ERO röfi töra önö zuta niha si möi ba kabu eresi saröu sibai ba Semenanjung Shima si so ba Jepang. Möi ira ba Kuil Agung Ise, ba wamosumange dewa matahari Shinto, sotöi Amaterasu Omikami si no lasömba ba zi dua ribu fakhe fa’ara. Si oföna lafalua niha sangondrasi ya’ia da’ö la’amoni’ö ira ba lasasai danga awö mbawara. Aefa da’ö mosindro ira föna kuil haiden (worship hall) ba la’o’ö zi to’ölö lafalua ba da’ö, lafaöndrö ira, labözi tawo-tawo ba mangandrö ira khö dewi. * Si so ba agama Shinto tetehegö göi khöra na fao ira ba agama bö’ö. So göi ba gotalua agama Buddha, sangotöigö niha Keriso, hegöi agama tanö bö’ö tola möi ira ba agama Shinto ba lafalua hadia zi no to’ölö ba da’ö.

Oya agama ba zi sagörö ulidanö oi la’okhögö nahia ni’amoni’ö, * ba tebai mu’erai ha’uga zuta niha sangondrasi nahia andrö. Ba soi si so niha Keriso, oya gereja hegöi nahia ni’amoni’ö si tola la’oguna’ö ba wame’e sumange khö Yesu, Maria, hegöi niha ni’amoni’ö. Tanö bö’ö lafasindro ba nahia si no irai alua nidunö-dunö ba Zura Ni’amoni’ö, ”sahöli-höli dödö” ba ginötö iada’a, mazui ba nahia si no la’irö’ö gama-gama meföna. Ato niha zi möi ba da’ö börö me faduhu dödöra wa abölö mufondro-ndrongo wangandröra na lafa’ema ba nahia si no mu’amoni’ö. So göi zanguma’ö wa da’ö no ohitö dödöra ba wangondrasi nahia andrö ba wangoroma’ö wa lö faröi ira ba agamara.

Hadia abölö mufondro-ndrongo wangandrö hegöi fakaosa nifa’ema ba nahia ni’amoni’ö? Hadia omuso dödö Lowalangi na so zi lö faröi ba wangondrasi nahia ni’amoni’ö? Hadia moguna möi niha Keriso wamosumange Lowalangi ba nahia ni’amoni’ö? Na ta’ila wanema li moroi ba zinofu-nofu andre, tola ta’ila hadia wamosumange si möi fangomusoi’ö dödö Lowalangi.

Tola ta’ila hewisa dödö Lowalangi wamaigi sumange nibe’e ba nahia ni’amoni’ö moroi ba huhuo Yesu khö ndra alawe Zamaria. Samuza inötö, mofanö Yesu itörö mbanua Zamaria ba molombase ia ba gumbu nidanö sahatö ba mbanua Sikhara. Ba da’ö so samösa ndra alawe sangai idanö ba muhede Yesu khönia. Fahuhuo ira, aefa da’ö imane alawe andrö wa so gamaehuta agama Yehuda faoma ndrawa Zamaria. Imane, ”Ba hili andrö mangalulu ndra tuama föna, ba ya’ami miwa’ö, ba Yeruzalema so naha wangalulu.”​—Yohane 4:5-9, 20.

 Hili niwa’ö ndra alawe andrö ya’ia da’ö Hili Garisi, 50 km tanö yöu Yeruzalema. Ba da’ö so gosali ndrawa Zamaria ba wo’owasaini gowasa simane gowasa Fasa. Tenga da’ö nifatunö Yesu sanandrösa fa’afaehu ba gotaluara. Imane Yesu khönia, ”Fati ligu, alawe, irugi baŵa dania, ba tenga ba hili andrö, ba tenga göi ba Yeruzalema mangalulu ami khö Nama.” (Yohane 4:21) Sambua fanema li sahöli-höli dödö da’ö, mendrua manö me niha Yehuda zanguma’ö! Hana wa mubato wame’e sumange ba gosali Lowalangi si so ba Yeruzalema?

Itohugö huhuonia Yesu, ”Ba irugi baŵa dania ba no irugi iya’e, ba sindruhu zangalulu, ba moroi ba Geheha ba moroi ba wa’aduhu mangalulu ira khö Nama. I’alui sa göi Ama zangalulu khönia simanö.” (Yohane 4:23) Ba zi ngaotu fakhe wa’ara, lamane ira niha Yehuda wa osali sebua ba solakhömi si so ba Yeruzalema da’ö nahia gangorudua ba wamosumange Lowalangi. Möi ira ba da’ö ba wame’e sumange khö Lowalangira Yehowa tölu kali ba zi döfi. (II Moze 23:14-17) Imane Yesu tola tebulö da’a ba ’sindruhu zangalulu’ khö Nama mangalulu ira ’moroi ba geheha hegöi ba wa’aduhu’.

Osali niha Yehuda oroma domosania hegöi nahiania. Hiza’i, fangalulu moroi ba geheha hegöi ba wa’aduhu lö oroma ba lö mutatugöi nahiania. Imane Yesu wa nahia wamosumange niha Keriso sindruhu lö moguna mufalua ia ba nahia si no mutatugöi hadia ba Hili Garisi, osali ba Yeruzalema, mazui ba nahia ni’amoni’ö tanö bö’ö.

Me fahuhuo Yesu khö ndra alawe Zamaria imane wa no ”irugi baŵa” wa fabö’ö lala wamosumange Lowalangi. Hawa’ara ginötö da’ö? Me no mate Yesu, ba da’ö tebato wangalulu nifalua niha Yehuda si te’odane-dane ba Goroisa Moze. (Roma 10:4) Hiza’i, imane Yesu, ’Baŵa andre . . . irugi ya’e.’ Hadia mbörö wa iada’a? Börö me Yesu andrö Mesia, i’owuloi ndra nifaha’önia solo’ö oroisania me imane, ”Eheha Lowalangi, ba da’ö zinangea fangalulu, ba zangalulu khönia, fangalulu moroi ba geheha ba fangalulu moroi ba wa’aduhu.” (Yohane 4:24) Tobali hadia geluaha fangalulu moroi ba geheha ba fangalulu moroi ba wa’aduhu?

Me iwa’ö Yesu fangalulu moroi ba geheha, tenga da’ö geluahania wa ta’oguna’ö sambua geheha, adu, mazui egebua lida na mangandrö ita. Eluahania moguna khöda geheha Lowalangi same’e fanuturu lala hegöi sanolo ya’ita ena’ö tasöndra wa’aboto ba dödö sanandrösa ba Daromali Lowalangi. (I Korindro 2:9-12) Aefa da’ö me iwa’ö  Yesu sanandrösa ba zindruhu eluahania moguna so khöda wa’aboto ba dödö moroi ba Zura Ni’amoni’ö. Börö da’ö itema Lowalangi zumange nibe’eda khönia na tefaudu ba Zura Ni’amoni’ö hegöi fanuturu lala nibe’e geheha Lowalangi, tenga dali nahia si no mutatugöi.

Hewisa zinangeania wamaigi niha Keriso sanandrösa nahia ni’amoni’ö? Moguna tatörö tödöda niwa’ö Yesu me imane wa sindruhu zangalulu khö Lowalangi mangalulu moroi ba geheha hegöi ba zindruhu. Tobali ba khö Nama, famosumange ya’ia ba nahia ni’amoni’ö lö tohude moroi ba nahia bö’ö. Ifatunö göi khöda Sura Ni’amoni’ö wa lö omasi Lowalangi ba niha samosumange adu. Imane, ”Mi’angelamaisi wame’e adu andrö” ba ”mi’angelama ba nadu andrö”. (I Korindro 10:14; I Yohane 5:21) Börö da’ö niha Keriso sindruhu lö mangalulu ira ba nahia ni’amoni’ö, mazui so’amakhaita ba wamosumange adu.

Tenga da’ö geluahania itegu ita Taromali Lowalangi na so nahia nitatugöida si tola ta’oguna’ö ba wangandrö, ba wamaha’ö, mazui ba wo’angerönusi zi no tabaso. Nahia gangowuloa si lö fawuka ba soadu tola tobali nahia ba wamaha’ö hegöi ba wamatunö Taromali Lowalangi. Lö fasala na tahaogö batu nisan ba niha si no mate. Da’ö dandra wa lö olifu ita khöra mazui ta’omasi’ö ira. Hiza’i, na tabali’ö nahia da’ö nahia ni’amoni’ö mazui nahia ba wame’e sumange khö nadu, eluahania lö ta’o’ö fareta Yesu.

Lö moguna möi ndra’ugö ba nahia ni’amoni’ö ena’ö ifondro-ndrongo wangandröu Lowalangi. Lö göi omuso dödö Lowalangi na möi ita ba nahia simane da’ö. Ifatunö khöda Sura Ni’amoni’ö wa Yehowa Lowalangi andrö ”Samazökhi danö’a ba ösinia, fefu, ba lö i’onahia gosali nifazökhi tanga niha”. Hewa’ae simanö tola ahatö ita khö Lowalangi. Tola mangandrö ita khönia gofu hezo manö ba hasambalö ifondro-ndrongo börö ”me lö’ö sa atö aröu ia khöda fefu”.​—Halöwö Zinenge 17:24-27.