Hadia no irai lö ö’ila hadia wanolo sinangea öbe’e ba ginötö mate nösi nomo zi fahuwu khöu? Itaria lö ta’ila hadia zinangea tawa’ö mazui tafalua, lua-luania talau zi lö hede-hede. Hiza’i, so wanolo si tola tabe’e.

Sabölö moguna ya’ia da’ö, so ndra’ugö ba gotaluara ba öbe’e wehede fondrara dödö simane ”fao ndra’o ba wa’abu dödö khöu”. Si to’ölönia ba mbanua bö’ö, tandra wa fao ba wa’abu dödö ya’ia da’ö na ögogohe danga mazui ötalagui niha si göna fa’abu dödö. Na fahuhuo khöu niha si göna abula dödö, haogö wamondro-ndrongo. Sabölö baga na so zinangea öfalua. Simane fondrino, mozago iraonora, mazui ölului halöwö irugi ba wogo’o. Abölö sökhi mbua-bua moroi na ha fehede.

Aefa da’ö, tola fahuhuo ndra’ugö sanandrösa ba niha si no mate andrö. Tola ötutunö gamuatania si sökhi hegöi si no irai ifalua sadöni dödöu. Na irongo da’ö niha si göna fa’abu dödö tola terara dödönia. Duma-dumania, imane Pam sanandrösa khö wo’omonia Ian si no mate önö fakhe silalö, ”Itaria lafatunö khögu niha hadia gamuata si sökhi si no irai ifalua Ian, hewa’ae lö irai u’ila. Terara dödögu wamondrongo da’ö.”

 Molo’ö si no lafareso ira sagalawa sekola, ba wamobörö ato zame’e fanolo ba niha si göna fa’abu dödö. Lö ara aefa da’ö, olifu ba arörö ira ba ngawalö halöwöra zamösana. Börö da’ö, böi aetu-aetu ö’odödögö fahuhuo khöra. * Ato niha si göna fa’abu dödö zangandrö saohagölö börö me so zondrara tödöra.

Datafaigi duma-duma zi samösa ira alawe si bohou ebua sotöi Kaori moroi ba Jepang. Abu sibai dödönia börö me no mate mamania. 15 waŵa aefa da’ö mate göi ga’ania ono alawe. Hiza’i, itema wondrara dödö moroi khö ndra talifusöda si lö faröi. So samösa zalawa döfi moroi khö Kaori sotöi Ritsuko. Omasi ia na tobali si fahuwu khö Kaori. Imane Kaori. ”Sindruhunia, lö omuso dödögu. Lö omasido na so niha bö’ö fogati mamagu, ba lö si tola mosalahini ya’ia. Hiza’i, börö me sökhi lagu Mama Ritsuko khögu, lua-luania fahuwu sibai ndra’aga. Fao ndra’aga we’amöi manuriaigö ero migu hegöi ba we’amöi ba gangowuloa niha Keriso. Ikaoni ndra’o ba wamadu tesi, i’ohe gögu ba oya ifa’ohe’ö zura hegöi kartu si möi fondrara dödögu. Amuata Mama Ritsuko andrö, da’ö zi tola mondrara tödögu.”

No felendrua fakhe me no mate mama Kaori. Iada’a, Kaori hegöi fo’omonia fao ira ba halöwö fanuriaigö safönu inötö. Imane Kaori, ”Lö aetu-aetu Mama Rutsiko wangoroma’ö fa’omasinia khögu. Ero mangawulido ba mbanuagu, ufalukhaisi ia ba omuso dödögu me fariawö ndra’o khönia.”

Duma-duma bö’ö sotema fondrara dödö ya’ia da’ö Poli, samösa Samaduhu’ö Yehowa ba Siprus. Sökhi sibai gamuata wo’omonia sotöi Sozos, samösa kubalo si sökhi ba mbanua niha Keriso. Asese ikaoni ba nomonia ndraono si lö ama, si lö ina, hegöi lakha mbanua ena’ö fariawö ba fao ira wemanga. (Yakobo 1:27) Hiza’i, me 53 fakhe ndröfi Sozos, mate ia börö tumor otak. Imane Poli, ”No 33 fakhe me no mangowalu ndra’aga, ba u’amalösi sibai börö me fo’omo si lö faröi ia.”

Me no aefa lako’o wo’omonia, findra Poli hegöi ononia Daniel si 15 fakhe ba Kanada. Labörögö fariawö khö ndra Samaduhu’ö Yehowa ba da’ö. Itörö tödö Poli, ”Ira talifusö ba mbanua niha Keriso sawena faböbö ndra’aga, lö la’ila hadia zi no irai alua khöma hegöi me göna khöma wangabu dödö. Hiza’i, fariawö ira khöma ba lö aetu-aetu laforoma’ö wa’omasira moroi ba wehede hegöi ba nifaluara. Ebua sibai mböli ba dödögu wanolo nibe’e ndra talifusöda khöma mendrua manö khö nonogu ba ginötö itörö tödönia bapania! Ira sondrönia’ö ba gangowuloa göi la’omasi’ö sibai Daniel. Samösa moroi ba gotaluara asese ladönisi Daniel fariawö khö ndra talifusöda mazui möi fabola.” Ya’ira si darua iada’a, lasöndra wa’ohahau dödö.

Tatu manö, oya wanolo hegöi fondrara dödö si tola tabe’e ba niha si göna fangabu dödö. So göi khöda wondrara dödö nibe’e Zura Ni’amoni’ö si tobali fangomuso dödöda ba zi so miföna.