1, 2. (a) Tutunö gamaedola ni’oguna’ö Yesu sanandrösa khö zokhö kabu agu. (b) Hewisa gamaedola da’a itutunö khöda sanandrösa ba wa’oböwö hegöi fa’ebua dödö?

SIHULÖ wongi, samösa zokhö kabu agu möi ia ba fasa ba wangalui sohalöwö. Ifatunö hauga gazi, ba so ndra matua somasi mohalöwö ba kabunia andrö. Hiza’i, börö me ambö khönia zohalöwö, ifuli möi ia ba fasa ba wangalui ndra matua sohalöwö khönia. Fawu’u li ia wa ibe’e gazira si tefaudu. Ba zi tanö owi, i’owuloi ndra sohalöwö khönia ba ibe’e gazira. Niha sohalöwö ma’ö-ma’ökhö hegöi si ha sambua za, ifagölösi wame’e gazira. Hiza’i, so zohalöwö ma’ö-ma’ökhö, lö omasi ia ba nifalua zokhö kabu. Andrö imane zokhö kabu, ’Hadia lö fao dödöu ba gazi nibe’egu? Hadia tebai ube’e hauga manö gazi somasido ba zohalöwö khögu? Hadia afökhö dödöu börö me oböwö ndra’o?’​—Matai’o 20:1-15

² Moroi ba waö-waö nitutunö Yesu, ifaha’ö ita hadia  zabölö moguna sanandrösa ba ”wa’ebua dödö” Yehowa. ^[1] (Faigi gonönöta.) (Baso II Korindro 6:1.) Hewisa lalania? So zanguma’ö wa ndra matua sohalöwö ma’ö-ma’ökhö, sinangea itema gazi sebua moroi ba danö bö’ö. Hiza’i, sokhö kabu iforoma’ö wa’ebua dödönia khö zohalöwö hewa’ae ha sambua za mohalöwö ia. Samösa niha satua-tua sanguma’ö wa ngawua wehede ”fa’ebua dödö” ba Zura Ni’amoni’ö eluahania ”buala nibe’e zi lö mangandrö sulö mazui buala nibe’e khö zi samösa niha si tenga sinangeania itema.”

3, 4. Hewisa wangoroma’ö Yehowa fa’ebua dödönia ba niha gulidanö, ba hadia mbörö?

³ Ifatunö khöda Sura Ni’amoni’ö wa fa’ebua dödö Lowalangi si tenga sinangea ta’okhögö no sambua ”mbuala”. (Efeso 3:7) Börö me lö mo’ahonoa wolo’öda goi-goi Yehowa, andrö wa tenga sinangea tatema wa’ebua dödö moroi khö Lowalangi. Sindruhunia, sinangea mate ita. Imane Razo Zelomo, ”Lö’ö sa niha satulö ba gulidanö solau si sökhi lö olalöŵa.” (Zangombakha 7:20) Ba gafuriata imane Faulo, ”Noa sa ahori mamazökhi horö ira, ba lö’ö sa si sökhi turiara khö Lowalangi” ba ”luo horö sa, ba fa’amate”.​—Roma 3:23; 6:23a.

⁴ Börö me i’omasi’ö sibai niha gulidanö Yehowa, ibe’e ’Nononia si ha sambua’ ena’ö mate ia salahida. Moroi ba wa’ebua dödönia, da’a nibe’enia sabölö ebua. (Yohane 3:16) Itutunö Faulo wa Yesu andrö ”nifo’aya lakhömi ba sumange, börö wamakao andrö, nitahania, fa’amate andrö, ena’ö itandra wa’amate, salahi niha fefu, balazi wa’ebua dödö Lowalangi”. (Heberai’o 2:9) Atulö, ”ba buala fa’ebua dödö Lowalangi andrö, ba no fa’auri si lö aetu ba khö Keriso Yesu, So’aya ya’ita.”​—Roma 6:23b.

5, 6. Hadia lua-luania na ifatörö ita (a) horö? (b) fa’ebua dödö?

⁵ Hana wa tola so horöda ba mate ita? Imane Sura Ni’amoni’ö, ”Samösa sa mbörö, wa no salawa wa’amate.” Börö me nga’ötö Gadamo ita, lua-luania lö mo’ahonoa ita ba mate. (Roma 5:12, 14, 17) Hiza’i, tola tafili ena’ö lö ifatörö ita horö. Hewisa lalania? Ba ginötö taforoma’ö wamati ba höli nibe’e Keriso, ta’okhögö wa’ebua dödö moroi khö Yehowa. Imane Sura Ni’amoni’ö, ”Ba ba zi no a’oi so horö, ba mendrua manö wa no a’oi so wa’ahakhö dödö göi, ena’ö simane fa’abölö horö andrö, ba wamunu, simanö göi wa’abölö wa’ahakhö dödö andrö, moroi ba wanga’atulö andrö, ba wa’auri si lö aetu, börö Yesu Keriso, So’aya ya’ita.”​—Roma 5:20, 21.

⁶ Hewa’ae ba mbawa horö so ita, hiza’i tola tatimbagö ena’ö böi ifatörö ita horö andrö. Ba ginötö tafalua zala, tola ta’andrö wangefa moroi khö Yehowa. Imane Faulo, ”Tenga sa barö mbaŵa goroisa so ami, no barö mbaŵa wa’ahakhö dödö so ami.” (Roma 6:14) Hewisa wa tola tahalö khöda  wamaha’ö moroi ba wa’ebua dödö Lowalangi? Imane Faulo, ”Noa sa to’ele wa’ebua dödö Lowalangi andrö . . . ifaha’ö ita, ena’ö taböhöli wa lö ba dödöda Lowalangi, awö wangisö andrö, ba gulidanö, ba ena’ö satua-tua ita, ba satulö tödö, ba solo’ö li Lowalangi, ba götö da’e ba gulidanö.”​—Tito 2:11, 12.

7, 8. Hadia geluahania fa’ebua dödö Yehowa ”si no oya ngawalö andrö”? (Faigi gambara ba wamobörö wamaha’ö.)

⁷ Isura Fetero, ”Faoma mitolo nawömi, balazi hadia nitema zamösana buala andrö, simane niha si sökhi, nibe’e fa’ebua dödö Lowalangi andrö ba danga fa’ebua dödö si no oya ngawalö andrö.” (I Fetero 4:10) Hadia geluahania fa’ebua dödö Yehowa ”si no oya ngawalö andrö”? Eluahania, gofu hadia gabula dödö nitaögöda ba wa’auri, ibe’e Yehowa hadia ni’oguna’öda ena’ö lö faröi ita. (I Fetero 1:6) Lö mamalö-malö ibe’e khöda wanolo si tefa’udu ni’oguna’öda ba ginötö so wanandraigö.

⁸ Isura Yohane, ”Me no manema ita fefu fa’ebua dödö si lö aetu-aetu moroi ba zi no a’oi so khönia.” (Yohane 1:16) Börö me oya lala nifalua Yehowa ba wangoroma’ö wa’ebua dödönia, andrö wa tola oya tatema howu-howu. Hadia manö howu-howu andrö?

9. Hadia zi tola tatema moroi ba wa’ebua dödö Yehowa, ba hewisa wa tola ta’andrö saohagölö ba da’ö?

⁹ I’efa’ö Yehowa horöda. Ta’andrö saohagölö ba wa’ebua dödö Yehowa, börö me i’efa’ö horöda. Hiza’i, ifalua da’ö ha na tafalalini gera-erada ba lö mamalö-malö tatimbagö gisö-isö dödö si fasala. (Baso I Yohane 1:8, 9.) Itutunö Faulo khö ndra niha Keriso nibayoini ba götönia, hewisa wangefa’ö Yehowa zala. Imane, ”[Lowalangi] si no mangefa’ö ya’ita ba wa’abölö zogömi-gömi andrö, si no mamawu’a ya’ita, si no molohe ya’ita ba mbanua Nono wa’omasinia andrö. Ba zi so khöda fangöhöli, fangefa’ö horö andrö.” (Kolose 1:13, 14) Ta’andrö sibai saohagölö ba wa’ebua dödö Lowalangi, ba omasi ita wamosumange ya’ia. Ba börö me i’efa’ö zalada Yehowa, andrö wa oya tatema howu-howu sahöli-höli dödö.

10. Hadia zi tola tatema börö wa’ebua dödö Lowalangi?

¹⁰ Tola fahuwu ita khö Lowalangi. Börö me lö mo’ahonoa ita, andrö i’otarai me tumbu, no tobali ita nudu Lowalangi. Hiza’i, imane Faulo, ”Na noa sa mu’atulö ita Lowalangi, ba wa’amate  Nononia, me si fa’udu ita.” (Roma 5:10) Börö höli andrö, tola te’atulö’ö ita khö Lowalangi ba tobali ita si fahuwu khönia. Itutunö Faulo da’a hegöi amakhaitania ba wa’ebua dödö Lowalangi khö ndra talifusö nibayoini, ”Me no satulö tödö ita, iwa’ö Lowalangi, balazi ba wamati, ba no atulö ita Lowalangi, börö Zo’aya ya’ita, Yesu Keriso. Moroi khönia göi, wa tola ta’ondrasi mege wa’ebua dödö andrö, si lö tebulö khöda.” (Roma 5:1, 2) Ta’andrö sibai saohagölö börö me tola fahuwu ita khö Yehowa!

11. Hewisa ndra niha nibayoini wolohe ”mbiri-biri bö’ö” ba wa’atulö?

¹¹ Tola atulö ita föna Lowalangi. Isura Danieli wa ba götö safuria dania, ”satua-tua” ya’ia da’ö niha nibayoini ”si no ato molohe ba wa’atulö”. (Baso Danieli 12:3.) Hewisa wamalua niha nibayoini? Laturiaigö duria somuso dödö ba lafaha’ö zuta ”mbiri-biri bö’ö” ba goi-goi Yehowa. (Yohane 10:16) Da’ö zanolo ya’ira ena’ö atulö föna Lowalangi, ba alua da’a ha börö wa’ebua dödö Yehowa. Itutunö Faulo, ”Ba saoha gölö wa iwa’ö Lowalangi satulö ira, fa’ebua dödönia, börö wangöhöli andrö, ba khö Keriso Yesu.”​—Roma 3:23, 24.

12. Hewisa gamakhaitania fangandrö ba fa’ebua dödö Lowalangi?

¹² Tola ahatö ita khö Lowalangi ba wangandrö. Tola mangandrö ita khö Yehowa börö wa’ebua dödönia. Itutunö Faulo wa dadaoma Yehowa andrö no ”dadaoma wa’ahakhö dödö”, ba ikaoni ita ena’ö tahatö’ö ita ba ”böi aiwö”. (Heberai’o 4:16a, NW) Tola  mangandrö ita ero inötö ba döi Yesu. Da’a sambua töi sebua khöda! Imane Faulo, ”Lö aiwö, awö lala, ba wanötöna, moroi ba wamati andrö khönia.”​—Efeso 3:12.

13. Hewisa wa’ebua dödö andrö ”wanolo ya’ita ba ginötö si tefaudu”?

¹³ Tola tasöndra wanolo ba ginötö si tefaudu. I’o’ou ita Faulo ena’ö mangandrö ita khö Yehowa ero so gabula dödöda, ”ena’ö tatema wa’ahakhö dödö, ba ena’ö falukha ita wa’ebua dödö, fanolo na baŵa moguna”. (Heberai’o 4:16b) Ero tataögö gabula dödö ba wa’aurida, tola ta’andrö wanolo moroi khö Yehowa. Ba ifondro-ndrongo wangandröda Yehowa, hewa’ae na tenga sinangea ifalua da’ö. Asese i’oguna’ö ndra talifusöda ba wamati ba wame’e fanolo khöda. Itema wangandröda Yehowa, ”tobali tola abe’e dödöda wanguma’ö: ’Yehowa zanolo ya’o, lö ata’u ndra’o. Hadia nilau niha khögu?’”—Heberai’o 13:6, NW.

14. Hewisa tola terara dödöda börö wa’ebua dödö Yehowa andrö?

¹⁴ Tola terara dödöda. Da’a sambua howu-howu sebua wondrara dödö nibe’e Yehowa khöda ba ginötö tataögö gabula dödö. (Sinunö 51:19) Me latandraigö niha Keriso ba Desalonika, isura Waulo, ”Ba ya’ia, So’aya ya’ita, Yesu Keriso ba Lowalangi, Amada, si no mangomasi’ö ya’ita, ba si no mame’e fondrara dödö khöda, si lö aetu, awö wanötöna si sökhi ba wa’ebua dödö, ba yamurara dödömi ba yamu’aro’ö.” (II Tesalonika 2:16, 17) Terara dödöda börö me ta’ila wa’ebua dödö Yehowa andrö, i’omasi’ö ba i’ame’egö tödö ita!

15. Börö wa’ebua dödö Lowalangi, hadia wanötöna nitemada?

¹⁵ So khöda wanötöna fa’auri si lö aetu. Börö me niha si so horö ita, lö khöda dötö nafö na lö itolo ita Yehowa. (Baso Zinunö 49:8, 9.) Hiza’i, ibe’e khöda Yehowa wanötöna sahöli-höli dödö. Hadia da’ö? Imane Yesu, ’Somasi Namagu, ena’ö so wa’auri si lö aetu khö zangila Ono fefu, samati khönia.’ (Yohane 6:40) Andrö, so khöda wanötöna fa’auri sagötö fa’ara börö me so wa’ebua dödö Yehowa. Imane Faulo, ”Noa sa to’ele wa’ebua dödö Lowalangi andrö, sangorifi niha fefu.”​—Tito 2:11.

16. Hewisa niha Keriso si föföna la’oguna’ö wa’ebua dödö Lowalangi ba wamalua zala?

¹⁶ Oya howu-howu nitemada ba wa’ebua dödö Yehowa andrö. Hiza’i, böi tamane wanguma’ö, börö wa’ebua dödönia andrö tola manö tafalua zala. Moroi ba gotalua niha Keriso si föföna, so ’zangoguna’ö wa’ebua dödö Lowalangida andrö . . . Ba wamalua horö’. (Yuda 4, NW) Niha Keriso sifaröi andre, so ba wangera-ngerara wa tola manö lafalua horö börö me hasambalö i’efa’ö zalara Yehowa. Ladönisi göi dödö ndra talifusö tanö bö’ö, ena’ö fao ira ba wamalua horö andrö. Iada’a, haniha manö zamalua da’ö no ”i’osiwawöi geheha fa’ebua dödö andrö”.​—Heberai’o 10:29.

17. Hadia mene-mene nibe’e Fetero?

 ¹⁷ Ba ginötö iada’a, i’oguna’ö Satana lala da’ö ena’ö so ba wangera-ngera niha Keriso wa tola manö lafalua zala börö me hasambalö i’efa’ö zalara Yehowa. Sindruhu wa i’efa’ö Yehowa zala niha na lafalalini gera-erara. Hiza’i, omasi ia na tatimbagö gisö-isö dödöda ba wamalua horö. Ibe’e geheha khö Wetero Yehowa ba wanura, ”Ba ya’ami ni’omasi’ö, me no tohöna mi’ila, ba mi’angelama, fa lö adöni ami göi ba wa’elungu zi lö molo’ö andrö, ba fa lö tebulö ami ba wa’aromi andrö. Ba yatedou khömi wa’ebua dödö andrö, ba fa’aboto ba dödömi So’aya ya’ita Yesu Keriso.”​—II Fetero 3:17, 18.

18. Börö wa’ebua dödö Yehowa, hadia halöwö ni’okhögöda?

¹⁸ Ta’andrö sibai saohagölö ba wa’ebua dödö Yehowa. Andrö, ta’oguna’ö howu-howu nitemada ba wamosumange Yehowa hegöi ba wanolo niha bö’ö. Mo’ömö ita khöra. Hewisa tola ta’oguna’ö howu-howu andrö? Imane Faulo, ”Ba no faehu game’ela andrö khöda, balazi wa’ebua dödö andrö si no falukha ita, . . . ba na so zi so halöwö, ba yamuhaogö halöwönia, ba na famaha’ö ba yamamaha’ö, ba na famarou tödö, ba yamufarou dödö niha, . . . ba na sahakhö tödö, ba yamoroi ba dödönia.” (Roma 12:6-8, NW) Andrö, börö wa’ebua dödö Yehowa moguna göi owölö-ölö ita ba halöwö fanuriagö, wamaha’ö niha ba Zura Ni’amoni’ö, mamarou dödö ndra talifusöda ba wamati, hegöi ba wangefa’ö zala niha zangafökhöi’ö dödöda.

19. Hadia halöwö nitutunöda ba migu föna?

¹⁹ No oya howu-howu nitemada börö wa’ebua dödö Yehowa, ba tola tafalua zabölö sökhi ya’ia da’ö ”famaduhu’ö turia somuso dödö, turia wa’ebua dödö Lowalangi andrö”. (Halöwö Zinenge 20:24) Tatutunö halöwö da’a ba wamaha’ö migu fönada.