SANAISI: Fameta’u moroi baero simane fa’atekiko ba fanandraigö tebai ibe’e taya Zura Ni’amoni’ö. Hiza’i, so ndra sanali ba samo’eluaha Zura Ni’amoni’ö omasi labulö’ö nösinia. Itaria, latandraigö lafazökhi Zura Ni’amoni’ö ba wotuhini famaha’öra, lö lafaudugö wamaha’öra ba Zura Ni’amoni’ö. Angeraigö duma-duma da’a:

• Nahia Wamosumange: Ba gotalua Abad si öfa ba si dua SM, sanura Pentateukh Samaria * inönö ngawua wehede zi so ba II Moze 20:17 ya’ia da’ö ”ba Hili Gerisi. Ba ba da’ö lö tola lö öfesindro sambua nahia wame’e sumange”. Manötöna niha Zamaria ba Daromali Lowalangi si tobali fotuhini ba wamazökhi nomo Lowalangi ba Hili Gerisi.

• Famaha’ö Lowalangi Sambua Tölu: Ambö 300 fakhe me no aefa lasura Zura Ni’amoni’ö, samösa ba zamaduhusi tödö Lowalangi Sambua Tölu inönö ngawua wehede ba I Yohane 5:7 ya’ia da’ö ”ba zorugo, Ama, Taromali, ba Eheha Ni’amoni’ö: ba hasambua ira”. Wehede da’ö lö hadöi ba naskah si föföna. Imane Bruce Metzger, samösa sonekhe ba Zura Ni’amoni’ö, ”I’otarai abad si fele önö hegöi aefa da’ö, ngawua wehede andrö itugu ara itugu asese tesöndra ia ba nga’örö naskah Latin Me Föna hegöi ba [Latin] Vulgata.”

• Töi Lowalangi: Ato zamo’eluaha Sura Ni’amoni’ö labali’ö nifaduhusi tödö niha Yahudi tobali dane-dane ba wangeheta töi Lowalangi moroi ba Daromali Lowalangi. Lafalalini döinia tobali töi faka simane ”Lowalangi” mazui ”So’aya”, töi ni’oguna’öra andrö tenga ha khö Zomböi latötöi ia hiza’i tola göi mu’oguna’ö ba niha, nadu, hegöi khö Gafökha.—Zinunö 82:6; I Korindro 8:5, 6; II Korindro 4:4. *

HEWISA WA IRUGI IADA’A TOLA SO ZURA NI’AMONI’Ö: si oföna, hewa’ae so ösa zanura Sura Ni’amoni’ö lö la’osiwawöi ba lö latörö zindruhu, ato göi zatua-tua ba la’angenanöi. Ba gotalua abad si önö ba si fulu, lasali Mbuku Ni’amoni’ö Heberai’o niha Masoret, tefotöi ia naskah Masoret. Molo’ö wangombakha, la’erai ngawua wehede hegöi hurufo ena’ö lö fasala ba ginötö lasali. La’oguna’ö göi nisura ba zinga ba wanura gonönöta zangoroma’ö na so niwu’ai ba naskah andrö. Niha Masoret andre latimbagö ba wombulö’ö naskah Zura Ni’amoni’ö. Imane Profesor Moshe Goshen-gottsein, ”Ba niha Masoret, na la’odödögö wowu’ai no sambua fondrege fa’alösökhi da’ö.”

Si dua, börö me oya nga’örö naskah si so iada’a sindruhunia möi fanolo niha sogonekhe ba Zura Ni’amoni’ö ba wangalui na so zi sala. Duma-dumania ba zi ngaotu fakhe, lamane tödöra ira sondrönia’ö ba agama wa Zura Ni’amoni’ö si no lafo’eluaha ba li Latin khöra no tefaudu ba naskah si föföna. Hiza’i, ba I Yohane 5:7, lafaogö ngawua wehede si fasala simane nitutunö moroi yawa ba duho da’a. Zala si no lafalua andre molua-lua ia ba King James version ba li Inggris! Hadia zi te’ombakha’ö me no lasöndra naskah tanö bö’önia? Isura Bruce Metzger wa,”ngawua wehede [ba I Yohane 5:7] lö hadöi fefu ba naskah si föföna (Siria, Koptik, Armenia, Etiopia, Arab, Slavia) baero ba li latin.” Börö da’ö, King James Version si no lafuli labohouni hegöi Sura Ni’amoni’ö tanö bö’önia no laheta ngawalö wehede si fasala.

Hadia naskah-naskah si no atua andre tola iforoma’ö khöda wa nösi Zura Ni’amoni’ö andre lö tebulö? Me lasöndra Nga’ölu Nasi si Mate ba ndröfi 1947, ira sagatua-tua tola lafatimbaisi naskah Masoret Heberai’o ba nga’ölu Zura Ni’amoni’ö si no lasura töra saribu fakhe ba zilalö. So ösa niha sangosisi’ö Nga’ölu Nasi si Mate lahalö gangetula wa hasambua nga’ölu no ”iforoma’ö khöda wa töra saribu fakhe me lasali naskah Zura Ni’amoni’ö niha Yahudi sanali, sindruhu-ndruhu tefaudu ba fagöna”.

The Chester Beatty Library ba Dublin, Irlandia, arakhagö lafalemba fefu papirus Buku Ni’amoni’ö Yunani Niha Keriso. Tefarahu göi ba da’ö naskah me abad si dua M nifazökhi töra 100 fakhe me no awai tesura Zura Ni’amoni’ö. Imane The Anchor Bible Dictionary ”baero i’asogö fangombakha soya hegöi si bohou sanandrösa ba naskah, iforoma’ö göi papirus hewisa wa’atefaudu ba wanali naskah Zura Ni’amoni’ö.”

BUANIA: Tenga tobali tebulö nösi Zura Ni’amoni’ö hewa’ae so naskah Zura Ni’amoni’ö si no atua ba oya ia nasa, hiza’i tobali itugu sökhi. Sir Frederic Kenyon isura so amakhaita ba Mbuku Ni’amoni’ö Yunani Niha Keriso, ”Lö hadöi mbuku si no so i’otarai me föna zanga’asogö oya dandra ba wotuhini naskahnia, ira sogonekhe ba Zura Ni’amoni’ö si lö falimo lö la’ositengagö wa naskah andrö no oya te’asogö ia khöda.” Imane göi William Henry Green sanandrösa ba Mbuku Ni’amoni’ö Heberai’o, ”Tola mumane wa lö hadöi tanö bö’ö nifazökhi i’otarai me föna irugi iada’a nihaogö ba wangosisi’ö.”