MOLOʼÖ Oroisa Moze, tola mubeʼe wune hegöi marafadi tobali sumange khö Yehowa. Asese mufendrongagö wanötöi fofo si dombua ngawalö andre, ba tola lafili iraono Gizaraʼeli hezo zomasi ira labeʼe. (3 Mo. 1:14; 12:8; 14:30) Hadia mbörö wa moguna goroisa daʼa? Börö me itaria lö hadöi fune ba mbanua si toröi yaʼira. Hadia mbörö?

Ha ba mbaŵa lökhö tesöndra wune ba danö Gizaraʼeli. Ba mbaŵa si Fulu, yaʼia daʼö ba ginötö waʼokafu-kafu, mofanö ira ba soi tanö böʼö si so tanö raya börö me molökhö ba daʼö. Awena mangawuli ira ba danö Gizaraʼeli na no irugi baŵa lökhö. (SS. 2:11, 12; Yer. 8:7) Tatu manö tosasa dödö ndraono Gizaraʼeli na laʼandrö khöra wameʼe fune tobali sumange ba mbaŵa waʼokafu-kafu.

Tenga simane fune, lö numalö marafadi ba soi böʼö. Börö daʼö, lö tebulö so ira ba danö Gizaraʼeli ero röfi. Baero daʼö, asese labaliʼö urifö nifaliaro marafadi andre. (Fareso göi Yohane 2:14, 16.) Moloʼö buku Bible Plants and Animals (Sinanö hegöi Urifö ba Zura Niʼamoniʼö), ”hasambalö tesöndra marafadi nifaliaro ba mbanua sebua hegöi ba mbanua side-ide ba Palestina. Ero sambua nomo, no lafazökhi dögi ba gamaudu dowa si tobali naha marafadi”.—Fareso göi Yesaya 60:8.

Börö daʼö, aoha ba ndraono Gizaraʼeli wangalui fofo niʼandrö Yehowa tobali sumange. Daʼa zangoromaʼö wa Yehowa andrö Lowalangi sebua faʼomasi ba sahakhö tödö.