So samösa zanuriaigö si lö mubayagö idanö moroi ba Armenia sotöi Haykanush. Samuza inötö isöndra paspor ahatö ba nomonia. Ba paspor andre so mato ha’uga ngawua kartu debit hegöi kefe sebua. I’ombakha’ö göi zi no isöndra andrö khö wo’omonia ira matua, sanuriaigö si lö mubayagö idanö nasa.

Hewa’ae tosasa ira ba gefe ba so gömöra ba niha, lahalö gangetula ba wofuli kefe nisöndrara andrö ba alamat si no tesura ba paspor. Ahöli-höli dödö zokhö paspor hegöi ösi nomonia. Itutunö Haykanush hegöi fo’omonia wa omasi ira latörö zindruhu börö me no lafaha’ö ira ba Zura Ni’amoni’ö. Aefa da’ö, la’oguna’ö ginötö da’ö ba wahuhuosa sanandrösa khö ndra Samaduhu’ö Yehowa ba labe’e khöra mbuku.

Omasi nösi nomo andrö wame’e kefe khö Haykanush si tobali tandra wangandröra saohagölö, hiza’i lö itema. Mahemolunia, möi wo’omo ndra matua sokhö paspor andrö ba nomo Haykanush. Ifaso Haykanush ba wanga’i laeduru berlian si tobali tandra wa i’andrö sibai saohagölö.

Simane ösi nomo andrö, ato göi niha sahöli-höli dödö börö me lö falimo Haykanush hegöi fo’omonia. Hiza’i, hadia ahöli-höli dödö Yehowa? Hewisa dödönia me latörö zindruhu? Hadia so gunania khöra me no latörö zindruhu?

Lö abua wanema li moroi ba zinofu-nofu andrö mege. Hadia mbörö? La’ila ono mbanua Lowalangi wa abölö omasi Yehowa na ta’o’ö gamuatania moroi na ta’ofönai’ö wangalui berlian, ana’a hegöi harato tanö bö’ö. Fabö’ö zabölö moguna ba wamaigi Yehowa moroi ba wamaigi niha bö’ö. (Yesaya 55:8, 9) Abölö moguna ba dödö nono mbanua Yehowa wangodödögö folo’ö amuatania.

Tola ta’ila da’a moroi ba Zura Ni’amoni’ö sanandrösa ba wa’aboto ba dödö hegöi fa’atua-tua. Imane Gamaedola 3:13-15, ”Ya’ahowu zanöndra fa’atua-tua, awö niha sogamö fa’aboto ba dödö. Fanöndra ya’ia, ba no tohude moroi ba wanöndra firö, ba hare ba khönia, ba italu’i gana’a. Si sökhi moroi ba mani-mani ia, ba fefu ngawalö mbarasi khöu, ba lö fagölö-gölö khönia.” Ba wamaigi Yehowa, ebua mböli gamuata si sökhi moroi ba harato.

Hewisa zanandrösa ba wanörö sindruhu?

Itörö zindruhu Yehowa. ”Lö mofaya” ia. (Tito 1:2) Ibe’e gehehania khö Waulo ba wanura sura ba niha Keriso Heberai’o me döfi si föföna, ”Mi’angandrö salahima, noa sa faduhu dödöma, wa lö iteguga tödöma, me si sökhi manö zedöna matörö, fefu, hadia ia.”​—Heberai’o 13:18.

No ibe’e khöda duma-duma si sökhi Yesu ba wanörö sindruhu. Duma-dumania, me iwa’ö khönia Ere Sebua sotöi Kayafa, ”Ube’e ba hölu ndra’ugö, khö Lowalangi sauri andrö, ena’ö öwa’ö khöma, na Keriso andrö ndra’ugö, Ono Lowalangi”, itörö zindruhu Yesu ba ifatunö wa ya’ia andrö Mesia. Ifatunö zindruhu hewa’ae no ifobahulu ia Sanhedrin tobali sanandrawaisi Lowalangi, ba tola manö labunu ia.​—Matai’o 26:63-67.

Hewisa göi ita? Duma-dumania, so zango’ou ya’ita falimo mazui tafuyu’ö zindruhu ena’ö tasöndra hare sebua. Hadia ta’o’ö niwa’önia andrö mazui tatörö zindruhu?

Abua khöda wanörö sindruhu ba ngaluo safuria andre börö me ato niha ”ha tana khöra la’alui, somasi ana’a ira”. (II Timoteo 3:2) Na tosasa niha ba gefe mazui abua wangalui halöwö, ato zanagö, falimo, mazui lafalua gamuata wa lö manörö sindruhu. No to’ölö wangera-ngera simane da’a. Ato zanguma’ö wa tola manö isöndra hare sebua na lö latörö zindruhu. So ösa niha Keriso zanga’i angetula si lö sökhi ba ”sangalui ana’a si lö atulö”. Lua-luania, obou döira ba mbanua niha Keriso.​—I Timoteo 3:8; Tito 1:7.

Ato niha Keriso zolo’ö Yesu. La’ila wa abölö moguna na mu’okhögö gamuata somasi Lowalangi moroi na mugohi wa’akayo mazui hare, gofu hadia ia. Da’ö mbörö wa lö manali ndraono niha Keriso si bohou ebua ha ena’ö lasöndra fote sebua. (Gamaedola 20:23) Tatu manö, lö ero-ero tatema zulö na tatörö zindruhu simane  nifalua Haykanush. Hiza’i, omasi Lowalangi na tatörö zindruhu ena’ö so khöda dödö side-ide sohau-hau, sabölö ebua böli moroi ba danö bö’ö.

Oroma da’a moroi ba zalua khö Gagik. Imane, ”Fatua lö tobali ndra’o niha Keriso, mohalöwödo ba perusahaan sebua. Lö omasi ibu’a pajak sokhö perusahaan da’ö. Ha ma’ifu hare perusahaan ni’ombakha’önia. Börö me direktur ndra’odo, lö tola lö’ö ’falulu fohalöwö’ ndra’o ba zotema pajak, ube’e khöra zölö-sölö. Lua-luania, lafotöi ndra’o niha si lö manörö sindruhu. Me ufaha’ö ndra’o ba zindruhu, ubato wamalua da’ö sa’ae hewa’ae ebua gazigu labe’e. Ba gafuriatania, ubokai usahagu samösa. Ufasura’ö döi perusahaan nifasindrogu ba ubu’a fefu pajak.”​—II Korindro 8:21.

Imane Gagik, ”Tenga mai alö zinöndragu, lua-luania abua khögu wangalui soguna ba nomo. Hiza’i, usöndra wa’ohahau dödö iada’a. So khögu dödö side-ide sohau-hau föna Yehowa. Tobali ndra’o göi duma-duma si sökhi ba ndraonogu ono matua si darua ba tebe’e khögu halöwö si sökhi ba gangowuloa. La’ila göi ndra’o wa utörö zindruhu ira sotema pajak hegöi ira awögu wohalöwö.”

I’omasi’ö Yehowa niha samosumange ya’ia, solo’ö amuatania si sökhi simane fanörö sindruhu. (Tito 2:10) Na tafalua da’a, no ifabu’u Yehowa wa itolo ita. Imane Razo Dawido, ”Me iraono ndra’o föna ba me satua ndra’o ma’ökhö, ba lö urai u’ila, numana zatulö tödö, ba lö urai u’ila mangandrö gö ma’uwunia.”​—Zinunö 37:25.

Oroma da’a ba zalua khö Ruti. Lö faröi ia khö ninania matuania si no atua sotöi Na’emi. Findra Ruti ba mbanua Gizara’eli ba ba da’ö ifosumange Lowalangi sindruhu. (Ruti 1:16, 17) Itörö zindruhu ba wangowuloi si toröi mbua nowi simane niwa’ö ba Goroisa Lowalangi ba niha si numana. Hulö simane salua khö Dawido ba gafuriata, lö irai iröi Ruti hegöi Na’emi Yehowa. (Ruti 2:2-18) Ibönökhi zoguna khöra ba ifili Ruti ena’ö moroi ba nga’ötönia tumbu Razo Dawido hegöi Mesia si no tefabu’u!​—Ruti 4:13-17; Matai’o 1:5, 16.

Tola manö abua ba nono mbanua Yehowa wangalui kefe ba wombönökhi soguna khöra. Hiza’i lö la’alui lala saoha, latörö zindruhu, la’odödögö wohalöwö ba owölö-ölö ira. Me no lafalua da’a, laforoma’ö wa abölö ebua mböli gamuata Lowalangi simane fanörö sindruhu moroi ba harato.​—Gamaedola 12:24; Efeso 4:28.

Simane Ruti, mamati niha Keriso ba zi sagörö ulidanö wa itolo ira Yehowa. Faduhu dödöra ba Zame’e bu’usa li, ”Lö’ö manö faröido khöu, ba lö’ö manö u’ositengagö ndra’ugö.” (Heberai’o 13:5) No ha’uga kali iforoma’ö Yehowa wa tola ba omasi ia wanolo niha sanörö sindruhu sagötö fa’ara. Ifalua zi no ifabu’u ba wombönökhi soguna ba nono mbanuania.​—Matai’o 6:33.

Tola manö ebua mböli berlian hegöi harato tanö bö’ö ba dödö niha. Hiza’i, faduhu dödöda wa ebua mböli wanörö sindruhu hegöi amuata si sökhi ba wamaigi Namada ba zorugo moroi ba harato tanö bö’ö!