Zura Ni’amoni’ö no buku si faehu moroi ba mbuku agama tanö bö’ö. Lö buku tanö bö’ö sabölö ara nifaduhusi tödö niha sato. Aefa da’ö lö buku tanö bö’ö baero Zura Ni’amoni’ö sabölö oya nifareso hegöi ni’alui zala.

Duma-dumania, so ösa sagalawa sekola ambö faduhu dödöra wa nösi Zura Ni’amoni’ö ba ginötö iada’a simane nisura me föna. Imane samösa profesor ba agama, ”Lö aboto ba dödöda hadia no atulö wamo’eluahada nösinia simane si föföna. Famo’eluaha ni’okhögöda oya zi fasala. Soyania tefazökhi me no hauga ngautu fakhe me no aefa tesura si föföna ba oya sibai gamaehutania.”

Tanö bö’önia ambö faduhu dödöra hadia simane si föföna nösi Zura Ni’amoni’ö börö wa’afaehu agama. Simane samösa ndra matua sotöi Faizal. No lafaha’ö ia ira satuania si tenga niha Keriso wa Sura Ni’amoni’ö andrö buku Ni’amoni’ö, hiza’i no tebulö. Imane wanguma’ö, ”Manahö dödögu na so niha somasi fahuhuo khögu ba Zura Ni’amoni’ö börö me lö khöra Sura Ni’amoni’ö si föföna. No tebulö da’ö!

Hadia tobali taha-taha ma lö’ö na tebulö Zura Ni’amoni’ö? Angeraigö anofula da’a: Hadia tola öfaduhusi tödö nifabu’u Zura Ni’amoni’ö same’e fondrara dödö ba zi so föna na lö ö’ila wa nifabu’u andrö so ba naskah si föföna? (Roma 15:4) Hadia omasi ö’o’ö mene-mene Zura Ni’amoni’ö ba ginötö öhalö gangetula sanandrösa ba halöwö, ösi nomou, mazui famosumange na tebulö nösi Zura Ni’amoni’ö iada’a?

Hewa’ae buku-buku Zura Ni’amoni’ö si föföna no taya, tola tafuli tafareso Sura Ni’amoni’ö zi no irai lasali me föna, simane ngahönö naskah-naskah Sura Ni’amoni’ö. Hana wa tola anau gölö naskah andrö hewa’ae so zomasi wamakiko ya’ia, ato zi fatuwu, hegöi so zomasi zombulö’ö ösinia? Börö me Sura Ni’amoniö so irugi iada’a, hadia faduhu dödömö wa ösinia simane si föföna? Angeraigö wanema li zinofu andrö, ba faigi waö-waönia safönu fanandraigö.