1-3. (a) Me no aefa tebayagö ita idanö, hadia manö gamuata sabua si tebai taröi? (b) Na abua khöda wombulö’ö fa’aurida, hadia zinangea tasofu khöda? (Faigi gambara ba wamobörö wamaha’ö.)

NO HAUGA fakhe famai Kevin, moroko, mabu ba i’oguna’ö narkoba. ^[1] (Faigi gonönöta.) Aefa da’ö, ifaha’ö ia sanandrösa khö Yehowa ba tobali ia si fahuwu khönia. Hiza’i, ba wamalua ya’ia oya zinangea ibulö’ö ba wa’aurinia. Tola ifalua da’ö börö wanolo moroi khö Yehowa hegöi fa’abölö moroi ba Daromalinia, Sura Ni’amoni’ö.​—Heberai’o 4:12.

² Me no tebayagö idanö Kevin, so nasa zinangea ibulö’ö ba wa’aurinia ena’ö tobali ia niha Keriso si sökhi. (Efeso 4:31, 32) Duma-dumania, alio sibai mofönu ia. Tokea ia me i’ila wa abua wangokhögö fanaha tödö. I’ila Kevin wa abölö abua wangokhögö fanaha tödö moroi ba  womböhöli amuata si lö sökhi si no ifalua fatua lö tebayagö ia idanö! Hiza’i, börö me i’andrö wanolo moroi khö Yehowa ba owölö-ölö ia ba wamaha’ö ya’ia ba Zura Ni’amoni’ö, tola tebulö lagu wa’aurinia.

³ Fatua lö tebayagö ita idanö, oya zinangea tabulö’ö ba wa’aurida ena’ö tefaudu ba niwa’ö Zura Ni’amoni’ö. Hiza’i, irugi iada’a so manö nasa gamuata sinangea tafabö’öni ena’ö tobali simane Lowalangi ba Keriso. (Efeso 5:1, 2; I Fetero 2:21) Duma-dumania, te asese mukökö-kökö ita mazui tafatou-tou ba tawa’ö zi lö baga sanandrösa ba niha bö’ö. Mazui, lö tafalua zatulö börö me talafo ata’u ita ba wehede hegöi ni’era-era niha dania. Tola manö no hauga fakhe taforege wombulö’ö amuatada. Hiza’i, ifuli zui tafalua gamuata si lö sökhi si no irai tafalua. Tobali, te manofu ita, ’Hana wa abua khögu wofabö’öni gamuatagu andre? Hadia zinangea ufalua ena’ö ufaudugö ba wa’aurigu niwa’ö Zura Ni’amoni’ö irege tola ubohouni gamuatagu?’

4. Hana wa lö ta’ila ta’omusoi’ö dödö Yehowa ba ngawalö nifaluada?

⁴ Börö me ta’omasi’ö Yehowa, andrö tafalua zomasi ia soroi ba dödö. Hiza’i, lö ta’ila ta’omusoi’ö dödönia sagötö fa’ara börö me lö so’ahonoa ita. Asese tawa’ö simane niwa’ö Waulo, ”So sa khögu wa’edöna, ba famalua si sökhi andrö, ba lö’ö.”​—Roma 7:18; Yakobo 3:2.

5. Hadia zi no taböhöli fatua lö tebayagö ita idanö, ba hadia manö walömo’ahonoa zi tobali abula dödöda?

⁵ Fatua lö tobali ita ono mbanua Yehowa, tabato wamalua hadia ia zi fatuwu khönia. (I Korindro 6:9, 10) Hiza’i, lö nasa so’ahonoa ita. (Kolose 3:9, 10) Hewa’ae no tebayagö ita idanö ba zi hauga fakhe fa’ara, lö manö aefa tafalua zala. Ero inötö, so manö gisö-isö dödö hegöi fangera-ngerada si fasala, mazui abua khöda wo’angenanöi amuatada. Sindruhunia, moguna talawa walömo’ahonoada ba zi hauga fakhe.

6, 7. (a) Hewa’ae lö mo’ahonoa ita, hana wa tola tobali ita si fahuwu khö Yehowa? (b) Hadia mbörö wa böi aombö dödöda wangandrö khö Yehowa ena’ö i’efa’ö zalada?

⁶ Hewa’ae lö mo’ahonoa ita, tola tobali ita si fahuwu khö Yehowa ba tafosumange ia. Törö tödöu hewisa me awena tobali ndra’ugö si fahuwu khö Yehowa. Ha ya’ia Samösa zangila si sökhi zi no öfalua ba omasi ia na so khöu wa’aboto ba dödö sanandrösa khönia. (Yohane 6:44) I’ila wa so zala hegöi so’amböta ndra’ugö ba lö manö nasa aefa öfalua golalöwa. Hiza’i, omasi Yehowa na tobali ndra’ugö si fahuwu khönia.

⁷ Börö me i’omasi’ö sibai ita Yehowa, ibe’e khöda mbuala sebua böli. Ifatenge Nononia Yesu ba gulidanö ena’ö tobali höli börö horöda. (Yohane 3:16) Na tafalua zala, tola ta’andrö wangefa moroi khö Yehowa. Faduhu dödöda wa i’efa’ö golalöwada ba tobali si fahuwu khönia ita börö höli si no ibe’e. (Roma 7:24, 25; I Yohane  2:1, 2) Törö tödöu, andrö wa mate Yesu börö niha sebua horö si no mombulö’ö fa’aurira. Hewa’ae ta’ila wa lö sökhi gamuatada, böi aetu-aetu ta’andrö khö Yehowa ena’ö i’efa’ö zalada. Na lö ta’andrö khönia ba wangefa’ö salada, fagölö geluahania na lö omasi tasasai dangada si no ta’unö. Ta’andrö sibai saohagölö me no itehegö khöda Yehowa tobali si fahuwu khönia hewa’ae lö mo’ahonoa ita!​—Baso I Timoteo 1:15.

8. Hadia mbörö wa tebai ta’aohasi ba dödö zala nifaluada?

⁸ Tatu manö, böi ta’aohasi ba dödö zala nifaluada mazui ta’alu-alui dani ba wamalua ya’ia. No ifatunö khöda Yehowa haniha niha zi tola tobali si fahuwu khönia. (Zinunö 15:1-5) Na omasi ita ahatö khönia, moguna ta’o’ö ia hegöi Ononia. Ta’angenanöi gisö-isö dödöda si fasala ba tatimbagö ia. Hewa’ae no ara tebayagö ita idanö, böi aetu tabulö’ö gamuatada.​—II Korindro 13:11.

9. Hezo ta’ila wa tola tabohouni gamuatada?

⁹ Imane Faulo ba niha Keriso, ”Wa niheta niha si tohöna andrö khömi, ba lala föna andrö, samakiko ya’ia, ba wangisö andrö, ba wa’elungu. Ba nibohouni ami, ba gera-era dödömi andrö. Ba mi’onukha niha si bohou andrö, nibe’e famaedo Lowalangi, wamazökhi ya’ia, ba wa’atulö dödö ba ba wa’ohahau, ba zi duhu.” (Efeso 4:22-24) Eluahania, moguna taforege wombulö’ö fa’aurida ba ’ta’onukha niha si bohou andrö’. Hewa’ae no ara ita tobali samosumange Yehowa, tola tafaha’ö ita ba gamuatania. Itolo ita göi Sura Ni’amoni’ö ba wamohouni amuatada ena’ö tobali ita simane ya’ia.

10. Börö wanolo moroi ba Zura Ni’amoni’ö, hadia zinangea tafalua ena’ö tola tabulö’ö gamuatada, ba hadia zinangea tasofu khöda?

¹⁰ Tatu manö omasi ita ta’o’ö hadia niwa’ö Zura Ni’amoni’ö. Tobali, moguna taforege na omasi ita tabulö’ö gamuatada. Hadia mbörö? Hana wa lö iheta manö Yehowa gamuatada si lö sökhi?

11-13. Hana wa lö iheta manö Yehowa gamuatada si lö sökhi?

¹¹ Ba ginötö takhalaigö mbanua si yawa awö danö hegöi ngawalö nösinia, lö aombö dödöda wa so wa’abölö khö Yehowa ba wamalua hadia ia. Duma-dumania, no ifazökhi luo saukhu sibai. Ero inötö, luo andre i’asogö haga hegöi wa’aukhu sabölö-bölö. Ha ma’ifu moroi ba wa’abölönia ni’oguna’öda ba wa’auri andre ba gulidanö. (Zinunö 74:16; Yesaya 40:26) Ibe’e göi Yehowa wa’abölö ba nono mbanuania si so ba gulidanö ba ginötö moguna. (Yesaya 40:29) Na omasi Yehowa, tola manö  iheta walömo’ahonoada hegöi gisö-isö dödö si fasala irege lö moguna taforege wolawa ya’ia. Tobali, hana wa lö ifalua da’ö?

¹² No itehegö khöda Yehowa ba wamalua hadia ia zomasi ita tafalua. Itehegö khöda ba wofili hadia ta’o’ö niwa’önia mazui lö’ö. Na ta’o’ö ba taforege wamalua somasi ia, da’ö dandra wa ta’omasi’ö ba ta’omusoi’ö dödönia. Imane Satana wa tenga sinangea mamatörö Yehowa. Hiza’i, na ta’o’ö niwa’ö Yehowa no taforoma’ö wa omasi ita na tobali ia Samatörö ya’ita. Tola faduhu dödöda wa i’osinangegö Amada sebua fa’omasi fefu nifaluada ba wolo’ö ya’ia. (Yobi 2:3-5; Gamaedola 27:11) Na taforege wolawa falömo’ahonoada hewa’ae abua wamalua ya’ia, da’ö dandra wa lö faröi ita khö Yehowa ba omasi ita na tobali ia Samatörö ya’ita.

¹³ Imane khöda Yehowa wa moguna ta’odödögö wolo’ö amuatania. (Kolose 3:12; baso II Fetero 1:5-7.) Itötöna khöda ena’ö ta’angenanöi hadia ni’era-erada hegöi gisö-isö dödöda. (Roma 8:5; 12:9) Na taforege wombulö’ö fa’aurida irege mofozu, tasöndra wa’ohahau dödö.

14, 15. Hadia zinangea tafalua ena’ö ta’okhögö gamuata somasi Yehowa? (Faigi kotak ” Sura Ni’amoni’ö Hegöi Fangandrö Zombulö’ö Fa’aurira”.)

¹⁴ Hadia zinangea tafalua ba wangokhögö amuata somasi Yehowa?  Moroi na ya’ita zotatugöi hadia zinangea tabulö’ö, datatehegö khö Lowalangi wame’e khöda fanuturu lala. Imane Roma 12:2, ”Böi mifaomagö ami ba niha zi sagötö tanö andre, mibali’ö ami, wamohouni era-era dödömi, ena’ö mi’ila mitimba tödömi hadia nilau dödö Lowalangi, hadia zi sökhi, hadia wa’omasinia ba hadia zo’ahonoa.” Ena’ö ta’ila hadia zomasi Yehowa, moguna ta’odaligö wanolo si no ihenaigö. Moguna tabaso Zura Ni’amoni’ö ero ma’ökhö, ta’angerönusi zi no tabaso ba ta’andrö geheha moroi khö Yehowa. (Luka 11:13; Galatia 5:22, 23) Tola itolo ita Yehowa ena’ö ta’ila hadia zomasi ia ba tola tafaha’ö ita ena’ö tafaudugö lala wangera-ngerada khönia. Na tafalua da’ö, tola omuso dödö Yehowa ba ni’era-erada, fehededa hegöi nifaluada ba tola ta’ila hewisa wo’angenanöi amuatada. Börö da’ö, böi aetu-aetu taforege ba wotimbagö ya’ia.​—Gamaedola 4:23.

¹⁵ Ba wombaso Sura Ni’amoni’ö ero ma’ökhö, ta’oguna’ö wanolo moroi ba publikasida simane Manuriaigö ba Sadarlah! Oya duho-tuho ba majalah andrö zanolo ya’ita ba wolo’ö amuata Yehowa hegöi ba wolawa falömo’ahonoada. Te so duho-tuho mazui ayati si tefaudu khöda. Tola ta’owuloi ia ena’ö tafuli tabaso ero inötö.

16. Hana wa lö moguna afatö dödöda na ara tebulö wa’aurida?

 ¹⁶ Moguna ginötö ba wolo’ö amuata Yehowa. Na ömane tödöu wa so nasa zinangea öbulö’ö ba wa’auriu, moguna so khöu wa’ebolo dödö. Si oföna, moguna öfaso ndra’ugö samösa ba wamalua hadia niwa’ö Zura Ni’amoni’ö. Na itugu ö’angeraigö ba öfalua hadia zomasi Yehowa, itugu aoha khöu ba wolo’ö fangera-ngerania hegöi ba wamalua satulö.​—Zinunö 37:31; Gamaedola 23:12; Galatia 5:16, 17.

17. Na lö faröi ita khö Yehowa, hadia nidöna-dönada ba zi so föna?

¹⁷ Tadöna-döna ginötö wa mo’ahonoa ita hegöi ba wamosumange Yehowa sagötö fa’ara. Ba luo da’ö, lö moguna talawa walömo’ahonoada. Aoha khöda ba wolo’ö Yehowa. Hewa’ae simane da’ö, tola tafosumange Yehowa ba ginötö andre börö me no ibe’e khöda höli. Hewa’ae lö mo’ahonoa ita, tola ta’omusoi’ö dödönia na taforege wombulö’ö fa’aurida ba ta’o’ö hadia zi no ifaha’ö ba Zura Ni’amoni’ö.

18, 19. Hana wa faduhu dödöda wa mofa’abölö Zura Ni’amoni’ö ba wombulö’ö fa’aurida?

¹⁸ I’angenanöi Kevin ena’ö lö alio mofönu ia. I’angerönusi zi no ibaso ba Zura Ni’amoni’ö ba i’odödögö wombulö’ö fa’aurinia. I’o’ö mene-mene nibe’e ndra talifusöda niha Keriso. Hewa’ae iforege wombulö’ö amuatania ba zi hauga fakhe fa’ara, ba ginötönia tobali ia samösa enoni sohalöwö. Barö zi 20 fakhe andre, no tobali ia satua sokubaloi. Hewa’ae simanö, aboto ba dödönia wa moguna ilawa walömo’ahonoania irugi mane ma’ökhö.

¹⁹ Simane Kevin, tola tabohouni gamuatada. Na tafalua da’ö, itugu ahatö ita khö Yehowa. (Zinunö 25:14) Na ta’odödögö wombulö’ö fa’aurida ba wangomusoi’ö tödönia, itolo ita ena’ö mofozu nifaluada. Tola faduhu dödöda wa Sura Ni’amoni’ö zi tola mombulö’ö fa’aurida.​—Zinunö 34:9.