Sama’ema fehede andrö ya’ia da’ö niha si fahuwu khöra. Hewa’ae simanö, tenga itugu terara dödönia. Fahuwu sibai Barbara khö namania. Lö aetu-aetu imane Barbara, ”Lö sökhi wa’amate namagu.” Ha’uga fakhe aefa da’ö, isura Barbara ba mbuku hewisa me mate namania. Da’a zangoroma’ö wa lö manö nasa alö wa’abu dödönia.

Tatu manö, ara alö wa’abu dödöda na mate niha ni’omasi’öda, mendrua manö na fahuwu sibai ita khönia, simane salua khö Barbara. Ba Zura Ni’amoni’ö, mu’amaedolagö wa’amate andrö simane ”safuria zi fa’udu”. (I Korindro 15:26) Tebai tatimbagö nifotöi fa’amate. Itaria ifawukaisi wa’aurida, mendrua manö na mate niha ni’omasi’öda ba ginötö si lö tadöna-döna. Lö niha si lö manörö fa’abu dödö börö wa’amate. Tatu manö, sinangea na afatö dödöda na mate niha ni’omasi’öda ba lö ta’ila hadia nifaluada hegöi lua-luania.

Te manofu-nofu ndra’ugö: ’Hawa’ara tola alö wa’abu dödögu andre? Hewisa ena’ö tola tataögö gabula dödö simane da’a? Na so niha si göna abula dödö, hewisa ena’ö tola urara dödönia? Hadia so dötönafö ba niha ni’omasi’öda si no mate?’