1-2. Hadia wamahaʼö nihalö zi samösa satua sokubaloi sanandrösa ba wamaʼema mene-mene?

 ME HAUGA fakhe silalö, so darua zatua sokubaloi sangondrasi si samösa talifusöda ira alawe börö me no ara lö si möi ia ba gangowuloa. Samösa moroi ba gotalua ndra satua sokubaloi andrö, ibaso ayati Zura Niʼamoniʼö sanutunö wa moguna sibai muʼondrasi gangowuloa. Iwaʼö tödönia wa tefarou dödö dalifusöda ira alawe andrö börö me no laʼondrasi ia. Hizaʼi me edöna mofanö ira, imane khöra talifusöda andrö, ”Sindruhu-ndruhu wa lö aboto ba dödömi hadia zalua khögu.” Me ifaʼema mene-mene satua sokubaloi andrö, lö nisofunia hadia zalua khö dalifusöda ira alawe no mege ba hadia gabula dödö nitaögönia. Lua-luania, lö tefarou dödö dalifusöda andrö ba mene-mene nifaʼemara.

² Imane satua sokubaloi samaʼema mene-mene andrö, ”Me luo daʼö, uwaʼö tödögu wa niha si lö mangila mangandrö saohagölö dalifusöda andrö. Hizaʼi me no uhaogö uʼangeragö, aboto ba dödögu wa awai niʼera-eragu ha ayati sinangea ubaso khönia, tenga sanandrösa ba zalua khönia. Moguna menaʼö usofu khönia, ’Hewisa duriamö talifusö?’ ’Hadia so gabula dödömö?’ ’Hadia zi tola ufalua ba wanolo yaʼugö?’” Itema wamahaʼö si sökhi satua sokubaloi andrö. Iadaʼa, no tobali ia kubalo sorasoi hadia nirasoi niha böʼö ba si tola mameʼe fanolo.

3. Haniha zi tola mamaʼema mene-mene ba mbanua niha Keriso?

 ³ No tebeʼe noro dödö khö ndra satua sokubaloi ba wamaʼema mene-mene na inötö moguna. Hizaʼi itaria, moguna göi lafaʼema mene-mene ira talifusöda tanö böʼö. Duma-dumania, te so samösa dalifusöda sinangea mamaʼema mene-mene si teʼodane-dane  ba Zura Niʼamoniʼö khö zi fahuwu khönia. (Si. 141:5; Amd. 25:12) Mazui, te so dalifusöda ira alawe soʼamenesi ira alawe sabölö awuyu-wuyu moroi khönia ba wamalua mene-mene si so ba Dito 2:3-5. Tatu manö, moguna göi labeʼe mene-mene hegöi fotu ira satua ba ndraonora. Börö daʼö, hewaʼae na khö ndra satua sokubaloi mufanandrösa artikel daʼa, tola tatema mbua si sökhi na tatutunö hewisa wamaʼemada mene-mene si tefaudu, si möi famarou dödö, ba si ”tobali fangomuso dödö”.—Amd. 27:9.

4. Hadia nitutunöda ba artikel daʼa?

⁴ Ba artikel daʼa, tatutunö öfa wanofu sanandrösa ba wamaʼema mene-mene: (1) Hadia zinangeania gohitö dödöda na tafaʼema mene-mene? (2) Hadia sindruhu-ndruhu moguna tafaʼema mene-mene? (3) Haniha zinangeania zamaʼema mene-mene? (4) Hewisa enaʼö tola tafaʼema mene-mene si tefaudu?

5. Hadia zanolo ira satua sokubaloi enaʼö tola lafaʼema mene-mene ba lala si fatema ba dödö niha? (1 Korindro 13:4, 7)

⁵ Laʼomasiʼö ndra talifusöra ira satua sokubaloi. Itaria, laforomaʼö waʼomasira andrö ba ginötö lafaʼema mene-mene ba niha sanörö lala si fasala. (Gal. 6:1) Hizaʼi, fatua lö fahuhuo ira ba niha daʼö, moguna laʼangeragö wehede zinenge sotöi Faulo andre: ”Faʼomasi andrö ba no sebolo tödö, si sökhi tödö. . . . Itaögö fefu hadia ia, faduhu dödönia fefu hadia ia, idöna-döna fefu hadia ia ba lö faröi ba ngawalö hadia ia.” (Baso 1 Korindro 13:4, 7.) Na laʼangerönusi ayati daʼa ira satua sokubaloi, tola lafareso gohitö dödöra ba wameʼe mene-mene ba lafaʼema ia si fao faʼomasi. Na irasoi talifusöda andrö wa laʼameʼegö tödö ia ira satua sokubaloi, tola manö itugu aoha khönia wanemaʼö mene-mene nifaʼemara.—Rom. 12:10.

6. Hadia duma-duma si sökhi niforomaʼö Waulo?

⁶ No ibeʼe duma-duma si sökhi Faulo ba wangai halöwö tobali satua sokubaloi. Duma-dumania, me moguna mene-mene khö ndra talifusöda si so ba Desalonika, lö itaha-taha Faulo ba woʼamenesi yaʼira. Hewaʼae simanö, ba zura nifaʼoheʼönia, isuno ua ira sakali börö halöwö nifaluara si fao faʼalöfaröi, faʼomasira, hegöi faʼanau gölö niforomaʼöra. Iʼangeragö göi zalua ba waʼaurira, ifaduhuʼö Faulo wa oya wamakao hegöi abula dödö nitaögöra. (1 Te. 1:3; 2 Te. 1:4) Baero daʼö, itutunö khöra wa no tobali ira duma-duma si sökhi ba niha Keriso tanö böʼö. (1 Te. 1:8, 9) Tatu omuso sibai dödöra me larongo wanuno nifaʼema Waulo! Fehedenia andrö zamaduhuʼö ba dödöra wa iʼomasiʼö sibai ira. Daʼa mbörö wa tola ifaʼema mene-mene si tefaudu Faulo ba zi dombua sura nifaʼoheʼönia ba niha Desalonika.—1 Te. 4:1, 3-5, 11; 2 Te. 3:11, 12.

7. Hana wa tola manö lö fatema ba dödö zi samösa niha mene-mene nifaʼema khönia?

⁷ Hadia zalua na tafaʼema mene-mene ba lala si lö tefaudu? Imane si samösa talifusöda si no ara mangai halöwö tobali satua sokubaloi, ”Itaria, lö fatema ba dödö niha mene-mene nifaʼemada tenga börö me fasala mene-mene nibeʼeda, hizaʼi börö me lö taforomaʼö waʼomasi ba wamaʼema yaʼia.” Hadia wamahaʼönia khöda? Abölö aoha wanemaʼö mene-mene na mufaʼema daʼö börö waʼomasi, tenga börö waʼabao dödö.

8. Fatua lö ifaʼema mene-mene si samösa satua sokubaloi, hadia manö wanofu-nofu sinangea iʼangeragö?

⁸ Tebai aösö-aösö ndra satua sokubaloi ba wamaʼema mene-mene. Fatua lö ifaʼema mene-mene si samösa satua sokubaloi, moguna isofu khönia samösa, ’Hadia sindruhu-ndruhu moguna ufaʼema khönia mene-mene? Hadia  sindruhu-ndruhu fasala nifaluania andrö? Hadia so goi-goi Zura Niʼamoniʼö nisawönia? Mazui hadia ha börö me faböʼö lala wangera-ngerama wa uwaʼö tödögu fasala ia?’ Moguna mangelama ndra satua sokubaloi faböi tobali ira ”niha salio bewe na fahuhuo”. (Amd. 29:20) Na ambö faduhu dödö zi samösa satua sokubaloi wa moguna ifaʼema mene-mene khö zi samösa talifusöda, tola iʼandrö mbua gera-era zatua sokubaloi tanö böʼö.—2 Ti. 3:16, 17.

9. Na omasi ita tabeʼe mene-mene sanandrösa ba lagu wonukha hegöi fangehao mboto, hadia wamahaʼö si tola tahalö moroi khö Waulo? (1 Timoteo 2:9, 10)

⁹ Nehegö atö duma-duma andre. Na ambö tefaudu ba dödö zi samösa satua sokubaloi lagu wonukha mazui fangehao mboto nifili zi samösa talifusöda, moguna isofu khönia samösa, ’Hadia so ayati Zura Niʼamoniʼö sangoromaʼö wa moguna ufaʼema khönia mene-mene?’ Enaʼö lö iʼodaligö mbua gera-erania samösa, te moguna iʼandrö mbua gera-era zatua sokubaloi tanö böʼö mazui talifusöda saro ba wamati. Tola fao ira wanutunö mene-mene nibeʼe Waulo sanandrösa ba lagu wonukha hegöi fangehao mboto. (Baso 1 Timoteo 2:9, 10.) Itutunö Faulo sambua goi-goi soguna ba niha Keriso: Moguna lafili nukha soadu ba sinangea. Hizaʼi, lö izara-zara wanutunö hadia manö nukha si tola lafake ba hadia göi zi tebai. Aboto ba dödönia wa tola lahalö samösa gangetula sanandrösa ba nukha nifakera asala tefaudu daʼö ba goi-goi Zura Niʼamoniʼö. Börö daʼö, fatua lö lahalö gangetula ira satua sokubaloi ba wamaʼema mene-mene, moguna laʼangeragö hadia moadu nukha niʼogunaʼö dalifusöda andrö mazui löʼö.

10. Hadia zinangea tatörö tödöda enaʼö taʼameʼegö tödö gangetula niha böʼö?

¹⁰ Moguna tatörö tödöda, hewaʼae na faböʼö gangetula nihalö zi darua niha Keriso saro ba wamati, tola manö faoma atulö gangetula nihalöra andrö. Tebai tafaso ndra talifusöda ba wamalua hadia zatulö ba wamaigida.—Rom. 14:10.

11-12. Na sindruhu-ndruhu moguna mufaʼema mene-mene, hadia wanofu-nofu sinangea iʼangeragö si samösa satua sokubaloi, ba hadia mbörö?

¹¹ Na sindruhu-ndruhu moguna mufaʼema mene-mene, fanofu tanö böʼö sinangea muʼangeragö yaʼia daʼö: Haniha zinangeania zamaʼema mene-mene andrö? Fatua lö ifaʼema mene-mene khö zi samösa foʼomo ira alawe mazui iraono, moguna fahuhuo zatua sokubaloi khö dalifusöda si tobali högö yomo ba nomo, börö me tola manö omasi ia na yaʼia zamaʼema mene-mene andrö. * Mazui, te omasi ia fao khö zatua sokubaloi andrö ba ginötö  ifaʼema mene-mene. Itaria, simane nitutunöda ba  ngenoli si 3, tola manö abölö tefaudu na muʼandrö khö zi samösa talifusöda ira alawe si no alawa döfi ba woʼamenesi talifusöda ira alawe sawuyu-wuyu.

¹² Moguna göi iʼangeragö wanofu daʼa si samösa satua sokubaloi: ’Hadia tefaudu na yaʼodo zamaʼema mene-mene daʼa, mazui abölö sökhi na niha böʼö zamaʼema yaʼia?’ Duma-dumania, na so dalifusöda sorasoi faʼide-ide dödö, tola manö abölö sökhi na satua sokubaloi si no irai morasoi simane daʼö zameʼe khönia mene-mene. Te abölö aboto ba dödönia hadia nirasoi dalifusöda andrö, ba abölö tefaudu mene-mene nifaʼemania. Hizaʼi, no tebeʼe noro dödö khö ndra satua sokubaloi maʼafefu ba wamarou tödö ndra talifusöda enaʼö lafaudugö waʼaurira ba goi-goi Zura Niʼamoniʼö. Börö daʼö, hewaʼae na lö irai alua khöra zimane nirasoi zi samösa talifusöda, lö tola löʼö lafaʼema khönia mene-mene.

13-14. Hana wa moguna lafondrondrongo nösi dödö niha böʼö ira satua sokubaloi?

¹³ Fondrondrongo nösi dödö niha böʼö. Na ifaʼanö ia si samösa satua sokubaloi ba wamaʼema mene-mene, moguna isofu khönia samösa: ’Hadia zi no aboto ba dödögu sanandrösa khö dalifusöda andrö? Hewisa zalua ba waʼaurinia? Hadia so gabula dödönia si lö niʼilagu? Hadia zabölö moguna khönia iadaʼa?’

¹⁴ Fefu niha somasi mamaʼema mene-mene, moguna lafalua goi-goi nisura ba Yakobo 1:19. Imane Yakobo, ”Dozi niha yamuʼalioʼö wamondrongo, böi yamufahulö wehede, ba böi alio mofönu.” Tola manö iwaʼö tödönia si samösa satua sokubaloi wa no ahori iʼila fefu zalua. Hizaʼi, hadia atulö daʼö? Ifangelama ita Amaedola 18:13, ”Na so zanema li fatua lö ifondrondrongo zindruhunia, faʼabodo daʼö ba fangaila.” Enaʼö sindruhu-ndruhu aboto ba dödöu hadia zalua khö zi samösa talifusöda, moguna manofu ndraʼugö khönia. Börö daʼö, moguna öfondrondrongo nösi dödönia fatua lö fahuhuo ndraʼugö. Törö tödöu wamahaʼö nihalö zi samösa satua sokubaloi si no tatutunö ba wamobörö artikel daʼa. Aboto ba dödönia wa ambö tefaudu na iʼanemaiʼö ifaʼema mene-mene si no ifaʼanö. Abölö sökhi na ifaʼema ua sakali wanofu-nofu simane daʼa: ”Hewisa duriamö talifusö?” ”Hadia so gabula dödömö?” ”Hadia zi tola ufalua ba wanolo yaʼugö?” Na laforege ira satua sokubaloi ba wangiʼila hadia zindruhunia zalua, tola itugu mofozu ira ba wameʼe fanolo hegöi famarou dödö khö ndra talifusöda.

15. Hadia zinangea lafalua ira satua sokubaloi ba woloʼö goi-goi nisura ba Gamaedola 27:23?

¹⁵ Moguna aboto ba dödöu mbiri-birimö. Simane si no tatutunö ba wamobörö, enaʼö tefaudu mene-mene nibeʼeda, lö ibönö na ha asala tabaso ayati mazui tabeʼe wanuturu lala. Moguna larasoi ira talifusöda wa taʼameʼegö tödö ira, aboto ba dödöda hadia zalua khöra, ba omasi ita tatolo ira. (Baso Gamaedola 27:23.) Börö daʼö, moguna laforege ira satua  sokubaloi ba wangaʼaroʼö fahuwusara khö ndra talifusöda.

16. Hewisa enaʼö aoha khö ndra satua sokubaloi ba wamaʼema mene-mene?

¹⁶ Yaʼami ira satua sokubaloi, tatu lö omasi ami na tumbu ba dödö ndra talifusöda wa fahuhuo ami khöra ha ba ginötö mifaʼema mene-mene. Börö daʼö, moguna asese fahuhuo ami khö ndra talifusöda ba miforomaʼö woʼameʼegö tödö ba ginötö alua khöra gabula dödö. Imane talifusöda si no ara mangai halöwö tobali satua sokubaloi, ”Na öfalua daʼö, tola itugu aro wahuwusami. Aefa daʼö, na so mene-mene sinangea öbeʼe, lö saʼae abua khöu wamaʼema yaʼia.” Baero daʼö, aoha göi khö ndra talifusöda wanemaʼö mene-mene nibeʼe khöra.

17. Hawaʼara moguna laforomaʼö waʼebolo dödö hegöi faʼasökhi dödö ira satua sokubaloi?

¹⁷ Foromaʼö waʼebolo dödö ba faʼasökhi dödö. Moguna sibai waʼebolo dödö ba faʼasökhi dödö na so niha sanimbagö mene-mene si teʼodane-dane ba Zura Niʼamoniʼö. Moguna mangelama ndra satua sokubaloi enaʼö böi mofönu ira ba niha si lö manemaʼö mazui si lö mamalua mene-mene nibeʼera. Moguna laʼoʼö duma-duma nibeʼe Yesu, ”Töla zukhu si no afufu lö ifatö, ba fandru si no alö haga lö ibunu.” (Mat. 12:20) Börö daʼö, na mangandrö zi samösa satua sokubaloi, tola iʼandrö khö Yehowa ba wanolo talifusöda andrö enaʼö aboto ba dödönia hadia mbörö wa muʼamenesi ia irege ifalua daʼö ba waʼaurinia. Tola manö moguna ginötö khö dalifusöda andrö ba woʼangeragö mene-mene nitemania. Na iforomaʼö khönia waʼasökhi dödö ba faʼebolo dödö si samösa satua sokubaloi, aoha khö dalifusöda andrö wanemaʼö mene-mene nibeʼe khönia. Tatu manö, lö tola löʼö teʼodane-dane mene-mene andrö ba Daromali Lowalangi.

18. (a) Hadia zinangea tatörö tödöda? (b) Simane ba gambara si so ba kotak, hadia zinangea ladunö-dunö ira satua fatua lö laʼamenesi ndraonora?

¹⁸ Fahaʼö ndraʼugö ba zala si no öfalua. Törö tödöu wa niha si lö moʼahonoa ita. Börö daʼö, tatu lö moʼahonoa wamaluada fanuturu lala si no tatutunö ba artikel daʼa. (Yak. 3:2) Hasambalö tafalua zala. Hizaʼi na alua daʼö, moguna  tafahaʼö ita moroi ba zala nifaluada andrö. Na larasoi ira talifusöda wa taʼomasiʼö ira, itugu aoha khöra wangefaʼö salada ba ginötö tetutu dödöra ba wehededa mazui ba nifaluada.—Faigi göi kotak ” Oroisa khö Ndra Satua”.

19. Hewisa enaʼö tobali fangomuso dödö ndra talifusöda mene-mene nibeʼeda khöra?

¹⁹ Simane si no tatutunö, itaria abua khöda wamaʼema mene-mene si tefaudu. Yaʼita andre niha si lö moʼahonoa, ba simanö göi niha nibeʼeda mene-mene. Törö tödöu goi-goi si no tatutunö ba artikel daʼa. Okhögö gohitö dödö si tefaudu ba wamaʼema mene-mene. Haogö angeragö hadia sindruhu-ndruhu moguna mufaʼema mene-mene ba hadia yaʼugö zinangea mamaʼema yaʼia mazui tenga. Fatua lö öfaʼema mene-mene khö zi samösa talifusöda, beʼe khönia wanofu-nofu ba haogö fondrondrongo ia enaʼö aboto ba dödöu hadia zalua khönia. Forege enaʼö aboto ba dödöu lala wangera-ngerania, foromaʼö waʼebolo dödö, ba aroʼö wahuwusau khö ndra talifusöda. Böi olifu ndraʼugö wa ohitö dödöda tenga ha ba wamaʼema mene-mene si tefaudu, hizaʼi enaʼö ”tobali fangomuso dödö” daʼö khö ndra talifusöda.—Amd. 27:9.