1, 2. (a) Hewisa dödö ndra Samaduhu’ö Yehowa sanandrösa ba Zura Ni’amoni’ö? (b) Hadia mbuku sabölö ö’omasi’ö ba Zura Ni’amoni’ö?

YA’ITA Samaduhu’ö Yehowa, tatu manö ta’omasi’ö Zura Ni’amoni’ö. Ibe’e khöda wondrara dödö, fanötöna, ba fanuturu lala si tola tafaduhusi tödö. (Roma 15:4) Tenga moroi ba wangera-ngera niha gulidanö nösinia, hiza’i no ”Taromali Lowalangi”.​—I Tesalonika 2:13.

² Fefu ita oi so mbuku sabölö ta’omasi’ö ba Zura Ni’amoni’ö. So zomasi mombaso Injil börö me oroma ba wa’auri Yesu gamuata Yehowa sadöni dödöda. (Yohane 14:9) So ösa zomasi mombaso buku sanandrösa ba wama’ele’ö simane zura Fama’ele’ö, börö da’a zangoroma’ö ”hewisa dania, si lö ara tö”. (Fama’ele’ö 1:1) So zi terara tödö ba wombaso mbuku Zinunö ba so göi zomasi mombaso mene-mene si no tesura ba mbuku Gamaedola. Sindruhu wa Sura Ni’amoni’ö buku ba niha fefu.

3, 4. (a) Hewisa dödöda sanandrösa ba publikasida? (b) Ha’ökhö manö tehenaigö publikasida?

³ Börö me ta’omasi’ö Zura Ni’amoni’ö, ta’omasi’ö göi  publikasida börö me te’odane-dane ia ba Daromali Lowalangi. No ihenaigö khöda Yehowa mbuku, buku side-ide, majalah hegöi lektur tanö bö’ö. Da’a zanolo ya’ita ena’ö ahatö khönia ba aro wamatida.​—Tito 2:2.

⁴ Oya publikasida si no muhenaigö khö ndra Samaduhu’ö Yehowa fefu. So publikasi nifa’anö molo’ö fa’alawa ndröfi, simane ba zi bohou ebua mazui ba zatua. Oya duho-tuho hegöi video ba situs Web khöda nifa’anö ba niha si tenga Samaduhu’ö Yehowa. Moroi ba ngawalö zi no muhenaigö andrö, oroma wa ifalua Yehowa zi no ifabu’u ba wame’e fanuturu lala ba niha fefu.​—Yesaya 25:6.

5. Hadia zi faduhu dödöda sanandrösa khö Yehowa?

⁵ Ato moroi ba gotaluada zame’e inötöra ba wombaso Sura Ni’amoni’ö hegöi publikasi. Hiza’i, lö fagölö-gölö ginötö ni’oguna’öda ba wamaha’ö ya’ita ba publikasi si no tatema. Faduhu dödöda wa omuso dödö Yehowa na atua-tua ita wangoguna’ö inötö ba wombaso hegöi ba wamaha’ö ya’ita. (Efeso 5:15, 16) Hewa’ae simanö, so zinangea ta’angenanöi. Hadia da’ö?

6. Hadia mbörö wa lö ta’ila tahalö wamaha’ö moroi ba zi no ihenaigö Yehowa?

⁶ Na lö mangelama ita, tola manö so ba wangera-ngerada wanguma’ö wa so ösa moroi ba Zura Ni’amoni’ö mazui publikasi si lö moguna khöda. Duma-dumania, hewisa na so nösi Zura Ni’amoni’ö si lö tefaudu ba zalua khöda? Mazui, hewisa na tenga khöda manandrösa publikasi andrö? Hadia ha asala no tabaso ia mazui lö tabaso? Na tafalua da’ö, tola manö lö ta’ila hadia gunania khöda. Hewisa ena’ö tatimbagö wama’ala simane da’ö? Böi olifu ita wa moroi khö Yehowa fefu nibasoda andrö. Imane Sura Ni’amoni’ö, ”Ya’o, Yehowa, Lowalangiu zamahaö ya’ugö ba zoguna khöu.” (Yesaya 48:17) Ba duho da’a, so tölu wanuturu lala si tola manolo ya’ita ba wangoguna’ö fefu zi no ihenaigö Yehowa khöda.

7. Hana wa moguna tabokai gera-erada ba wombaso Sura Ni’amoni’ö?

⁷ Tabokai gera-erada ba wombaso ya’ia. Sindruhu sa wa so ösa nösi Zura Ni’amoni’ö si no mutatugöi ha’ökhö manandrösa ia. Hewa’ae simanö, iwa’ö Sura Ni’amoni’ö wa ”fefu nösi zura andrö, ba eheha Lowalangi zame’e ba dödö niha, ba moguna ia”. (II Timoteo 3:16) Andrö wa moguna tabokai gera-erada ba wombaso Sura Ni’amoni’ö. Lö olifu samösa dalifusöda ira matua wa oya wamaha’ö nihalönia me ibaso sambua waö-waö si so ba Daromali. Da’a zanolo ya’ia ba wangai famaha’ö hewa’ae lö hauga oroma. Börö da’ö, fatua lö tabaso Zura Ni’amoni’ö, ta’andrö khö Yehowa ena’ö ibokai wangera-ngerada ba ibe’e khöda wa’atua-tua ena’ö ta’ila hadia wamaha’ö somasi ia tahalö.​—Gesera 7:10; baso Yakobo 1:5.

8, 9. (a) Hadia zinangea tasofu khöda ba ginötö tabaso Zura Ni’amoni’ö? (b) Moroi ba goi-goinia sanandrösa khö ndra satua sokubaloi niha Keriso, hadia ni’ilada sanandrösa khö Yehowa?

⁸ Be’e wanofu. Ba ginötö öbaso Zura Ni’amoni’ö, batogö ba sofu khöu samösa:  ’Hadia wamaha’önia khögu sanandrösa khö Yehowa? Hewisa ena’ö tola u’oguna’ö ia ba wa’aurigu? Hewisa ena’ö u’oguna’ö ia ba wanolo niha bö’ö?’ Na ta’angerönusi wanofu andre, tola tasöndra wamaha’ö moroi ba wombaso Sura Ni’amoni’ö. Datafaigi sambua duma-duma. Itutunö khöda Sura Ni’amoni’ö hadia ni’andrö khö ndra satua sokubaloi niha Keriso. (Baso I Timoteo 3:2-7.) Tola manö imane tödöda wa lö moguna khöda goi-goi andrö börö me lö fefu ita tobali satua sokubaloi. Hewa’ae simanö, data’oguna’ö wanofu si tölu ngawua andre si no mututunö moroi yawa ena’ö ta’ila hewisa wa tola tetolo ita ba goi-goi andrö.

⁹ ”Hadia wamaha’önia khögu sanandrösa khö Yehowa?” No izara-zara wanutunö khöda Yehowa hadia manö ni’andrö khö ndra satua sokubaloi. So goi-goi salawa ni’andrönia ba ndra matua sangai halöwö ba mbanua niha Keriso. Da’a zangoroma’ö wa moguna sibai mbanua niha Keriso khö Yehowa. Imane Sura Ni’amoni’ö wa no ihöli ira ”faoma do Nononia samösa”. (Halöwö Zinenge 20:28, NW) Tobali, itötöna Yehowa khö ndra satua sokubaloi ena’ö tobali ira duma-duma si sökhi, labu’a föna Lowalangi hewisa wolohera ono mbanuania. Omasi ia na ohahau dödöda börö me la’ame’egö tödö ita ira satua sokubaloi. (Yesaya 32:1, 2) Na tabaso goi-goi  andrö, ta’ila hawa’ebua wa’omasi Yehowa khöda.

10, 11. (a) Hadia gunania ba wa’aurida na tabaso goi-goi sanandrösa khö ndra satua sokubaloi? (b) Hewisa ena’ö ta’oguna’ö ia ba wanolo niha bö’ö?

¹⁰ ”Hewisa ena’ö tola u’oguna’ö ia ba wa’aurigu?” Na no tobali ndra’ugö satua sokubaloi, moguna öfuli öfaigi goi-goi andrö ba dou’ö zi lö nifaluau. Na omasi ndra’ugö ’wangalui halöwö satua niha Keriso’, odödögö wamalua goi-goi andrö. (I Timoteo 3:1) Fefu niha Keriso tola lahalö wamaha’ö moroi ba goi-goi andrö. Duma-dumania, itötöna khöda Yehowa ena’ö so khöda wa’aboto ba dödö hegöi fangera-ngera si sökhi. (Filifi 4:5; I Fetero 4:7) Na ”tobali duma-duma ami [ira satua sokubaloi], ba nikubaloi andrö”, tola tafaha’ö ita khöra ba ’ta’ohia’ö wamatira andrö’.​—I Fetero 5:3; Heberai’o 13:7.

¹¹ ”Hewisa ena’ö u’oguna’ö ia ba wanolo niha bö’ö?” Goi-goi si no muzara-zara khö ndra satua sokubaloi niha Keriso andrö, tola ta’oguna’ö ba wanolo niha nifaha’öda hegöi niha sadöni dödö ba Zura Ni’amoni’ö, ena’ö aboto ba dödöra hadia gamaehuta zatua sokubaloi moroi khö ndra sondrönia’ö ba agama. Da’ö göi zanolo ya’ita ena’ö lö olifu ita halöwö ni’onorogö tödö ndra satua sokubaloi ba gangowuloa. Tetolo ita göi ba wamosumange ya’ira. (I Tesalonika 5:12) Itugu tafosumange ira, itugu omuso dödöra ba wamalua halöwöra.​—Heberai’o 13:17.

12, 13. (a) Molo’ö fakake si no tehenaigö khöda, hadia wanofu sinangea ta’alui wanema li? (b) Be’e duma-duma hewisa wa tola tahalö wamaha’ö si lö ta’ila me mböröta.

¹² Alui. Na tafaha’ö ita ba Zura Ni’amoni’ö, tola ta’alui wanema li moroi ba wanofu-nofu andre:

• Haniha zanura ösi Zura Ni’amoni’ö andre?

• Hezo ba hamega musura ia?

• Hadia zahöli-höli dödö salua me musura mbuku andre?

Da’a zanolo ya’ia ba wangai famaha’ö si lö ta’ila me mböröta.

¹³ Duma-dumania, imane Hezekieli 14:13, 14, ”Na mosala khögu niha ba danö, heza, na faröi ira khögu, ba na ubabaya ira, na ufufu wangabe’era andrö, öra, na ufatörö khöra lofo ba na uhori ba danö niha, fabaya uriföra, ba na so ba danö andrö niha andrö si datölu: Noakhi ba Danieli ba Yobi, ba ha ya’ira zauri, ba wa’atulö dödöra andrö, iwa’ö So’aya, Yehowa.” Na tahaogö ta’alui, tola ta’ila wa ngawua wehede da’a isura Hezekieli mato 612 fakhe SM. No hauga ngaotu fakhe mate Noakhi hegöi Yobi me luo da’ö. Hiza’i, lö olifu Yehowa wa’alöfaröira. Lö si mate nasa Danieli me luo da’ö. Te 20 fakhe ia me imane Yehowa wa ya’ia niha satulö tödö simane  Noakhi hegöi Yobi. Hadia wamaha’önia khöda? Ifaigi ba i’ame’egö tödö Yehowa wa’alöfaröi nono mbanuania hegöi ndraono si bohou ebua.​—Zinunö 148:12-14.

14. Hadia gunania lektur si no tehenaigö ba zi bohou ebua, ba hewisa göi ena’ö so gunania khöda? (Faigi gambara ba wamobörö wamaha’ö.)

¹⁴ Lektur ba zi bohou ebua. No tafaha’ö ita wa tola tahalö wamaha’ö moroi ba nösi Zura Ni’amoni’ö hegöi ba ngawalö publikasida. Datafaigi duma-dumania. Barö zi hauga fakhe andre, oya zi no ihenaigö Yehowa ba zi bohou ebua. ^[1] (Faigi gonönöta.) Da’a zanolo ya’ira ba wanaögö fanandraigö salua khöra ba zekola hegöi na tedou wa’ebua-buara. Hiza’i, hewisa wa tola tahalö wamaha’ö na tabaso duho-tuho hegöi mbuku andrö? Na tabaso zi no muhenaigö andrö, tola ta’ila hadia gabula dödö zi bohou ebua ba tola tabe’e wanolo hegöi famarou dödö khöra.

15. Hana wa moguna adöni dödö niha Keriso si no alawa döfi ba wombaso ngawalö zi no muhenaigö ba zi bohou ebua?

¹⁵ Böi so wayawasa ba niha Keriso si no alawa döfi na so nibasora sanandrösa ba zi bohou ebua. Oya gabula dödö nidunö-dunö ba duho andrö soguna ba niha Keriso fefu. Duma-dumania, fefu ita moguna tafaduhu’ö wamatida, tataha wönuda, tatimbagö wanandraigö moroi ba nawöda si fagölö ya’ita ba tatimbagö wahuwusa hegöi hiburan si lö sökhi. Tobali, hewa’ae ba ndraono si bohou ebua musura publikasi andrö, fefu nösinia te’odane-dane ba Zura Ni’amoni’ö ba fefu niha Keriso tola lahalö khöra wamaha’ö.

16. Hadia manö nasa guna publikasi si no muhenaigö ba zi bohou ebua?

¹⁶ Publikasi nihenaigö ba zi bohou ebua, tola möi fanolora ba wanga’aro’ö fahuwusara khö Yehowa. (Baso Zangombakha 12:1, 13.) Moguna göi ba niha si no alawa döfi. Duma-dumania, ba Sedarlah! mbaŵa si Öfa 2009, so duho ”Kaum Muda Bertanya . . . Bagaimana Aku Bisa Menikmati Pembacaan Alkitab?” So wanuturu lala ba duho andrö ba so göi kotak si tola laguti, la’irö’ö ba la’oguna’ö ba wamaha’ö. Hadia so gunania duho da’a ba niha salawa döfi? Itutunö samösa wo’omo ira alawe si so iraono wa abua sibai khönia wombaso Sura Ni’amoni’ö. Hiza’i, i’oguna’ö wanuturu lala si so ba duho andrö ba omuso dödönia me i’ila wa oi mo’amakhaita nösi Zura Ni’amoni’ö andrö irege tola mu’ehaogö gambara si sökhi. Imane, ”Iada’a adöni sibai dödögu wombaso Sura Ni’amoni’ö.”

17, 18. Hewisa wa tola tahalö wamaha’ö ba wombaso lektur nihenaigö ba niha sato? Be’e duma-duma.

¹⁷ Lektur ba niha sato. I’otarai me  döfi 2008, omuso dödöda me so mbuku Manuriaigö edisi wamaha’ö. Muhenaigö ia khö ndra Samaduhu’ö Yehowa. Hiza’i, so göi majalah si tola tabe’e ba niha sato. Hewisa wa tola tahalö wamaha’ö moroi ba majalah andrö? Datafaigi sambua duma-duma. Tatu manö, omuso dödöu na möi niha nikaoniu ba Balai Mbanua Lowalangi. Ba ginötö lafa’ema huhuo sebua, ö’angeraigö hewisa dödö niha nikaoniu ba zi no irongo andrö, ba hewisa ena’ö tola ibulö’ö wa’aurinia. Ba gafuriatania, fagöna ba dödöu ba ö’andrö saohagölö ba duho si no mufa’ema andrö.

¹⁸ Simanö göi ba ginötö tabaso lektur nihenaigö ba niha sato. Duma-dumania, edisi umum mbuku Manuriaigö hegöi duho-tuho si no muhenaigö ba jw.org, la’oguna’ö ngawua wehede salio mu’ila eluaha ba wanutunö ösi Zura Ni’amoni’ö. Na tabaso ia, itugu monönö wa’aboto ba dödöda hegöi fa’omasida ba zindruhu sanandrösa ba Zura Ni’amoni’ö si no ara ta’ila. Tafaha’ö ita göi ba lala si bohou ba wanutunö famatida ba ginötö manuriaigö. Simanö göi, majalah Sadarlah! zame’e khöda fa’afaduhu dödö wa so Zomböi fa’auri irege tetolo ita ba wamaduhu’ö famatida.​—Baso I Fetero 3:15.

19. Hewisa wangoroma’öda wa ta’andrö saohagölö khö Yehowa ba zi no ihenaigö khöda?

¹⁹ Oya mene-mene ba fanuturu lala si no ihenaigö Yehowa khöda. (Matai’o 5:3) Böi tabato wombaso hegöi wamalua fefu zi no ihenaigö khöda. Na tafalua da’ö, tola tahalö wamaha’ö ba taforoma’ö khö Yehowa wa ta’andrö saohagölö ba zi no ihenaigö andrö.​—Yesaya 48:17.