1, 2. (a) Hadia wamangelama si no labe’e ena’ö lö tekiko wa’auri niha sato? (Faigi gambara ba wamobörö wamaha’ö.) (b) Hadia wanuturu lala nibe’e ba nono mbanua Lowalangi?

”BATOGÖ, FAIGI, FONDRO-NDRONGO.” Töra 100 fakhe ba zilalö, no musura ngawua wehede andrö ba wafa nifasa ba lala nitörö kereta api ba mbanua Amerika Utara. Moguna ia ena’ö lö fatandru moto si fazuzu ba kereta api. Ato niha sauri börö me la’ame’egö tödö wamangelama andrö.

² Tenga ha tandra wamangelama nibe’e Yehowa khöda. Hiza’i, ibe’e khöda wanuturu lala ena’ö te’orifi ita ba aröu moroi ba ngawalö wama’ala. No amaedola gubalo sebua fa’omasi Yehowa andrö, ibe’e wanuturu lala ba ifangelama nono mbiri-birinia ena’ö lö latörö lala si möi famakiko fa’aurira.​—Baso Yesaya 30:20, 21.

3. Hadia mbörö wa mate niha gulidanö?

³ Ibe’e Yehowa wanuturu lala hegöi oroisa ba nono mbanuania i’otarai me iwöwöi niha gulidanö. Duma-dumania  ba kabu Edena. Na la’o’ö goroisa Yehowa so wa’ohahau dödö ba niha sagötö fa’ara. (I Moz. 2:15-17) Hiza’i, lö i’o’ö Adamo ba Khawa wanuturu lala nibe’e Namara sebua fa’omasi. Abölö i’o’o Khawa wanuturu lala nibe’e gulö, ba fao göi Gadamo. Hadia lua-luania? Göna ira fangabu dödö ba fa’amate sagötö fa’ara. Baero da’ö, fefu nga’ötöra latörö wa’amate.

4. (a) Hadia mbörö wa moguna ba niha wanuturu lala si bohou me no aefa Anönö Danö Idanö? (b) Moroi ba goroisania sanandrösa ba ndro, hewisa wamaigi Lowalangi fa’auri?

⁴ Ibe’e Lowalangi wanuturu lala si bohou khö Noakhi. Me no awai Anönö Danö Idanö, lö itehe Yehowa ba niha gulidanö wemanga mazui ba wamadu do. Hadia mbörö? I’otarai da’ö, itehegö ba niha Yehowa wemanga nagole. Börö da’ö, moguna ba niha goroisa si bohou, ”Ha nagole si so noso na bakha, si so donia na, ba lö tola mi’a.” (I Moz. 9:1-4) Noso zi samösa niha da’ö wa’aurinia. Moroi ba goroisa andrö, aboto ba dödöda hewisa wamaigi Lowalangi wa’auri. Fa’auri andrö no okhötania, börö me ya’ia Zamazökhi ya’ita. Börö da’ö, no sinangea ibe’e wanuturu lala sanandrösa ba wa’auri. Duma-dumania, lö itehe ba niha wamunu awöra niha. Ba wamaigi Lowalangi, fa’auri hegöi do no ni’amoni’ö. Ihuku niha sangoguna’ö si dombua ngawalö andre ba zi lö tefaudu.​—I Moz. 9:5, 6.

5. Hadia nifatunöda ba hadia gunania?

⁵ Me no aefa götö Noakhi, lö aetu-aetu ibe’e Lowalangi wanuturu lala ba nono mbanuania. Ba duho da’a, tafaigi duma-dumania ena’ö aro gangetulada ba wolo’ö fanuturu lala nibe’e Yehowa solohe ya’ita ba gulidanö si bohou.

6. Hana wa moguna mube’e ba ndraono Gizara’eli goroisa nifa’ema khö Moze, ba hadia zinangea lafalua?

⁶ Me götö Moze, ibe’e Yehowa wanuturu lala ba nono mbanuania sanandrösa ba gamuata hegöi ba wamosumange ya’ia. Hadia mbörö? No tebulö zalua ba wa’aurira. Ba zi töra dua ngaotu fakhe, toröi ndraono Gizara’eli ba danö Miserai tobali sawuyu. Mangalulu ndrawa Miserai ba niha si no mate, la’oguna’ö nadu, ba oya ngawalö nifaluara si möi fango’aya döi Lowalangi. Me no aheta nono mbanua Lowalangi moroi ba danö Miserai, moguna khöra wanuturu lala si bohou. Tobali ira soi solo’ö Oroisa Yehowa. Molo’ö niha sagatua-tua, ngawua wehede ”goroisa” ba li Heberai’o mo’amakhaita ia ba ”wamobawa lala, wanuturu lala hegöi famaha’ö”. Börö me no so Goroisa Moze, tola telumö’ö ndraono Gizara’eli ba wamalua amuata fohorö hegöi ba wolo’ö agama faya moroi ba soi si fasui ya’ira. Tefahowu’ö ndraono Gizara’eli ba ginötö la’o’ö goroisa Lowalangi. Hiza’i, me lö khöra folo’ö, göna ira fangabu dödö.​—Baso V Moze 28:1, 2, 15.

7. (a) Tutunö hadia mbörö wa ibe’e Yehowa wanuturu lala ba nono mbanuania. (b) Hewisa wa tobali samamaha ba ndraono Gizara’eli Goroisa Moze?

⁷ So mbörö tanö bö’ö wa mube’e wanuturu lala si bohou. Ba Goroisa Moze, tola tefa’anö ndraono Gizara’eli ba wotema’ö fa’atohare Mesia, Yesu Keriso. Moguna sibai da’a ena’ö alua gohitö dödö Yehowa. Börö  me so Goroisa Moze, aboto ba dödö ndraono Gizara’eli wa lö mo’ahonoa ira ba moguna khöra höli, ya’ia da’ö sumange so’ahonoa sangeheta fefu horöra. (Gal. 3:19; Heb. 10:1-10) Baero da’ö, Oroisa Moze möi folumö’ö nga’ötö ofeta khö Mesia ena’ö la’ila ia iraono Gizara’eli na irugi inötö wa’atoharenia. Tobali, Oroisa Moze hulö ”samamaha” gasa-gasa wa’atohare Keriso.​—Gal. 3:23, 24.

8. Hana wa moguna wanuturu lala moroi ba goi-goi si so ba Goroisa Moze?

⁸ Fanuturu lala ba Goroisa Moze so gunania khöda. Hana wa tola? Tola tabatogö ita sabata ba wamaigi goi-goi ba Goroisa andrö. Hewa’ae lö tafalua Goroisa Moze iada’a, hiza’i oya wanuturu lala si tobali fanolo khöda ba wa’auri hegöi ba wamosumange Yehowa. I’oroisi Lowalangi ba wanura Oroisa andrö ena’ö tafaha’ö ita, ta’odaligö wanuturu lala moroi ba goi-goinia, ba ta’osinangegö wamaha’ö Yesu sabölö ebua moroi ba Goroisa Moze. Fondro-ndrongo me imane Yesu, ”No mirongo, wa no muwa’ö: Böi ohorö! Ba ya’o, ba uwa’ö, khömi: Dozi, haniha zamaigi ira alawe, wangisö ya’ia, ba no ihoröni tödönia.” Tobali, tenga ha ba wamalua horö ta’aröu’ö ita, moguna göi taheta wangera-ngera hegöi gisö-isö dödö si lö sökhi.​—Mat. 5:27, 28.

9. Hana wa ifuli ibe’e Lowalangi wanuturu lala si bohou?

⁹ Me no tohare Yesu tobali Mesia, ibe’e Yehowa wanuturu lala si bohou ba ihaogö ifatunö gohitö dödönia. Hadia mbörö? Me döfi 33 M, itimba ndraono Gizara’eli Yehowa ba ifili mbanua niha Keriso tobali ono mbanuania. Fabö’ö zui zalua ba nono mbanua Lowalangi.

10. Hadia mbörö wa mube’e goroisa si bohou ba mbanua niha Keriso, ba hadia gamaehutania moroi ba Goroisa Moze?

¹⁰ Ibe’e Yehowa Goroisa Moze ba ndraono Gizara’eli ena’ö lafamaha ira hewisa wamosumange ya’ia hegöi ba wanörö lala si sökhi. Me döfi si föföna, tenga ha moroi ba zi sambua soi nono mbanua Lowalangi, hiza’i moroi ba ngawalö soi, ba lafotöi ira iraono Gizara’eli ba wamati. Tobali ira banua niha Keriso ba tefaböbö ira ba gamabu’ula si bohou. Ibe’e zui Yehowa wanuturu lala si bohou. Aboto ba dödöda wa ”lö ifaigi mbawa niha Lowalangi, dozi sa, ha soi ira, sangata’ufi ya’ia, solau satulö, da’ö zomasi ia”. (Hal. 10:34, 35) La’o’ö ”goroisa Keriso” si te’odane-dane ba goi-goi si no tesura ba dödöra, tenga ba gara wanura simane Oroisa Moze. Moguna goroisa si bohou andre ba niha Keriso iada’a ba möi fanuturu lala khöra gofu hezo toröi ira.​—Gal. 6:2.

11. Hadia zi dombua goroisa nibe’e Yesu so’amakhaita ba ”goroisa Keriso”?

¹¹ Moguna ba ndraono Gizara’eli ba wamati wanuturu lala nifa’ema Yehowa khö Yesu. Fatua lö hadöi gamabu’ula si bohou, ibe’e Yesu dombua goroisa sabölö moguna. Si oföna, sanandrösa ba wanuriaigö. Si dua, sanandrösa ba gamuata niha Keriso hegöi lagura ba niha bö’ö. Oroisa andre moguna ba niha Keriso fefu irugi iada’a, he na ba zorugö auri ita hegöi na ba gulidanö.

12. Hadia zi bohou sanandrösa ba wanuriaigö?

¹² Meföna, na so soi bö’ö somasi mangai halöwö khö Yehowa, moguna möi ira ba mbanua Gizara’eli. (I Raz. 8: 41-43) Aefa da’ö ibe’e Yesu goroisa ba Matai’o 28:19, 20. (Baso.) I’o’ou ndra nifaha’önia ”mi’ae’e” ba niha fefu. Me alua Wendrakose 33 M, ifatunö Yehowa wa omasi ia na teturiaigö duria somuso dödö ba zi sagörö ulidanö. Me luo da’ö, so mato 120 nono mbanua niha Keriso si bohou sotema eheha ba tola fahuhuo ira ba niha Yehuda hegöi ba niha proselit ba ngawalö li. (Hal. 2:4-11) I’otarai da’ö, itugu oya mbanua nitörö ba wanuriaigö. Manuriaigö ira ba ndrawa Zamaria, aefa da’ö me döfi 36 M, manuriaigö ira ba niha si tenga niha Yehuda si lö muboto. Eluahania, moguna manuriaigö niha Keriso ba niha fefu ba zi sagörö ulidanö!

13, 14. (a) Hadia zi tefarahu ba ’goroisa si bohou’ nibe’e Yesu? (b) Hadia zi tobali famaha’ö khöda moroi ba duma-duma nibe’e Yesu?

¹³ Ibe’e göi Yesu ’goroisa si bohou’ sanandrösa ba laguda khö ndra talifusöda. (Baso Yohane 13:34, 35.) Moguna ta’omasi’ö ira ero ma’ökhö. Hiza’i, tenga ha da’ö manö. Moguna göi tatehegö nosoda khöra. Ba Goroisa Moze, lö mufaso wamalua da’a.​—Mat. 22:39; I Yoh. 3:16.

¹⁴ Yesu zi oföna tobali duma-duma khöda ba wangoroma’ö fa’omasi. I’omasi’ö sibai ndra nifaha’önia irege itehe mate ia salahira. Omasi göi ia na la’o’ö duma-dumania ira nifaha’önia. Börö da’ö, moguna tatehegö akao ita ba mate salahi ndra talifusöda.​—I Tes. 2:8.

15, 16. Hadia manö zi tebulö nitörö nono mbanua Lowalangi, ba hewisa wame’enia fanuturu lala khöda iada’a?

¹⁵ Ituyu Yesu ”zawuyu andrö, si lö faröi, satua-tua” ba wame’e khö ndra nifaha’önia ’gö [ba wamati], na inötö wemanga’. (Mat. 24:45-47) Ö andre simane fanuturu lala ba nono mbanua Lowalangi na fabö’ö zalua khöra. Hadia manö zi tebulö nitöröda?

¹⁶ No so ita ba ”götö safuria andrö” ba lö aratö tatörö wamakao sabölö-bölö si lö irai alua. (II Tim. 3:1; Mrk. 13:19) Baero da’ö, no tetibo’ö Zatana ba gulidanö andrö wa göna niha wangabu dödö. (Fam. 12:9, 12) Tatema göi goroisa moroi khö Yesu ena’ö manuriaigö ita ba niha sato ba ngawalö li, töra moroi ba zi to’ölö tafalua!

17, 18. Hewisa dödöda ba wotema’ö fanuturu lala nibe’e moroi ba gorahua Lowalangi?

¹⁷ So wanolo moroi ba gorahua Lowalangi si tola mama’anö ya’ita we’amöi manuriaigö. Hadia no ö’oguna’ö da’ö? Ba gangowuloa, tatema wanuturu lala hewisa wangoguna’ö fanolo andrö. Hadia ömane tödöu wa fanuturu lala andre moroi khö Lowalangi?

¹⁸ Ena’ö tola tasöndra howu-howu Lowalangi, moguna tafaigi fefu wanuturu lala nibe’enia ba mbanua niha Keriso. Na so khöda wolo’ö iada’a, tola aoha khöda wolo’ö fanuturu lala nibe’e na alua ”wamakao sabölö-bölö”, na inötö tefakiko gulidanö nifatörö Zatana. (Mat. 24:21) Aefa da’ö, moguna khöda wanuturu lala si bohou na auri ita ba gulidanö Faradaiso si lö Satana.

19, 20. Hadia gölu-gölu zura nibokai, ba hadia mbuania?

¹⁹ Me götö Moze, moguna wanuturu lala si bohou ba ndraono Gizara’eli, andrö wa ibe’e khöra Lowalangi Goroisa Moze. Ba gafuriata, moguna la’o’ö ”goroisa Keriso” ono mbanua  niha Keriso. Simanö göi, ifatunö khöda Sura Ni’amoni’ö wa ba gulidanö si bohou tatema gölu-gölu zura si so fanuturu lala si bohou. (Baso Fama’ele’ö 20:12.) Tola manö ba gölu-gölu zura andre itutunö khöda hadia zomasi Yehowa ba niha ba luo da’ö. Na lafaha’ö ira hegöi niha nisusugi, tola la’ila hadia gohitö dödö Lowalangi. Moroi ba gölu-gölu zura andrö, tola tafaha’ö ita sanandrösa ba wangera-ngera Yehowa. Börö me no so khöda wa’aboto ba dödö sanandrösa ba Zura Ni’amoni’ö, fefu niha si so ba Waradaiso faoma la’omasi’ö nawöra, la’osinangegö, ba lafosumange. (Yes. 26:9) Khalaigö atö hawa’oya zinangea tafaha’ö ita hegöi nifaha’öda ba niha, börö wanuturu lala moroi khö Razoda, Yesu Keriso!

²⁰ Na ta’o’ö wanuturu lala ”nisura ba zura andrö” ba lö faröi ita khö Yehowa sagötö wamakao safuria, isura döida ba ”zura wa’auri”, ba lö irai iheta. Tola auri ita irugi zi lö aetu! Tobali, moguna TABATOGÖ sabata ba wombaso Sura Ni’amoni’ö, TAFAIGI hadia wamaha’önia khöda, ba TAFONDRO-NDRONGO ba ta’o’ö wanuturu lala nibe’e Lowalangi iada’a. Na tafalua da’a, tola te’orifi ita ba wamakao sabölö-bölö, ba lö aetu-aetu tafaha’ö ita sanandrösa khö Yehowa, Lowalangida safönu fa’atua-tua ba sebua fa’omasi, sagötö fa’ara.​—Zango. 3:11; Rom. 11:33.