötönia.​—I Moz. 3:17-19, 23.

4. So niha si falulu fohalöwö khö Lowalangi ba wango’ozui ohitö dödönia. Hadia manö nifaluara?

⁴ Baero da’ö, i’andrö Lowalangi ba niha tanö bö’ö ena’ö falulu fohalöwö ira khönia. I’andrö khö Noakhi ba wamazökhi owo ena’ö terorogö ia hegöi nösi nomonia ba ginötö Anönö Danö Idanö. Moze zangefa’ö ndraono Gizara’eli moroi ba danö Miserai. Yosua zondrönia’ö ndraono Gizara’eli ba Danö Gamabu’ula. Zelomo zamazökhi osali ba Yeruzalema. Maria zi tobali ina Yesu. Falulu fohalöwö fefu niha si lö faröi andrö hegöi niha tanö bö’ö khö Yehowa ba wango’ozui ohitö dödönia.

5. Hadia halöwö si tola tafalua, ba hadia moguna i’andrö khöda Yehowa ba wamalua halöwö andrö? (Faigi gambara ba wamobörö wamaha’ö.)

⁵ Ba ginötö andre, i’andrö khöda Yehowa ba wotuhini Mbanuania. Oya lala si tola tafalua ba wamosumange Lowalangi. Hewa’ae lö fagölö-gölö nifaluada ba wamosumange ya’ia, fefu ita tola taturiaigö duria somuso dödö sanandrösa ba Mbanuania. Sindruhunia, tola ifalua fefu da’ö Yehowa. Tola manö fahuhuo ia moroi ba zorugo ba niha gulidanö. Imane Yesu wa tola manö muhede gara ibe’e Yehowa, ena’ö la’ombakha’ö ba niha sanandrösa khö Razo ba Mbanuania. (Luk. 19:37-40) Hiza’i, itehegö khöda Yehowa tobali ’sanolo ba halöwö khönia’. (I Kor. 3:9) Imane Faulo, ”Ba ma’andrö khömi, ya’aga sanolo ba halöwö andrö, böi saekhu ba danö, me no falukha ami wa’ebua dödö Lowalangi andrö.” (II Kor. 6:1) No sambua töi si sökhi me no i’andrö khöda Lowalangi ena’ö falulu fohalöwö ita khönia, irege tasöndra wa’ohahau dödö. Datafaigi hadia mbörö.

6. Hadia niwa’ö Nono Lowalangi sia’a me falulu fohalöwö ia khö Namania?

⁶ Tola ohahau dödö nono mbanua Yehowa na falulu fohalöwö ira khö Lowalangi. Imane Nono Lowalangi sia’a fatua lö möi ia ba gulidanö, ”Yehowa mege zomböi ya’odo, böröta lala andrö khönia . . . Ba ya’odo duka khönia, fa’omuso dödö ndra’o [khönia], ero ma’ökhö, famai ndra’o fönania, lö mamalö-malö.” (Gamd. 8:22, 30) Me falulu fohalöwö Yesu khö Namania, omuso dödönia börö me oya halöwö zi no i’awaisi ba aboto ba dödönia wa i’omasi’ö ia Yehowa. Hewisa göi ita?

7. Hana wa tola ohahau dödöda na möi ita manuriaigö?

⁷ Na tabe’e mazui tatema gofu hadia ia, ohahau dödöda simane niwa’ö Yesu.  (Hal. 20:35) Me tafaha’ö ita ba zindruhu, tatu manö ohahau dödöda. Hiza’i, hana wa omuso dödöda na taturiaigö zindruhu andrö ba niha bö’ö? Börö me ta’ila wa omuso sibai dödöra me so khöra wa’aboto ba dödö sanandrösa ba Zura Ni’amoni’ö, ba tola göi fahuwu ira khö Lowalangi. Omuso sibai dödöda na labulö’ö wangera-ngerara hegöi lala wa’aurira. Halöwö fanuriaigö andrö no halöwö sabölö moguna ba sabölö sökhi si tola mame’e khöda fa’ohahau dödö. Na manuriaigö ita ba niha, tola fahuwu ira khö Lowalangi ba lasöndra wa’auri si lö aetu.​—II Kor. 5:20.

8. Hadia niwa’ö ndra talifusöda sanandrösa wa’ohahau dödö nirasoira me falulu fohalöwö ira khö Yehowa?

⁸ Ba ginötö tafaha’ö niha sanandrösa khö Lowalangi, ta’ila wa no ta’omusoi’ö dödö Yehowa ba i’andrö saohagölö börö me no taforege ba wamosumange ya’ia. Tatu omuso sibai dödöda. (Baso I Korindro 15:58.) Imane Marco si toröi ba Italia, ”Omuso sibai dödögu börö me no ube’e zabölö sökhi khö Yehowa, tenga ba niha salio mangolifugö hadia zi no ufalua.” Imane göi Franco sanuriaigö ba Italia, ”Moroi ba Daromali Yehowa hegöi gö ba wamati si no tehenaigö, tefasugi ba dödöda ero ma’ökhö wa i’omasi’ö sibai ita, ba mo’eluaha ba dödönia zi no tafalua, hewa’ae na lö mo’eluaha nifaluada andrö molo’ö ya’ita. Da’ö mbörö wa ohahau sibai dödögu falulu fohalöwö khö Lowalangi, ba tola mofozu wa’aurigu.”

9. Hewisa wahuwusara Yehowa hegöi Yesu, ba hadia mbörö?

⁹ Na falulu fohalöwö ita ba niha ni’omasi’öda, itugu ahatö ita khönia. Itugu aboto ba dödöda nösi dödönia hegöi amuatania. Ta’ila hadia gohitö dödöra ba hewisa lalara wogamö ya’ia. Te ba zi töra hauga miliar fakhe no falulu fohalöwö Yesu khö Yehowa. Aro wa’omasira khö nawöra zamösana, irege lö hadöi zi tola mamabali wahuwusara. Ba da’ö oroma hewisa wahuwusara me imane Yesu, ”Ha sambua ndra’aga Amagu.” (Yoh. 10:30) Ba ginötö falulu fohalöwö ira, sindruhu-ndruhu wa te’osambua’ö wangera-ngerara ba so khöra wahasara dödö.

10. Na möi ita manuriaigö, itugu ahatö ita khö Lowalangi hegöi khö ndra talifusöda. Hadia mbörö?

¹⁰ I’andrö Yesu khö Yehowa ena’ö ilumö’ö ndra nifaha’önia. Hadia mbörö? Imane, ”Ena’ö ha sambua dödöra, simane tödöda andrö.” (Yoh. 17:11) Itugu aboto ba dödöda gamuata Lowalangi na tafalua goi-goinia ba wa’aurida ba fao ita ba halöwö fanuriaigö. Ta’ila hana wa moguna tafaduhusi tödö ia, ba ta’o’ö wanuturu lala nibe’enia. Na ahatö ita khö Lowalangi, ahatö göi ia khöda. (Baso Yakobo 4:8.) Tola göi itugu ahatö ita khö ndra talifusöda börö me fagölö-gölö tataögö  gabula dödö. Faoma falulu fohalöwö ita, faoma ohahau dödöda, ba fagölö göi gohitö dödöda. Imane Octavia si toröi ba Inggris, ”Itugu ahatö ndra’o khö ndra talifusöda börö me falulu fohalöwö ndra’o khö Yehowa.” Itutunö wa te’odane-dane wahuwusania börö me ”fagölö gohitö dödöra”. Tatu simanö göi nirasoida. Na ta’ila wa laforege sibai ba wangomusoi’ö dödö Yehowa, itugu ahatö ita khöra.

11. Hana wa itugu ahatö ita khö Yehowa hegöi khö ndra talifusöda ba gulidanö si bohou?

¹¹ Iada’a, ta’omasi’ö Lowalangi hegöi ndra talifusöda. Ba gulidanö si bohou dania, itugu ta’omasi’ö ira nasa. Angeraigö atö hawa’omuso dödöda ba halöwö nifaluada dania ba zi so föna! Tatema’ö niha nisusugi ba tafaha’ö ira sanandrösa khö Yehowa. Fao ita göi ba wamohouni ulidanö andre tobali faradaiso. Ohahau sibai dödöda na falulu fohalöwö ita. Itugu ara itugu mo’ahonoa ita barö wamatörö Keriso. Itugu ahatö ita ba niha fefu hegöi khö Yehowa, ’zangabusoi’ö fefu zauri, somasi ira’.​—Zin. 145:16.

12. Hewisa wa tola telumö’ö ita börö halöwö fanuriaigö?

¹² Moguna tarorogö wahuwusada khö Yehowa. Hadia mbörö? Alio aolo dödöda ba wolo’ö lagu wangera-ngera hegöi amuata niha gulidanö börö me so ita ba gulidanö nifatörö Zatana, ba börö me lö mo’ahonoa ita. Hulö na molangi ita ba nidanö. I’ohe ita ndrulu nidanö andrö ba nahia si lö omasi ita. Börö da’ö, taforege ba wolawa ndrulu nidanö andrö ena’ö lö ihanigö ita. Simanö göi me so ita ba gulidanö nifatörö Zatana. Böi tatehe idönisi dödöda. Hewisa wa tola telumö’ö ita börö halöwö fanuriaigö? Na tatutunö sanandrösa khö Yehowa hegöi Zura Ni’amoni’ö, tola te’osambua’ö wangera-ngerada ba zi sökhi hegöi ba zabölö moguna, tenga ba ngawalö zi tola mame’e awuwu wamatida. (Fil. 4:8) Tola aro wamatida börö halöwö fanuriaigö. Da’ö zamasugi ba dödöda fefu zi no ifabu’u Lowalangi hegöi goi-goinia safönu fa’omasi. Itolo ita göi ena’ö so khöda gamuata si sökhi si tola molumö’ö ya’ita moroi khö Zatana hegöi ulidanö tana khönia.​—Baso Efeso 6:14-17.

13. Hadia niwa’ö samösa Zamaduhu’ö Yehowa ba Australia sanandrösa ba halöwö fanuriaigö?

¹³ Na owölö-ölö ita manuriaigö, ba wamaha’ö niha, hegöi ba wanolo ndra talifusöda ba gangowuloa, tola telumö’ö ita börö me lö inötöda ba wo’angeraigö abula dödö. Imane Joel si toröi ba Australia, ”U’ila gabula dödö nitaögö niha ba urasoi samösa hadia gunania börö me u’o’ö goi-goi Zura Ni’amoni’ö ba wa’aurigu. Halöwö fanuriaigö zanolo ya’o ena’ö so khögu fangide-ngide’ö, tefaha’ö ndra’o ba wangandrö saohagölö, hegöi ba wangodaligö Yehowa ba ndra talifusöda.”

14. Na lö tabato manuriaigö, da’ö dandra wa fao-fao khöda geheha Lowalangi. Hadia mbörö?

¹⁴ Na fao ita ba wanuriaigö, faduhu dödöda wa fao-fao khöda geheha Lowalangi. Duma-dumania, khalaigö atö na mohalöwö’ö ba wame’e roti misa ba niha. Lö sogazi ndra’ugö ba halöwö andrö ba öbe’e gefeu ba wamalua ya’ia. Ato zi lö manga’i roti nibe’emö andrö, ba fatuwu ira khöu börö me möi’ö ba nomora wolohe roti. Hadia ötohugö manö halöwö andrö? Ba zi lö arara, awuwu wa’abölömö, ba öbato wamalua halöwö da’ö. Hiza’i, ato moroi ba gotaluada zi lö awöli-wöli wamalua halöwö fanuriaigö ba zi hauga fakhe, hewa’ae so zango’aya mazui  sofönu khöda. Tatehegö tabe’e ginötö hegöi kefeda ba wamalua halöwö da’a. Da’ö dandra wa itolo ita eheha Lowalangi.

15. Hadia gamakhaita halöwö fanuriaigö ba gohitö dödö Lowalangi ba niha gulidanö?

¹⁵ Hadia gamakhaita halöwö fanuriaigö ba gohitö dödö Yehowa ba niha gulidanö? Ohitö dödö Lowalangi ya’ia da’ö ena’ö auri niha gulidanö sagötö fa’ara. Lö tebulö gohitö dödönia, hewa’ae no ifalua horö Adamo. (Yes. 55:11) No itatugöi Lowalangi hewisa lala ena’ö te’efa’ö ita moroi ba horö hegöi fa’amate. Hewisa lalania? Möi Yesu ba gulidanö ba itehegö ia tobali höli. Hiza’i, ena’ö so guna höli andrö ba niha gulidanö, moguna la’o’ö li Lowalangi. Börö da’ö, ifaha’ö niha Yesu hadia ni’andrö Lowalangi khöra, ba i’o’ou ndra nifaha’önia ena’ö lafalua wamaha’ö simanö. Na möi ita manuriaigö ba tatolo niha ena’ö tobali si fahuwu khö Lowalangi, eluahania no fao ita falulu fohalöwö khö Lowalangi ba wango’ozui gohitö dödönia ena’ö te’efa’ö niha gulidanö moroi ba horö hegöi fa’amate.

16. Hadia gamakhaita halöwö fanuriaigö ba goroisa sebua nibe’e Lowalangi?

¹⁶ Na tatolo niha ba wanöndra fa’auri si lö aetu, da’ö dandra wa ta’omasi’ö ira hegöi Yehowa. ’Omasi ia na ahori te’orifi niha, na dozi lasöndra wa’aboto ba dödöra zi duhu.’ (I Tim. 2:4) Me so niha Farizai’o sanofu khö Yesu hadia goroisa sebua nibe’e Lowalangi, imane Yesu, ”’Omasi’ö Zo’aya ya’ugö, Lowalangiu andrö, moroi si’aikö ba dödöu, nosou ma’asambua zangomasi’ö ya’ia. Ba öhorigö gera-erau, wangomasi’ö ya’ia.’ Da’ö zebua goroisa, da’ö zi föföna. Ba sambuatö, si fakhili-khili khönia: ’Omasi’ö zahatö khöu, simane fa’omasiu ndra’ugö.’” (Mat. 22:37-39) No ta’o’ö goroisa andrö na taturiaigö duria somuso dödö.​—Baso Halöwö Zinenge 10:42.

17. No sambua töi sebua börö me tola taturiaigö duria somuso dödö. Hewisa dödöu?

¹⁷ Ibe’e khöda Yehowa halöwö si tola mame’e fa’ohahau dödö, si tola mangahatö’ö ya’ita khönia hegöi khö ndra talifusöda, ba si tola molumö’ö fahuwusada khönia. Na tafalua halöwö da’ö, no taforoma’ö wa’omasida khö Lowalangi hegöi ba niha bö’ö. No sambua howu-howu da’a khöda! Töra hauga zuta nono mbanua Yehowa ba zi sagörö ulidanö, ba oi fabö’ö-bö’ö zalua khöra zamösana. Hiza’i, tola tafalua ndrege wa’abölöda ba wama’ema ba niha misa hadia zi faduhu dödöda, he ya’ita si no atua mboto, sawuyu-wuyu, si kayo mazui si numana, sabölö mazui si tebai mboto. Tatu fao dödöda ba niwa’ö Chantel si toröi ba Prancis me imane, ”I’o’ou ndra’o Yehowa, Lowalangi sohahau tödö, fondrege Zabölö ba mbanua si yawa awö danö, Samazökhi fefu hadia ia, ’Ae’e! Ombakha’ö! Ombakha’ö soroi ba dödö sanandrösa khögu. Ube’e khöu wa’abölögu, Taromaligu moroi ba Zura Ni’amoni’ö, fanolo moroi ba zorugo, moroi khö ndra talifusö, hegöi famaha’ö ba fanuturu lala si tefaudu.’ Da’a no sambua töi sebua khöda börö me tola tafalua ni’andrö Yehowa ba falulu fohalöwö ita khö Lowalangida!”