1, 2. Hewisa wangoroma’ö Waulo wa i’andrö saohagölö ba wa’ebua dödö Lowalangi?

SI FAO fa’atulö dödö imane Faulo, ”Ba tenga zaya-zaya gölö wa’ebua dödö [Lowalangi].” (Baso I Korindro 15:9, 10.) Sindruhu-ndruhu i’ila Waulo wa tebai itema wa’ahakhö dödö Lowalangi. Börö me föna no tobali ia solohi ndra niha Keriso.

² Me arakhagö mate Waulo, isura khö Dimoteo, ”U’andrö saohagölö khö Keriso Yesu, So’aya ya’ita, sangabölö’ö ya’o, me no iwa’ö tödönia, lö faröi ndra’o, me ifataro ndra’o ba halöwö andrö.” (I Timoteo 1:12-14) Hadia halöwö andrö? Itutunö Faulo khö ndra satua sokubaloi ba mbanua niha Keriso si so ba Efeso, ”Ba lö ba dödögu nosogu, lö itörö ligu na’i, ba wango’ozui lalagu, awö halöwögu andrö, nitemagu khö Zo’aya, Yesu, famaduhu’ö turia somuso dödö, turia  wa’ebua dödö Lowalangi andrö.”​—Halöwö Zinenge 20:24.

3. Hadia halöwö sebua nibe’e khö Waulo? (Faigi gambara ba wamobörö wamaha’ö.)

³ Hadia ”turia somuso dödö” nituriaigö Waulo, ba hewisa wa oroma wa’ebua dödö Yehowa ba da’ö? Imane Faulo khö ndra niha Keriso ba Efeso, ”No mirongo nihonogöi Lowalangi, ba wa’ebua dödönia andrö, nibe’e ba dangagu, ba khömi andrö.” (Efeso 3:1, 2) I’andrö Yesu khö Waulo ena’ö ituriaigö duria somuso dödö andre khö zi tenga niha Yahudi. Iada’a, niha ba ngawalö soi tola fao ira ba wamatörö Mbanua Lowalangi nifatörö Mesia. (Baso Efeso 3:5-8.) Owölö-ölö Waulo ba wanuriagö ba tobali ia duma-duma khö ndra niha Keriso iada’a. Iforoma’ö wa fa’ebua dödö Lowalangi andrö tenga ”si lö eluaha” mazui si lö guna khönia.

4, 5. Hana wa tola tawa’ö ”turia somuso dödö ba Mbanua Lowalangi” fagölö ia ba duria somuso dödö ba ”wa’ebua dödö Lowalangi”?

⁴ Ba götö safuria andre, so halöwö nono mbanua Yehowa ba wanuriaigö ”Mbanua Lowalangi andrö, turia somuso dödö, ba gulidanö misa, ma’asagörö, ba wamaduhu’ö ba niha fefu.” (Matai’o 24:14) Turia somuso dödö ba Mbanua Lowalangi fagölö ia ba ”turia somuso dödö ba wa’ebua dödö Lowalangi”. Hewisa wa tola? Börö me fefu howu-howu nitemada moroi ba Mbanua Lowalangi no fa’ebua dödö Lowalangi da’ö. (Efeso 1:3) Owölö-ölö Waulo we’amöi manuriaigö ba wangoroma’ö fangandrö saohagölönia börö wa’ebua dödö Yehowa. Hadia tola ta’o’ö simane nifalua Waulo?​—Baso Roma 1:14-16.

⁵ Ba wamaha’ö migu silalö, aboto ba dödöda hewa’ae niha si so horö ita, tola tatema howu-howu moroi ba wa’ebua dödö Yehowa ba ngawalö lala. Börö me no oya tatema howu-howu, so zi tobali halöwöda ya’ia da’ö wamaha’ö niha bö’ö sanandrösa hewisa Yehowa wangoroma’ö fa’omasinia, ba hewisa göi tola latema mbuania. Hadia lala zi tola tafalua ba wanolo niha bö’ö wangandrö saohagölö ba wa’ebua dödö Lowalangi?

6, 7. Me tatutunö ba niha bö’ö sanandrösa ba höli andrö, hewisa tola tafazaewe duria somuso dödö ba wa’ebua dödö Lowalangi?

⁶ Iada’a, ato niha zi lö mangila wa fasala ira na lafalua horö. Andrö wa lö la’ila wa moguna khöra höli. Ba ginötö si fagölö göi, itugu ato niha saboto ba dödö wa lö ohahau dödöra ba lala wa’aurira. Ba me fahuhuo ira khö ndra Samaduhu’ö Yehowa, ato zi lö mangila hadia horö andrö, hadia lua-luania khöda, ba hadia zi nangea tafalua ena’ö böi i’osawuyu ita horö. Me la’ila hadia geluaha horö andrö, la’andrö saohagölö niha satulö tödö, börö me no ibe’e Yehowa Nononia ba gulidanö ena’ö te’efa’ö ita moroi ba horö ba fa’amate. Ifalua da’a Yehowa börö wa’omasinia ba wa’ebua dödönia.​—I Yohane 4:9, 10.

⁷ Osisi’ö hadia niwa’ö Waulo sanandrösa khö Nono ni’omasi’ö Yehowa, ”Ba da’ö so khöda wangöhöli andrö, ba ndronia, fangefa lalö andrö, dali wa  no a’oi so wa’ebua dödönia [Yehowa].” (Efeso 1:7) Höli nibe’e Keriso andre, no tandra sebua ba wa’omasi Lowalangi khöda, ba da’a göi dandra wa’ebua dödönia sahöli-höli dödö. Da’a sambua fanolo, samaha’ö ya’ita wa na mamati ita ba höli Yesu, tola te’efa’ö horöda ba tola ta’okhögö dödö side-ide si lö sinegu! (Heberai’o 9:14) Tatu manö, da’a duria somuso dödö sinangea tafa’ema ba niha bö’ö!

8. Hana wa moguna te’atulö’ö niha si so horö khö Lowalangi?

⁸ Na so niha si lö mamati ba höli Yesu, no tobali ia nudu Lowalangi. Andrö, so halöwöda ba wama’ema khöra wa tola tobali ira si fahuwu khö Lowalangi. Isura Yohane, ”Khö zamati khö Nono andrö so wa’auri si lö aetu, lö i’ila dania wa’auri si lö mamati khö Nono andrö, lö tebulö wönu Lowalangi khönia.” (Yohane 3:36) Omuso dödöda börö me höli Keriso andrö tola tobali ita si fahuwu khö Lowalangi. Itutunö Faulo, ”Me no fabali ami föna, me no fa’udu ami, ba gera-erami, ba mbua-mbuami andrö, si lö sökhi, ba no i’atulö’ö ami iada’e, fa’amate andrö, ba mboto nösinia andrö.”​—Kolose 1:21, 22.

9, 10. (a) Hadia halöwö nibe’e Keriso khö ndra talifusönia nibayoini? (b) Hewisa ”mbiri-biri bö’ö” ba wanolo niha nibayoini?

⁹ Ibe’e Keriso khö ndra talifusönia nibayoini ba gulidanö ”halöwö fangatulö”. Itutunö Faulo khöra, ”Fefu da’ö, ba moroi ba Lowalangi, si no mangatulö’ö ya’ita khönia, ba khö Yesu Keriso, si no mame’e göi khöda halöwö fangatulö andrö. Lowalangi sa zi no mangatulö’ö khönia ösi gulidanö, ba khö Keriso, lö ibe’e ömöra lalöra andrö, ba no ibe’e ba dödöma Daromali andrö ba wangatulö andrö. Ba no sinenge ndra’aga, salahi Keriso, hulö na Lowalangi zamarou tödö niha, ba lima andrö, mangandrö ndra’aga, salahi Keriso, mamane: ’Mifa’atulö’ögö ami khö Lowalangi.’”​—II Korindro 5:18-20.

¹⁰ No halöwö sebua khö ndra ”mbiri-biri bö’ö” ba wanolo niha nibayoini ba wamalua halöwö fanuriaigö. (Yohane 10:16) Tobali ”nifatenge” mazui ”ni’o’ou” khö Keriso ”mbiri-biri bö’ö” ba lafalua halöwö sabölö ebua, ya’ia da’ö halöwö fanuriaigö, ba wamaha’ö sindruhu ba niha hegöi ba wanolo ya’ira ena’ö tobali si fahuwu khö Yehowa. Manolo niha tobali si fahuwu khö Yehowa no halöwö sabölö moguna ba wanuriaigö turia somuso dödö ba wa’ebua dödö Lowalangi.

11, 12. Hana wa no turia somuso dödö ba niha na lafaha’ö ira wa tola mangandrö ira khö Yehowa?

¹¹ Ato niha mangandrö ira börö da’ö  zame’e ohahau dödöra, hiza’i lö sindruhu-ndruhu faduhu dödöra wa ifondro-ndrongo Lowalangi wangandröra. Moguna aboto ba dödöra wa Yehowa andrö ”Samondro-ndrongo fangandrö.” Isura Dawido, ”Samondro-ndrongo fangandrö ndra’ugö, dozi niha mangondrasi ya’ugö. No ilangö ndra’o ngawalö golalöwa, ba salama andrö, ba ya’ugö zangefa’ö.”​—Zinunö 65:3, 4.

¹² Itutunö Yesu khö ndra nifaha’önia, ”Na so hadia manö ni’andrömi khö Nama, ba ibe’e khömi ba döigu.” (Yohane 16:23, NW) Eluahania tola ta’andrö ”hadia manö” zi tefaudu ba gohitö dödö Yehowa. Isura Yohane, ”Da’ö wa lö aiwö, si so khöda ba khönia: na so ni’andröda, hadia ia, si faudu ba zomasi ia, ba ifondro-ndrongo khöda.” (I Yohane 5:14) Omuso sibai dödöda börö me tatolo niha ena’ö aboto ba dödöra wa fangandrö andre tenga ha mame’e fa’ohahau dödö, hiza’i da’a lala ena’ö lahatö’ö ira ba ”Dadaoma wa’ahakhö dödö” Yehowa! (Heberai’o 4:16, NW) Ba ginötö tafaha’ö niha hewisa lala wangandrö sindruhu, ha’ökhö mufa’ema ia, ba hadia zi nangea la’andrö, tatolo ira tobali si fahuwu khö Yehowa, ba tola terara dödöra na so gabula dödö.​—Zinunö 4:2; 145:18.

13, 14. (a) Hadia halöwö sebua sahöli-höli dödö khö ndra niha nibayoini ba götö si so föna? (b) Hadia halöwö sahöli-höli dödö nifalua niha nibayoini ba niha gulidanö?

¹³ Abölö oya i’oroma’ö Yehowa wa’ebua dödönia ”ba götö si so föna”. Hewisa wa tola? Ibe’e Yehowa halöwö sebua sahöli-höli dödö khö zi 144.000 niha samatörö awö Keriso ba zorugo. Itutunö Faulo hadia halöwö sebua andrö, imane, ”Lowalangi andrö, si no a’oi so fa’ahakhö dödö, ba wa’omasinia andrö, si no fahöna, fa’omasinia ita, he me no si mate ita, ba golalöwa andrö, ba no i’orifi ita, awö Keriso—fa’ahakhö dödö, wa no auri ami—ba no ifao wanusugi ya’ita ba famawu’a ya’ita, fama’aso ya’ita ba mbanua zorugo, ba khö Keriso Yesu.”​—Efeso 2:4-7, NW.

¹⁴ Abua wokhalaigö ngawalö sahöli-höli dödö nihenaigö Yehowa khö ndra niha Keriso nibayoini, ba ginötö mamatörö ira awö Keriso ba zorugo. (Luka 22:28-30; Filifi 3:20, 21; I Yohane 3:2) Yehowa, ”I’oroma’ö ba götö si so föna wa’ahakhö dödönia andrö, si no a’oi so, si no fahöna” khöra. Ya’ira si so ba lala si tohude. Ya’ira andre ”Yeruzalema si bohou” ono alawe nihalö khö Keriso. (Fama’ele’ö 3:12; 17:14; 21:2, 9, 10) Fao ira wohalöwö khö Yesu ba ’wamadöhö wökhö soi niha baero’. Latolo niha gulidanö ena’ö te’efa’ö ira moroi ba horö ba fa’amate hegöi ba wanolo ya’ira ena’ö mo’ahonoa.​—Baso Fama’ele’ö 22:1, 2, 17.

15, 16. Hewisa wangoroma’ö Yehowa fa’ebua dödönia khö ”mbiri-biri bö’ö” ba götö si so föna?

 ¹⁵ Itutunö ba Efeso 2:7, wa i’oroma’ö Lowalangi wa’ebua dödönia ”ba götö si so föna”. Ba ginötö da’ö göi, niha si so ba gulidanö larasoi ”wa’ahakhö dödönia andrö, si no a’oi so, si no fahöna”. (Luka 18:29, 30) So sambua nifalua Yehowa sahöli-höli dödö zangoroma’ö fa’ebua dödönia ba gulidanö ya’ia da’ö wanusugi niha moroi ba ”lewatö”. (Yohane 5:28, 29) Haniha nisusugi? Niha si lö faröi si no mate fatua lö mate Keriso hegöi ”mbiri-biri bö’ö” si lö faröi khö Yehowa ba luo safuria. Fefu niha si lö faröi andre, ifuli tesusugi ira ba wamosumange Yehowa.

¹⁶ Zuta niha si no mate fatua lö la’ila haniha Lowalangi, ba tesusugi göi ira. Isura Yohane, ”Ba u’ila zi no mate fefu, he satua, ba he iraono, föna dadaoma andrö so ira, ba tebokai zura; ba tebokai zura bö’ö, ya’ia zura wa’auri andrö. Ba tehuku si mate andrö, balazi nisura ba zura andrö, dali mbua-buara. Ba ibe’e baero asi zi mate andrö khönia, ba fa’amate andrö, ba lewatö, ba labe’e baero zi mate andrö, khöra, ba tehuku, dali mbua-buara zamösana.” (Famaele’ö 20:12, 13, NW) Niha nisusugi, tola lafaha’ö ira sanandrösa khö Yehowa ba wamaduhu’ö famatörönia. Moguna lafaha’ö ira ba la’o’ö goi-goi Zura Ni’amoni’ö hegöi fanuturu lala si so ba ”nga’ölu zura”. Fanuturu lala si  bohou andre zangoroma’ö fa’ebua dödö Yehowa.

17. Hadia zi nangea tatörö tödöda na möi ita manuriaigö?

¹⁷ Iada’a, itugu moguna halöwö fanuriagö turia somuso dödö sanandrösa ba Mbanua Lowalangi, börö me no ahatö luo andrö! (Mareko 13:10) Moguna tatörö tödöda hadia gohitö dödöda na möi ita manuriaigö, ya’ia da’ö wa mosumange Yehowa. Hewisa wa tola tafalua da’ö? Moguna ta’ombakha’ö ba niha hadia howu-howu nitemada si tola mangomusoi’ö dödöda ba gulidanö si bohou, ba tola ta’okhögö da’ö ha börö wa’ebua dödö Yehowa sahöli-höli dödö.

18, 19. Hewisa wa mosumangeda fa’ebua dödö Yehowa andrö?

¹⁸ Ba ginötö manuriaigö ita ba niha, tola tatutunö khöra na mamatörö Mbanua Keriso dania, lasöndra howu-howu niha moroi ba höli ba itugu ara tobali mo’ahonoa ira. Imane Sura Ni’amoni’ö, ”Nifazökhi Lowalangi andrö, ni’efa’ö ba wangosawuyu wa’atekiko andrö, ba wolohe ya’ia ba wa’aefa nono Lowalangi andrö, si so lakhömi.” (Roma 8:21) Tola alua da’a ha börö wa’ebua dödö Yehowa.

¹⁹ Tatema halöwö sebua ya’ia da’ö wama’ema ba niha fefu sanandrösa ba zi no ifabu’u sahöli-höli dödö si so ba Fama’ele’ö 21:4, 5, ”[Lowalangi] i’osi dania daŵa hörö fefu ba höröra, ba lö fa’amate sa’ae, ba lö fa’abu dödö, ba lö fege’ege, ba lö fa’afökhö sa’ae, me no numalö zi föföna andrö”. Ba Yehowa zi dadao ba dadaoma andrö, imane, ”Hiza, ubohoini fefu hadia ia!” Imane nasa, ”Tanö ba zura, me si lö tebulö ba me no sindruhu Daromali andre”. Ba ginötö lö mamalö-malö ita ba wanuriaigö turia somuso dödö ba niha, sindruhu-ndruhu tafosumange wa’ebua dödö Yehowa!