TUHO SI OFÖNA | HANA WA TEFAKAO BA MATE YESU?
Hadia Sindruhu-ndruhu No Alua?
Me musim semi 33 M, labunu Yesu, niha Nazareta andrö. No laböbögö khönia zi lö duhu, lö fa’ahakhö dödö ba wamöbözi ya’ia, ba la’osö ia ba döla geu. Hiza’i, isusugi ia Lowalangi, ba 40 hari aefa da’ö tefazawa ia ba zorugo.
Tola ta’ila waö-waö salua andre moroi ba zi öfa ngawua Injil ba Mbuku Nisura ba Li Ndrawa Heleni, mazui tefotöi ia Gamabu’ula Li si Bohou. Hadia sindruhu-ndruhu no alua ia andrö? Fanofu da’a moguna sibai. Tola manö zaya-zaya gölö wamati niha Keriso na lö salua ia, ba fanötöna sanandrösa ba wa’auri si lö aetu ba Waradaiso hulö zi no amaedola fangifi. (I Korindro 15:14) Hiza’i na no alua, so wanötöna ba niha gulidanö ba zi so föna, da’a zasese ta’ombakha’ö ba niha. Tobali, hadia sindruhu-ndruhu no alua waö-waö nisura ba Injil andrö mazui ha hikaya ia?
SI TOLA TA’ILA MOROI BA ZALUA
No tefaudu wanura Injil andrö ba no muhaogö wanutunö ösinia, tenga simane hikaya. Duma-dumania, sindruhu-ndruhu so döi-töi mbanua si no tesura ba Injil andrö. Irugi iada’a ato niha si möi manörö-nörö ba mbanua andrö. Döi-töi niha si no tesura ba mbuku andrö sindruhu-ndruhu so ira, tefaudu ba zi no lasöndra ira sejarawan.—Luka 3:1, 2, 23.
Niha sanura ba ndröfi si föföna hegöi si mendrua lasura waö-waö wa’auri Yesu. * Lala wa’amatenia nidunö-dunö ba Injil tefaudu simane nifalua niha Roma na so niha nibunura meluo da’ö. Sindruhu-ndruhu no alua zi no musura andre, ba lö labini’ö gofu hadia ia zalua. Ba mbuku Injil andre, idunö-dunö zala nifalua ndra nifaha’ö Yesu. (Matai’o 26:56; Luka 22:24-26; Yohane 18:10, 11) Da’a zangoroma’ö wa lö lalau waya ndra sanura Injil andrö ba tefaudu nisurara sanandrösa khö Yesu.
HADIA SINDRUHU-NDRUHU NO TESUSUGI YESU?
Hewa’ae ato niha zi faduhu tödö wa no auri Yesu ba mate ia, so ösa zi lö faduhu tödö me tesusugi ia. Ira nifaha’önia si felezara manö lö faduhu dödöra me awena larongo wa no tesusugi ia. (Luka 24:11) Hiza’i, ba ginötö bö’ö awena faduhu dödöra hegöi ndra nifaha’önia tanö bö’ö me la’ila wa sindruhu-ndruhu no tesusugi Yesu. Me samuza inötö, töra 500 niha sangila wa no tesusugi ia.—I Korindro 15:6.
Me no lara’u Yesu ba labunu ia, owölö-ölö ndra nifaha’önia ba wangombakha ba niha fefu wa no tesusugi ia. La’ombakha’ö göi ba niha si no irai mamunu ya’ia. (Halöwö Zinenge 4:1-3, 10, 19, 20; 5:27-32) Hadia ata’u ndra nifaha’ö andrö wanuriaigö na lö ni’ilara wa sindruhu-ndruhu no tesusugi Yesu? Fanusugi Yesu andrö sökhi lua-luania irege monönö wa’ato niha Keriso irugi mane ma’ökhö.
Fa’amate ba fanusugi Yesu sindruhu-ndruhu no alua ia simane si no tesura ba mbuku Injil. Na tahaogö ta’osisi’ö wombaso ya’ia, tola faduhu dödöda wa sindruhu-ndruhu no alua ia. Itugu faduhu dödöda nasa na so khöda wa’aboto ba dödö hadia mbörö wa’alua ia. Ba da’ö ta’ila ba duho aefa da’a.
^ par. 7 Tacitus, tumbu ia me 55 M, isura wa ”töi niha Keriso tehalö ba döi Keriso. Tefakao ia barö wamatörö Kaizaro Tiberio ba danga Kumandro Wondrio Filato Roma.” Lasura göi sanandrösa khö Yesu ira Suetonius (me döfi si föföna), sejarawan Yehuda sotöi Yosefus (me döfi si föföna), ba Plinius Muda, gubernur Bitinia (me teberögö ndröfi si dua).
