FA’ALÖSÖKHI BA NÖSI NOMO HEGÖI BA WA’ORUDU: Itutunö Perserikatan Bangsa-Bangsa ”Samösa moroi ba zi datölu ndra alawe no tefakao mazui manaögö fa’alösökhi ba wa’orudu nifalua wo’omora, itaria alua da’ö ba wa’aurira.” Aefa da’ö, ”arakhagö samösa moroi ba zi dalima ndra alawe ba zi sagörö ulidanö nihoröni mazui arakhagö lahoröni.”

FA’ALÖSÖKHI SALUA BA LALA: Molo’ö fangombakha, töra moroi ba zi 30.000 angowuloa niha si lö sökhi samalua fa’alösökhi ba Amerika Serikat. Ba Amerika Latin, arakhagö 1 moroi ba zi 3 niha ni’ombakaha’ö tobali nifakao ba wa’alösökhi andre.

FAMUNUSA: Arakhagö matonga zuta niha nibunu me ndröfi 2012, töra moroi ba wa’ato niha nibunu ba wasuwöta. Abölö ato niha nibunu ba afrika tanö raya hegöi ba Amerika Tengah, öfa kali wa’oya niha nibunu salua misa ba gulidanö. Ba zi töra döfi 100.000 niha nibunu ba Amerika Latin, ba arakhagö 50.000 niha ba Brazil. Hadia so zinangea mufalua ba woböhöli fa’alösökhi andrö?

Hana wa itugu oya manö wa’alösökhi andrö? No mu’ila hadia mbörönia: börö wa’atedou gamaehuta sosial ba ekonomi, si to’ölönia lö lafosumange wa’auri nawöra niha, fangoguna’ö alkohol ba zi lö tefaudu hegöi narkoba, asese la’ila iraono wa’alösökhi nifalua zegebua moroi khöra, ba lö labe’e huku ba niha zamalua fa’alösökhi.

No oya nifalua ba zi hauga soi ba wangalösi fa’alösökhi andre. Banua São Paulo, Brasil, ato sibai ono mbanuania. No te’ombakha’ö wa 80 persen alö wamunusa barö zi fulu fakhe andre. Hewa’ae simanö, alua nasa ngawalö wa’alösökhi andrö, ba arakhagö 10 moroi ba zi 100.000 niha nibunu. Börö da’ö, hadia zinangea mufalua ba wangohori fa’alösökhi?

Ba wangohori fa’alösökhi so gamakhaitania ba mbua-bua hegöi gamuata samösa niha. Niha si lö sökhi tola tebulö ia na itibo’ö mbua-mbua fa’asiliawa, ha tana khönia i’alui, ba fakhögusa. Ibulö’ö tobali fa’omasi, famosumange, ba fo’ame’egö tödö niha bö’ö.

Hadia si tobali famarou zi samösa niha ba wobulö’ö amuatania? Angeraigö hadia nifaha’ö Zura Ni’amoni’ö:

• ”Da’ö sa wa’omasida Lowalangi, ena’ö ta’o’ö goroisania.”—I Yohane 5:3.

• ”Fangata’ufi Yehowa, ba no fa’ogoro ba zi lö sökhi.” *​—Gamaedola 8:13.

Fa’omasi khö Lowalangi hegöi fa’ata’u ba wame’e afökhö dödönia da’ö si tobali fa’abölö khö zi samösa niha ba wombulö’ö amuatania. Ba tenga ha asala ibulö’ö ia, hiza’i sindruhu-ndruhu i’oroma’ö ba wa’aurinia. Hadia sindruhu tola alua da’ö?

Angeraigö Alex, * no irai lakuru ia 19 fakhe wa’ara ba Brasil börö me mato hauga kali ifalua zi lösökhi. Me no aefa tefaha’ö ia ba Zura Ni’amoni’ö, tobali Samaduhu’ö Yehowa ia me döfi 2000. Hadia sindruhu no ibulö’ö gamuatania? Sindruhu, maniasa sibai Alex ba zi lö sökhi si no ifalua ba zilalö. Imane alex, ”U’omasi’ö sibai Yehowa ba urasoi hewisa wangefa’önia fefu golalöwagu. Fangandrö saohagölö ba fa’omasigu khö Yehowa da’ö zanolo ya’o ba wobulö’ö da’ö fefu.”

César, ya’ia göi moroi ba Brasil, i’oguna’ö wana ba wanagö hegöi ba worabu. Ifalua da’ö 15 fakhe ba wa’aurinia. Hana wa tola ibulö’ö fa’aurinia? Me so ia ba gurunga, lafalukhaisi ia ira Samaduhu’ö Yehowa, ba ifaha’ö ia ba Zura Ni’amoni’ö. Imane César, ”Awena usöndra gohitö dödö wa’aurigu. Ufaha’ö ndra’o wangomasi’ö Lowalangi. Ufaha’ö göi ndra’o wangokhögö dödö fangata’ufi ena’ö lö ufalua zi lö sökhi si möi mangafökhöi’ö tödö Yehowa. Omasido u’oroma’ö wa u’andrö sibai saohagölö wa’ahakhö dödönia. Fa’omasi ba fangata’ufi da’ö si tobali famarou khögu ba wobulö’ö fa’aurigu.”

Hadia ni’ilada moroi ba zi no alua khöra? Mofa’abölö Zura Ni’amoni’ö ba wanolo niha ba wobulö’ö lala wangera-ngerara irege laröi wa’aurira si lö sökhi. (Efeso 4:23) Imane nasa Alex, nitutunö moroi yawa, ”Hadia zi no ufaha’ö ya’o ba Zura Ni’amoni’ö hulö nidanö sohahau nifaduwa ba mbotogu, itugu ara taya wangera-ngera si lö sökhi. Lö utötöna wa da’ö zi tola manolo ya’o wobulö’ö fa’aurigu.” Atulö, wa ba ginötö tafa’anö ba wangerada mene-mene Zura Ni’amoni’ö, tola tatimbagö wangera-ngera si lö sökhi. Daromali Lowalangi Mofa’abölö ba wangehaogö. (Efeso 5:26) Buania ya’ia da’ö niha si lö sökhi ba niha sangalui tana khönia tola tobali sökhi ba somasi fa’atulö. (Roma 12:18) Larasoi samösa wa’ohau-hau dödö ba wa’aurira börö me la’o’ö mene-mene Zura Ni’amoni’ö.—Yesaya 48:18.

Töra walu zuta ndra Samaduhu’ö Yehowa ba zi 240 soi no lasöndra lala ba wotimbagö fa’alösökhi. Niha moroi ba ngawalö soi, tingkat sosial, hegöi waö-waö wa’auri no lafahaö ira ba wangomasi’ö hegöi ba wangata’ufi Lowalangi ba faoma la’omasi’ö nawöra, so khöra wa’atulö hulö zi sambua omo ba zi sagörö ulidanö. (I Fetero 4:8) Moroi ba wa’aurira zangoroma’ö wa tola alua ulidanö si lö fa’alösökhi.

Imane Sura Ni’amoni’ö wa ba zi lö aratö ihori fefu ngawalö wa’alösökhi. Gulidanö si lösökhi andre no ihenaigö Lowalangi ”na luo wanguhuku andrö, no luo wa’atekiko niha si lö mangata’ufi Lowalangi”. (II Fetero 3:5-7) Lö hadöi sa’ae niha si lö sökhi samakao niha bö’ö. Hewisa ena’ö faduhu dödöda wahasambalö ihori zi lö sökhi Lowalangi?

Imane Sura Ni’amoni’ö wa Lowalangi ”i’ogorofi tödönia zebua horö andrö ba somasi mamakao awönia”. (Zinunö 11:5) Somböi ya’ita i’omasi’ö wa’atulö ba falö’ebua dödö zambuana. (Zinunö 33:5; 37:28) Da’ö mbörö wa lö itehegö so zi lö sökhi sagötö fa’ara.

Sindruhu, lö aratö tohare gulidanö si bohou. (Zinunö 37:11; 72:14) Hadia omasi öfaha’ö ndra’ugö nasa ba Zura Ni’amoni’ö ena’ö tola ösöndra wa’auri ba gulidanö si lö fa’alösökhi andrö?