1, 2. (a) Hadia wamaha’ö si tola tahalö ba wa’anau gölö Gideono hegöi si 300 ndra matua si fao khönia? (Faigi gambara ba wamobörö wamaha’ö.) (b) Molo’ö nisura ba Luka 21:19, hadia mbörö wa moguna so khöda wa’anau gölö?

KHALAIGÖ hewisa wa’afökhö hegöi fa’amarase ba wasuwöta nifalua zaradadu ndraono Gizara’eli ba wolawa nudura, nidönia’ö Gideono samösa Zanguhuku. Gideono hegöi si fao khönia, lagohi ndraono Midiano hegöi soi si fa’awö khöra sara wongi wa’ara, fa’aröunia mato 32 kilometer! Ifatunö Sura Ni’amoni’ö hadia zalua, ”Ba me no irugi Yoridano Gideono ba me no i’ötö, awö zi 300 andrö, si fao khönia, ba si no erege tödö.” Lö nasa si möna ira ba wasuwöta, so 15.000 zaradadu sinangea lalawa nasa. Ba zi ha’uga fakhe no tefakao ndraono Gizara’eli moroi ba nudura, andrö lö laböhöli wolohi nudura irege möna ira!​—Zanguhuku 7:22; 8:4, 10, 28.

² Simanö göi ita, tafalua wasuwöta safökhö ba si möi fangerege dödöda. Nududa ya’ia da’ö Satana, ulidanö  tana khönia, ba falömo’ahonoada. So ba gotaluada zi no ha’uga fakhe molawa nudura. Tola möna ita börö wanolo moroi khö Yehowa. Hiza’i, lö sawai nasa wasuwötada. Itaria erege dödöda wolawa ya’ia, mazui marase ita wombase’ö fa’atekiko gulidanö si lö sökhi andre. Ifangelama ita Yesu wa göna ita fanandraigö hegöi folohi ba luo safuria andre. Hiza’i, na anau gölöda, tola möna ita. (Baso Luka 21:19.) Hadia geluahania wa’anau gölö? Hadia zanolo ya’ita ena’ö anau gölöda? Hadia wamaha’ö si tola tahalö ba niha si so fa’anau gölö? Ba hewisa ena’ö ’mo’ahonoa wa’anau gölöda’?​—Yakobo 1:4, NW.

3. Hadia geluahania wa’anau gölö?

³ Ba Zura Ni’amoni’ö, fa’anau gölö tenga ha ba wanaögö abula dödö, tobali hewisa lala wangera-ngerada hegöi tödöda sanandrösa ba wanandraigö salua andrö. Na so khöda wa’anau gölö, lö khöda fa’ata’u, lö faröi ita, ba so wa’ebolo dödö. So zanguma’ö wa fa’anau gölö zi tola manolo ya’ita ena’ö aro dötönaföda ba lö awuwu ita na so wanandraigö. Hewa’ae göna ita fanandraigö sabölö-bölö, lö mangiwa dödöda. Lö ta’era-era sibai wa’afökhö wanandraigö salua khöda, hiza’i tabe’e ba duduma höröda howu-howu nitemada.

4. Hana wa tola tawa’ö na so khöda wa’omasi, so khöda wa’anau gölö?

⁴ Tola anau gölöda na so khöda wa’omasi. (Baso I Korindro 13:4, 7.) Hezo manö taforoma’ö ia? Na ta’omasi’ö Yehowa, tola tataögö fefu hadia ia nitehegönia. (Luka 22:41, 42) Na ta’omasi’ö ndra talifusöda, tenga falömo’ahonoara nifaigida. (I Fetero 4:8) Ba wongambatö, so ”wamakao” hewa’ae so wa’ohahau dödö yomo ba nomo. Hiza’i, na so khöda wa’omasi, tola anau gölöda ba wanaögö famakao ba aro wongambatöda.​—I Korindro 7:28.

5. Hana wa ha Yehowa zanolo ya’ita ena’ö so khöda wa’anau gölö?

⁵ Andrö wanolo moroi khö Yehowa. Yehowa andrö ”Lowalangi wa’ebolo dödö, Lowalangi wondrara dödö”. (Roma 15:5) Ha ya’ia zangila fefu hadia ia zalua khöda, hegöi nösi dödöda. Ibe’e khöda wanolo ena’ö anau gölöda. Imane Sura Ni’amoni’ö, ”I’o’ö zomasi zangata’ufi ya’ia, ifondro-ndrongo we’aora ba itolo.” (Zinunö 145:19) Hiza’i, hewisa wanema Lowalangi wangandröda ena’ö so khöda wa’anau gölö?

6. Simane si no ifabu’u ba Zura Ni’amoni’ö, hewisa wa ”ifaigi [Yehowa] göi wa’awai” ba wanandraigö salua khöda?

⁶ Ba ginötö ta’andrö wanolo moroi khö Yehowa ena’ö anau gölöda, ifabu’u khöda wa ”ifaigi göi wa’awai”. (Baso I Korindro 10:13.) Hewisa wamaluania  da’ö? Na inötönia, iheta wanandraigö andrö. Hiza’i, sasesenia ibe’e khöda wa’abölö ’ena’ö a’oi so khöda wanaha tödö, awö wa’ebolo dödö, ba ena’ö omuso dödöda’. (Kolose 1:11) Börö me i’ila Yehowa walömo’ahonoada, lö irai itehegö alua khöda wanandraigö si tebai tataögö irege faröi ita khönia.

7. Be’e duma-duma hadia mbörö wa moguna khöda gö wamati ena’ö anau gölöda.

⁷ Oguna’ö gö wamati ena’ö aro wamatiu. Hadia mbörö wa moguna gö wamati andrö? Duma-dumania, ba wanösö Hili Everest, i’oguna’ö 6.000 kalori si samösa niha ero ma’ökhö. Ena’ö anau gölö ba wanösö hili andrö, moguna oya i’a gö si so kalori moroi ba zi to’ölö la’oguna’ö niha. Simanö göi ita, moguna gö ba wamati ena’ö anau gölöda ba wogamö ohitö dödöda. Böi tebulö tabe’e ginötöda ba wamaha’ö ya’ita samösa ba Zura Ni’amoni’ö hegöi we’amöi ba gangowuloa. Da’a zi tola manolo ya’ita ena’ö aro wamatida.​—Yohane 6:27.

8, 9. (a) Molo’ö Yobi 2:4, 5, hadia zi tefarahu na tetandraigö ita? (b) Ba ginötö so gabula dödö, hadia zinangea ökhalaigö?

⁸ Törö tödöu wa’alöfaröimö khö Lowalangi. Na göna ita fanandraigö, tefakao ita. Hiza’i tenga ha da’ö, tetandraigö göi wa’alöfaröida khö Lowalangi. Oroma ba nifaluada hadia faduhu dödöda wa Yehowa Zamatörö banua si yawa awö danö na göna ita fanandraigö. Hewisa wa alua da’a? Satana, nudu Lowalangi soda’awaini famatörönia, iböbögö zi lö duhu khö Yehowa, imane wa awena lafosumange Lowalangi niha börö me tana khöra ni’era-erara. Imane Satana, ”Fefu hadia ia, okhöta niha, ba ilulu, asala auri ia!” Imane nasa sanandrösa khö Yobi, ”Ba tema oro’ö dangau, babaya nösinia, ba lö zi lö ikaoni ba mbawau, wa i’erogö ndra’ugö!” (Yobi 2:4, 5) Hadia no tebulö Zatana i’otarai me iböbögö zi lö duhu andrö? Lö’ö! Ha’uga fakhe aefa da’ö, me tetibo’ö ia moroi ba zorugo, lö aetu ifobahulu nono mbanua Lowalangi si lö faröi. (Fama’ele’ö 12:10) Ba ginötö andre, ifobahulu niha Satana wa lafosumange Lowalangi börö me ha tana khöra ni’era-erara. Omasi sibai ia i’ila na tatimbagö wamatörö Lowalangi ba tabato wangai halöwönia.

⁹ Ba ginötö tefakao ndra’ugö, khalaigö da’a. So Zatana faoma bekhu ba zingau. Lafaigi-faigi hadia nifaluau ba laböbögö zi lö duhu wa hasambalö awuwu ndra’ugö. Ba zi tambai göi so Yehowa, so Razoda Yesu Keriso, ngahönö ndra mala’ika hegöi niha si no tebayoini si no tesusugi ba zorugo. Lafaigi-faigi göi ndra’ugö ba wanaögö famakao andre, hiza’i labe’e khöu wamarou dödö! Omuso dödöra na la’ila so khöu wa’anau gölö hegöi falöfaröi khö Yehowa. Örongo me imane Yehowa khöu, ”Ya’atua-tua ndra’ugö, ya’ugö onogu; omusoi’ö dödögu, ena’ö u’ila ubu’a,  na so zanandrawaisi ya’odo.”​—Gamaedola 27:11.

10. Hewisa ena’ö tola ö’o’ö wa’anau gölö Yesu?

¹⁰ Angeraigö mbuania. Khalaigö atö na mofanö’ö ba zaröu. Ötörö dögi narö hili ba no ogömi-gömi lala nitöröu. Hiza’i, aboto ba dödöu wa tola ö’ila zi haga na lö öböhöli wanörö ya’ia. Simanö göi ba wa’auri andre, oya gabula dödö nitaögöu irege marase ndra’ugö ba wanaögö ya’ia. No irasoi Yesu zimane da’ö. Me tefakao ia ba döla geu, la’o’aya ia ba irasoi wa’afökhö. Tola manö da’a ginötö sabölö afökhö ba wa’aurinia! Hana wa tola anau gölönia? Imane Sura Ni’amoni’ö wa idöna-döna ”wa’omuso dödö andrö, si no so fönania”. (Heberai’o 12:2, 3) Lö mangoloi dödö Yesu ba wamaigi buala nibe’e khönia börö me lö faröi ia ba wo’amoni’ö töi Lowalangi hegöi ba wotuhini famatörönia. Aboto ba dödönia wa ha sabata wamakao nitaögönia andre ba hasambalö itema luonia ba zorugo irugi zi lö aetu. Iada’a, te oya göna khöu wanandraigö si tebai ötaögö, hiza’i böi olifu’ö wa fefu zalua da’a ha ba zi sabata.

11. Hana wa moguna ta’angeraigö duma-duma moroi ba ”niha sanau ölö”?

¹¹ Tenga ha ya’ita zanaögö abula dödö. So niwa’ö Wetero ba niha Keriso ena’ö tola lataögö wamakao moroi khö Zatana. Imane, ”Da’ö mitimba, mi’abe’e’ö ami, ba wamati, me no mi’ila, simanö göi wamakao, sanörö talifusömi andrö, ba niha ba gulidanö.” (I Fetero 5:9) Salua moroi ba ”niha sanau ölö” tola tobali famaha’ö khöda ena’ö lö faröi ita. Faduhu dödöda wa tola tataögö fefu hadia ia, ba böi olifu ita wa tatema mbua na anau gölöda. (Yakobo 5:11, NW) Datafaigi duma-dumania. ^[1]—Faigi gonönöta.

12. Hadia wamaha’ö khöda moroi ba duma-duma ndra kerubi nifataro ba kabu Edena?

¹² Kerubi ya’ia da’ö mala’ika si so dadaoma salawa. Me no aefa lafalua horö Adamo ba Khawa, ifatenge kerubi Yehowa ba wangai halöwö si bohou ba gulidanö. Fabö’ö sibai halöwöra andre moroi ba zi to’ölö lafalua ba zorugo. Duma-dumara andre tola tobali famaha’ö khöda ena’ö anau gölöda na so halöwö sabua nibe’e khöda. Imane Sura Ni’amoni’ö wa ”ifataro kerubi [Yehowa] föna kabu Edena, tanö ba gatumbukha luo khönia, kerubi si so föda si takile, nifaligoi, ba wanaro lala ba geu fangorifi andrö”. ^[2] (Faigi gonönöta.) (I Moze 3:24) Lö si tesura ba Zura Ni’amoni’ö  wa mokökö ndra kerubi mazui lamane tödöra wa ya’ira zinangea nifatenge ba halöwö si bohou andrö. Lö aföli mazui awuwu ira. Töra 1.600 fakhe lö tebulö lahalö halöwö andrö irugi awai, te me Anönö Danö Idanö!

13. Hewisa wa tola anau gölö Yobi ba wanaögö fanandraigö?

¹³ Yobi niha si lö faröi. Itaria afökhö dödöu börö wehede nawöu mazui soroi yomou. Tola manö göna khöu wökhö sabölö-bölö mazui abula dödö börö me mate niha ni’omasi’öu. Hewa’ae oya ngawalö zalua, tola ösöndra wondrara dödö moroi ba duma-duma Yobi. (Yobi 1:18, 19; 2:7, 9; 19:1-3) Lö aboto ba dödö Yobi hana wa i’ozumaigö göna ia ngawalö wanandraigö, hiza’i lö irai awuwu ia. Hana wa tola anau gölönia? Si oföna sibai, börö me i’omasi’ö Yehowa ba lö omasi i’afökhöi’ö dödö Yehowa. (Yobi 1:1) Omasi Yobi wangomusoi’ö dödö Lowalangi, he ba wa’omuso dödö mazui ba ginötö so gabula dödö. Iforoma’ö göi wa’abölönia Yehowa, ifatunö khö Yobi fefu zahöli-höli dödö moroi ba zi no iwöwöi. Ba da’a tola faduhu dödö Yobi wa iheta wanandraigö andrö Yehowa ba ginötö si tefaudu. (Yobi 42:1, 2) Da’ö zalua, ”Ba ifadöhö wamakao Yobi andrö Yehowa, . . . ifabali sa’ae khö Yobi fefu zi so khönia föna.” Ba ”no atua sibai ia ba me no aföli ia wa’auri”.​—Yobi 42:10, 17.

14. Molo’ö II Korindro 1:6, hewisa wa tola möi fanolo niha tanö bö’ö wa’anau gölö Waulo?

¹⁴ Faulo, samösa sinenge. Hadia göna ndra’ugö folohi mazui famakao? Hadia abu dödöu börö me oya halöwö nibe’e khöu me no tobali ndra’ugö satua sokubaloi mazui pengawas wilayah? Na simanö, tola tetolo ndra’ugö na öfaigi duma-duma Waulo. Hewa’ae abölö-bölö wamakao salua khönia, hiza’i so so dödönia ndra talifusö si so  ba mbanua niha Keriso. (II Korindro 11:23-29) Duma-dumania andre zamarou tödö niha bö’ö börö me lö awuwu ia ba wamati. (Baso II Korindro 1:6.) Simanö göi na anau gölöu, tola möi famarou dödö niha bö’ö.

15, 16. (a) Hewisa wa tola mo’ahonoa wa’anau gölö andrö khöda? (b) Be’e duma-duma hewisa wa ’mo’ahonoa wa’anau gölö andrö’.

¹⁵ Tebe’e geheha khö Yakobo ba wanura da’a, ”Ba famo’ahonoa dania wa’anau gölö andrö, ena’ö mo’ahonoa ami, si lö sala, ba böi ambö hadia ia.” (Yakobo 1:4, NW) Hewisa wa tola mo’ahonoa wa’anau gölöda? Na göna ita fanandraigö, moguna so khöda wa’ebolo dödö, fangandrö saohagölö, mazui fa’omasi. Na anau gölöda ba wanaögö fefu hadia zalua andre, tola tafaha’ö ita ena’ö itugu taforoma’ö nasa gamuata andrö, ba ta’a’azökhi mbua-bua wa’aniha Keriso.

¹⁶ Na so khöda wa’anau gölö tola tobali ita niha Keriso si sökhi. Lö tasawö goroisa Yehowa ha ena’ö tola aefa ita moroi ba wanandraigö. Duma-dumania, na öforege wolawa wangera-ngerau si lö sökhi ba wamalua amuata fohorö, böi awuwu ndra’ugö! Andrö wanolo moroi khö Yehowa ena’ö tola ötimbagö wangera-ngera si lö sökhi andrö. Hadia so nösi nomou zolohi ya’ugö? Böi awuwu ndra’ugö! Böi aetu öhalö halöwö Yehowa. Buania, itugu aro wa’afaduhu dödöu khö Yehowa. Törö tödöu, ena’ö i’omasi’ö ita Lowalangi, moguna anau gölöda.​—Roma 5:3-5; Yakobo 1:12.

17, 18. (a) Be’e duma-duma hana wa moguna so khöda wa’anau gölö irugi gamozua. (b) Börö me no ahatö ginötö, hadia zi tola faduhu dödöda?

¹⁷ Moguna anau gölöda irugi gamozua, tenga ha mo’inötö. Khalaigö atö na so göfa sahöndrö. Niha si so yawa ba göfa moguna molangi ira irugi mbewe nasi ena’ö tola te’orifi ira. Na so zomböhöli ba wolangi, tola ahöndrö ia ba mate. Simanö göi ita, na lö khöda fa’anau gölö irugi gamozua tola mate ita. Na omasi ita auri ba gulidanö si bohou, moguna anau gölöda. Yafao dödöda ba wehede Waulo me iwa’ö, ”Lö ma’ila wa’ata’u.”​—II Korindro 4:1, 16.

¹⁸ Simane Faulo, faduhu dödöda wa hasambalö itolo ita Yehowa na so khöda wa’anau gölö irugi gamozua. Imane Faulo, ”Ba möna sibai ita, ibe’e si no mangomasi’ö ya’ita. Noa sa faduhu dödögu, he fa’amate, ba he fa’auri, he mala’ika, ba he samatörö, he si so iada’e, ba he si so dania, he sabölö, ba he fa’alawa ba he fa’abakha, ba he hadia ia mbö’önia nifazökhi Lowalangi, ba lö i’ila ifabali ita ba wa’omasi Lowalangi andrö ita, ba khö Keriso Yesu, So’aya ya’ita.” (Roma 8:37-39) Atulö sa wa itaria erege dödöda. Hiza’i, data’o’ö Gideono hegöi niha si fao khönia. Hewa’ae erege dödöra, lö awuwu ira ba ”wolohi [emali andrö]”.​—Zanguhuku 8:4.