1, 2. (a) Tutunö hadia mbörö wa tenga si famai-mai wamayagö idanö. (b) Hadia zinangea i’ila si samösa niha fatua lö tebayagö ia idanö, ba hadia mbörö?

HADIA ya’ugö si bohou ebua somasi tebayagö idanö? Na ya’ia, no sambua töi sebua na öfalua da’ö. Simane zi no tafatunö ba migu silalö, tenga si famai-mai wangai angetula famayagö idanö. Da’a zangoroma’ö föna niha sato wa no ölulu wa’auriu khö Yehowa, öfabu’u wa öhalö halöwönia sagötö fa’ara ba ö’ofönai’ö wamalua somasi ia ba wa’auriu. Fatua lö tebayagö ndra’ugö idanö, moguna so khöu wa’atua wangera-ngera ba wamati, aboto ba dödöu geluaha folulu fa’auri, ba soroi ba dödöu wa edöna mubayagö idanö, börö me tenga si famai-mai na fawu’u li khö Lowalangi.

² Tola manö lö nasa edöna ndra’ugö mubayagö idanö. Mazui, ömane tödöu no tola tebayagö ndra’o idanö, hiza’i imane satuau wa moguna öbaloi irege atua wangera-ngerau ba moguna ödou’ö wa’aboto ba dödöu. Hadia zinangea öfalua? Böi ide-ide dödöu. Oguna’ö ginötö si so ba wama’anö ya’ugö irege tola tebayagö ndra’ugö idanö ba wa’alio.  Börö da’ö, moguna öhalo gangetula ena’ö: (1) ö’aro’ö wa’afaduhu dödöu, (2) haogö mbua-buau, ba (3) dou’ö wangandröu saohagölö.

3, 4. Hadia wamaha’ö si tola lahalö iraono si bohou ebua moroi ba duma-duma Dimoteo?

³ Angeraigö hadia wanema li ba wanofu-nofu andre: Hana wa faduhu dödögu wa so Lowalangi? Hana wa faduhu dödögu wa moroi khö Lowalangi Zura Ni’amoni’ö? Hana wa oroisa Lowalangi ni’o’ögu, tenga ba wolo’ö niha gulidanö? Na ö’ila hadia wanema linia, tola ’ötimba tödöu hadia nilau dödö Lowalangi, hadia zi sökhi, hadia wa’omasinia ba hadia zo’ahonoa’. (Rom. 12:2) Hana wa moguna öfalua da’ö?

⁴ Tola itolo ndra’ugö duma-duma moroi khö Dimoteo. So khönia wa’aboto ba dödö sanandrösa ba Daromali Lowalangi börö me no ifaha’ö ia inania hegöi nenenia. Hiza’i, imane Faulo khönia, ”Ba ya’ugö andrö, ba böi böhöli zi no örongo, awö zi no faduhu dödöu.” (II Tim. 3:14, 15) Ngawua wehede ”faduhu dödö” eluahania ”sindruhu-ndruhu faduhu dödö wa atulö zi no mufaduhusi tödö andrö”. Faduhu dödö Dimoteo wa no isöndra zindruhu ba Daromali Lowalangi. Ifaha’ö ia ba zindruhu tenga börö ni’o’ou ninania hegöi nenenia. Tobali, no irasoi samösa hadia zi no ifaha’ö ya’ia sindruhu-ndruhu atulö ba faduhu göi dödönia.​—Baso I Tesalonika 5:21.

5, 6. Hana wa moguna öfaha’ö ndra’ugö ba ’wotandra fefu, hadia ia’ i’otarai iada’a?

⁵ Hewisa ndra’ugö samösa? Te i’otarai ba wa’ide-ide no ö’ila zindruhu. Börö da’ö, angeraigö i’otarai iada’a hadia mbörö wa faduhu dödöu wa no öfaha’ö ndra’ugö ba zindruhu. Tola möi fangaro wamatiu da’a ba tola öhalö gangetula tenga börö nifarou ndra awöu, ulidanö da’a, hegöi tödöu samösa.

⁶ Na öfaha’ö ndra’ugö ba ’wotandra fefu, hadia ia’ i’otarai iada’a, tola öbe’e wanema li ba wanofu-nofu moroi khö ndra awöu, simane: ’Hana wa faduhu dödöu wa so Lowalangi? Na i’omasi’ö niha gulidanö Lowalangi, hana wa itehegö alua zi lö sökhi? Haniha zamazökhi Lowalangi?’ Na no öfa’anö ndra’ugö, lö khöu fa’aombö-aombö dödö ba wame’e fanema li moroi ba wanofu-nofu andrö. Tola itugu owölö-ölö öfaha’ö ndra’ugö ba Zura Ni’amoni’ö.

7-9. Tutunö hadia mbörö wa tola aro wa’afaduhu dödöu na ö’oguna’ö panduan belajar ”Apa yang Sebenarnya Alkitab Ajarkan?”.

⁷ Na öhaogö ö’osisi’ö Zura Ni’amoni’ö, tola öbe’e wanema li, ba lö khöu fa’aombö-aombö dödö sa’ae, ba aro wa’afaduhu dödöu. (Hal. 17:11) Oya mbuku si tola manolo ya’ugö. Duma-dumania Asal Mula Kehidupan—Lima Pertanyaan yang Patut Direnungkan hegöi buku Apakah Ada Pencipta yang Mempedulikan Anda? Ato zi bohou ebua si no tetolo börö duho ”Apa yang Sebenarnya Alkitab Ajarkan?” ba jw.org. Tola ö’alui ba faosatö AJARAN ALKITAB. So panduan belajar ba duho andrö si möi fanolo khöu ena’ö itugu aro wamatiu sanandrösa ba Zura Ni’amoni’ö.

⁸ Na asese öfaha’ö ndra’ugö ba Zura Ni’amoni’ö, te no ö’ila sa’ae hadia wanema li ba wanofu si so ba panduan belajar andrö. Hiza’i, hadia faduhu dödöu wa sindruhu ia andrö? Moroi ba panduan belajar andrö tola ö’angerönusi ngawalö ayati ba ösura hadia mbörö wa faduhu dödöu ba zi sambua tuho andrö. Na öfalua da’ö, tola ötutunö zi no öfaduhusi tödö ba niha bö’ö. Na ö’ila öbokai internet ba öfaigi duho ”Apa yang Sebenarnya  Alkitab Ajarkan?”, tola ö’oguna’ö ia ba wamaha’ö ya’ugö samösa ba Zura Ni’amoni’ö.

⁹ Ya’ugö zotatugöi samösa wa da’a zindruhu ena’ö tola tebayagö ndra’ugö idanö. Imane samösa dalifusöda ira alawe si bohou ebua, ”Fatua lö uhalö gangetula ba wamayagö idanö, ufaha’ö ndra’o ba Zura Ni’amoni’ö. Faduhu dödögu wa da’a agama sindruhu. Ero ma’ökhö, itugu faduhu dödögu.”

10. Hana wa moguna tefaudu gamuata niha Keriso si no tebayagö idanö ba zi no ifaduhusi tödö?

¹⁰ Imane Sura Ni’amoni’ö, ”Simanö göi wamati andrö, na lö bua-bua; no amaedola zi lö noso.” (Yak. 2:17) Tola oroma ba mbua-buau na faduhu dödöu ba zindruhu. Öforege ”wanörö lala satulö andrö, awö wangata’ufi Lowalangi”.​—Baso II Fetero 3:11.

11. Tutunö hadia geluahania ”wanörö lala satulö andrö”.

¹¹ Hadia geluahania ”wanörö lala satulö andrö”? Eluahania moguna sökhi mbua-buau. Tandraigö angerönusi: Me so zondrönisi dödöu ba wamalua si lö atulö barö zi önö waŵa silalö, hadia aboto ba dödöu hadia zinangea öfalua? (Heb. 5:14) Hadia lö olifu’ö zi no öfalua barö-barö da’a me so wondrönisi dödö moroi khö ndra awöu ba wamalua sala? Hadia no tobali duma-duma si sökhi amuata ndra’ugö ba zekola? Hadia lö aetu-aetu öforoma’ö wa lö faröi ndra’ugö khö Yehowa, mazui hadia no irai öfagölösi’ö khö ndra awöu sekola ena’ö lö la’o’aya’ö? (I Fet. 4:3, 4) Tatu manö samösa lö niha so’ahonoa. Itaria, niha si no ara mangai halöwö khö Yehowa, tola manö aila ba abua khöra wamu’a na so zanandraigö famatira. Hiza’i, niha si no molulu fa’auri khö Lowalangi, so khönia wa’omuso dödö me no tobali Samaduhu’ö Yehowa, ba iforoma’ö da’a ba mbua-buania.

12. Hadia duma-dumania halöwö ba ”wangata’ufi Lowalangi”, ba hewisa dödöu ba da’ö?

¹² Hadia geluahania ”wangata’ufi Lowalangi”? Ya’ia da’ö halöwö so’amakhaita ba mbanua niha Keriso, simane fe’amöi ba gangowuloa hegöi fanuriaigö. Baero da’ö, eluahania göi halöwö si lö i’ila hörö niha, simane fangandrö ba famaha’ö samösa ba Zura Ni’amoni’ö. Niha si no molulu fa’auri khö Yehowa, lö imane tödönia wa abua wamalua halöwö da’ö. Fao dödönia ba niwa’ö Razo Dawido me imane, ”Folo’ö somasi ndra’ugö, ya’ugö Lowalangigu, ba no fa’omasigu; ba oroisamö, ba no so ba dödögu bakha.”​—Zin. 40:9.

13, 14. Hadia zi tola manolo ya’ugö ena’ö öhalö halöwö ba ”wangata’ufi Lowalangi”? Hadia mbuania ba zi bohou ebua ba zi no muhenaigö andre?

¹³ Ena’ö tetolo ndra’ugö ba wotatugöi gohitö dödöu, faigi lembar kerja ba mbuku Pertanyaan Kaum Muda—Jawaban yang Praktis, Jilid 2, nga’örö 308 ba 309. Ba lembar kerja andrö, tola ösura wanema li moroi ba wanofu-nofu simane, ”Hadia no öhaogö öfatunö nösi dödöu ba wangandrö, ba hadia zoroma moroi ba wangandröu sanandrösa ba wa’omasiu khö Yehowa?” ”Hadia manö ni’oguna’öu ba wamaha’ö ya’ugö samösa?” ”Hadia möi ndra’ugö manuriaigö hewa’ae lö möi ndra satuau?” Tola göi ösura hadia manö zinangea ödou’ö ba wangandröu, famaha’ö ya’ugö samösa, ba fanuriaigöu.

¹⁴ Ato ndraono si bohou ebua sedöna mubayagö idanö, larasoi samösa wa moguna lembar kerja andrö. Imane samösa dalifusöda ira alawe sotöi Tilda, ”Me mböröta, u’oguna’ö lembar kerja andrö  ba wanura hadia manö gohitö dödögu. Uzara-zara wogamö ya’ia, ba tola tebayagö ndra’o idanö döfi aefa da’ö.” Simanö göi niwa’ö dalifusöda si bohou ebua sotöi Patrick. Imane, ”No u’ila hadia gohitö dödögu sinangea ukhamö. Hiza’i, börö me no usura ia, tola u’odödögö ba wogamö ya’ia.”

15. Tutunö hadia mbörö wa moguna ya’ugö samösa zangai angetula ba wolulu fa’auriu khö Lowalangi.

¹⁵ Sambua wanofu moroi ba lembar kerja andrö ya’ia da’ö, ”Hadia hasambalö öhalö halöwö Yehowa hewa’ae labato ira satuau mazui ira awö-awöu?” Na no ölulu wa’auriu khö Yehowa ba tebayagö ndra’ugö idanö, tola aro wahuwusami. Börö da’ö, tebai ö’odaligö ndra satuau mazui niha bö’ö ba wangai halöwönia. Na ötörö lala satulö andrö ba ö’ata’ufi Lowalangi, da’ö dandra wa faduhu dödöu wa da’a zindruhu ba omasi ndra’ugö wolo’ö oroisa Lowalangi. Tola sa’ae tebayagö ndra’ugö idanö.

16, 17. (a) Hadia zinangea mango’ou ya’ita tobali niha Keriso? (b) Be’e duma-duma hewisa wangandröu saohagölö ba höli si no mube’e.

¹⁶ Samuza inötö, so niha sonekhe ba Goroisa Moze sanofu khö Yesu, ”Hezo zebua goroisa ba zura goroisa andrö?” Imane Yesu, ”Omasi’ö Zo’aya ya’ugö, Lowalangiu andrö, moroi si’aikö ba dödöu, nosou ma’asambua zangomasi’ö ya’ia. Ba öhorigö gera-erau, wangomasi’ö ya’ia.” (Mat. 22:35-37) Molo’ö Yesu, fa’omasi khö Yehowa da’ö zi tobali dane-dane ba wombayagö idanö ba tobali niha Keriso. Sambua lala ena’ö tola tedou wa’omasiu khö Yehowa ya’ia da’ö na ö’angerönusi höli hegöi buala sebua moroi khö Lowalangi ba niha gulidanö. (Baso II Korindro 5:14, 15; I Yohane 4:9, 19.) Na öfalua da’ö, tefarou ndra’ugö ba wangandrö saohagölö ba mbuala sebua andrö.

¹⁷ Fangandröu saohagölö ba mbuala andrö tola mu’amaedolagö ia simane da’a: Khalaigö na so niha sanolo ya’ugö me arakhagö alömö ndra’ugö. Hadia i’anemai’ö mangawuli’ö ba nomo ba olifu’ö hadia zi no ifalua niha andrö khöu? Lö’ö! Tatu manö mo’ömö ndra’ugö khönia börö me no itolo’ö! Simanö göi, sinangea ta’andrö saohagölö ba höli si no ibe’e Yehowa hegöi Yesu. Mo’ömö fa’auri ita khöra! No la’efa’ö ita moroi ba horö ba fa’amate. Börö wa’omasira wa tola so dötönaföda auri ba Waradaiso sagötö fa’ara!

18, 19. (a) Hadia mbörö wa lö moguna ata’u ndra’ugö tobali tana khö Yehowa? (b) Hana wa itugu sökhi wa’auriu na öhalö halöwö khö Yehowa?

 ¹⁸ Hadia ö’andrö saohagölö ba zi no ifalua Yehowa khöu? Na noa, no inötönia khöu wolulu fa’auri ba tebayagö idanö. Folulu fa’auri andrö eluahania öfabu’u khö Lowalangi wa omasi ndra’ugö öfalua zomasi ia sagötö fa’ara. Hadia moguna ata’u ndra’ugö fawu’u li? Lö’ö! Si sökhi zomasi ibe’e khöu Yehowa, ba ifahowu’ö niha samalua ohitö dödönia. (Heb. 11:6) Na ölulu wa’auriu ba tebayagö ndra’ugö idanö, itugu sökhi wa’auriu, tenga itugu lö sökhi! So samösa dalifusöda si 24 fakhe ndröfinia, tebayagö ia idanö me iraono ia. Imane, ”Na awena tebayagö ndra’o idanö me no alawa ndröfigu, tola manö oya monönö wa’aboto ba dödögu. Hiza’i, börö me no ululu wa’aurigu khö Yehowa i’otarai me ide-ide, tola telumö’ö ndra’o börö me lö ugohi gisö-isö gulidanö.”

¹⁹ Omasi Yehowa na ösöndra zabölö sökhi. Tobali na Satana, ha tana khönia ni’era-erania ba lö ba dödönia ndra’ugö. Na ö’o’ö ia, lö i’ila ibe’e khöu wa’ohahau dödö. Hewisa wa tola ibe’e manö khöu zi lö ni’okhögönia? Lö khönia turia somuso dödö, ba lö khönia fanötöna. Awai zi tola ibe’e khöu ha fa’auri si lö fanötöna, börö me da’ö zalua khönia ba zi so föna!​—Fam. 20:10.

20. Hadia zi tola ifalua si bohou ebua ena’ö tola ihalö gangetula ba wolulu fa’aurinia ba tebayagö idanö? (Faigi göi kotak ” Fanolo Ena’ö Tedou ba Wamati”.)

²⁰ No angetula si sökhi na ölulu wa’auriu khö Yehowa. Hadia no tola öhalö gangetula? Na simanö, böi ata’u ndra’ugö fawu’u li. Hiza’i, na lö nasa sedöna ndra’ugö, oguna’ö wanuturu lala si so ba duho da’a ena’ö tola öhalö gangetula. Ifarou Faulo ndra talifusö si so ba mbanua Wilifi ena’ö ladou’ö ira ba wamati. (Fil. 3:16) Na ö’o’ö da’ö, ba zi lö aratö, tola öhalö gangetula ba wolulu fa’auriu khö Yehowa ba tebayagö ndra’ugö idanö.