Zuta niha ba zi sagörö ulidanö zi faduhu tödö wa Natal andrö no owasa ba wanörö tödö luo wa’atumbu Yesu Keriso. Hiza’i hadia no irai ö’angeraigö hadia lafalua göi Natal ira niha Keriso ba abad siföföna, niha fondrege zahatö khö Yesu meföna? Ba hadia ö’ila hadia niwa’ö Zura Ni’amoni’ö sanandrösa ba wanörö tödö luo wa’atumbu? Na musöndra wanema li moroi ba zinofu andrö, tola tobali fanolo khöda ba wotatugöi hadia ba niha Keriso moguna Natal andrö.

Siföföna, lö irai itutunö Sura Ni’amoni’ö gowasa wanörö tödö luo wa’atumbu Yesu hegöi niha tanö bö’ö si lö faröi khö Lowalangi. Ba Zura Ni’amoni’ö, ha darua niha sangowasaini luo wa’atumbura. Ya’ira tenga samosumange Yehowa, Lowalangi nisura ba Zura Ni’amoni’ö, ba so zi lö sökhi salua me la’owasaini luo wa’atumbura andrö. (1 Moze 40:20; Mareko 6:21) Molo’ö Encyclopædia Britannica, lö fatema ba dödö niha Keriso ba abad siföföna ”zi to’ölö nifalua niha baero ba wanörö tödö luo wa’atumbu”.

Lö nitatugöi Zura Ni’amoni’ö me hamega tumbu Yesu. Imane Cyclopedia karya McClintock ba Strong, ”Tebai mutatugöi moroi ba G[amabu’ula] Li si B[ohou] mazui moroi ba sumber tanö bö’ö me hamega tumbu Yesu.” Tatu manö, na omasi Yesu ena’ö la’owasaini ira solo’ö khönia luo wa’atumbunia, hasambalö itatugöi ena’ö la’ila mbaŵa wa’atumbunia.

Si dua, lö irai isura Sura Ni’amoni’ö wa Yesu mazui so ba gotalua ndra nifaha’önia zamalua Natal. Molo’ö New Catholic Encyclopedia, si oföna sibai mututunö wamalua Natal ya’ia da’ö ”ba Chronograph karya Philocalus, sambua sura mbaŵa Romawi nihalö ba mbaŵa si 336 [M]”. Moroi ba da’a mu’ila wa tefalua gowasa andrö me no awai tefa’anö Zura Ni’amoni’ö ba mato hauga abad me no aefa möi Yesu ba gulidanö. Tobali, isura McClintock ba Strong wa ”famalua gowasa Natal, sindruhu-ndruhu tenga nifakhoi Lowalangi, mazui tenga göi moroi ba G[amabu’ula] Li si B[ohou]”. *

Börö me Samaha’ö Sebua Yesu, andrö ibe’e wanuturu lala satulö sanandrösa ba zomasi ia ena’ö lafalua ira solo’ö khönia, ba no tesura da’ö ba Zura Ni’amoni’ö. Famalua owasa Natal, lö tefarahu. Hulö simane guru ba zekola, tatu lö omasi ia na lafalua ndraono zekolania hadia ia zi lö nifakhoinia, simanö göi Yesu, lö omasi ia na ”italu’i zi so ba zura” nifalua ndra solo’ö khönia.​—1 Korindro 4:6.

Hiza’i, so sambua zi lö tola lö latörö tödö niha Keriso ba abad siföföna, ya’ia da’ö Fanörö Tödö wa’amate Yesu. Yesu samösa zamatunö khö ndra nifaha’önia hawa’ara ba hewisa wamaluara da’ö. Hewisa wamalua ya’ia, hegöi mbaŵa wa’amatenia, tesura ba Zura Ni’amoni’ö.​—Luka 22:19; 1 Korindro 11:25.

Simane si no aboto ba dödöda, Natal andrö no sambua owasa wanörö tödö luo wa’atumbu, ba lö lafalua da’ö ira niha Keriso ba abad siföföna. Aefa da’ö, lö nifatunö Zura Ni’amoni’ö wa ifalua Yesu mazui niha tanö bö’ö gowasa Natal andrö. Börö da’ö, zuta niha Keriso ba zi sagörö ulidanö zangai angetula wa sindruhunia tenga khöra moguna Natal.