Oya mene-mene sanandrösa ba duho andre. Hiza’i, lö fefu tobali fanolo. Duma-dumania, so zanguma’ö khöu ena’ö böi me’e ndra’ugö mazui böi ö’oroma’ö ba niha hadia nirasoimö. So göi danö bö’ö sanguma’ö ena’ö me’e ba ö’oroma’ö hadia nirasoimö. Tobali so wanuturu lala si sökhi moroi ba Zura Ni’amoni’ö ba tefaudu ba zi no lafareso ba ginötö da’a.

So zi to’ölö ba mbanua bö’ö, na me’e ndra matua no sambua fangaila da’ö. Tobali, hadia moguna aila ita me’e mendrua manö föna niha sato? Molo’ö ira pakar kesehatan mental, lö fasala na me’e ita börö wa’amate. Na me’e ita, da’ö zi tobali fanolo ba wo’alösi fa’abu dödö nirasoida. Lö baga na tataha-taha ia bakha ba dödö. Molo’ö Sura Ni’amoni’ö lö fasala na me’e mazui tobali fangaila. Angeraigö atö zalua khö Yesu. Hewa’ae so khönia wa’abölö ba wangorifi niha si no mate, hiza’i lö aila ia me’e föna niha sato me mate niha si fahuwu khönia, sotöi Lazaro.​—Yohane 11:33-35.

Sinangea na itaria mofönu niha sanaögö fa’abu dödö, mendrua manö na niha ni’omasi’ö mate ba zi lö mudöna-döna. Oya mbörö wa tola mofönu niha si göna fa’abu dödö. Duma-dumania, niha nifosumangeda ifa’ema wehede si lö fakhamö i’angeraigö. Imane samösa ira matua moroi ba Afrika Selatan sotöi Mike, ”Ha 14 fakhe ndra’o me mate namagu. Ba ginötö lako’o ia, imane fandrita Gereja Anglikan wa moguna khö Lowalangi niha si sökhi amuata ba ikaoni ira ba wa’alio. * Mofönu sibai ndra’o me urongo wehede da’ö börö me moguna khöma nasa zatuama. Iada’a, no 63 fakhe me no mate ia ba lö manö taya wa’afökhö dödögu ba wahede da’ö.”

Hewisa na alua waniasa? Mendrua manö na alua wa’amete si lö mudöna-döna, tola imane tödönia niha sabu tödö, ’Lö alua da’a mena’ö na ufalua da’a ma da’ö.’ Mazui no fa’udu ami fatua lö mate ia. Tola manö monönö waniasamö ba fatahi ndra’ugö.

Na no irai maniasa ndra’ugö ba mofönu’ö simane da’ö, böi taha ia ba dödöu. Si bagania, fatunö ba niha si fahuwu khöu somasi mamondrongo hegöi ba wame’e fa’afaduhu dödö wa lö fasala nirasoimö andrö. Imane Sura Ni’amoni’ö, ”Sindruhu si fahuwu, ba no fadoro i’omasi’ö nawönia; ba ba wamakao, ba tumbu ia si fatalifusö.”​—Gamaedola 17:17.

Lowalangi Yehowa, Samazökhi ya’ita, ha ya’ia zi Fahuwu sabölö baga ba niha sabu tödö. Tutunö khönia nösi dödöu ba wangandrö, börö me ’so so sa dödönia ndra’ugö’. (I Fetero 5:7) No ifabu’u Lowalangi wa fefu zamalua da’ö ibe’e ’wa’ohahau dödö andrö, khö Lowalangi, sabölö moroi ba gera-era niha fefu’. (Filifi 4:6, 7) Tema wondrara dödö nibe’e Lowalangi khöu moroi ba Zura Ni’amoni’ö. Sura ayati si möi fondrara dödö. (Faigi  kotak.) Tola göi ötanö ba dödöu ayati da’ö. Na  öfalua da’ö, ba zi ha ya’ugö hegöi na lö ö’ila mörö ba zi bongi, ayati da’ö tola tobali fondrara dödöu.​—Yesaya 57:15.

Barö-barö da’a, samösa zotöi Jack 40 fakhe ndröfinia, mate wo’omonia börö kanker. Ifatunö Jack wa itaria lö sökhi dödönia na haya’i-ya’ia. Hiza’i, isöndra wanolo börö wangandrö. Imane, ”Me mangandrödo khö Yehowa, urasoi wa so nawögu. Asese tokea ndra’o ba zi bongi ba lö u’ila mörö. Börö da’ö ulau mombaso ba u’angerönusi ayati Zura Ni’amoni’ö ba ututunö nösi dödögu khönia ba wangandrö. Börö da’a wa usöndra wa’ohahau dödö, irege u’ila mörö zui.”

Samösa ndra alawe sotöi Vanessa no mate ninania börö wökhö. Irasoi samösa wa fangandrö tola tobali fanolo khönia. Imane wanguma’ö, ”Ba ginötö tebai utaögö, awai zi tola ufalua u’angaröfili döi Lowalangi ba ukila we’e. Ifondro-ndrongo wangandrögu Yehowa ba ibe’e khögu wa’abölö.”

Ira psikolog la’amenesi niha si göna fa’abu dödö ena’ö fao ira ba wanolo niha bö’ö mazui fao ira ba kegiatan sosial. Na lafalua da’ö tola lasöndra wa’omuso dödö ba alö wa’abu dödöra. (Halöwö Zinenge 20:35) Ato niha Keriso si göna abula dödö, lasöndra wondrara dödö börö me latolo niha bö’ö.​—II Korindro 1:3, 4.