1-3. Hana wa sökhi sibai luo Wendrakose andrö, ba hewisa wa’alua nifa’ele’ö ba Daromali? (Faigi gambara ba wamobörö wamaha’ö.)

SIHULÖ wongi Migu ba Yeruzalema no ngaluo si sökhi sibai si tebai mu’olifugö. Me luo da’ö la’owasaini gowasa ni’amoni’ö nifotöi luo Wendrakose, me tebörögö mbaŵa wamasi rigi. Sihulö wongi ba gosali, ibe’e ere sebua zumange si to’ölö mube’e. Aefa da’ö, mato bözi siwa, ibe’e roti si lö mu’aisöni nifazökhi moroi ba mbua nowi si oföna mubasi. Ihahae roti andrö ere sebua ba ibe’e khö Yehowa. Da’a nifotöi ngaluo Wendrakose 33 M.​—III Moz. 23:15-20.

² Ero röfi, ba zi hauga fakhe fa’ara, ifazökhi ere sebua zumange nihahae. Mu’ame’egö tödö sibai wame’e sumange andre börö sanandrösa ba Wendrakose 33 M. Da’ö zalua khö ndra nifaha’ö Yesu si 120 sangandrö yawa ba lote ba Yeruzalema. (Hal. 1:13-15) Walu ngaotu fakhe fatua lö alua da’ö, no ihenaigö isura Yoeli sanandrösa ba gowasa andrö. (Yoe. 3:1-5; Hal. 2:16-21) Hadia sibai zalua andrö?

³ Baso Halöwö Zinenge 2:2-4. Me inötö Wendrakose  33 M, ibe’e gehehania Lowalangi ba niha Keriso, irege tebayoini ira. (Hal. 1:8) Aefa da’ö, lafasui ira niha sato ba tebörögö fahuhuo ndra nifaha’ö sanandrösa ba zahöli-höli dödö sawena la’ila ba larongo. Itutunö khöda Fetero hadia manö zalua me luo da’ö ba hana wa moguna ia. Aefa da’ö, imane ba niha sato, ”Mifalalini gera-erami ba mifabayagö’ö idanö ami, dozi ami ba döi Yesu Keriso, ba wangefa’ö horömi andrö, ba mitema dania mbuala andrö, Eheha ni’amoni’ö.” Me luo da’ö, so 3.000 niha nibayagö idanö ba latema göi geheha ni’amoni’ö.​—Hal. 2:37, 38, 41.

4. (a) Hana wa moguna adöni dödöda ba zalua me luo Wendrakose? (b) Hadia danö bö’ö nasa zalua me luo da’ö? (Faigi onönöta.)

⁴ Haniha ni’amaedolagö ere sebua hegöi sumange nibe’enia ero ngaluo Wendrakose? Yesu zi no amaedola ere sebua. Ira nifaha’ö Yesu si no mubayoini da’ö zi no amaedola roti. No mufili ndra nifaha’ö moroi ba gotalua niha gulidanö si lö mo’ahonoa ba lafotöi ira ”böröta” mazui mbua sia’a. (Yak. 1:18) Itema ira Lowalangi tobali ononia ba tefili ira tobali razo si fao awö Yesu mamatörö ba zorugo ba Mbanua Lowalangi. (I Fet. 2:9) I’oguna’ö wamatörönia Yehowa ba wame’e howu-howu ba niha solo’ö somasi ia. So gunania khöda Wendrakose 33 M, he sauri si fao awö Yesu ba zorugo hegöi sauri ba waradaiso. ^[1]

5. Hezo ta’ila wa lö fagölö ginötö wombayoini niha nibayoini?

⁵ Lö olifu ndra nifaha’ö ginötö me owulo ira yawa ba lote. So zi hulö hola-hola galitö ba högöra zamösana. Ibe’e wa’atua-tua khöra Yehowa irege tola fahuhuo ira ba li tanö bö’ö. Faduhu dödöra wa no tebayoini ira eheha. (Hal. 2:6-12) Tobali, lö fefu alua zahöli-höli dödö ba niha Keriso me tebayoini ira. Duma-dumania, so ngahönö niha nibayoini ba Yeruzalema me no aefa Wendrakose. Hiza’i, lö niwa’ö Zura Ni’amoni’ö wa so zi hulö hola-hola galitö ba högöra. Tebayoini ira ba ginötö tebayagö ira idanö. (Hal. 2:38) Lö fefu göi niha Keriso tebayoini ba ginötö tebayagö ira idanö. So niha Zamaria nibayoini me no aefa tebayagö ira idanö. (Hal. 8:14-17) Ba ginötö bö’ö, tebayoini Konelio hegöi ösi nomonia fatua lö tebayagö ira idanö.​—Hal. 10:44-47.

6. Hadia nitema niha nibayoini, ba hadia lua-luania khöra?

⁶ Aboto ba dödö niha Keriso wa no fabö’ö-bö’ö lala ba wombayoini ya’ira. So zo’anemai’ö mangila wa no ibayoini ia Yehowa, so göi zi lö’ö. Awena la’ila ba gafuriatania. Hiza’i, ifatunö Faulo hadia zalua khöra. Imane, ”Ba da’ö te’a’aro’ö göi ami, Eheha ba gamabu’ula li andrö, ni’amoni’ö, me no mamati ami. Eheha andrö we’e-we’e dödö, ba gondröita andrö khöda.” (Ef. 1:13, 14) Tobali, i’oguna’ö gehehania Yehowa ba wotandrösaigö ba dödö niha Keriso wa no tefili ira we’amöi ba zorugo. Eheha andrö no ”we’e-we’e dödö”, mazui tandra wa ba zorugo dania auri ira, tenga ba gulidanö.​—Baso II Korindro 1:21, 22; 5:5.

7. Ena’ö latema luora we’amöi ba zorugo, hadia zinangea ifalua niha Keriso si no tebayoini?

⁷ Na so niha Keriso si no mubayoini, hadia hasambalö itema luonia? Lö’ö. Faduhu dödönia wa no tekaoni ia we’amöi  ba zorugo. Hiza’i, awena itema luonia na lö faröi ia khö Yehowa. Imane Fetero, ”Andrö mendrua manö mi’owölö-ölögö, ya’ami ira talifusö, wanga’aro’ö fogaoni ya’ami andrö, awö wanutuyu ya’ami andrö; na milau da’ö sa ba lö’ö manö te’ala ami. Na simanö sa, ba lö te’ambösi khömi dania lala ba mbanua si lö tebulö andrö, khö Zo’aya ya’ita andrö, sangorifi ya’ita, Yesu Keriso.” (II Fet. 1:10, 11) Börö da’ö, niha Keriso nibayoini moguna itimbagö gofu hadia ia zanaisi ya’ia ba wamosumange Yehowa. Hewa’ae no mutuyu mazui mukaoni ia we’amöi ba zorugo, lö itema luonia na faröi ia.​—Heb. 3:1; Fam. 2:10.

8, 9. (a) Hadia mbörö wa ato zi lö aboto ba dödö hadia zalua ba zi samösa niha me tebayoini ia? (b) Hewisa wa tola i’ila zi samösa niha wa no tefili ia we’amöi ba zorugo?

⁸ Ba ginötö andre, ato nono mbanua Lowalangi si lö aboto ba dödö hadia zalua ba zi samösa niha me ibayoini ia Lowalangi. Lö fasala da’ö, börö me ya’ira manö lö mubayoini. Iwöwöi niha Lowalangi ena’ö auri ira ba gulidanö, tenga ba zorugo. (I Moz. 1:28; Zin. 37:29) Hiza’i, so nifili Yehowa ösa zi tobali razo hegöi ere ba zorugo. Me no tebayoini ira, no fabö’ö dötönaföra hegöi fangera-ngerara. Ladöna-döna ena’ö ba zorugo auri ira.​—Baso Efeso 1:18.

⁹ Hewisa wa tola i’ila zi samösa niha wa no tefili ia we’amöi ba zorugo? Faigi hadia niwa’ö Waulo ba niha nibayoini si so ba Roma, ”nikaoni andrö ni’amoni’ö”. Imane khöra, ”Tenga sa Eheha zawuyu nitemami, ena’ö ata’u zui ami; Eheha ndraono nitemami; moroi khönia wa mu’ao ita: He Aba, Ama! Ya’ia, Eheha andrö göi, zamaduhu’ö tödöda, wa ono Lowalangi ita.” (Rom. 1:7; 8:15, 16) Eheha ni’amoni’ö ni’oguna’ö Lowalangi ba wangombakha ba zi samösa niha, wa no tefili ia fao awö Yesu mamatörö tobali razo ba zorugo.​—I Tes. 2:12.

10. Hadia geluaha I Yohane 2:27 me imane wa lö moguna so niha bö’ö zamaha’ö niha Keriso nibayoini?

¹⁰ Lö moguna so niha bö’ö zamaduhu’ö ba dödöra wa no ibayoini ira Lowalangi. Yehowa sa zamaduhu’ö ba dödöra. Imane Yohane ba niha Keriso si no mubayoini, ”Ba no so khömi wamayoini andrö, khö ni’amoni’ö andrö, ba mi’ila fefu, hadia ia.” Imane nasa, ”Ba no ahono ba dödömi wamayoini andrö, nitemami khönia, ba lö moguna khömi, ifaha’ö ami niha, mi’iagö sa’ae ba khönia, dali wamaha’ö wamayoininia ya’ami andrö, ba ngawalö hadia ia, fefu, ba no si duhu, ba tenga faya; mi’o’ö wamaha’önia ya’ami andrö.” (I Yoh. 2:20, 27) Yehowa zamaha’ö niha Keriso nibayoini. Börö da’ö, lö moguna so niha bö’ö zangombakha khöra wa no tebayoini ira. I’oguna’ö gehehania Yehowa ba wamaduhu’ö ba dödöra wa no tefili ira!

11, 12. Hadia zanofu-nofu dödö niha Keriso si no tebayoini, ba hadia zi faduhu dödönia?

¹¹ Oya zi tebulö ba wa’auri niha Keriso me ibayoini ira eheha ni’amoni’ö. Imane Yesu wa no ifuli ”tumbu” ira mazui ”tumbu moroi si yawa”. (Yoh. 3:3, 5) Aefa da’ö itutunö, ”Böi ahöli-höli dödöu, me no uwa’ö khöu, lö tola lö tumbu moroi si yawa ami. Angi andrö, ba isawa zomasi ia, ba örongo  höngö-höngönia, ba lö ö’ila, heza i’otarai, ba heza isawa. Simanö göi dozi si tumbu khö Geheha.” (Yoh. 3:7, 8) Lö duhu tola tatutunö ba niha si lö mubayoini hewisa rasonia na no tebayoini. ^[2]

¹² Tola manö manofu-nofu dödö niha si no mubayoini, ’Hana wa ya’o nifili Yehowa, hana wa tenga niha bö’ö?’ Te imane dödönia wa tenga sinangea tebayoini ia. Hiza’i, so khönia wa’afaduhu dödö börö me Yehowa zofili ya’ia. Omuso sibai dödönia ba i’andrö saohagölö börö me no mube’e khönia mbuala andrö. Fagölö nirasoinia simane niwa’ö Wetero, ”Nisuno Lowalangi, Ama Zo’aya ya’ita, Yesu Keriso, si no mamuli mangadonogö ya’ita, dali wa’ahakhö dödönia andrö, si no fahöna, ba wanötöna andrö, si tenga faya, moroi ba wemaoso Yesu Keriso andrö, moroi ba ngai zi mate, ba wanema ondröita andrö si lö taya, si lö si lö göna, si lö ariri, ni’irö’ö khömi ba zorugo.” (I Fet. 1:3, 4) Na labaso ayati da’a ira niha nibayoini, faduhu dödöra wa khöra samösa fahuhuo Namara.

13. Me no tebayoini ira eheha, hadia zi tebulö ba wangera-ngerara ba hadia mbörö?

¹³ Fatua lö ifili niha Keriso si möi ba zorugo Yehowa, tötönaföra ya’ia da’ö ena’ö auri ira ba gulidanö sagötö fa’ara. Labase-base’ö ginötö na ibohouni gulidanö andre Yehowa tobali faradaiso ba ihori fefu ngawalö zi lö sökhi. Te lakhalaigö ha wa’omuso dödöra na tesusugi nösi nomora mazui si fahuwu khöra. Ba latötöna ena’ö tola la’iagö nomo nifazökhira mazui latanö zinanö ba la’a mbuania. (Yes. 65:21-23) Hana wa ibörögö fabö’ö ni’era-erara? Hadia börö me no larasoi wa’abu dödö mazui famakao? Hadia lamane dödöra wa aföli ira dania wangiagö ulidanö si bohou andrö ba lö lasöndra wa’ohahau dödö? Mazui hadia omasi ira worasoi hewisa wangiagö zorugo? Tenga. Sindruhunia, Lowalangi zanguma’ö khöra. Me ifili ira, i’oguna’ö gehehania ba wombulö’ö lala wangera-ngerara hegöi luo nidöna-dönara.

14. Hewisa dödö niha nibayoini sanandrösa ba wa’aurira ba gulidanö?

¹⁴ Hadia da’ö geluahania niha nibayoini andre omasi ira mate? Itutunö Waulo hadia nirasoi niha nibayoini. I’amaedolagö mbotora si hulö ”nose” ba imane, ”Andrö mangarö-ngaröga, ya’aga si so ba nose andrö, sonoro ndra’aga, me lö omasiga, na aheta nukhama, me omasiga na tefalaete, ena’ö i’a fa’auri andrö zi mate andrö.” (II Kor. 5:4) Börö da’ö, niha Keriso nibayoini andre lö omasi ira mate. Omasi ira lasöndra wa’ohahau dödö ba la’oguna’ö ginötöra wefao ba nösi nomora hegöi si fahuwu khöra ba wamosumange Yehowa ero ma’ökhö. Gofu hadia ia nifaluara, itörö-törö tödöra zi no ifabu’u Lowalangi khöra ba zi so föna.​—I Kor. 15:53; II Fet. 1:4; I Yoh. 3:2, 3; Fam. 20:6.

15. Hadia manö dandra zangoroma’ö wa lö mubayoini eheha zi samösa niha?

¹⁵ Te manofu–nofu dödöu hadia no ifili ndra’ugö Yehowa we’amöi ba zorugo mazui lö’ö. Na ömane tödöu no ifili’ö, angeraigö wanofu-nofu da’a: Hadia no owölö-ölö ndra’ugö we’amöi manuriaigö? Hadia omasi’ö öfaha’ö ndra’ugö ba Zura Ni’amoni’ö ba önönö wa’aboto ba dödöu ’fa’abakha wa’atua-tua Lowalangi’? (I Kor. 2:10) Hadia  faduhu dödöu wa no ibe’e khöu Yehowa mbua si sökhi ba halöwö fanuriaigö? Hadia omasi öfalua nasa ni’andrö Yehowa? Hadia sindruhu-ndruhu ö’omasi’ö niha bö’ö ba ö’onorogö tödö wanolo ya’ira ba wamosumange Yehowa? Hadia no ö’ila dandra wa no oya itolo ndra’ugö Yehowa ba wa’auriu? Na ya’ia, hadia da’ö geluahania wa no tekaoni ndra’ugö we’amöi ba zorugo? Tenga. Hadia mbörö? Börö me ato nono mbanua Lowalangi zorasoi simane da’ö, hewa’ae no mubayoini ira hegöi lö’ö. Baero da’ö, ibe’e Yehowa gehehania ba niha samosumange ya’ia, gofu hadia dania luo nitemara. Na so khöu wa’aombö dödö, eluahania lö nifili ndra’ugö. Lö hadöi fa’aombö-aombö dödö ba niha si no ifili Yehowa! Sindruhu-ndruhu wa faduhu dödöra!

16. Hezo ta’ila wa lö fefu niha sotema geheha Lowalangi tefili ira möi ba zorugo?

¹⁶ Ba Zura Ni’amoni’ö, ato niha si lö faröi sotema eheha moroi khö Yehowa. Hiza’i, lö möi ira ba zorugo. Sambua duma-duma ya’ia da’ö Yohane Samayagö Idanö. Imane Yesu hewa’ae lö irai so niha sebua simane Yohane, hiza’i lö fao ia wamatörö tobali razo ba zorugo. (Mat. 11:10, 11) Itema göi geheha ni’amoni’ö Dawido. (I Zam. 16:13) Eheha ni’amoni’ö zanolo ya’ia ena’ö so khönia wa’atua-tua sanandrösa khö Yehowa hegöi ba wanura ösa mbuku Zura Ni’amoni’ö. (Mrk. 12:36) Hewa’ae simanö, i’ombakha’ö Fetero wa ”tenga sa Dawido zi möi yawa ba zorugo”. (Hal. 2:34) I’oguna’ö gehehania Yehowa ba wame’e khöra fa’abölö ba wamalua sahöli-höli dödö, tenga ena’ö möi ira ba zorugo. Hadia da’ö geluahania ambö afönu wolo’öra mazui tenga sinangea mamatörö ira ba zorugo? Tenga. Tobali, omasi isusugi ira Yehowa auri ba gulidanö Faradaiso.​—Yoh. 5:28, 29; Hal. 24:15.

17, 18. (a) Hadia luo nidöna-döna nono mbanua Lowalangi ba ginötö andre? (b) Hadia wanofu-nofu nifatunöda ba wamaha’ö aefa da’a?

¹⁷ Ato nono mbanua Lowalangi ba ginötö andre si lö möi ba zorugo. Ladöna-döna wa auri ira ba gulidanö nifatörö Lowalangi, simane Gaberahamo, Dawido, Yohane Samayagö Idanö, ba oya danö bö’önia nasa me götö Zura Ni’amoni’ö. (Heb. 11:10) So 144.000 si fao awö Yesu mamatörö ba zorugo. Imane Sura Ni’amoni’ö wa so niha nibayoini ’zi tosai’ nasa ba gulidanö ba ngaluo safuria andre. (Fam. 12:17) Tobali, ato zi no mate moroi ba gotalua zi 144.000, ba no so ira ba zorugo iada’a.

¹⁸ Na so zanguma’ö wa no tebayoini ia, hewisa dödöda ya’ita sanötöna sauri ba gulidanö? Na so ba gotalua ndra talifusöda niha Keriso si no mamörögö wemanga roti hegöi wamadu agu ba Wanörö Tödö fa’amate Yesu, hewisa dödöda? Hewisa na itugu monönö wa’ato niha nibayoini? Hadia moguna aombö dödöda? Tasöndra wanema linia ba wamaha’ö aefa da’a.