1-2. Hadia zinangea tafalua na no aefa tebayagö ita idanö? Tutunö.

 HAWAʼASESE öbözini nomomö? Fatua lö findra ndraʼugö ba nomo andrö, te öhaogö wamözini yaʼia. Hizaʼi, hewisa na lö saʼae irai öbözini nomou aefa daʼö? Tatu manö taʼunö nomo daʼö ba oya gawu-gawu. Tobali, enaʼö ohahau dödömö ba wamaigi omomö andrö, moguna asese öbözini ia.

² Simane daʼö göi, böi tebulö taʼehaogö lala wangera-ngera hegöi amuatada. Fatua lö tebayagö ita idanö, tatu manö no taforege sibai ba wombulöʼö faʼaurida ba ’wangehaogö yaʼita moroi ba ngawalö zi lö sökhi si tola manaʼunöisi botoda hegöi fangera-ngerada’. (2 Ko. 7:1) Hizaʼi, na no aefa tebayagö ita idanö, ’böi tebulö tabohouni lala wangera-ngerada’ simane mene-mene nibeʼe Waulo. (Ef. 4:23) Hadia mbörö? Börö me tola itaʼunöisi gera-erada ulidanö si lö sökhi andre. Enaʼö lö tebulö taʼomusoiʼö dödö Yehowa, moguna asese tafareso lala wangera-ngerada, amuatada hegöi ohitö dödöda.

3. Hadia zinangea tafalua ba ’wombulöʼö lala wangera-ngerada?’ (Roma 12:2)

³ Hadia zinangea tafalua ba wombulöʼö lala wangera-ngerada? (Baso Roma 12:2.) Ngawua wehede Yunani ”mibulöʼö  lala wangera-ngerami” tola mufoʼeluaha tobali ”miʼehaogö mangawuli lala wangera-ngerami”. Niha sangehaogö omo, iʼehaogö fefu zi no tekiko, tenga ha asala ibeʼe gama-gama si sökhi ba nomo andrö. Simane daʼö göi, na omasi ita tabulöʼö lala wangera-ngerada, tenga ha asala tafalua ösa zi sökhi, hizaʼi moguna tafareso haniha ita zindruhunia ba tafalua wombulöʼö enaʼö sindruhu-ndruhu taʼoʼö goi-goi Yehowa. Börö daʼö, tenga ha sakali tafalua ia, hizaʼi moguna taʼaseseʼö.

4. Hadia zinangea tafalua enaʼö lö tedönisi dödöda ba gulidanö andre?

⁴ Dania na no moʼahonoa ita, tola taʼomusoiʼö dödö Yehowa sagötö faʼara. Hizaʼi iadaʼa, moguna taforege ba wamalua daʼö. Ba Roma 12:2, ifatunö Faulo wa moguna tabulöʼö lala wangera-ngerada ba böi tatehegö tedönisi dödöda ba gulidanö andre enaʼö tola tafalua gohitö dödö Lowalangi. Börö daʼö, moguna tafareso ua sakali hadia tefaudu gangetula hegöi ohitö dödöda ba gohitö dödö Lowalangi mazui no tedönisi dödöda ba gulidanö andre.

5. Hewisa wamaresoda lala wangera-ngerada sanandrösa ba ngaluo Yehowa si no itugu ahatö? (Faigi gambara.)

⁵ Angeragö atö sambua duma-duma. Omasi Yehowa na ’lö taya ba gera-erada waʼatohare ngaluo Yehowa’. (2 Fe. 3:12) Enaʼö taʼila wa no tafalua daʼö, moguna taʼangerönusi wanofu-nofu daʼa: ’Moroi ba lala waʼaurigu, hadia aboto ba dödögu wa no ahatö gamozua götö danö andre? Moroi ba gangetulagu ba wolohi sekola salawa hegöi halöwö, hadia oroma wa uʼofönaiʼö wangai halöwö khö Yehowa? Hadia faduhu dödögu wa hasambalö ibönökhi zoguna khögu Yehowa hegöi soguna ba nösi nomogu, mazui hadia lö tebulö uʼera-era manö zoʼamakhaita ba gefe?’ Tatu omuso sibai dödö Yehowa na taforege ba wamalua ohitö  dödönia ba waʼaurida.​—Mat. 6:25-27, 33; Fil. 4:12, 13.

6. Hadia zi lö tebulö tafalua?

⁶ Moguna asese tafareso gera-erada ba tafalua wombulöʼö. Iʼamenesi niha Gorindro Faulo, ”Böi miböhöli wanekhegö tödömi na samati ami. Mitatugöi hewisa zindruhunia ami.” (2 Ko. 13:5) Enaʼö oroma wa niha ”samati” ita, lö ibönö na ha asala möi ita ba gangowuloa mazui manuriaigö ita ero-ero inötö. Moguna göi tafaudugö gera-erada, ohitö dödöda mazui somasi dödöda. Börö daʼö, tola tabulöʼö gera-erada na tabaso Daromali Lowalangi. Moguna taforege ba woloʼö lala wangera-ngera Yehowa, ba tafalua zabölö sökhi ba wangomusoiʼö tödönia.​—1 Ko. 2:14-16.

7. Moloʼö Efeso 4:31, 32, hadia nasa zinangea tafalua ba hana wa lö aoha wamalua daʼö?

⁷ Baso Efeso 4:31, 32. Tenga ha lala wangera-ngerada nibulöʼöda, moguna göi ’tabohouni gamuatada’. (Ef. 4:24) Moguna taforege wamalua daʼö. Duma-dumania, taforege sibai ba wangeheta khöda faʼafökhö dödö, faʼabao dödö, fönu hegöi amuata si lö sökhi tanö böʼö. Hizaʼi, lö aoha wamalua daʼö. Hadia mbörö? Börö me no tohöna mowaʼa ba dödöda ngawalö gamuata si lö sökhi. Duma-dumania, iwaʼö Sura Niʼamoniʼö wa so ösa niha ”salio mofönu” ba ”salio aukhu”. (Amd. 29:22) Niha sangokhögö amuata si lö sökhi simane daʼö, lö tebulö laforege ba wamalua fombulöʼö hewaʼae na no tebayagö ira idanö. Oroma daʼö ba duma-duma aefa daʼa.

8-9. Moroi ba zalua khö Stephen, hana wa lö tebulö taforege wangeheta amuata si lö sökhi?

⁸ Itutunö si samösa talifusöda ira matua sotöi Stephen, hewaʼae na no tebayagö ia idanö, moguna nasa iʼokhögö wanaha tödö. Imane, ”Duma-dumania, me manuriaigö ndraʼaga ba nomo-omo misa, uʼila zanagö radio ba motogu. Aefa daʼö ugohi zanagö andrö. Me arakhagö ukhamö ia, itiboʼö radiogu andrö ba ilau moloi. Me ututunö khö ndra talifusöda tanö böʼö hewisa wa tola ufuli uhalö radiogu andrö, manofu khögu samösa zatua sokubaloi, ’He Stephen, na no öraʼu ia menaʼö hadia nifaluamö khönia?’ Mangera-ngera ndraʼo ba wanofunia andrö, ba daʼö zamarou tödögu enaʼö tobali ndraʼo niha somasi faʼatulö.” b

⁹ Simane si no taʼila ba zalua khö Stephen, tola manö taforomaʼö gamuata si lö baga ba ginötö si lö tadöna-döna, hewaʼae na tawalinga no aheta khöda gamuata andrö. Na daʼö zalua khöu, böi ide-ide dödöu ba böi halö rahu-rahu wa tenga niha Keriso si sökhi ndraʼugö. Ifaduhuʼö samösa daʼö Faulo, ”Na omasi ndraʼo wamalua satulö, ba no ahatö khögu zi lö sökhi.” (Rom. 7:21-23) Fefu niha Keriso si lö moʼahonoa, moguna lalawa gamuatara si lö sökhi sasese tumbu ba dödöra, hulö simane gawu-gawu si lö aetu-aetu so ba nomoda. Moguna taforege ba wangeheta amuata si lö sökhi ba waʼaurida. Hewisa wamaluada daʼö?

10. Hewisa lalada ba wangeheta amuatada si lö sökhi? (1 Yo. 5:14, 15)

¹⁰ Na abua khöu ba wangeheta amuatamö si lö sökhi, angandrö khö Yehowa, yafaduhu dödömö wa hasambalö ifondrondrongo wangandrömö ba itolo ndraʼugö. (Baso 1 Yohane 5:14, 15.) Sindruhu sa, lö ifalua dandra sahöli-höli dödö Yehowa ba wangeheta amuata si lö sökhi. Hizaʼi, ibeʼe khöu wanolo enaʼö mofozu ndraʼugö ba wangeheta amuata  si lö sökhi andrö. (1 Fe. 5:10) Baero daʼö, moguna göi öfalua hadia zi no öʼandrö. Böi falua hadia ia zi tola manusugi amuatau ba zi lalö. Böi faigi film, acara TV mazui öbaso mbuku samatumbuʼö ba dödöu wa lö fasala gamuata si lö sökhi andrö. Ba na ifuli tumbu ba gera-eramö gisö-isö dödö si lö tefaudu, anemaiʼö tiboʼö ia.​—Fil. 4:8; Kol. 3:2.

11. Hadia zinangea tafalua enaʼö lö tebulö tabohouni gamuatada?

¹¹ Hewaʼae na no öheta khöu gamuata si tohöna, moguna göi öbohouni gamuatamö. Hewisa lalania? Fahaʼö ndraʼugö ba gamuata Yehowa ba forege ba woloʼö yaʼia. (Ef. 5:1, 2) Duma-dumania, ba ginötö öbaso waö-waö Zura Niʼamoniʼö sangoromaʼö wa lö tebulö iʼefaʼö zalada Yehowa, angeragö, ’Hadia no uʼefaʼö göi zala niha böʼö?’ Ba ginötö öbaso sanandrösa ba waʼahakhö dödö Yehowa ba niha si numana, angeragö, ’Hadia uʼameʼegö tödö ndra talifusöda na moguna khöra wanolo sanandrösa ba zoguna ba mboto? Hadia uforomaʼö daʼö ba nifaluagu?’ Böi tebulö bohouni gamuatamö ba wombulöʼo gera-eramö. Na lö iʼanemaiʼö mofozu ndraʼugö, böi afatö dödömö ba böi awuwu ndraʼugö.

12. Hadia waʼatebulö nirasoi Stephen me no iʼoʼö goi-goi Zura Niʼamoniʼö?

¹² Stephen si no mututunö moroi yawa mege, ba gafuriata mofozu ia wamohouni amuatania. Me no aefa tebayagö ia idanö, no irai so zangandrö fönunia. Hizaʼi, enaʼö lö aukhu ia, ilau mofanö moroi ba daʼö mazui iʼalui lala tanö böʼö enaʼö lö fawuka zalua. Imane wangumaʼö, ”Ato zanuno yaʼo ba lala wangasiwaigu abula dödö andrö, farahu ba daʼö woʼomogu. Yaʼo samösa ba ahöli dödögu! Urasoi wa tola alua waʼatebulö simane daʼö tenga börö waʼabölögu, hizaʼi börö Zura Niʼamoniʼö.”

13. Hadia zi tola manolo yaʼita ba wamalua satulö? (Galatia 5:16)

¹³ Baso Galatia 5:16. Moguna taforege ba wamalua satulö. Si fao faʼoböwö, ibeʼe khöda gehehania Yehowa ba wanolo yaʼita. Tola tasöndra wanuturu lala moroi ba geheha niʼamoniʼö na tafahaʼö ita ba Daromali Lowalangi. Tatema göi waʼabölö moroi ba geheha andrö na taʼondrasi gangowuloa. Ba daʼö tola fariawö ita khö ndra talifusöda samorege ba wamalua satulö. Tatu möi fangaro wamatida daʼö. (Heb. 10:24, 25; 13:7) Baero daʼö, moguna mangandrö ita khö Yehowa soroi ba dödö. Taʼandrö khönia wanolo ba wolawa falömoʼahonoada. Hasambalö itolo ita Yehowa, ibeʼe khöda gehehania enaʼö lö tebulö taforege wamalua daʼö. Sindruhu sa, hewaʼae no tafalua fefu daʼö, tola manö lö saheta khöda gisö-isö dödö si fasala. Hizaʼi, itolo ita Yehowa enaʼö böi taʼoʼö gisö-isö dödö si fasala andrö. Simane niwaʼönia ba Galatia 5:16, niha soloʼö fanuturu lala geheha niʼamoniʼö ’lö igohi wangisö nösi andrö’.

14. Hana wa lö taböhöli wamalua satulö?

¹⁴ Na no asese tafalua halöwö ba wamati, hadia nasa zinangea tafalua? Moguna taforege wamalua satulö ba böi taböhöli. Hana wa moguna sibai daʼö? Börö me tola manö ifuli so gisö-isö dödö si fasala andrö simane udu si lö irai mörö. Na no aefa tebayagö ita idanö, te adöni dödöda wamalua si tebai tafalua menaʼö. Duma-dumania, famai, femabu-mabu mazui famaigi pornografi. (Ef. 5:3, 4) Samösa dalifusöda ono matua sangumaʼö, ”Abua sibai khögu ba wolawa faʼomasi khö nawögu ira matua. Uwai ha sabata khögu wangera-era simane daʼö. Hizaʼi, lö tebulö so ia.” Hadia zinangea öfalua na so khöu gisö-isö dödö si fasala andrö?

15. Hana wa teʼabölöʼö ita na taʼila wa tenga ha yaʼita zamorege ba wolawa isö-isö dödö si fasala? (Faigi gambara.)

 ¹⁵ Na öforege ba wolawa isö-isö dödö si fasala si no amaedola udu fondrege zabölö, törö tödöu wa tenga ha yaʼugö zamalua daʼö. Imane Sura Niʼamoniʼö, ”Fanandraigö salua khömi sindruhunia ha fanandraigö si toʼölö alua ba niha.” (1 Ko. 10:13a) Mutandrösaigö wehede daʼa ba niha Keriso si so ba Gorindro. So ösa ba gotaluara me föna zohoröni donga zodonga, ira matua ihoröni nawönia ira matua, ba tuka mabu. (1 Ko. 6:9-11) Moloʼö yaʼugö, hadia taya gisö-isö dödöra si fasala andrö me no aefa tebayagö ira idanö? Tatu manö löʼö. Sindruhu sa wa yaʼira andrö niha nibayoini, hizaʼi lö moʼahonoa nasa ira. Tola manö ba zi sambua inötö, tumbu ba gera-erara gisö-isö dödö si fasala andrö. Hizaʼi, moguna laforege wolawa yaʼia. Tola möi famarou dödöda daʼa. Hadia mbörö? Börö me daʼa zangoromaʼö wa tenga ha yaʼita zamorege ba wolawa isö-isö dödö si fasala. So göi zi no irai mofozu ba wolawa yaʼia. Börö daʼö, ’lawa ia si fao famati saro’ börö me aboto ba dödömö wa ’fefu dalifusöda si sara lala wamati ba zi sagörö ulidanö, latörö göi wamakao simane daʼö’.​—1 Fe. 5:9.

16. Hadia lala wangera-ngera sinangea tatimbagö, ba hadia mbörö?

¹⁶ Böi so ba gera-erada wa lö hadöi soʼameʼegö tödö famorege si no tafalua. Tola möi famaʼalau daʼö, börö me ifatumbuʼö ba dödömö wa tebai ölawa gisö-isö dödö si fasala. Sindruhunia no iwaʼö Sura Niʼamoniʼö, ”Lö faröi Lowalangi, lö ilulu ami ba wanandraigö si tebai mitaha. Na göna ami fanandraigö, ifaigi lala enaʼö tola anau gölömi ba wanaögö yaʼia.” (1 Ko. 10:13b) Börö daʼö, hewaʼae abölö sibai gisö-isö dödö si fasala, hizaʼi tola ölawa ia börö wanolo moroi khö Yehowa.

17. Hewaʼae na itaria tumbu ba wangera-ngerada gisö-isö dödö si fasala, hadia zi tola tafalua?

 ¹⁷ Törö tödöu, börö me lö moʼahonoa ndraʼugö, tola manö ba zi sambua inötö ifuli so ba wangera-ngeramö gisö-isö dödö si fasala. Hizaʼi na alua daʼö, anemaiʼö timbagö ia. Simane Yosefo, iʼanemaiʼö moloi ia me idönisi dödönia foʼomo Wotifa. (1 Mo. 39:12) Böi awuwu ndraʼugö ba wolawa isö-isö dödö si fasala!

18-19. Hadia manö wanofu-nofu sinangea taʼangeragö ba wamareso yaʼita samösa?

¹⁸ Na tabulöʼö lala wangera-ngerada, eluahania tatatugöi wa fangera-ngerada hegöi nifaluada tefaudu ba zomasi Yehowa. Börö daʼö, moguna asese tafareso ita samösa ba taʼangeragö wanofu-nofu andre: ’Hadia oroma ba nifaluagu wa no aboto ba dödögu wa no ahatö gamozua götö danö andre? Hadia oroma ba gamuatagu wa lö tebulö uforege wamohouni amuatagu? Hadia uʼoʼö wanuturu lala moroi ba geheha Yehowa si tola manolo yaʼo ba wolawa isö-isö dödö si fasala?’

¹⁹ Na öfareso ndraʼugö samösa, böi tötöna wa moʼahonoa ndraʼugö. Na so zinangea öbulöʼö, böi ide-ide dödöu. Törö tödöu wehede ba Wilifi 3:16, ”Sabölö moguna, enaʼö tedou ita simane si no tafalua barö daʼa.” Börö daʼö, böi tebulö douʼö ndraʼugö ba wamati. Hasambalö ifahowuʼö Yehowa wamorege si no öfalua ba wombulöʼö lala wangera-ngeramö.