Fanofu Zombaso
Ba Hezekieli faza 37, itutunö dombua si’o si tobali sambua si’o. Hadia geluahania?
I’oguna’ö zama’ele’ö sotöi Hezekieli Yehowa, ba wama’ele’ö wa mangawuli nono mbanuania ba Danö Gamabu’ula ba te’osambua’ö ira tobali sambua soi. Itutunö khöda ba wama’ele’ö andrö göi, wa niha samosumange Lowalangi te’osambua’ö ira tobali ono mbanua ba luo safuria dania.
I’andrö khö Hezekieli Yehowa ba wanura zi dombua si’o. Isura ba zi sambua si’o, ”Mado Yehuda ba awöra iraono Gizara’eli”, ba zi sambua tö, ”Mado Yosefo, si’o Geferayi, ba awönia ma’uwu Gizara’eli ma’afefu.” Si dombua si’o andre tobali ”ha sara si’o” ba danga Hezekieli.—Hezekieli 37:15-17, NW.
Hadia geluaha ”Geferayi”? Mado Geferayi ya’ia da’ö mado si föföna moroi ba ndraono Gizara’eli si fulu mado tanö yöu. Sindruhunia, razo si föföna samatörö ba mbanua andrö ya’ia da’ö Yerobeamo, moroi ba mado Geferayi. (V Moze 33:13, 17; I Razo 11:26) Mado andrö moroi ba ngaötö Geferayi, ono matua moroi khö Yosefo. (V Moze 1:32, 33) Itema Yosefo howu-howu sahöli-höli dödö moroi khö namania, Yakobo. Börö da’ö, ”si’o Geferayi” andre tefaudu na la’amaedolagö ia mbanua si fulu mado tanö yöu. Me 740 SM, ara fatua lö mama’ele’ö Hezekieli, ihori mbanua Gizara’eli tanö yöu soi Asiria, ba la’ohe niha si so ba mbanua andrö. (II Razo 17:6, NW) Hauga fakhe aefa da’ö, ihori soi Asiria soi Babilona. Andrö, me isura Hezekieli wama’ele’ö sanandrösa ba zi dombua si’o, ato ba gotalua ndraono Gizara’eli no tefazawili ira ba Imperium Mbabilona.
Me 607 SM, ihori mbanua Yehuda si dombua mado tanö raya soi Mbabilona, ba la’ohe ba Mbabilona niha si so ba mbanua andrö. Te la’ohe göi niha si toröi moroi ba mbanua Gizara’eli tanö yöu. Razo samatörö ba mbanua tanö yöu moroi ba mado Yehuda. Ira ere göi toröi ira ba Yehuda börö mohalöwö ira ba nomo Lowalangi ba Yeruzalema. (II Nga’ötö 11:13, 14; 34:30) Andrö, tefaudu sibai si’o ”mado Yehuda” la’amaedolagö ia mbanua si dombua mado tanö raya.
Hawa’ara te’osambua’ö zi’o si dombua andrö? Alua da’a me döfi 537 SM, me mangawuli ba Yeruzalema niha nitibo’ö nifatenge moroi ba mbanua tanö raya hegöi banua tanö yöu, lafuli lafasindro omo Lowalangi. Lö tefabali sa’ae ndraono Gizara’eli. Sakali tö, te’osambua’ö ira fefu ba wamosumange Yehowa. (Hezekieli 37:21, 22) No ifa’ele’ö Yesaya hegöi Yeremia fangosambua’ö da’a.—Yesaya 11:12, 13; Yeremia 31:1, 6, 31.
Hadia nifa’ele’ö Hezekieli sanandrösa ba wamosumange satulö? I’owuloi Yehowa niha samosumange ya’ia ”tobali sambua”. (Hezekieli 37:18, 19) Hadia no alua da’a iada’a? Noa. Ibörögö alua da’a me döfi 1919. Fatua lö alua ia, omasi Zatana na tefabali ono mbanua Lowalangi sagötö fa’ara. Hiza’i me döfi 1919, itugu tefa’anö ba te’osambua’ö ira.
Ba götö da’ö, ato nono mbanua Lowalangi zanötöna tobali razo ba ere fao khö Yesu ba zorugo. (Fama’ele’ö 20:6) Ya’ira hulö simane si’o khö Yehuda. Hiza’i, so ma’ifu niha sanötöna fa’auri si lö aetu ba gulidanö. Ba gafuriata, itugu ato ira. (Zakharia 8:23, NW) Ya’ira hulö simane si’o khö Yosefo.
Iada’a, si dombua ngawawa andre no fao ira wamosumange Yehowa. Ba so samösa Razo khöra ya’ia da’ö Yesu Keriso. Ba wama’ele’ö Hezekieli, latötöi ia ”genonigu Dawido”. (Hezekieli 37:24, 25) Mangandrö Yesu khö Namania sanandrösa khö ndra nifaha’önia imane, ”Ena’ö ha sambua dödöra, dozi ira, simane ya’ugö, Ama, ba khögu, ba simane ya’o ba khöu.” * (Faigi gonönöta.) (Yohane 17:20, 21) Itutunö Yesu göi ba nikubaloi side-ide, ya’ia da’ö niha nibayoini wa ”tobali ha sambawa nikubaloi” ira faoma ”mbiri-biri bö’ö”. Fefu ira la’o’ö ”samösa gubalo”. (Yohane 10:16) Simane nitutunö Yesu, fefu nono mbanua Lowalangi no te’osambua’ö ira iada’a, he sanötöna fa’auri si lö aetu ba zorugo hegöi ba gulidanö!
^ par. 10 Me fahuhuo Yesu sanandrösa ba dandra luo safuria, oya gamaedola nibe’enia khö ndra nifaha’önia. Sabölö tohude, si föföna itutunö ”sawuyu si lö faröi, satua-tua”, ya’ia da’ö ngawawa side-ide niha nibayoini zondrönia’ö ono mbanua Lowalangi. (Matai’o 24:45-47) Aefa da’ö, ibe’e gamaedola ba niha nibayoini. (Matai’o 25:1-30) Ba gafuriata, itutunö sanandrösa khö dalifusö si falulu fohalöwö khö Keriso ba auri ira sagötö fa’ara ba gulidanö. (Matai’o 25:31-46) Simanö göi, na ibörögö alua wama’ele’ö Hezekieli iada’a, si föföna alua ya’ia da’ö khö zanötöna fa’auri ba zorugo. Si to’ölönia, si fulu mado moroi ba ndraono Gizara’eli lö la’amaedolagö ira sanötöna ba gulidanö. Hiza’i, ifasugi ba dödöda wa fangosambua’ö nitutunö ba wama’ele’ö andre manandrösa ia ba ”mbiri-biri bö’ö” hegöi niha nibayoini.
