1, 2. Hadia zabu dödö Yefita faoma ononia?

FAGOHI nono alawe andrö ba wofalukhaisi namania. Omuso dödönia me no mangawuli namania moroi ba wasuwöta, lö hadia ia khönia. Manunö ia fao fanari. Tatu tokea dödönia ba nifalua hegöi niwa’ö namania börö me isika nukhania ba mu’ao ia, ”Alai ndra’o ndra’ugö onogu! Abu sibai dödögu öbe’e.” Ifatunö khö nononia wa no fawu’u li ia khö Yehowa ba tola tebulö wa’auri nononia ba zi no ifabu’u. Tatu tebai mangowalu ia mazui mo’ono. Hiza’i, sökhi wanemania li namania, ifarou namania ena’ö ifalua zi no ifabu’u khö Yehowa. Ba da’ö oroma wa faduhu sibai dödönia wa fefu ni’andrö Yehowa khönia sökhi lua-luania. (Zanguhuku 11:34-37) Me i’ila wamati nononia andrö, omuso sibai dödönia börö me i’ila wa nifaluania möi fangomusoi’ö dödö Yehowa.

 ² Faduhu dödö Yefita hegöi ononia ba nifalua Yehowa. Mamati ira hewa’ae abua khöra wamalua ya’ia. Omasi ira na tefaudu ba dödö Yehowa nifaluara.

3. Hadia mbörö wa moguna khöda ba ginötö andre duma-duma nifalua Yefita hegöi ononia?

³ Abua wangoroma’ö falöfaröida khö Yehowa. Moguna ’ena’ö tatimba zi fa’udu ba wamati andrö’. (Yuda 3) Ena’ö tola tafalua da’ö, datafaha’ö ita ba nifalua Yefita hegöi ononia ba gabula dödö salua khöra. Hewisa wa tola lö faröi ira khö Yehowa?

4, 5. (a) Hadia niwa’ö Yehowa ba ndraono Gizara’eli me larugi Danö Gamabu’ula? (b) Simane niwa’ö ba Zinunö 106, hadia lua-luania ba ndraono Gizara’eli me lalawa Yehowa?

⁴ Ero ma’ökhö, itörö-törö tödö Yefita faoma ononia alawe hadia lua-luania ba ndraono Gizara’eli me lö la’o’ö li Yehowa. Me 300 fakhe silalö, no ifarou ndraono Gizara’eli Yehowa ba wamunu fefu zanömba adu ba Danö Gamabu’ula, hiza’i lö la’o’ö. (V Moze 7:1-4) Ato ba ndraono Gizara’eli zolo’ö ndrawa Gana’ana, sanömba adu ba samalua amuata wohorö.​—Baso Zinunö 106:34-39.

⁵ Börö me faröi ndraono Gizara’eli, lö ilumö’ö ira Yehowa moroi ba nudura. (Zanguhuku 2:1-3, 11-15; Zinunö 106:40-43) Tatu abua ba niha sangomasi’ö Yehowa ba wangoroma’ö falöfaröira me inötö tefakao ira. Hewa’ae simanö, so niha si lö faröi nidunö-nidunö ba Zura Ni’amoni’ö simane Yefita ba ononia alawe, Elikana, Khana, ba Samueli. Lö tebulö la’omusoi’ö dödö Yehowa.​—I Zamueli 1:20-28; 2:26.

6. Hadia zondrönisi dödö niha gulidanö ba ginötö andre, ba hadia zinangea tafalua?

⁶ Ba ginötöda andre, lagu wangera-ngera niha hegöi nifaluara fagölö simane ndrawa Gana’ana. Awai ni’era-erara ba wa’aurira ha famalua amuata fohorö, fa’alösökhi, hegöi folohi kefe. Hiza’i, no ifangelama ita Yehowa. Omasi ia wolumö’ö ya’ita simane wolumö’önia ndraono Gizara’eli moroi ba gisö-isö dödö niha gulidanö. Hadia omasi ita tahalö wamaha’ö moroi ba zala nifaluara? (I Korindro 10:6-11) Dataforege ba wotimbagö fangera-ngera niha gulidanö. (Roma 12:2) Hadia omasi tafalua da’a?

7. (a) Hadia nifalua ndraono Gizara’eli khö Yefita? (b) Hadia nifalua Yefita me alua zimane da’ö?

⁷ Me götö Yefita, lafakao ndraono Gizara’eli ira ndrawa Wilisiti hegöi ndraono Gamoni börö me lö la’o’ö niwa’ö Yehowa. (Zanguhuku 10:7, 8) Baero da’ö, so wanandraigö moroi khö ndra talifusönia ba wa’aniha hegöi ira salawa ba ndraono Gizara’eli. Börö me fatuwu ira khönia ba so khöra wa’olohu, andrö wa lafofanö ia ba wondröi tanö si no tobali tana khönia. (Zanguhuku 11:1-3) Hiza’i, lö i’o’ö Yefita gamuatara si lö sökhi. Hezo ta’ila da’ö? Ba ginötö la’andrö  wanolo khönia ira salawa, i’o’ö ba ifalua. (Zanguhuku 11:4-11) Hadia zango’ou Yefita ba wamalua da’ö?

8, 9. (a) Hadia goi-goi si so ba Goroisa Moze ni’oguna’ö Yefita si tobali fanuturu lala khönia? (b) Hadia zabölö i’ofönai’ö Yefita?

⁸ Yefita andre no niha sabölö, ba aboto ba dödönia hewisa waö-waö ndraono Gizara’eli hegöi Goroisa Moze. Moroi ba zi no ifalua Yehowa ba nono mbanuania, i’ila hadia goi-goi Lowalangi sanandrösa ba zatulö hegöi si lö atulö. (Zanguhuku 11:12-27) Ba ginötö ihalö gangetula, i’oguna’ö wa’aboto ba dödö si no i’ila. Aboto ba dödönia hewisa dödö Yehowa sanandrösa ba wofönu, wolau balö, ba i’ila wa omasi Lowalangi na ta’omasi’ö niha bö’ö. Aefa da’ö, moroi ba Goroisa andre tefaha’ö ia hadia zinangea ifalua ba niha, mendrua manö ba niha si fatiu tödö khönia.​—Baso II Moze 23:5; III Moze 19:17, 18.

⁹ Duma-duma Yosefo zi tobali fanolo khö Yefita. Ifaha’ö ia moroi khö Yosefo me iforoma’ö wa’ahakhö dödö khö ndra talifusönia hewa’ae fatiu dödöra khönia. (I Moze 37:4; 45:4, 5) Duma-duma andrö zi tobali fanolo khö Yefita ba wamalua somasi Yehowa. Hewa’ae afökhö dödönia ba nifalua ndra talifusönia, i’ofönai’ö fasuwö ba wango’awögö Yehowa hegöi ono mbanuania moroi na i’era-era zi no alua khönia. (Zanguhuku 11:9) Börö me lö faröi ia khö Yehowa, tefahowu’ö ia hegöi ndraono Gizara’eli.​—Heberai’o 11:32, 33.

10. Hewisa goi-goi Lowalangi möi fanoloda ena’ö tobali ita niha Keriso sindruhu?

¹⁰ Hewisa ena’ö tola tobali duma-duma khöda Yefita? Hadia nifaluada na afatö dödöda labe’e ira talifusöda ba wamati mazui tamane tödöda lö sökhi lagura khöda? Lö tabali’ö fa’afökhö dödöda tobali daha-tahada ba wangai halöwö khö Yehowa. Böi taböhöli we’amöi ba gangowuloa mazui fariawö khö ndra talifusöda. Data’o’ö duma-duma Yefita ba tafalua zomasi Yehowa. Da’a zi tobali fanolo khöda na göna ita fanandraigö ena’ö tola tobali duma-duma si sökhi ita.​—Roma 12:20, 21; Kolose 3:13.

11, 12. Hadia hölu Yefita ba hadia geluahania?

¹¹ Aboto ba dödö Yefita wa moguna wanolo moroi khö Lowalangi ena’ö tola te’efa’ö ndraono Gizara’eli moroi ba danga ndraono Gamoni. Ifabu’u khö Yehowa na möna ia, ibe’e ’zumange nitunu’ ya’ia da’ö niha si oföna sibai mamaondragö ya’ia ba newali na mangawuli ia moroi ba wasuwöta. (Zanguhuku 11:30, 31) Hadia geluahania da’a?

 ¹² Fatuwu khö Yehowa na latunu niha tobali sumange. Andrö aboto ba dödöda wa tenga da’ö geluahania wa sindruhu-ndruhu itunu niha Yefita tobali sumange. (V Moze 18:9, 10) Ba Goroisa Moze, sumange nitunu no sambua buala so’ahonoa nibe’e niha khö Yehowa. Tobali, eluaha zumange nibe’e Yefita ya’ia da’ö itehegö nononia ba wangai halöwö khö Yehowa ba gosali sandrohu fa’aurinia. Ifondro-ndrongo Yehowa wangandrö Yefita ba tebe’e khönia wa’amöna. (Zanguhuku 11:32, 33) Tobali, haniha nibe’e Yefita khö Yehowa?

13, 14. Moroi ba wehede Yefita ba Zanguhuku 11:35, hadia ni’ilada sanandrösa ba wamatinia?

¹³ Angeraigö atö nidunö-dunö ba wamobörö wamaha’ö. Ba ginötö mangawuli Yefita moroi ba wasuwöta, ononia alawe ni’omasi’önia si ha sambua, da’ö zi oföna mamaondragö ya’ia! Hadia ifalua Yefita zi no ifabu’u? Hadia tola itehegö mangai halöwö nononia ba gosali khö Yehowa sandrohu fa’aurinia?

¹⁴ Oroisa Lowalangi zanolo Yefita ba wangai angetula si sökhi. Te itörö tödönia nisura ba II Moze 23:19, me mu’o’ou nono mbanua Lowalangi ba wame’e sumange sabölö sökhi khö Yehowa. Imane göi ba Goroisa andrö na so zi möi ba hölu khö Yehowa, ”ba lö tola ifuli linia, yamutörö sibai niwa’önia andrö”. (IV Moze 30:3) Ifalua zi no ifabu’u Yefita hewa’ae i’ila hadia lua-lua khö nononia hegöi khönia samösa, simane nifalua Khana si lö faröi, sauri me götö da’ö. Börö me ba gosali mangai halöwö nononia alawe, tebai mo’ono ia. Börö da’ö, lö hadöi nga’ötö Yefita sanohugö töinia ba sangokhögö haratonia. (Zanguhuku  11:34) Hewa’ae simanö imane Yefita, ”Noa sa numalö ligu khö Yehowa, ba tebai ufuli!” (Zanguhuku 11:35) Itema Yehowa zumange nibe’e Yefita ba ifahowu’ö ia. Hadia so khöu wamati simane Yefita?

15. Hadia hölu si no tawa’ö, ba hewisa wangoroma’öda wa lö faröi ita?

¹⁵ Ba ginötö talulu wa’aurida khö Yehowa, no möi ita ba hölu wa tafalua gofu hadia zomasi ia. Aboto ba dödöda wa lö aoha wamalua hadia zi no tafabu’u andrö. Hiza’i, hadia nifaluada ba ginötö la’andrö khöda wamalua si lö faudu ba dödöda? Na lö taböhöli ba wolo’ö niwa’ö Lowalangi, da’ö dandra wa lö faröi ita ba zi no tafabu’u. Hewa’ae afökhö ba wamalua ya’ia, hiza’i abölö ebua howu-howu nitemada moroi khö Yehowa. (Maleakhi 3:10) Tobali, hewisa dödö nono Yefita? Hadia nifaluania börö me no fawu’u li namania?

16. Hewisa dödö nono Yefita ba zi no ifabu’u amania? (Faigi gambara ba wamobörö wamaha’ö.)

¹⁶ Fabö’ö hölu Yefita moroi ba hölu Khana. Möi ba hölu Khana wa ibe’e nononia Samueli wohalöwö ba gosali tobali Nazir (niha nilulu ba wangai halöwö khö Yehowa). (I Zamueli 1:11) Mutehegö mangowalu ba mo’ono niha si no tobali Nazir. Hiza’i, ono Yefita mube’e tobali ”sumange nitunu” so’ahonoa. Börö da’ö, lö i’ila irasoi hewisa wa’omuso dödö tobali fo’omo ira alawe hegöi tobali satua. (Zanguhuku 11:37-40) Angeraigö da’a! Tola manö mangowalu ia ba ndra matua si tehöngö ba mbanua andrö börö me sondrönia’ö iraono Gizara’eli namania. Iada’a tobali ia enoni ba gosali. Hadia nifalua nono alawe andre? Iforoma’ö wa i’ofönai’ö wangai halöwö khö Yehowa, imane khö namania, ”Lau khögu niwa’öu andrö.” (Zanguhuku 11:36) Itehegö lö mangowalu ia ba lö mo’ono ena’ö tola ihalö halöwö Yehowa. Hewisa ena’ö aoha gölöda wangai halöwö Yehowa simane nifaluania?

17. (a) Hewisa ena’ö tola ta’o’ö wamati Yefita hegöi ononia? (b) Simane nisura ba Heberai’ö 6:10-12, hewisa wa tola tefarou ndra’ugö ena’ö aoha gölöu ba wangai halöwö khö Yehowa?

 ¹⁷ Ngahönö ndra talifusöda ono matua hegöi ono alawe latehegö lö mangowalu ira mazui lö mo’ono ba ginötö andre. Hadia mbörö? Lö omasi ira na mangoloi dödöra wangai halöwö khö Yehowa. Ato göi ndra talifusöda si no atua same’e inötöra hegöi fa’abölöra khö Yehowa, hewa’ae sindruhunia tola la’oguna’ö ginötöra andrö ba ndraono mazui ba ma’uwura. So zohalöwö ba konstruksi, so zi möi ba Sekolah bagi Penginjil Kerajaan, ba so göi zi findra ba mbanua niha Keriso si lö ato sanuriaigö. Tanö bö’ö, ladou’ö ginötöra wangai halöwö Yehowa sagötö mbaŵa Wanörö Tödö fa’amate Yesu. Lö olifu Yehowa zi no lafalua ira talifusöda si lö faröi andre. (Baso Heberai’o 6:10-12.) Hewisa na ya’ugö? Hadia aoha gölöu ba wondrou’ö inötöu wangai halöwö khö Yehowa?

18, 19. Hadia wamaha’ö si tola tahalö moroi khö Yefita hegöi ononia si no tesura ba Zura Ni’amoni’ö, ba hewisa ena’ö tola ta’o’ö nifaluara?

¹⁸ Hadia zanolo Yefita ba wanaögö fefu gabula dödönia? I’odaligö Yehowa ba wame’e fanuturu lala ena’ö tola ihalö gangetula ba wa’aurinia. Lö adöni dödönia ba nifalua niha si fasui ya’ia. Lö faröi ia hewa’ae afatö dödönia ba zi no lafalua niha khönia. Ifahowu’ö ia Yehowa hegöi ononia alawe börö me aoha gölöra wamalua da’ö ba i’oguna’ö ira Yehowa ena’ö ato niha samosumange ya’ia. Hewa’ae labato niha bö’ö ba wamalua sindruhu, hiza’i lö faröi ira khö Yehowa.

¹⁹ Imane Sura Ni’amoni’ö, ”Ena’ö mibe’e famaedo khömi zanema amabu’ula li andrö, ba wamati, ba ba wa’ebolo dödö.” (Heberai’o 6:12) Data’o’ö nifalua Yefita hegöi ononia. Na lö faröi ita khö Yehowa, hasambalö ifahowu’ö ita.