KHALAIGÖ na mowaö-waö ndra’ugö baero ba lala ba zi bongi, ha ya’ugö samösa. I’anemai’ö ö’ila wa so samösa niha solo’ö-lo’ö ndra’ugö moroi furi. Me öbato wofanö ba ibatogö ia göi. Me ö’aliokö wofanö, ba i’aliokö ia göi. Ba ölau fagohi ba nomo nawöu sahatö ba da’ö. Me ibokai mbawandruhönia, ba möi’ö bakha, ahono sa’ae dödöu börö me ö’ila wa no telumö’ö ndra’ugö.

Te lö irai alua khöu zimane da’ö. Hiza’i, tola manö so danö bö’ö same’e aombö dödöu. Duma-dumania, hadia öforege ba wotimbagö falömo’ahonoamö, hiza’i öfuli öfalua nasa zala simane da’ö? Hadia no ara lö hadöi halöwöu hewa’ae no öforege wangalui ya’ia? Hadia aombö dödöu na itugu atua’ö mazui ambö fa’abölöu ba götö si so föna? Mazui so ngawalö tanö bö’ö zame’e aombö dödöu?

Hadia manö gabula dödömö, sökhi na so zi fahuwu khöu, ba tola ötutunö khönia hadia gabula dödömö ba tola itolo ndra’ugö. Hadia so zi fahuwu khöu? Tatu manö, so! Yehowa nawö si fahuwu khöu, hulö simane me fahuwu ia khö niha samati ya’ia da’ö Gaberahamo, simane nisura ba Yesaya 41:8-13, NW. Ba ayati 10 ba 13, fabu’u li Yehowa khöda samösa, ’Böi busi dödöu, lö’ö sa aefado khöu? Böi tokea’ö, Lowalangiu sa ndra’odo, u’abe’e’ö ndra’ugö, ba utolo’ö, ugogohe ndra’ugö na tangagu kambölö andre, samalua satulö. Ya’odo sa’ae, Yehowa, Lowalangimö andrö zololohe kambölöu, ya’odo andre, sanguma’ö khöu, böi ata’u ndra’ugö, utolo’ö!’

Terara sibai dödöda ba wehede Yehowa. Tandraigö atö ba wokhalaigö hadia sindruhu-ndruhu nifabu’u Yehowa khöda. Ba ayati da’a lö iwa’ö wa mowaö-waö ita ba zinga Yehowa ba tagogohe dangania. Na mowaö-waö ndra’ugö ba zingania, tatu manö kambölönia zogogohe kaberau. Hiza’i, ibe’e Yehowa ”dangania kambölö samalua satulö” ba idöni ”dangamö kambölö”, hulö simane idöni ndra’ugö moroi ba gabula dödö. Me idöni Yehowa kambölömö, ifarou ndra’ugö ba imane, ’Böi ata’u ndra’ugö, utolo’ö.’

Molo’ö ya’ugö, Yehowa andrö hadia Ama sangomasi’ö ya’ugö hegöi Awömö? Hadia faduhu dödömö wa itolo ndra’ugö ba ginötö so gabula dödömö? Sindruhu-ndruhu wa i’ame’egö tödö ndra’ugö Yehowa, ba omasi ia wanolo ya’ugö. Na so noro dödö mazui abula dödömö, omasi Yehowa na ahono dödömö. Hadia mbörö? Börö me i’omasi’ö sibai ndra’ugö. Sindruhu-ndruhu ya’ia andrö ”fanolo sabölö, ba wa’abu dödö”.​—Zinunö 46:2.

So niha latörö-törö tödö manö hadia zala nifaluara, ba aombö dödöra hadia no i’efa’ö Lowalangi  horöra andrö. Na örasoi zimane da’ö, angeraigö sanandrösa khö Yobi niha samati. Ifatunö hadia zala nifaluania me bohou ebua ia. (Yobi 13:26) Irasoi göi Dawido simane da’ö, ba i’andrö khö Yehowa, ”Böi angeragö horögu me ono matua ndra’odo ba he lalögu andrö.” (Zinunö 25:7) Börö me lö mo’ahonoa, fefu ita ’noa sa ahori mamazökhi horö, ba lö’ö sa si sökhi turiada khö Lowalangi’.​—Roma 3:23.

Ngawua wehede zondrara dödö ba Yesaya faza 41 lasura zoguna khö ndraono Gizara’eli. Ebua sibai zala nifaluara, ba iwa’ö Yehowa wa ihuku ira ba latibo’ö ira ba mbanua Babilona. (Yesaya 39:6, 7) Ba ginötö da’ö, fabu’u li Yehowa wa i’efa’ö niha samalalini era-erara ba sangawuli khönia! (Yesaya 41:8, 9; 49:8) I’oroma’ö Yehowa wa’omasinia hegöi fa’ahakhö dödönia iada’a, khö ndra niha samalalini era-erania ba somasi mangomusoi’ö dödö Yehowa.​—Zinunö 51:3.

Faigi hadia zalua khö Takuya, * no i’oigö tödönia woböhöli gamuatania si lö sökhi ba wamaigi pornografi hegöi ba wamalua masturbasi. Asese ifalua gamuata si lö sökhi andrö. Hewisa dödönia? ”Lö mo’eluaha wa’aurigu, hiza’i me uhatö’ö ndra’o khö Yehowa ba wangandrö, ba u’andrö wangefa moroi khönia, ifazawa ndra’o moroi ba wa’aekhu tou.” Hewisa wamalua Yehowa da’a? Ira satua sokubaloi ba gangowuloa si so Takuya, lamane khönia ena’ö itelefo ira na so ba dödönia wamalua gamuata si lö sökhi andrö. Imane, ”Abua khögu wo telefo ya’ira. Hiza’i, ero utelefo ira, ifuli te’abölö’ö ndra’o.” Aefa da’ö, ira satua sokubaloi lahaogö lala ena’ö möi satua samasui ba nomo Takuya. Imane satua samasui andrö khönia, ”We’amöigu ba da’a tenga ba zi lö mudöna-döna. Omasi ndra satua sokubaloi na so ndra’odo ba da’a. Latuyu ndra’ugö ena’ö ötema wokubaloi.” Imane Takuya, ”Ya’o zamalua horö, hiza’i Yehowa zamatenge ira satua sokubaloi ba wame’e fanolo khögu.” Ba gafuriata, iböhöli Takuya gamuatania si lö sökhi andrö, ba tobali ia perintis biasa, ba iada’a mohalöwö ia ba gödo ndraha. Simane wanolo Yehowa dalifusöda andre, simanö göi wanolo Yehowa ndra’ugö na öfalua zala.

So ösa niha, abu dödöra börö me no aheta ira ba halöwöra ba abua wangalui halöwö sibohou. Khalaigö hewisa wa’abua na lö latema-tema ita ba wohalöwö. Na alua simane da’a, so zanguma’ö wa lö mo’eluaha wa’aurira. Hewisa tola itolo ndra’ugö Yehowa? Te lö alio ibe’e khöu halöwö somasi’ö. Hiza’i, tola itolo ndra’ugö ena’ö ötörö tödö ngawua wehede Dawido, ”Me iraono ndra’o föna ba me satua ndra’o ma’ökhö, ba lö irai u’ila, numana zatulö tödö, ba lö irai u’ila mangandrö gö ma’uwunia.” (Zinunö 37:25) I’ame’egö tödö ndra’ugö Yehowa, ba ibe’e khöu ”tangania kambölö samalua satulö” ena’ö tembönökhi zoguna khöu irege lö öböhöli wamosumange ya’ia.

Sara, si toröi ba Kolombia, no irasoi samösa hewisa wanolo Yehowa ya’ia. Ya’ia andre itema gazi sebua börö me mohalöwö ia ma’ö-ma’ökhö ba nahia wohalöwö si tehöngö ba ni’osinangegö niha. Hiza’i, omasi ia ba wamalua sabölö oya ba  wohalöwö khö Yehowa, andrö, iheta ia moroi ba halöwönia ba ibörögö merintis. Hiza’i, abua sibai khönia wangalui halöwö si ha matonga hari. Andrö, ibokai khönia toko es krim side-ide, hiza’i itugu ara ahori manö gefenia, ba iduhö sa’ae toko andrö. Imane, ”Tölu fakhe no numalö sa’ae, hiza’i u’andrö saohagölö khö Yehowa börö me lö awuwu ndra’odo.” I’ila sa’ae hadia manö ngawalö zindruhu-ndruhu zoguna khönia ba hewisa ena’ö böi aombö dödönia ba zalua mahemolu. (Matai’o 6:33, 34) Ba gafuriata, kafalonia si oföna itelefo ia ba ibe’e khönia halöwö si fagölö simane halöwönia ba zilalö. Iwa’ö wa omasi ia wotema halöwö andrö, ha na tola mohalöwö ia matonga hari ba na tola itaria ihalö cuti ena’ö tola möi ba gangowuloa, möi ba kebaktian wilayah hegöi ba kebaktian regional. Iada’a, lö isöndra Sara gazi sebua simane ba zilalö. Hiza’i, tola itohugö merintis. Iwa’ö ba ginötö abu dödönia, irasoi samösa danga Yehowa si fao fa’omasi.

Ato zabu tödö börö me itugu atua ira ba lö aratö awai ginötöra wohalöwö. Abu dödöra na lö ibönö gefera ena’ö lasöndra wa’ohahau dödö ba wa’auri. Aombö dödöra göi börö me alö wa’abölöra ba götö si so föna. Te Razo Dawido zangandrö khö Yehowa, imane, ”Böi tibo’ö ndra’odo, na itugu atua ndra’o, na alö dölagu, ba böi faröi ndra’ugö khögu!”​—Zinunö 71:9, 18.

Hewisa ena’ö niha salawa ndröfi lö aombö dödöra sanandrösa ba ginötö si so föna? Moguna la’aro’ö wamatira khö Lowalangi ba faduhu dödöra wa i’asogö hadia manö zoguna khöra. Hiza’i, so ösa niha zorasoi fa’ohahau dödö ba ginötö tefönui fefu zoguna hegöi wa’omasi dödöra börö me oya gefera, ba moguna lafaha’ö ira hewisa ena’ö ahono ba ohahau dödöra ba zi no so. Te la’ila wa’abölö sökhi ba wa’aurira na la’a ’sambua figa sayu’ moroi ba ”göröbao satabö”! (Gamaedola 15:17, NW) Na ö’osambua’ö dödöu wamosumange Yehowa, hasambalö i’asogö fefu hadia manö zoguna khöu ba ginötö no atua ndra’ugö.

Angeraigö sanandrösa khö José hegöi Rose, samosumange Yehowa safönu inötö töra moroi ba zi 65 fakhe. Ba ginötö da’ö oya lataögö wanandraigö. Larorogö nama ga Rose börö me moguna khönia wanolo ba zi ma’ökhö hegöi ba zi bongi. Simanö göi José, la’operasi ba lakemoterapi ia börö me mofökhö kanker ia. Hewisa wame’e Yehowa dangania kambölö khö ndra ngambatö samati andre? I’oguna’ö sambua ngambatö niha Keriso sotöi Toni ba Wendi. So khöra sambua apartemen ba omasi ira labe’e khö perintis safönu inötö ba lö la’andrö okosi. Itörö tödö Toni me SMA ia, ero ma’ökhö ifaigi baero ba zandrela, lalau manuriaigö ndra José hegöi Rose. I’omasi’ö sibai ira Tomi, börö owölö-ölö ira, ba da’ö sambua duma-duma sebua khönia. Börö me José hegöi Rose labe’e fefu wa’aurira ba wamosumange Yehowa, andrö wa Tomi ba Wendi labe’e apartemenra khöra. No 15 fakhe latolo José ba Rose ba no 85 fakhe ndröfira iada’a. Imane José hegöi Rose wa Toni ba Wendi andre, no sambua mbuala Yehowa khöra.

Fawu’u li Yehowa khöu, ’Böi ata’u ndra’ugö, utolo’ö!’ Ibe’e ”dangania kambölö samalua satulö” khöu göi. Hadia ö’oro’ö göi dangamö?