1-2. (a) Hadia mbörö wa abua sibai ba niha sato ba wamaduhusi tödö niha sangokhögö kuaso? (b) Hadia nitutunöda ba artikel daʼa?

 BA GÖTÖDA andre, abua ba niha sato ba wamaduhusi tödö niha sangokhögö kuaso. Laʼila wa ira samatörö hegöi huku si so iadaʼa, abölö laʼofönaiʼö niha si kayo mazui niha sangokhögö kuaso moroi ba niha si tosasa. Imane Sura Niʼamoniʼö, ”Ibaliʼö ia niha samatörö awönia niha irege teʼala ia.” (Sango. 8:9) Baero daʼö, so ösa ndra sondröniaʼö ba agama si lö sökhi amuata. Lua-luania, ato niha si lö saʼae faduhu tödö khö Lowalangi. Börö daʼö, na tadöniaʼö wamahaʼö ba Zura Niʼamoniʼö khö zi samösa niha, moguna taforege ba wanolo yaʼia enaʼö ifaduhusi tödö Yehowa hegöi ira niha nifataronia.

² Tenga ha niha nifahaʼö ba Zura Niʼamoniʼö zinangea mamorege ba wamaduhusi tödö Yehowa hegöi organisasinia. Yaʼita göi si no ara ba zindruhu, moguna mamati ita wa oi atulö fefu gangetula hegöi nifalua Yehowa. Hizaʼi itaria, so zalua sanandraigö famatida. Ba artikel daʼa, tatutunö tölu duma-dumania: (1) na tabaso waö-waö si so ba Zura Niʼamoniʼö sambö aboto ba dödöda, (2) na so wanuturu lala hegöi angetula nihalö organisasi Yehowa sambö fatema ba dödöda, ba (3) na alua khöda wanandraigö ba zi so miföna.

3. Hana wa tola möi fanandraigö wamatida waö-waö si so ba Zura Niʼamoniʼö?

 ³ Ba ginötö tabaso Zura Niʼamoniʼö, itaria manofu-nofu dödöda, ’Hana wa ifalua daʼa Yehowa? Hana wa ihalö gangetula simane daʼa?’ Duma-dumania, na tabaso mbuku 4 Moze, so samösa ndraono Gizaraʼeli nibunu Yehowa börö me iʼozaragö geu ba ngaluo Sabato. Hizaʼi, ngaotu fakhe aefa daʼö, mututunö ba mbuku 2 Samueli wa iʼefaʼö horö Razo Dawido Yehowa hewaʼae no mohorö ia ba ibunu niha. (4 Mo. 15:32, 35; 2 Sa. 12:9, 13) Börö daʼö, te manofu-nofu dödöda, ’Hana wa iʼefaʼö horö sebua nifalua Dawido Yehowa hizaʼi ibunu niha samalua horö side-ide?’ Enaʼö tola taʼila wanema linia, datatutunö zi tölu ngawalö andre sinangea tatörö tödöda na tabaso Zura Niʼamoniʼö.

4. Moloʼö 1 Moze 18:20, 21 hegöi 5 Moze 10:17, hana wa tola faduhu dödöda wa oi atulö fefu gangetula nihalö Yehowa?

⁴ Lö ahori izara-zara wanutunö Sura Niʼamoniʼö na so zalua. Duma-dumania, aboto ba dödöda wa sindruhu-ndruhu ifalalini gera-erania Dawido. (Si. 51:2-4) Hizaʼi, hewisa göi ndra matua sanawö oroisa sanandrösa ba ngaluo Sabato? Hadia maniasa ia ba zala si no ifalua? Hadia no irai isawö goroisa Yehowa ba zilalö? Hadia no asese lafangelama ia hizaʼi iʼosiwawöi fefu wamangelama andrö? Lö nifatunö Zura Niʼamoniʼö. Hizaʼi si no tatu, ”lö ebua dödö zambuana” Yehowa. (5 Mo. 32:4) Ba ginötö ihalö gangetula, ihaogö iʼangeragö fefu hadia ia zalua. Yaʼia andrö tenga simane niha gulidanö, sasese mangai angetula si lö atulö börö wehede niha böʼö, fanahö-nahö tödö, mazui tanö böʼönia. (Baso 1 Moze 18:20, 21; 5 Moze 10:17.) Na oya tafahaʼö ita sanandrösa khö Yehowa hegöi goi-goinia, itugu aboto ba dödöda ia ba faduhu dödöda wa oi atulö fefu gangetula nihalönia. Buania, hewaʼae na so waö-waö ba Zura Niʼamoniʼö sambö aboto ba dödöda, lö tebulö faduhu dödöda wa ”atulö Yehowa ba lalania andrö fefu”.—Si. 145:17.

5. Hana wa itaria fasala lala wangera-ngerada? (Faigi göi kotak ” Falömoʼahonoa zi Tobali Baʼa-Baʼa Irege Tebalu Zatulö”.)

⁵ Börö me lö moʼahonoa ita, itaria fasala lala wangera-ngerada. Tewöwöi ita si fakhili-khili  khö Lowalangi. Börö daʼö, tatu omasi göi ita na mufalua zatulö ba niha fefu. (1 Mo. 1:26) Hizaʼi, börö me lö moʼahonoa ita, itaria fasala lala wangera-ngerada hewaʼae na tawaʼö tödöda wa no ahori taʼila fefu zindruhunia. Daʼö zalua khö Yona. Fatuwu sibai khönia me ihalö gangetula Yehowa ba wangefaʼö sala niha Niniwe. (Yon. 3:10–4:1) Sindruhunia, börö waʼahakhö dödö Yehowa, tola teʼorifi niha Niniwe samalalini era-era si töra 120.000 niha. Ba daʼa aboto ba dödöda wa lala wangera-ngera Yona zinangea muʼatulöʼö, tenga lala wangera-ngera Yehowa.

6. Hana wa lö moguna ifatunö khöda Yehowa hadia zi tobali dane-dane gangetula nihalönia?

⁶ Lö moguna ifatunö khöda Yehowa hadia zi tobali dane-dane gangetula nihalönia. Sindruhu sa, no mato hauga kali ifondrondrongo mbua gera-era nono mbanuania Yehowa sanandrösa ba gangetula si no ihalö mazui sedöna ihalö. (1 Mo. 18:25; Yon. 4:2, 3) Itaria göi itutunö hadia mbörö wa ihalö zi sambua angetula. Hizaʼi sindruhunia, lö moguna sibai ifatunö khöda daʼö Yehowa. (Yon. 4:10, 11) Börö me yaʼia Zomböi yaʼita, lö moguna iʼandrö mbua gera-erada fatua lö ifalua hadia ia.—Yes. 40:13, 14; 55:9.

7. Hadia zi tola manö abua khöda wamalua, ba hadia mbörö?

⁷ Tatu faduhu dödöda wa oi atulö fefu nifalua Yehowa. Hizaʼi, tola manö abua khöda wamaduhusi tödö niha si no ifataro ba organisasinia. Na lahalö gangetula, te manofu-nofu dödöda hadia no laʼoʼö wanuturu lala moroi khö Yehowa mazui laʼodaligö waʼatua-tuara samösa. Me götö Zura Niʼamoniʼö, te so ösa niha sangokhögö lala wangera-ngera simane daʼö. Angeragö atö hewisa dödö nösi nomo niha sanawö oroisa sanandrösa ba ngaluo Sabato nitutunö ba  ngenoli si 3. Tola manö manofu-nofu dödöra hadia no iʼandrö wanuturu lala Moze khö Yehowa fatua lö ihuku nösi nomora. Simanö göi ndra si fahuwu khö Guria niha Kheti, tola manö so ba wangera-ngerara wa no iʼogunaʼö kuasonia Dawido enaʼö lö göna ia hukuma faʼamate hewaʼae no mohorö ia khö woʼomo Guria. Hizaʼi, böi olifu ita wa ifaduhusi tödö niha nifataronia Yehowa. Börö daʼö, na lö faduhu dödöda khöra, eluahania lö tafaduhusi tödö Yehowa.

8. Hadia waʼafagölö mbanua niha Keriso me abad siföföna faoma banua niha Keriso ba götöda iadaʼa? (Halöwö Zinenge 16:4, 5)

⁸ Ba götöda iadaʼa, iʼogunaʼö ”zawuyu si lö faröi ba satua-tua” Yehowa ba wondröniaʼö organisasinia ba gulidanö. (Mat. 24:45) Simane ira boto solohe me abad siföföna, ladöniaʼö nono mbanua Yehowa ba zi sagörö ulidanö ba labeʼe wanuturu lala khö ndra satua sokubaloi. (Baso Halöwö Zinenge 16:4, 5.) Aefa daʼö, laʼoʼö wanuturu lala andrö ira satua sokubaloi ba mbanua niha Keriso. Na taʼoʼö wanuturu lala nibeʼe organisasi hegöi ira satua sokubaloi, eluahania no tafaduhusi tödö Yehowa.

9. Hawaʼara ginötönia abua khöda ba woloʼö fanuturu lala nibeʼe ndra satua sokubaloi, ba hadia mbörö?

⁹ Itaria abua khöda wotuhini angetula ndra satua sokubaloi. Duma-dumania, barö zi hauga fakhe safuria andre, so wanuturu lala si bohou ba zi hauga banua niha Keriso hegöi wilayah. Börö daʼö, laʼandrö ira satua sokubaloi khö ndra sanuriaigö enaʼö findra ira ba mbanua niha Keriso si lö ato sanuriaigö. Lafalua daʼö enaʼö tola lahaogö wangogunaʼö Nahia Gangowuloa. Na laʼandrö khöda findra, te abua khöda wamalua daʼö börö me lö tola löʼö taröi zi fahuwu khöda hegöi ösi nomoda ba mbanua niha Keriso si fao yaʼita ba zilalö.  Hadia Yehowa zangombakha khö ndra satua sokubaloi hezo zinangeania mufataro zi samösa sanuriaigö? Tenga. Daʼö mbörö wa tola manö abua khöda woloʼö angetula nihalöra. Hizaʼi, ifaduhusi tödö ndra satua sokubaloi Yehowa ba itehegö khöra ba wangai angetula andrö. Börö daʼö, moguna tafaduhusi tödö göi ira. *

10. Moloʼö Heberaiʼo 13:17, hadia mbörö wa moguna tatuhini ndra satua sokubaloi?

¹⁰ Hadia mbörö wa moguna tatuhini ndra satua sokubaloi ba taʼoʼö gangetula nihalöra, hewaʼae na lö tefaudu daʼö ba zomasi ita? Na tafalua daʼö, no tarorogö wahasara dödö ba gotalua nono mbanua Lowalangi. (Ef. 4:2, 3) Na laʼoʼö wanuturu lala nibeʼe ndra satua sokubaloi ira sanuriaigö si fao fangide-ngideʼö, itugu aro mbanua niha Keriso. (Baso Heberaiʼo 13:17.) Ba sabölö moguna, na tatuhini niha nifataro Yehowa ba wondrorogö yaʼita, daʼö zangoromaʼö wa tafaduhusi tödö Yehowa.—Hal. 20:28.

11. Hewisa enaʼö tola itugu tafaduhusi tödö gangetula nihalö ndra satua sokubaloi?

¹¹ Hewisa enaʼö tola itugu tafaduhusi tödö gangetula nihalö ndra satua sokubaloi? Böi olifu ita wa no laʼandrö wanuturu lala si otarai geheha niʼamoniʼö fatua lö lahalö gangetula soguna ba mbanua niha Keriso. No göi lahaogö laʼangeragö goi-goi si so ba Zura Niʼamoniʼö, ba laʼoʼö wanuturu lala nibeʼe organisasi. Omasi ira ba wangomusoiʼö tödö Yehowa ba laforege wokubaloi ono mbanuania. Lafalua daʼö si fao faʼalöfaröi, ba aboto ba dödöra wa khöra dania tezofu-zofu. (1 Fe. 5:2, 3) Baero daʼö, angeragö atö: Hewaʼae fawuka-wuka gulidanö andre börö waʼafaböʼö mado, agama, hegöi politik, hizaʼi so wahasara dödö ba gotalua nono mbanua Yehowa ba wamosumange Lowalangi satulö si ha samösa. Daʼa zangoromaʼö wa ifahowuʼö organisasinia Yehowa!

12. Hadia manö zinangea laʼangeragö ira satua sokubaloi na so zamalua horö sebua?

¹² No ibeʼe noro dödö sebua Yehowa khö ndra satua sokubaloi, yaʼia daʼö ba wondrorogö enaʼö lö raʼiö mbanua niha Keriso. Na so niha samalua horö sebua, ira satua sokubaloi zangai angetula hadia muʼefasi ia moroi ba mbanua niha Keriso mazui löʼö. Moguna laʼila hadia sindruhu-ndruhu no ifalalini gera-erania. Tola manö iwaʼö wa maniasa ia. Hizaʼi, hadia sindruhu-ndruhu fatuwu ia ba gamuatania andrö? Hadia no ihalö gangetula enaʼö lö ifuli ifalua daʼö? Na ira awönia zondrönisi tödönia ba wamalua daʼö, hadia omasi ia iböhöli wariawösa khöra? Moguna laʼangeragö daʼa ira satua sokubaloi, ba lafareso fefu zindruhunia. Laʼohe daʼö ba wangandrö ba laʼalui goi-goi Zura Niʼamoniʼö. Aefa daʼö, lahalö gangetula hadia tola nasa farahu ia ba mbanua niha Keriso mazui löʼö. Itaria, moguna muʼefasi niha samalua horö sebua.—1 Ko. 5:11-13.

13. Hadia zi tola manö tumbu ba wangera-ngerada na laʼefasi zi fahuwu khöda mazui ösi nomoda moroi ba mbanua niha Keriso?

¹³ Na tenga si fahuwu khöda mazui ösi nomoda niʼefasi moroi ba mbanua niha Keriso, tola manö lö abua khöda wanemaʼö angetula nihalö ndra satua sokubaloi. Hizaʼi, hewisa na si fahuwu khöda niʼefasi andrö mazui ösi nomoda? Tola manö manofu-nofu dödöda hadia no laʼangeragö fefu zalua ira satua sokubaloi. Mazui, te manofu-nofu dödöda hadia tefaudu gangetula nihalöra andrö ba zomasi Yehowa. Na daʼö nirasoida, hadia zinangea tatörö tödöda enaʼö lö tebulö tatuhini gangetula nihalöra?

14. Hadia zinangea tatörö tödöda na lahalö gangetula ira satua sokubaloi ba wangefasi si fahuwu khöda mazui ösi nomoda?

 ¹⁴ Moguna tatörö tödöda wa Yehowa zamazökhi amakhoita andrö, ba moguna ia ba mbanua niha Keriso hegöi ba niha samalua sala. Na lö laʼefasi niha si lö mamalalini era-era moroi ba mbanua niha Keriso, tola manö idönisi dödö ndra talifusöda tanö böʼö. (Gal. 5:9) Baero daʼö, tola manö lö aboto ba dödönia wa tebai muʼaohasi ba dödö horö nifaluania andrö. Lua-luania, te iwaʼö tödönia wa lö moguna ibulöʼö gamuatania enaʼö ifuli sökhi wahuwusania khö Yehowa. (Sango. 8:11) Yafaduhu dödöu wa lö laʼaohasi ba dödö gangetula nihalöra ira satua sokubaloi ba wangefasi si samösa niha. Aboto ba dödöra wa yaʼira andrö hulö simane sangetuʼö huku ba ndraono Gizaraʼeli me götö föna, tobali ira ”sanguhuku khö Yehowa, tenga ba niha”.—2 Ng. 19:6, 7.

15. Hana wa moguna faduhu dödöda iʼotarai iadaʼa wa oi atulö fefu wanuturu lala nibeʼe Yehowa?

¹⁵ Iʼotarai iadaʼa, moguna faduhu dödöda wa oi atulö fefu wanuturu lala nibeʼe Yehowa. Hadia mbörö? Börö me no ahato waʼatua danö. Na alua wamakao sabölö-bölö, te labeʼe khöda wanuturu lala si lö fatema ba dödöda mazui sabua khöda famalua. Ba luo daʼö, lö iʼanemaiʼö fahuhuo khöda Yehowa. Tola manö iʼogunaʼö niha nifataronia ba wameʼe khöda fanuturu lala. Ba ginötö waʼabasaki simane daʼö, tobali famaʼalada na aombö dödöda wanuturu lala nibeʼera mazui manofu-nofu ita, ’Hadia sindruhu moroi khö Yehowa wanuturu lala andre mazui moroi ba wangera-ngerara samösa?’ Ba ginötö daʼö, hadia faduhu dödöu khö Yehowa hegöi organisasinia? Teʼodaligö wanema linia moroi ba nifaluamö iadaʼa. Na no toʼölö ndraʼugö ba woloʼö fanuturu lala iʼotarai iadaʼa, tola göi dania aoha khöu woloʼö fanuturu lala sagötö alua wamakao sabölö-bölö.—Luk. 16:10.

16. Hadia zi tola möi fanandraigö wamatida ba Hamagedo?

¹⁶ Moguna göi taʼangeragö hewisa wanemaʼöda angetula Yehowa na no tohare gamozua götö danö andre. Iadaʼa, manötöna ita enaʼö lafosumange Yehowa ösi nomoda hegöi niha tanö böʼö fatua lö tohare waʼatua danö. Hizaʼi, ba Hamagedo, iʼogunaʼö Yesu Yehowa ba wangai angetula hadia teʼorifi ira mazui löʼö. (Mat. 25:31-33; 2 Te. 1:7-9) Tenga yaʼita zotatugöi haniha manö dania zanema faʼahakhö dödö Yehowa. (Mat. 25:34, 41, 46) Hadia faduhu dania dödöda ba gangetula nibeʼe Yehowa, mazui hadia taböhöli wamosumange yaʼia ha börö me lö fao dödöda ba gangetulania?  Sindruhu-ndruhu wa moguna tafaduhusi tödö Yehowa iʼotarai iadaʼa enaʼö faduhu göi dödöda khönia ba zi so miföna.

17. Hadia manö mbua si sökhi nitemada ba gulidanö si bohou börö gangetula Yehowa?

¹⁷ Angetula Yehowa dania zangaʼasogö ngawalö zi sökhi ba gulidanö si bohou. Ba daʼö, lö hadöi saʼae agama sofaya, lala wogale safönu fakhögusa, ba famatörö niha gulidanö sangaʼasogö faʼatosasa. Lö saʼae mofökhö-fökhö ita, atua, mazui abu dödöda börö waʼamate niha niʼomasiʼöda. Tebeʼe ba gurunga Zatana awö ndra malaʼika si lö sökhi sagötö zi saribu fakhe, ba tehori fefu ngawalö zi lö sökhi salua börö me no mamadaö ira. (Fam. 20:2, 3) Khalaigö hewisa dödöda ba luo daʼö. Tatu taʼandrö sibai saohagölö börö me no tafaduhusi tödö Yehowa iʼotarai iadaʼa!

18. Hadia wamahaʼö si tola tahalö moroi ba duma-duma si lö sökhi nifalua ndraono Gizaraʼeli nitutunö ba 4 Moze 11:4-6 hegöi 21:5?

¹⁸ Ba gulidanö si bohou dania, hadia so nasa zi tobali fanandraigö wamatida khö Yehowa? Tola manö so. Angeragö atö duma-duma si lö sökhi nifalua ndraono Gizaraʼeli mböröta. Lö ara me no teʼefaʼö ira moroi ba wangosawuyu ba danö Miserai, ibörögö mukökö ira börö me itörö tödöra gö niʼara ba danö Miserai, ba lawaʼö wa anuzu sibai dödöra mana nibeʼe Yehowa. (Baso 4 Moze 11:4-6; 21:5.) Hewisa göi ita? Hadia tafalua göi zimane daʼö na no aefa Hamagedo dania? Tola manö oya halöwö sinangea tafalua ba luo daʼö ba wangehaogö ulidanö tobali Faradaiso. Te lö tasöndra waʼohahau dödö ba wamobörö. Hadia mukökö ita khö Yehowa simane nifalua ndraono Gizaraʼeli mböröta? Na iʼotarai iadaʼa taʼandrö saohagölö ba ngawalö nihenaigö Yehowa khöda, itugu taʼandrö göi saohagölö ba nihenaigönia khöda dania ba zi so miföna.

19. Hadia zi no öfahaʼö yaʼugö moroi ba artikel daʼa?

¹⁹ Lö tola löʼö faduhu dödöda wa atulö fefu nifalua Yehowa. Moguna göi tafaduhusi tödö niha nifataronia, börö me no ibeʼe khöra noro dödö ba wamalua fanuturu lala si otarai khönia. Böi olifu ita wehede Yehowa nifaʼema Yesaya samaʼeleʼö andre: ”Na lö miböhöli waʼafaduhu dödö ba lö mangiwa dödömi, hasambalö abölö ami.”—Yes. 30:15.