Tumbu ndra’o ba Mulhouse ba timur laut Prancis. Toröido ba mbanua si numana ba no tehöngö mbanuama ba wa’amu’i. Me ide-ide ndra’odo asese u’ila ba mbanua niha si fa’udu-udu ba zi sambua omo. Ba zi sambua omoma, asese lö la’ame’egö tödö ba lö to’ölö la’andrö mbua gera-era ndra alawe. Lafaha’ö ndra’o wa ira alawe andrö ha sohalöwö ba naha nawu, mondrorogö ira matua hegöi iraono.

Afeto wa’aurigu me iraono. Me fulu fakhe ndra’o, mate bapagu börö me asese ibadu duo. Lima fakhe aefa da’ö, ibunu samösa ia ga’agu ono matua. Ba ndröfi da’ö göi u’ila hörögu samösa me alua wabunusa ba nösi nomoma börö wa’udusa. Sindruhu-ndruhu tokea ndra’o. Lafaha’ö ndra’o ösi nomoma ba wangoguna’ö rosö, fana, hegöi ba wa’udusa. Afökhö högögu, ubörögö wamake tato ba ulau mamadu tuo.

Me 16 fakhe, ubadu 10 irugi 15 boto-boto bir ero ma’ökhö, ba lö ara aefa da’ö ufake narkoba. Ba wamu’a da’ö fefu, u’amawa zi’öli si no atua ba ulau managö. Me 17 fakhe, no irai labe’edo ba gurunga. Lahuku ndra’o 18 kali börö wanagö ba fa’udusa ba niha.

Me arakhagö 20 fakhe, itugu lö sökhi wa’aurigu. Ba zi sahari ubadu 20 ganja nitandraölö, ufake heroin, ba dalu-dalu tanö bö’ö nitegu ndra famareta. No ha’uga kali arakhagö matedo börö me talafo oya ubadu. Ubörötaigö mamawa narkoba, ba u’ohe-ohe rosö hegöi fana. No irai ufana samösa ndra matua, harazaki wa ba högö mböbö löwinia göna! Me 24 fakhe ndra’o, mate ninagu ba itugu amu’i ndra’o. Na la’ila ndra’o niha ba ata’u ira lalau mofanö. Ba börö me asese fa’udu ndra’o, itaria hari satu ba hari migu la’ohe ndra’o ba kantor polisi mazui ba ruma saki ba wanagu sokho ba nösigu.

Me 28 fakhe ndröfigu, ulau mangowalu. Hiza’i amu’i ndra’o khö wo’omogu. Asese ulele ba ubözi ia, ba lö irai falulu fohalöwö ndra’aga. Uwalingagö ibönö na no ube’e khönia gama-gama nitagö. Aefa da’ö, so zalua si lö mudöna-döna. Ibörögö ifaha’ö ia fo’omogu ba Zura Ni’amoni’ö khö ndra Samaduhu’ö Yehowa. Me no aefa wamaha’önia si föföna, ibato woroko, lö itema sa’e gefe nitagö, ba ifuli gama-gama nibe’egu khönia. Mofönu sibai  ndra’o khönia. Ufakao-kao ia na ifaha’ö ia ba Zura Ni’amoni’ö ba uwuwusi zimbo rokogu ba mbawania. U’o’aya-aya ia föna niha sato.

Samuza inötö me mabu ndra’o ba zi bongi, utunu nomoma. Iheta ndra’o fo’omogu hegöi onogu si ide-ide si lima fakhe moroi ba galitö. Me no döhö wa’amabugu maniasa sibai ndra’o. Umane tödögu lö tola i’efa’ö horögu Lowalangi. Lö olifudo me fahuhuo samösa wandrita imane, niha si lö sökhi möi ba narako. Imane göi khögu dokter jiwa, ”Lö fanötöna khöu sa’ae! Lö te’efa’ö horöu.”

Me no akhozi nomoma, toröiga ba nomo ninagu matuagu. Me möi ndra Samaduhu’ö Yehowa ba wamalukhaisi fo’omogu, usofu khöra, ”Hadia tola i’efa’ö horögu Lowalangi?” Labaso khögu I Korindro 6:9-11 moroi ba Zura Ni’amoni’ö. Ba ayati da’a idunö-dunö gamuata sogoro Lowalangi. Ba ayati da’ö göi iwa’ö, ”Ba no simanö ösa ami föna.” Moroi ba ayati da’a faduhu dödögu wa tola ubulö’ö gamuatagu. Aefa da’ö, labokai khögu I Yohane 4:8 ba lafaduhu’ö wa i’omasi’ö ndra’o Lowalangi. Börö me terara dödögu, u’andrö khö ndra Samaduhu’ö Yehowa ena’ö lafaha’ö ndra’o ba Zura Ni’amoni’ö dua kali samigu. Ubörögö we’amöi ba gangowuloa niha Keriso khöra, ba lö ubato wangandrö khö Yehowa.

Me no aefa sara waŵa, uhalö gangetula ubato wamake narkoba ba uböhöli wamadu tuo. Hiza’i, urasoi so zi fa’udu ba mbotogu! Asese u’angifigö zi lö sökhi, afökhö högögu, agakandro nösigu, ba oya danö bö’ö nirasoigu me no ubato wamalua da’ö. Hiza’i, urasoi wa igogohe dangagu Yehowa ba wangabölö’ö ya’o. Urasoi simane Faulo me itema wanolo moroi khö Lowalangi. Imane Faulo, ”Ulawa manö fefu, börö zanga’abölö ya’o andrö.” (Filifi 4:13) Ba gafuriata tola uböhöli woroko.​—II Korindro 7:1.

Sura Ni’amoni’ö zanga’azökhi fa’aurigu hegöi ösi nomogu. Tebulö gamuatagu khö wo’omogu. Ibörögö u’osinangegö ia ba na so niwa’ögu asese uwa’ö wehede ”tolo” ba ”saohagölö”. Ibörögö göi tobali ndra’o satua si sökhi khö nonoma alawe. Me no irugi döfi ufaha’ö ndra’o ba Zura Ni’amoni’ö, fawu’u li ndra’o khö Yehowa ba tebayagö idanö simane nifalua wo’omogu.

Faduhu dödögu wa goi-goi Zura Ni’amoni’ö zangefa’ö ya’o. Talifusöma si tenga Samaduhu’ö Yehowa lamane te no mate ndra’o börö wamake narkoba mazui börö wa’udusa.

Tebulö fefu wa’aurima ya’aga si sambua omo. Famaha’ö Zura Ni’amoni’ö zanolo ya’o ba wamalua fo’ömögu tobali satua ba fo’omo si sökhi. (Efeso 5:25; 6:4) Ibörögö fao ndra’aga ba wamalua halöwö. Iada’a, lö ufaso wo’omogu ba naha nawu. Hiza’i, omuso dödögu ba watuhini fo’omogu me ihalö halöwö fanuriaigö safönu inötö. Fao göi dödönia khögu me no tobali ndra’o satua sokubaloi ba mbanua niha Keriso.

Fa’omasi ba fa’ahakhö dödö Yehowa da’ö zombulö’ö fa’aurigu. Omasi ndra’o udunö-dunö gamuatania ba niha si lö fanötöna, simane famaigi niha fa’aurigu mböröta. Aboto ba dödögu wa Sura Ni’amoni’ö tola tobali fanolo gofu haniha ia ba wangokhögö fa’auri si sökhi si so tötönafö. Ifaha’ö ndra’o Sura Ni’amoni’ö ba wangomasi’ö hegöi ba wangosinangegö niha bö’ö, ira matua ba ira alawe, hegöi botogu samösa.