BA GÖTÖ Zura Niʼamoniʼö, na so ndra matua somasi mangowalu khö zi samösa ira alawe, ira matua andrö mazui ösi nomonia moguna labeʼe mböwö ba nösi nomo ndra alawe andrö. Tola ibeʼe gama-gama sebua böli, urifö, mazui kefe tobali böwö. Itaria, mohalöwö zi samösa ira matua khö namania matuania ba wamuʼa böwö andrö. Daʼö nifalua Yakobo. Mohalöwö ia khö namania matuania ba zi fitu fakhe faʼara enaʼö tola mangowalu ia khö Rakhela. (1 Mo. 29:17, 18, 20) Hadia mbörö wa mufalua daʼö?

Imane pakar Zura Niʼamoniʼö sotöi Carol Meyers, ”Na sohalöwö ba danö zi sambua ösi nomo, si toʼölönia fao khöra mohalöwö nonora alawe. Hizaʼi, na no labeʼe ia nihalö, lö saʼae ilului halöwö zatuania. Börö daʼö, tola tawaʼö wa böwö andrö zi tobali salahi nonora.” Böwö andrö göi zi tobali fangaroʼö gamakhaita zi dombua ösi nomo irege tola faoma latolo nawöra ba ginötö si basaki. Baero daʼö, böwö andrö zangoromaʼö wa no famatua zi samösa ira alawe ba tobali ia noro dödö woʼomonia, tenga noro dödö namania.

Hewaʼae na mubeʼe mböwö, tenga daʼö geluahania wa foʼomo ira alawe andrö hulö simane gama-gama si tola mufamawa. Imane buku Ancient Israel—Its Life and Institutions (Faʼauri hegöi si Toʼölö Mufalua ba Götö Ndraono Gizaraʼeli Me Föna), ”Sindruhu sa, börö me lö tola löʼö mubeʼe gefe mazui tanö böʼönia ba nösi nomo ndra alawe, tola manö tumbu ba dödöda wa fangowalu ndraono Gizaraʼeli andrö hulö simane fowöli gama-gama. Hizaʼi, [böwö] andrö no amaedola salahi nono alawe andrö khö zatuania, tenga si tobali bölinia.”

Ba zi hauga soi ba götöda andre, so nasa zamuala fameʼe böwö. Na laʼandrö mböwö ira niha Keriso, ’tebai fatandro ira’ mazui laʼandrö mböwö sebua. (Fil. 4:5; 1 Ko. 10:32, 33) Moguna laforomaʼö wa tenga niha ”sangomasiʼö anaʼa” ira ba lö khöra fakhögusa. (2 Ti. 3:2) Na lö laʼandrö mböwö sebua, tola alio mufalua walöwa börö me lö moguna iʼowuloi gefe sebua talifusöda ira matua sedöna mangowalu khö nonora. Mazui, na sohalöwö safönu inötö dalifusöda andrö, lö moguna iböhöli wangai halöwö safönu inötö ha börö wangaʼasogö böwö sebua niʼandrö khönia.

Ba zi hauga soi, no lafakhoi ira samatörö wa lö tola löʼö mubeʼe mböwö. Na so goi-goi simane daʼö ba soi si toröi yaʼira, moguna laʼoʼö daʼö ira niha Keriso. Hadia mbörö? Itutunö Sura Niʼamoniʼö wa moguna ”laʼoʼö li ndra samatörö” ira niha Keriso ba lafalua huku si no latatugöi, asala lö fatimba daʼö ba goroisa Lowalangi.—Rom. 13:1; Hal. 5:29.