1, 2. (a) Hadia zalua ba ginötöda andre niwa’ö Yehowa? (b) Hadia wanofu-nofu nifatunöda ba duho da’a? (Faigi gambara ba wamobörö wamaha’ö.)

IMANE Yehowa wa ba ginötöda andre, ”Dafulu niha, hadia lira fefu, li niha baero, zondra’u ahe mbaru niha Yehuda si hasamösa, ba sanguma’ö: ’Faoga khömi, me no marongo, wa lö aefa-aefa khömi Lowalangi!’” (Zakh. 8:23, NW ) ”Niha Yehuda” eluahania niha nibayoini Lowalangi. Lafotöi ira ”ndraono Gizara’eli khö Lowalangi”. (Gal. 6:16) ’Niha si dafulu’ eluahania niha si so fanötöna sauri ba gulidanö sagötö fa’ara. Aboto ba dödöra wa no ifahowu’ö ngawawa nibayoini andre Yehowa ba la’ila wa no sambua töi sebua wefao khöra ba wamosumange ya’ia.

² Simane Zakharia, imane Yesu wa ha sambalö te’osambua’ö nono mbanua Lowalangi. Imane wanguma’ö wa niha sanötöna sauri ba zorugo lafotöi ira ”rorogöfö gubalo si lö atoto”, niha sanötöna sauri ba gulidanö lafotöi ira ”biri-biri bö’ö”. Hiza’i, imane Yesu wa tobali ira ”sambawa nikubaloi” ba ”samösa gubalo” ni’o’öra. (Luk. 12:32; Yoh. 10:16) Börö me so dombua ngawawa andrö, tola manö so zanofu-nofu: (1) Hadia moguna la’ila döi niha nibayoini ira biri-biri bö’ö  andrö? (2) Hewisa zindruhunia gamuata niha nibayoini? (3) Hewisa dödögu na so ba gotalua ndra talifusöda si manga roti ba samadu agu ba ginötö Wanörö Tödö fa’amate Yesu? (4) Hadia moguna aombö dödögu na itugu ato zi manga roti ba samadu agu ba ginötö Wanörö Tödö fa’amate Yesu? So wanema linia ba duho da’a.

3. Hana wa lö ta’ila haniha zi 144.000 andrö?

³ Hadia moguna la’ila döi niha nibayoini ira biri-biri bö’ö andrö? Lö’ö. Hadia mbörö? Börö me lö tatu na latema luora ma lö’ö. Hewa’ae no ifili ira Lowalangi we’amöi ba zorugo, awena latema luora na lö faröi ira. I’ila Satana da’ö, ba i’oguna’ö ’zama’ele’ö faya’ ba ”wamaelungu” ya’ira. (Mat. 24:24) Fatua lö ifaduhu’ö khöra Yehowa wa ya’ira andrö no niha si lö faröi, tebai lamane dödöra wa ha sambalö latema luora. ^[1] Ibe’e wamontandro safuria khöra Yehowa fatua lö mate ira mazui fatua lö tebörögö ”wamakao sabölö-bölö”.​—Fam. 2:10; 7:3, 14.

4. Hewisa wa tola ’fao’ mbiri-biri tanö bö’ö khö ndra niha nibayoini na tebai mu’ila döira?

⁴ Hewisa wa tola ’fao’ mbiri-biri tanö bö’ö khö ndra niha nibayoini na tebai mu’ila döira? Imane Sura Ni’amoni’ö wa dafulu niha ”zondra’u ahe mbaru niha Yehuda si ha samösa, ba sanguma’ö: Faoga khömi, me no marongo, wa lö aefa-aefa khömi Lowalangi”. Ha samösa niha Yehuda nitötöi ba ayati Zura Ni’amoni’ö andre. Tobali, ngawua wehede ”khömi” eluahania tenga ha samösa. Ba da’ö ta’ila wa so ngawawa niha ni’amoni’ö ni’amaedolagö niha Yehuda. No aboto ba dödö biri-biri tanö bö’ö wa fao ira ba ngawawa andrö ba wamosumange Yehowa. Lö moguna la’ila döi niha si fao ba ngawawa andrö hegöi ba wanara lahera. I’ombakha’ö khöda Sura Ni’amoni’ö wa ha Yesu Zolohe ya’ita, ba ha ya’ia ni’o’öda.​—Mat. 23:10.

5. Hadia wamangelama sinangea la’angeraigö ira niha nibayoini, ba hadia mbörö?

⁵ Moguna lahaogö wo’angeraigö ira niha nibayoini wamangelama nisura ba I Korindrö 11:27-29. (Baso.) Hadia geluaha ayati da’a? Na lö larorogö wahuwusara khö Yehowa ba faröi ira, eluahania ”tenga sinangea” ira ba wemanga roti hegöi ba wamadu agu Fanörö Tödö fa’amate Yesu. (Heb. 6:4-6; 10:26-29) Famangelama andrö tobali famasugi ba dödö khö ndra niha nibayoini wa tebai faröi ira na omasi latema ”luo zi möna andrö, ba nikaoni Lowalangi niha, moroi si yawa, ba khö Keriso Yesu”.​—Fil. 3:13-16.

6. Hewisa zindruhunia gamuata niha Keriso nibayoini?

⁶ Imane Faulo ba niha Keriso nibayoini, ”Ya’o nikuru andre, ba khö Zo’aya, ena’ö mitörö zinangea lala nikaoni andrö, me no mukaoni ami.” Hewisa wamaluara da’ö? Itutunö Faulo, ”Ya a’oi so wa lö fayawa ami, awö wa’asökhi dödö, awö wa’ebolo dödö, mibologö dödömi khö nawömi, mi’omasi’ö ia; mi’oigö dödömi, ena’ö lö tebulö wahasara dödö, ena’ö fabö’ö ami, famaböbö fa’atulö andrö.” (Ef. 4:1-3) Moguna geheha ni’amoni’ö moroi khö Yehowa ba wanolo ono mbanuania, ena’ö so khöra wangide-ngide’ö, tenga ena’ö so  wayawasa. (Kol. 3:12) Lö ba dödö niha nibayoini wanguma’ö wa abölö tohude ira moroi ba niha bö’ö. Aboto göi ba dödöra wa lö abölö oya geheha nibe’e Yehowa khöra moroi ba nono mbanuania tanö bö’ö. Ba lö lamane dödöra wa abölö abakha wa’aboto ba dödöra Zura Ni’amoni’ö moroi ba niha tanö bö’ö. Lö irai lawa’ö ba zi samösa niha wa no tebayoini niha andrö ba tola ibörögö wemanga roti hegöi ba wamadu agu ba Wanörö Tödö fa’amate Yesu. Tobali, so khöra wangide-ngide’ö hegöi fa’aboto ba dödö wa ha Yehowa zi tola mamili haniha zi möi ba zorugo.

7, 8. Hadia zi tebai latötöna ira niha Keriso si no labayoini ba hadia mbörö?

⁷ Hewa’ae na no tefili niha nibayoini we’amöi ba zorugo, lö latötöna ena’ö lafosumange ira niha bö’ö. (Ef. 1:18, 19; baso Filifi 2:2, 3.) Lö la’ombakha’ö göi ba niha wa no ibayoini ira Yehowa. Börö da’ö, lö ahöli-höli dödö niha nibayoini na so zi lö i’anemai’ö faduhu dödö wa no tebayoini ira. Aboto ba dödöra wa no ifaha’ö ita Sura Ni’amoni’ö, ena’ö böi alio tafaduhusi tödö na so niha sanguma’ö wa no ibe’e khönia Lowalangi halöwö si sökhi. (Fam. 2:2) Börö me lö itötöna ena’ö lafosumange ia niha bö’ö, tatu manö lö omasi idunö-dunö ba niha wa no tebayoini ia. Lö göi fa’asiliawa khönia irege idunö-dunö ba niha hadia manö halöwö nifaluania dania ba zorugo.​—I Kor. 1:28, 29; baso I Korindro 4:6-8.

⁸ Lö lamane ira niha Keriso nibayoini wa ha khö nawöra si no tebayoini manö tola fahuwu ira. Lö la’alu-alui niha Keriso si no tebayoini tanö bö’ö ba wodunö-dunö halöwö nifaluara dania mazui owulo ira ba wo’abakhai’ö ba dödöra nösi Zura Ni’amoni’ö. (Gal. 1:15-17) Na lafalua da’ö, lö hadöi fahasara dödö ba gangowuloa ba no latandrawaisi geheha ni’amoni’ö, si möi fanolo nono mbanua Lowalangi ba wanöndra fa’ohahau dödö hegöi fahasara dödö.​—Baso Roma 16:17, 18.

9. Hana wa moguna ta’angenanöi laguda khö ndra talifusöda si manga roti ba samadu agu ba Wanörö Tödö fa’amate Yesu? (Faigi kotak ” Fa’omasi Andrö, ’Lö Ilau zi Lö Moadu.’”)

⁹ Hewisa ndra’ugö khö ndra talifusöda si no mubayoini? Imane Yesu khö ndra nifaha’önia, ”Si fatalifusö ami fefu.” Itohugö nasa wanguma’ö, ”Ba samali’ö salawa ya’ia, ba ni’ide-ide’ö dania, ba sangide-ngide’ö ya’ia ba nibali’ö salawa.” (Mat. 23:8-12) Börö da’ö, fasala na tasuno-suno sibai zi samösa niha hewa’ae na ya’ia andrö niha Keriso nibayoini. Me idunö-dunö khöda Sura Ni’amoni’ö sanandrösa khö ndra satua sokubaloi, ifarou ita ba wolo’ö famatira. Lö ifarou ita ena’ö tabali’ö zi samösa niha tobali sondrönia’ö ya’ita. (Heb. 13:7) Sindruhu sa wa no iwa’ö khöda Sura Ni’amoni’ö wa so niha ”nifodua winaeta zumangera”. Andrö wa iwa’ö da’ö börö me ya’ira ”sangehaogö fangai halöwöra” ba ”zi so halöwö fahuhuosa ba famaha’ö”, tenga börö me no tebayoini ira. (I Tim. 5:17) Na talafo tasuno-suno ba ta’ame’egö tödö sibai niha nibayoini, hulö na ta’ailasi ira. Tola manö nasa tumbu ba dödöra wa’asiliawa. (Rom. 12:3) Tatu manö, lö omasi ita na te’ala ndra talifusöda niha Keriso nibayoini!​—Luk. 17:2.

10. Hewisa wangoroma’öu wa ö’osinangegö niha Keriso nibayoini?

¹⁰ Hewisa wangoroma’öda wa ta’osinangegö  niha nibayoini Yehowa? Lö tasofu-sofu khöra hewisa me tebayoini ira. Ha ya’ira zangila da’ö, tenga sinangea ta’ila. (I Tes. 4:11; II Tes. 3:11) Lö göi tamane wa no tebayoini wo’omora, satuara, mazui ösi nomora tanö bö’ö. Tenga moroi ba nösi nomonia isöndra luonia zi samösa niha. (I Tes. 2:12) Böi tabe’e wanofu si tola mangafökhöi’ö tödöra. Duma-dumania, böi tasofu khö dalifusöda hewisa dödönia na auri ia ba gulidanö sagötö fa’ara hewa’ae lö fao ia khö wo’omonia. Faduhu dödöda wa ba gulidanö si bohou, ’i’abusoi’ö fefu zauri somasi niha’ Yehowa.​—Zin. 145:16.

11. Hewisa wa terorogö wamatida na lö ’tasuno niha ba zi so ira’?

¹¹ Na lö ta’alawa’ö niha nibayoini moroi ba niha tanö bö’ö, no tarorogö wamatida. Hadia mbörö? I’ombakha’ö khöda Sura Ni’amoni’ö wa tola manö so ”dalifusö faya” ba gangowuloa, sanguma’ö wa no tebayoini ira. (Gal. 2:4, 5; I Yoh. 2:19) Te so ösa niha nibayoini si no faröi. (Mat. 25:10-12; II Fet. 2:20, 21) Hewa’ae ya’ira andrö niha nibayoini, niha si tehöngö, mazui niha si no arara ba wamosumange Yehowa, lö ’tasuno ira’ ba lö tatara lahera. Hadia mbörö? Na faröi ira mazui laröi gangowuloa, lö taya wamatida khö Yehowa mazui lö taböhöli ba wamosumange ya’ia.​—Yud. 16.

12, 13. Hana wa lö moguna aombö dödöda ba wa’ato niha zi manga roti ba samadu agu ba Wanörö Tödö fa’amate Yesu?

¹² Itugu alö wa’oya niha nibayoini si manga roti ba samadu agu ba Wanörö Tödö fa’amate Yesu ba zi ha’uga fakhe. Hiza’i, barö-barö da’a, itugu monönö zui wa’atora ero röfi. Hadia moguna aombö dödöda? Lö’ö. Datafaigi hadia mbörö.

¹³ ’Aboto ba dödö Yehowa dana khönia andrö.’ (II Tim. 2:19) Lö sangila haniha zindruhunia niha nibayoini andrö, hewa’ae so dalifusöda sangerai-ngerai hawa’ato niha si manga roti ba samadu agu ba Wanörö Tödö fa’amate Yesu. Ha Yehowa zangila. Ba gotaluara andrö, so manö zanguma’ö wa no tebayoini ira, sindruhunia sa lö’ö. Duma-dumania, so zi to’ölö wemanga roti hegöi ba wamadu agu. Hiza’i, ba gafuriatania laböhöli.  So göi zofökhö fangera-ngera ba lawalingagö fao ira khö Keriso wamatörö ba zorugo. Andrö, lö ta’ila hawa’ato zindruhunia niha nibayoini zi tosai ba gulidanö.

14. Hadia niwa’ö Zura Ni’amoni’ö sanandrösa ba wa’ato niha nibayoini zi so ba gulidanö na tebörö wamakao sabölö-bölö?

¹⁴ So niha nibayoini ba zi sagörö ulidanö na tohare Yesu wolohe ya’ira ba zorugo. Imane Sura Ni’amoni’ö wa ”ifatenge mala’ikania [Yesu], telau dorofe sebua li, ba la’owuloi khönia nitutuyunia andrö, moroi ba zi fasui, i’otarai wondrege danö, numalö ba wondregenia tanö sa”. (Mat. 24:31) Ifatunö nasa Sura Ni’amoni’ö wa ba ngaluo safuria, so ösa niha Keriso nibayoini ba gulidanö. (Fam. 12:17) Hiza’i, lö nifatunönia hawa’ato ira zi toröi ba gulidanö na tebörögö wamakao sabölö-bölö.

15, 16. Hadia zinangea aboto ba dödöda sanandrösa ba zi 144.000 nifili Yehowa?

¹⁵ Yehowa zangai angetula hawa’ara ifili niha nibayoini. (Rom. 8:28-30) Ibörötaigö Yehowa wamili niha nibayoini me no aefa tesusugi Yesu. Fefu niha Keriso ba ndröfi si föföna no tebayoini. Ngaotu fakhe aefa da’ö, so zi lö molo’ö khö Keriso hewa’ae lamane wa ya’ira andrö niha Keriso. Hewa’ae simanö, ibayoini niha Keriso sindruhu si lö atoto Yehowa. Hulö simane niwa’ö Yesu, ya’ira andrö tanömö zi sökhi ba gotalua danömö ndru’u. (Mat. 13:24-30) Ba ngaluo safuria, lö ibato wofili niha si 144.000 Yehowa. ^[2] Tobali, na ifili ira Lowalangi fatua lö awai wamakao sabölö-bölö, tatu manö lö aombö dödöda ba gangetula Yehowa. (Yes. 45:9; Dan. 4:35; baso Roma 9:11, 16.) ^[3] Moguna ta’angenanöi ena’ö lö mokökö ita simane nifalua sohalöwö khö zokhö kabu nagu sanandrösa ba luo nibe’enia khö zafuria mohalöwö.​—Baso Matai’o 20:8-15.

¹⁶ Lö fefu niha nibayoini ba zorugo tobali ’sawuyu si lö faröi; ba satua-tua’. (Mat. 24:45-47) Simane me döfi si föföna, iada’a lö ato ni’oguna’ö Yehowa hegöi Yesu ba wame’e gö, mazui ba wamaha’ö niha sato. Me döfi si föföna, lö ato moroi ba gotalua niha Keriso nibayoini ni’oguna’ö ba wanura Kitab-Kitab Yunani Kristen. Ba ginötö andre göi, tenga fefu niha Keriso si no mubayoini ni’oguna’ö ba wame’e ’go nono mbanua Lowalangi na inötö wemanga’.

17. Hadia wamaha’ö si tola tahalö moroi ba duho da’a?

¹⁷ Hadia wamaha’ö si tola tahalö moroi ba duho da’a? No ihalö gangetula Yehowa ba wamae’e fa’auri si lö aetu ba gulidanö ba nono mbanuania, hegöi fa’auri ba zorugo ba niha si fao mamatörö awö Yesu. Ibe’e luora Yehowa, he ba ”niha Yehuda” hegöi ba zi ”dafulu niha”, ba i’andrö khöra ena’ö la’o’ö goi-goi si fagölö ba böi faröi ira. Moguna so khöra wangide-ngide’ö. Moguna faoma lafosumange Yehowa ba so khöra wahasara dödö hegöi fa’ohahau dödö. Börö me itugu ahatö wa’atua danö, böi taböhöli wamosumange Yehowa ba te’osambua’ö ita ba wolo’ö Keriso.