Hadia no irai göna ndra’ugö fökhö si lö abölö-bölö? Me no döhö ndra’ugö tatu olifu’ö sa’e hewisa wa’afökhö. Tenga simane da’ö na mate niha ni’omasi’öda. Imane Dr. Alan Wolfelt ba mbukunia Healing a Spouse’s Grieving Heart, ”Lö alio taya wa’abu dödöda na mate niha ni’omasi’öda. Hiza’i, na so niha zondrara tödöda ba itugu numalö göi ginötö, tola manö alö wa’abu dödöda.”

Faigi hadia zalua khö wurugöda Aberahamo me mate wo’omonia. Imane Sura Ni’amoni’ö ”Ibörögö fa’ala-alai Gaberahamo ba i’e’esi Zara”. Ngawua wehede ”ibörögö” eluahania ara taya wa’abu dödönia. * Duma-duma tanö bö’ö ya’ia da’ö Yakobo. No lalimo ia wa mate nononia Yosefo lawa’ö no ibunu ia utu ndru’u. ’Ara’ aheta wa’abu dödönia. Hewa’ae no larara dödönia ösi nomonia, lö manö taya ba dödönia wa’amate Yosefo ba zi ha’uga fakhe.​—I Moze 23:2, NW; 37:34, 35; 42:36; 45:28.

Simanö göi ba ginötö andre na mate niha ni’omasi’öda. Datafaigi dombua duma-dumania.

• ”Mate wo’omogu Robert me 9 mbaŵa si Fitu 2008. Fatua lö mate ia, si to’ölönia, ero si hulö wongi, na no awai manga ndra’aga ba na mofanö ia wohalöwö, faoma ma’uma ba matalagui nawöma, ba mabe’e wehede fa’omasi. Öno fakhe aefa da’ö afökhö nasa ba dödögu. Hiza’i, lö manö si taya ba dödögu ia.”​—Gail, 60 fakhe.

• ”Hewa’ae no 18 fakhe me no mate wo’omogu, lö aetu itörö-törö tödögu ia. Na u’ila zadöni dödögu ba zi fasui ya’o, itörö tödögu ia. Tatu manö na lö si mate ia, omuso dödönia na i’ila hadia nifaigi-faigigu andrö.”​—Etienne, 84 fakhe.

Na mate niha ni’omasi’öda, lö fasala na ara taya wa’abu dödöda. Fabö’ö-bö’ö zalua na abu dödö zi samösa niha. Lö baga na tahuku ia ha börö me ikila wege-ege. Hewa’ae abu sibai dödöda, böi tatahigö ita samösa. Hewisa ena’ö tola tataögö gabula dödö andrö?