TUHO SI’OFÖNA | HANA WA MOGUNA TATÖRÖ ZINDRUHU?
Fanguma’ö Sindruhu—Hadia Lö Moguna Sa’ae?
Mohalöwö Hitoshi ba wangerai kefe ba agen samolala halöwö ba Jepang. Me itutunö khö gafalonia hauga gefe ni’oguna’öra, imane gafalonia ena’ö böi itörö zindruhu wangombakha ba perusahaan sohalöwö ira. Itutunö Hitoshi wa itegu ia tödönia side-ide. Lua-luania, edöna i’efasi ia gafalonia ba halöwönia.
Hauga waŵa aefa da’ö, abu dödö Hitoshi börö me edöna la’efasi ia ba halöwönia. Duma-dumania, fatua lö latema ia wohalöwö, so zinangea lasofu-sofu khönia. Ifatunö Hitoshi wa lö omasi ia halöwö si lö manörö sindruhu. Imane sanofu khönia, ”No fabö’ö wangera-ngeramö andrö moroi ba niha bö’ö!” Lafarou ia ösi nomonia hegöi si fahuwu khönia ena’ö lö tebulö itörö zindruhu, hiza’i so khönia wa’aombö-aombö dödö. Duma-dumania imane, ”Manofu-nofu dödögu hadia sökhi na u’ombakha’ö wamatigu andre ma lö’ö.”
Salua khö Hitoshi andre zangoroma’ö wa lö fefu niha latörö zindruhu. Ato zanguma’ö wa no sinangea lö tatörö zindruhu, mendrua manö na talau mogale. Samösa ndra alawe sohalöwö ba Afrika Selatan imane, ”No so ndra’o ba gotalua niha si lö manörö sindruhu, ba itaria oya zondrönisi dödöda ena’ö böi tatörö zindruhu.”
Sambua duma-duma wa lö manörö sindruhu sasese lafalua niha ba ginötö andre ya’ia da’ö, falimosa. Hauga fakhe silalö, samösa psikolog ba Universitas Massachusetts Amherst sotöi Robert S. Feldman itutunö wa so 60 persen niha si töra felewalu fakhe, si lö’ö-lö’önia sakali ba zi fulu menit lalau falimo na fahuhuo ira. Imane Feldman, ”Lö utötöna wa simane da’ö lua-luania. Falimosa andre no da’ö zi to’ölö ba wa’auri niha sero ma’ökhö.” Andrö, no aröu fabö’ö lagu niha ba ginötö da’a, lö omasi ira telimo, hiza’i lafalua zi töra moroi ba walimosa.
Hadia mbörö wa asese falimo niha, managö, ba lafalua gamuata si lö tefaudu tanö bö’ö ba ginötö andre? Hadia lua-luania ba niha fefu na lö latörö zindruhu? Sabölö moguna, hewisa ena’ö tola ta’aröu’ö ita ba gamuata falömanörö sindruhu?
