1-2. (a) Hadia goroisa nibeʼe khö ndra sinenge Yesu si datölu, ba hewisa wanemaʼöra? (b) Hadia nitutunöda ba artikel daʼa?

ME NO aefa luo Wendrakose 32 M, iʼila gangilata sahöli-höli dödö sinenge sotöi Fetero, Yakobo, ba Yohane. Ba Hili Heremono salawa sibai, laʼila wa tebulö zikhala Yesu, ”mohaga mbawania hulö haga luo, ba takile waʼafusi nukhania”. (Mat. 17:1-4) Ba gafuriata gangilata andrö, larongo li Lowalangi me imane, ”Onogu daʼa, niʼomasiʼögu, omuso dödögu khönia. Mifondrondrongo niwaʼönia.” (Mat. 17:5) Me no aefa alua daʼö, laforomaʼö ba lala waʼaurira wa lafondrondrongo niwaʼö Yesu ira sinenge si datölu andrö. Tatu manö, omasi ita taʼoʼö duma-dumara.

² Ba artikel si no tataluʼi, no tafahaʼö ita wa so ösa zi tebai saʼae tafalua na tafondrondrongo niwaʼö Yesu. Ba artikel daʼa, tatutunö dombua ngawalö zinangea tafalua.

3. Moloʼö Mataiʼo 7:13, 14, hadia zinangea tafalua?

³ Baso Mataiʼo 7:13, 14. Ha dombua lala nitötöi Yesu ba daʼa, yaʼia daʼö lala ’sebolo’ hegöi lala ”sise-ise”. Lö hadöi lala tanö böʼö. Moguna tafili hezo lala nitöröda. Daʼa gangetula fondrege zi tohude sinangea tahalö, börö me daʼa zotatugöi  hadia tasöndra waʼauri si lö aetu mazui löʼö.

4. Hewisa lala ’sebolo’ andrö?

⁴ Moguna tatörö tödöda niwaʼö Yesu wa so gamaehuta zi dombua lala andrö. Ato niha somasi manörö lala ’sebolo’ andrö börö me aoha wanörö yaʼia. Lahalö gangetula enaʼö lö tebulö latörö lala andrö, ba laʼoʼö niha sato sanörö yaʼia. Lö laʼila wa Satana zomuso tödö na lafalua daʼö, ba lö laʼila göi wa saekhu ba waʼamate lala andrö.—1 Ko. 6:9, 10; 1 Yo. 5:19.

5. Hewisa enaʼö tola lasöndra lala ”sise-ise” ira nifahaʼö Yesu ba ibörögö latörö lala andrö?

⁵ Lala si sambua yaʼia daʼö lala ”sise-ise”, ba iwaʼö Yesu wa lö ato zanörö yaʼia. Hadia mbörö? Simane niwaʼö Yesu ba ayati aefa daʼö, ato ndra samaʼeleʼö sofaya samaelungu niha. (Mat. 7:15) Na tafaigi iadaʼa, so mato hauga ribu agama, ba ato ba gotaluara zangumaʼö wa sindruhu nifahaʼöra. Lua-luania, manofu-nofu dödö niha si hauga zuta faʼato, ba lawaʼö tödöra wa lö hadöi agama satulö. Daʼö mbörö wa lö laforege wangalui lala saekhu ba waʼauri. Hizaʼi sindruhunia, tola lasöndra lala andrö. Imane Yesu, ”Na lö tebulö mitöngöni wehedegu, sindruhu-ndruhu wa nifahaʼögu ami, ba aboto ba dödömi zindruhu, ba sindruhu andrö zangefaʼö yaʼami.” (Yoh. 8:31, 32) Börö me soloʼö khö Yesu ita, lö moguna taʼoʼö niha sato. Hizaʼi, taforege wangalui sindruhu. Tafahaʼö ita ba Zura Niʼamoniʼö soroi ba dödö, ba sindruhu-ndruhu taʼalui hadia niʼandrö Lowalangi khöda. Tafondrondrongo göi hadia wamahaʼö Yesu. Duma-dumania, no tafahaʼö ita wa omasi Yehowa na tatimbagö wamahaʼö agama sofaya ba taböhöli wamalua owasa si toʼölö lafalua. No göi tafahaʼö ita wa tenga saoha wombulöʼö lala waʼaurida ba wangomusoiʼö tödö Yehowa. (Mat. 10:34-36) Tola manö daʼö nirasoida. Hewaʼae simanö, lö awuwu ita börö me taʼomasiʼö Lowalangida si so ba zorugo ba omasi ita taʼomusoiʼö dödönia. Tatu omuso dödö Yehowa me iʼila fefu wamorege si no tafalua!—Amd. 27:11.

6. Moloʼö Sinunö 119:9, 10, 45, 133, hadia zanolo yaʼita enaʼö lö tebulö tatörö lala saekhu ba waʼauri?

⁶ Me no ibörögö tatörö lala sise-ise, hadia zanolo yaʼita enaʼö lö tebulö tatörö lala andrö? Angeragö atö duma-duma daʼa. Ba ginötö taʼohe moto ba lala sise-ise ba gahe hili, si toʼölönia so mbaʼa-baʼa si no lafasa ba zinga lala. Tatu manö, lö tawaʼö tödöda wa tobali taha-tahada mbaʼa-baʼa andrö. Simanö göi, goi-goi Yehowa andrö si so ba Zura Niʼamoniʼö, muʼamaedolagö ia simane baʼa-baʼa nifasa ba zinga lala. Ibeʼe khöda goi-goi andrö Yehowa enaʼö lö tebulö tatörö lala saekhu ba waʼauri.—Baso Zinunö 119:9, 10, 45, 133.

7. Hadia zinangea latörö tödöra ira si bohou ebua sanandrösa ba lala sise-ise?

⁷ Yaʼami si bohou ebua, hadia talafo abeʼe goi-goi Yehowa andrö ba wamaigimi? Omasi Zatana na so ba wangera-ngerami zimane daʼö. Iforege wondrönisi tödömi enaʼö miʼoʼö niha sanörö lala sebolo börö me hulö sökhi sibai waʼaurira na mifaigi. Omasi ia na so ba wangera-ngerami wa rugi ami na lö miʼoʼö hadia nifalua ndra awö-awömi ba zekola mazui nifaigimi ba Internet. Omasi göi Zatana enaʼö miwaʼö tödömi wa lö miʼokhögö waʼomuso dödö na mifalua goi-goi Yehowa. * Hizaʼi, törö tödöu daʼa: Lö ifatunö Satana ba  niha sanörö lala sebolo wa saekhu ba waʼamate lala nitöröra andrö. Tenga simane Satana, ifatunö khömi Yehowa wa so dötönafö si sökhi ba zi so miföna na lö tebulö mitörö lala saekhu ba waʼauri andrö.—Si. 37:29; Yes. 35:5, 6; 65:21-23.

8. Hadia wamahaʼö si tola lahalö ira si bohou ebua moroi ba zalua khö Olaf?

⁸ Tola mifahaʼö ami ba zalua khö dalifusöda ira matua sotöi Olaf. * Ladönisi dödönia ira awönia sekola enaʼö ifalua gamuata wohorö. Itutunö khöra wa ira Samaduhuʼö Yehowa lö lafalua waʼorudu na lö sangowalu, börö me lafalua goi-goi Zura Niʼamoniʼö. Me no aefa larongo daʼö, so ösa ndraono alawe awönia ba zekola, itugu laforege wondrönisi tödönia ba wamalua amuata wohorö. Hewaʼae simanö, lö tedönisi dödö Olaf ba ihalö gangetula ba wamalua satulö. Tenga ha daʼö wondrönisi dödö nitaögö Olaf. Imane wanutunö, ”Lafarou ndraʼo ira guru enaʼö möido kuliah faböi laʼaohasi ba dödö ndraʼo niha böʼö. Lawaʼö wa lö mofozu waʼaurigu na lö  kuliah ndraʼo.” Hadia zanolo Olaf ba wanimbagö fondrönisi dödö ba zekola? Imane, ”Fahuwu ndraʼo khö ndra talifusöda ba gangowuloa. Hulö simane ösi nomogu ira. Ibörögö göi uʼodödögö wamahaʼö yaʼo ba Zura Niʼamoniʼö. Itugu oya ufahaʼö ndraʼo, itugu faduhu dödögu wa daʼa zindruhu. Ba gafuriata, ubayagö ndraʼo idanö.”

9. Hadia zinangea tafalua enaʼö lö tebulö tatörö lala sise-ise?

⁹ Omuso dödö Zatana na taröi lala saekhu ba waʼauri. Omasi ia na taʼoʼö niha sato, sanörö lala sebolo ”saekhu ba waʼatekiko”. (Mat. 7:13) Enaʼö lö tebulö tatörö lala sise-ise, moguna tafondrondrongo niwaʼö Yesu. Moguna göi tatörö tödöda wa lö tekiko ita na lö tebulö tatörö lala andrö. Iadaʼa, datatutunö hadia nasa mene-mene nibeʼe Yesu.

10. Moloʼö mene-mene Yesu ba Mataiʼo 5:23, 24, hadia zinangea tafalua?

¹⁰ Baso Mataiʼo 5:23, 24. Ba ayati daʼa, itutunö Yesu sambua noro dödö si tohude niʼokhögö niha Yahudi samondrondrongo linia, yaʼia daʼö ba wameʼe sumange. Khalaigö zalua andre: Möi zi samösa niha Yahudi ba gosali ba wolohe khö gere gurifö nibeʼenia tobali sumange. Hizaʼi, na itörö tödönia wa so zalania khö dalifusönia, moguna iʼanemaiʼö iröi zumange andrö ba mofanö ia. Hadia mbörö? Hadia zabölö tohude moroi ba wameʼe sumange khö Yehowa? Imane Yesu, ”Alui dalifusömö andrö, ba atulöʼö ua ndraʼugö khönia.”

11. Tutunö hadia manö nifalua Yakobo enaʼö ifuli atulö ia khö Gezau.

¹¹ Moroi ba duma-duma Yakobo, tola taʼila hewisa lala enaʼö ifuli atulö ita ba niha böʼö. No iröi mbanuania mato 20 fakhe waʼara. Aefa daʼö, ifatenge malaʼikania Yehowa ba wangumaʼö khö Yakobo enaʼö mangawuli ia. (1 Mo. 31:11, 13, 38) Hizaʼi, no sambua abula dödö daʼa khö Yakobo börö me omasi gaʼania Ezau ba wamunu yaʼia. (1 Mo. 27:41) Lua-luania, ”ataʼu Yakobo ba mangiwa dödönia”, börö me tola manö lö si taya wönu gaʼania khönia. (1 Mo. 32:7) Hadia nifalua Yakobo enaʼö ifuli atulö ia khö gaʼania? Si oföna, mangandrö ia khö Yehowa soroi ba dödö. Aefa daʼö, oya mbuala nifaʼoheʼönia khö Gezau. (1 Mo. 32:9-15) Ba me falukha ira ba gafuriata, ifaöndrö ia tou ba danö föna Gezau, tenga ha sakali dua kali, hizaʼi irugi fitu kali. Börö me so wangide-ngideʼö khö Yakobo ba ifosumange gaʼania Ezau, tola ifuli atulö ira.—1 Mo. 33:3, 4.

12. Hadia wamahaʼö si tola tahalö moroi ba duma-duma Yakobo?

¹² Tola tahalö wamahaʼö si tohude moroi ba nifalua Yakobo fatua lö falukha ia khö gaʼania hegöi me no falukha ira. Iʼandrö wanolo moroi khö Yehowa si fao fangide-ngideʼö. Aefa daʼö, ifalua zi tefaudu ba wangandrönia, oya lala nifaluania enaʼö omasi gaʼania ifuli atulö khönia. Me falukha ira, lö fabuʼa-buʼa Yakobo sanandrösa haniha zatulö ba haniha zi fasala. Ohitö dödönia yaʼia daʼö enaʼö ifuli atulö ia khö gaʼania. Hewisa enaʼö tola taʼoʼö duma-duma Yakobo?

13-14. Na tetutu dödö zi samösa talifusöda börö nifaluada, hadia zinangea tafalua?

¹³ Enaʼö lö tebulö tatörö lala saekhu ba waʼauri, moguna tarorogö waʼatulö khö ndra talifusöda. (Rom. 12:18) Na tetutu dödö zi samösa talifusöda börö nifaluada, hadia zinangea tafalua? Simane Yakobo, moguna mangandrö ita khö Yehowa soroi ba dödö. Tola taʼandrö khönia wanolo enaʼö ifuli atulö ita khö dalifusöda andrö.

 ¹⁴ Moguna göi tafareso ita samösa. Tola tasofu khöda samösa: ’Hadia lö abua gölögu ba wamaduhuʼö wa yaʼo zi fasala, uʼandrö khönia waʼebolo dödö soroi ba dödö, ba uforege enaʼö ifuli atulö ndraʼaga? Hewisa dödö Yehowa hegöi Yesu na uforege enaʼö ifuli atulö ndraʼo khö dalifusögu ba wamati?’ Na taʼangerönusi wanofu-nofu simane daʼö, tola terou dödöda ba wangaʼasogö faʼatulö khö ndra talifusöda, simane niwaʼö Yesu khöda. Hewisa enaʼö tola taʼoʼö duma-duma Yakobo ba wamalua daʼö?

15. Moloʼö Efeso 4:2, 3, hewisa zinangeania ita na taforege enaʼö ifuli atulö ita khö ndra talifusöda?

¹⁵ Angeragö atö hadia zalua na duma-dumania fadaʼawa Yakobo khö Gezau sanandrösa haniha zatulö ba haniha zi fasala. Tola manö faehu sibai zalua ba gafuriata. Börö daʼö, na tafalukhaisi zi samösa talifusöda enaʼö ifuli atulö ita khönia, moguna so khöda wangide-ngideʼö. (Baso Efeso 4:2, 3.) Imane ba Gamaedola 18:19, ”Abölö abua wokalaisi talifusö safökhö tödö moroi ba wokalaisi banua si no mufoʼöli, ba na faʼudu ira, abua wangatulöʼö, hulö mbaʼa-baʼa mbawa göli si no aro.” Hizaʼi na taʼandrö waʼebolo dödö si fao fangide-ngideʼö, tola teboka ”mbaʼa-baʼa” andrö.

16. Na omasi ita ifuli atulö khö zi samösa talifusöda, hadia zinangea taʼangeragö, ba hadia mbörö?

¹⁶ Fatua lö fahuhuo ita khö dalifusöda si no taʼafökhöisi tödö, moguna ua taʼangeragö hadia zinangea tawaʼö ba hewisa lalada wamaʼema yaʼia. Na fahuhuo ita khönia, böi olifu ita gohitö dödöda, yaʼia daʼö enaʼö lö saʼae afökhö dödönia khöda. Ba wamobörö, tola manö ifaʼema khöda wehede si lö fatema ba dödöda mazui itahigö ita. Lua-luania, te ibörögö mofönu ita ba fabuʼa-buʼa ita khönia. Hizaʼi na tafalua daʼö, hadia tola ifuli atulö ita khö dalifusöda andrö? Tatu manö löʼö. Böi olifu ita wa abölö moguna tarorogö waʼatulö khö dalifusöda moroi na taforomaʼö haniha zatulö ba haniha zi fasala.—1 Ko. 6:7.

17. Hadia wamahaʼö si tola öhalö moroi ba duma-duma Gilbert?

¹⁷ Nehegö atö duma-duma zi samösa talifusöda ira matua sotöi Gilbert, samorege ba wangaʼasogö faʼatulö. Imane wanutunö, ”Ba zilalö, lö fahuwu khögu nonogu alawe. Ba zi dua fakhe faʼara, lö tebulö uforege wahuhuosa khönia si fao faʼasökhi dödö enaʼö ifuli sökhi gamakhaitama.” Hadia nasa nifalua Gilbert? ”Fatua lö fahuhuodo khönia, ulau mangandrö ba ufaʼanö dödögu enaʼö lö mofönu  ndraʼo na ifaʼema wehede sagafökhö. Moguna ufaʼanö ndraʼo ba wangefaʼö salania. Baero daʼö, lö göi uforege ba wangoromaʼö wa yaʼo zatulö, ba aboto ba dödögu wa moguna urorogö waʼatulö ba nösi nomogu.” Hadia mbuania? Imane Gilbert, ”Omuso sibai dödögu iadaʼa börö me sökhi gamakhaitagu ba nösi nomogu maʼafefu.”

18-19. Na tetutu dödö zi samösa niha börö nifaluada, hadia zinangea tafalua, ba hadia mbörö?

¹⁸ Hadia wamahaʼö si tola öhalö? Na tetutu dödö zi samösa talifusöda börö nifaluamö, moguna öforege enaʼö ifuli atulö ndraʼugö khönia simane mene-mene nibeʼe Yesu. Angandrö khö Yehowa ba andrö khönia geheha niʼamoniʼö enaʼö tola tobali ndraʼugö solohe faʼatulö. Buania, hasambalö örasoi waʼomuso dödö ba tola öforomaʼö wa sindruhu-ndruhu öfondrondrongo niwaʼö Yesu.—Mat. 5:9.

¹⁹ Taʼandrö sibai saohagölö khö Yehowa börö me lö tebulö iʼogunaʼö Yesu si tobali ”högö mbanua niha Keriso” ba wameʼe khöda fanuturu lala si fao faʼomasi. (Ef. 5:23) Simane sinenge sotöi Fetero, Yakobo, hegöi Yohane, datahalö gangetula enaʼö lö tebulö ’tafondrondrongo niwaʼönia’. (Mat. 17:5) Simane si no tatutunö, tola tafalua daʼö na lö tebulö tatörö lala sise-ise saekhu ba waʼauri, ba ifuli atulö ita khö ndra talifusöda si tetutu tödö khöda. Na tafalua daʼö, hasambalö fahöna howu-howu nitemada ba tasöndra waʼauri si lö aetu safönu faʼomuso dödö ba zi so miföna.