Me döfi 1949, findra bapagu moroi ba Jerman numalö ba Australia. I’alui halöwönia ba pertambangan hegöi perusahaan pembangkit listrik, ba toröi ia ba mbanua Victoria. Ba da’ö lalau mangowalu ira satuagu, ba tumbu ndra’o me döfi 1953.

Ba zi hauga fakhe aefa da’ö, ibörögö ifaha’ö ia mamagu ba Zura Ni’amoni’ö khö ndra Samaduhu’ö Yehowa. Andrö i’otarai ide-idedo, no so khögu wa’ahöli-höli dödö ba famaha’ö Zura Ni’amoni’ö. Hiza’i fatuwu khö bapagu agama. Tobali ia niha samu’i, ata’u sibai mamagu börö me’asese ifeta’u ia bapagu. Ifaha’ö manö ia mamagu ba Zura Ni’amoni’ö ba zi lö i’ila bapagu, ba itugu i’omasi’ö hadia zi no ifaha’ö ya’ia. Na mofanö bapagu, idunö-dunö khögu hegöi khö nakhigu ono alawe hadia zi no ifaha’ö ya’ia. Ifatunö khöma mamagu wa so gulidanö si bohou ba zi so föna ba hewisa wa tola owua-wua dödöma na ma’o’ö goi-goi Zura Ni’amoni’ö.—Zinunö 37:10, 29; Yesaya 48:17.

Me 18 fakhe ndröfigu, tumbu ba dödögu wondröi omo börö me lö sökhi gamuata bapagu. Hewa’ae faduhu dödögu ba nifaha’ö mamagu, hiza’i u’osilö’ögö da’ö fefu. Andrö wa lö u’o’ö mene-mene Zura Ni’amoni’ö. Ibörögö mohalöwödo ba pertambangan sanandrösa ba listrik. Mangowalu ndra’o me 20 fakhe ndröfigu. Tölu fakhe aefa da’ö, tumbu khöma nono alawe ono sia’a, ba ufatimbaisi ba dödögu hadia zabölö moguna ba wa’aurigu. Aboto ba dödögu wa tola tobali fanolo Zura Ni’amoni’ö ba nösi nomoma, andrö ufuli ufaha’ödo ba Zura Ni’amoni’ö khö samösa Samaduhu’ö Yehowa. Hiza’i, fatuwu sibai khö wo’omogu Zamaduhu’ö Yehowa. Me möido ba gangowuloa, ifeta’udo fo’omogu ba wamili hadia ubato wamaha’ö ba Zura Ni’amoni’ö mazui uröi soroi yomogu. Börö wa’adogo-dogo wangera-ngeragu ba u’o’ö manö zomasi ia, ba lö sa’ae ufaha’ödo khö ndra Samaduhu’ö. Ba gafuriata so khögu waniasa börö me lö u’o’ö zindruhu andrö.

Samuza inötö la’oroma’ö khögu pornografi ira awögu ba wohalöwö. Lua-luania toröi-röi da’ö ba dödögu ba sogoro sibai, ba lö aetu itegu-tegudo tödögu. Börö me itörö tödögu zi no ufaha’ödo ba Zura Ni’amoni’ö, faduhu dödögu wahasambalö ihuku ndra’o Lowalangi. Hiza’i, börö me lö aetu-aetu ufaigi pornografi, lö sa’ae fatuwu ba wangera-ngeragu irege tagiado wamaigi ya’ia.

Töra 20 fakhe, itugu aröu ndra’o moroi ba wa’asindruhu ba lö ufalua zi sökhi simane si no irai utema wamaha’ö moroi khö mamagu. Hadia nibe’egu ba wangera-ngeragu oroma ba gamuatagu. Lö sökhi wehedegu hegöi ba wude-wude hokha. Lua-luania lö fatimba ba dödögu fohorö. Hewa’ae no so wo’omogu, selingkuh nasa ndra’o. Samuza inötö, mosindrodo föna zörömi, ba umane ba dödögu, ’fatuwudo khöu.’ Lö sökhi wa’aurigu, fatuwudo ba mbotogu samösa.

Tekiko wongambatögu, simanö göi wa’aurigu. Ulau mangandrö soroi ba dödö khö Yehowa. Ufuli utohugö wamaha’ö ba Zura Ni’amoni’ö, hewa’ae no tebato ba zi dua wulu fakhe. Me inötö da’ö, no mate sa’ae bapagu, ba no tebayagö idanö mamagu tobali Samaduhu’ö Yehowa.

Fa’aurigu ba famaha’ö Zura Ni’amoni’ö no sebua böli simane sorugo ba ulidanÖ. Hiza’i, iada’a uhalö gangetula simane niwa’ö Zura Ni’amoni’ö ena’ö usöndra fa’ahono ba wangera-ngera. Ubörögö wombulö’ö lala wehedegu hegöi ba wanaha dödö ena’ö lö alio mofönu. Uhalö göi gangetula ba wondröi amuata wohorö, famaisa, wamadu-madu tuo hegöi managö khö zohalöwö ya’o.

Ahöli dödö ndra awögu wohalöwö börö me omasi ubulö’ö gamuatagu. Tölu fakhe fa’ara lö aetu-aetu ladönisi ndra’o ena’ö ufulido ba zi no to’ölö ufalua ba gamuatagu ba zilalö. Na itaria tadoro ndra’o wofönu na falele, ba omuso sibai dödöra ba lamane, ”Awena da’a ia! No mangawuli Joe silalö.” Afökhö sibai wehede simanö da’ö! Afatö dödögu.

Ba nahiagu wohalöwö oya sibai pornografi ba elektronik hegöi tercetak. Lö aetu-aetu ndra awögu la’oguna’ö komputer ba wamazawili gambara zohorö-horö, simane si no irai ufalua. Börö me tohöna so khögu wa’atagia wamaigi pornografi, u’odödögö sibai ba wolawa ya’ia, hiza’i la’alui lala ena’ö tedönisi ndra’o. U’andrö wanolo khö zamaha’ö ya’o ba Zura Ni’amoni’ö. Ihaogö ba wamondro-ndrongo huhuogu. Ibe’e mene-mene si tefaudu ba Zura Ni’amoni’ö, ba iforoma’ö khögu hewisa ena’ö tola ulawa ba wamaigi-maigi pornografi, ba ifarou ndra’o ena’ö lö aetu-aetu u’andrö wanolo khö Yehowa ba wangandrö.—Zinunö 119:37

Samuza inötö, u’andrö khö ndra awögu wohalöwö ena’ö owulo ira. Me no tohare ira fefu, u’andrö khöra ena’ö labe’e bir khöndra awöma si darua si no woböhöli femabu. Lö omasi ira wame’e ba ebua lira wanguma’ö, ”Böi lau zimane da’ö! Yaira andre la’odödögö ba woböhöli femabu!” Ba utema lira, ”Simane da’ö göi ndra’o.” I’otarai da’ö, aboto ba dödöra wa u’odödögö ba woböhöli wamaigi pornografi, börö da’ö lö sa’ae lagadu ndrao.

Afuriatania, börö wanolo Yehowa tola uböhöli wa’atagia wamaigi pornografi. Me ndröfi 1999, tebayagö idanö ndra’o tobali Samaduhu’ö Yehowa. U’andrö saohagölö me no tebe’e khögu ginötö si mendrua kali ba wangokhögö fa’omuso dödö ba fa’auri si lö ra’iö.

I’ada’a aboto ba dödögu hadia mbörö wa fatuwu khö Yehowa ba gamuatagu ba zi nonumalö. Börö me Ama sebua fa’omasi, omasi ia na telumö’ö ita ba pornografi si tobali famakiko. Atulö simane niwa’ö ba Gamaedola, ”Döna-döna khö Yehowa, moroi si’aikö ba dödöu, ba böi abe’e dödöu ba wa’onekheu. Böi aefa dödöu khönia, gofu hadia ia lala khöu, ba ya’ia zangadölö töröwau.” Tenga ha tobali solumö’ö ya’ita wamaha’ö Zura Ni’amoni’ö, hiza’i na tafalua ia tola göi tasöndra fa’auri so’ahahau tödö.—Zinunö 1:1-3.

Si no numalö, fatuwudo sibai ba wa’aurigu samösa, hiza’i iada’a mo’eluaha wa’aurigu. Ohahau wa’aurigu ba urasoi samosa wa lö faröi Yehowa khögu ba i’efa’ö zalagu. Me döfi 2000 mangowalu ndra’aga Karolin, ono alawe si baga-baga sangomasi’ö Yehowa simane ya’odo. So wa’ohahau dödö ba nösi nomoma. So khöma wa’omuso dödö tola fao ndra’aga ba wa’afatalifusöta niha Keriso si sökhi ba safönu fa’omasi ba zi sagörö ulidanö.