Hadia no ahori öbaso fefu edisi Manuriaigö ba ndröfi daʼa? Na noa, tandraigö beʼe wanema li ba wanofu-nofu andre:

Iwaʼö Yakobo 5:11 wa Yehowa andrö no ”safönu faʼomasi” ba ”sahakhö tödö”. Börö daʼö, hadia zi tola tafaduhusi tödö?

Börö me iʼomasiʼö ita Yehowa ba ahakhö dödönia, omasi ia iʼefaʼö zalada ba itolo ita. Moguna taʼoʼö duma-dumania andrö.—w21.01, ngaʼörö 21.

Hana wa ifazökhi Yehowa gamakhoita sanandrösa ba wondröniaʼö?

Ifalua daʼö Yehowa börö me iʼomasiʼö ita. Börö me no ifazökhi gamakhoita andrö, tola so waʼahono dödö ba nösi nomonia ba toföfö fefu nifaluara. Fefu nösi nomo soloʼö amakhoita andrö, tola laʼila haniha zinangea mangai angetula ba haniha zinangea mamalua yaʼia.—w21.02, ngaʼörö 3.

Hana wa moguna laʼangenanöi wangogunaʼö pesan singkat ira niha Keriso?

Na ihalö gangetula si samösa niha ba wangogunaʼö aplikasi simane daʼö, moguna mangelama ia ba wamili haʼökhö fariawö ia. Abölö abua wamalua daʼö ba grup chat sato niha. (1 Ti. 5:13) Moguna göi mangelama ita faböi tafaʼema duria si lö tatu na atulö, mazui taʼakali ndra talifusöda ba wangalui hare.—w21.03, ngaʼörö 31.

Hadia manö mbörö wa itehegö Lowalangi tefakao ba mate Yesu?

Si oföna, lö tola löʼö latawi Yesu ba döla geu enaʼö teʼefaʼö niha Yahudi moroi ba wangelifi. (Gal. 3:10, 13) Si dua, ifaʼanö Yesu Yehowa ba wamalua halöwö tobali Ere Sebua. Ba si tölu, börö me lö faröi Yesu irugi waʼamatenia, no iforomaʼö wa tola lö faröi niha gulidanö hewaʼae na lataögö wanandraigö sabua. (Yob. 1:9-11)—w21.04, ngaʼörö 16-17.

Hadia zi tola öfalua na abua khöu wamalukhaisi niha ba wanuriaigö?

Tola öforege wanuriaigö ba ginötö so niha yomo ba nomo. Tola göi manuriaigö ndraʼugö ba nahia si faböʼö-böʼö. Baero daʼö, tola öfalua lala wanuriaigö tanö böʼö, duma-dumania öfaʼoheʼö zura.—w21.05, ngaʼörö 15-16.

Hadia geluaha wehede Waulo me imane, ”Si mate ndraʼo ba goroisa”? (Gal. 2:19)

Börö Goroisa Moze, tola aboto ba dödö niha wa lö moʼahonoa ira. Oroisa daʼö göi zolohe iraono Gizaraʼeli khö Keriso. (Gal. 3:19, 24) Daʼö mbörö wa mamati Waulo khö Keriso. Börö daʼö, no ”mate [Waulo] ba goroisa”, mazui tenga saʼae barö Goroisa Moze so ia.—w21.06, ngaʼörö 31.

Hewisa wameʼe Yehowa duma-duma ba wangoromaʼö faʼanau gölö?

Anau gölö Yehowa hewaʼae na teʼoʼaya döinia, ato zolawa faʼasinangeania ba wamatörö, so ösa ndraononia samadaö, lö tebulö falimo Gafökha, tefakao nono mbanuania, mate ndra si fahuwu khönia, lafakao niha böʼö ira niha si lö sökhi, ba lafakiko gomböila dangania ira niha gulidanö.—w21.07, ngaʼörö 9-12.

Hewisa wameʼe Yosefo duma-duma ba wangoromaʼö faʼebolo dödö?

Anau gölönia hewaʼae na lafalua khönia zi lö atulö ira talifusönia. Ba gafuriata, muböbögö khönia zi lö duhu ba lakuru ia ba Miserai ba zi hauga fakhe faʼara.—w21.08, ngaʼörö 12.

Hadia geluaha wamaheu nifaʼeleʼö ba Hagaʼi 2:6-9, 20-22?

Me tafaʼema duria sanandrösa ba Wamatörö Lowalangi, mazui tafaheu ngawalö soi, ato niha sanimbagö yaʼita. Hizaʼi, börö wamaheu andrö, ato göi zi terou tödö ba wamosumange Yehowa. Ba zi lö ara tö, hasambalö alua wamaheu safuria ba ngawalö soi ba ginötö muhori dania ira.—w21.09, ngaʼörö 15-19.

Hana wa lö atage ita wamalua halöwö ba wamati?

Omuso dödö Yehowa ba wonehegö famorege si no tafalua. Na lö atage ita, hasambalö tasöndra waʼauri si lö aetu.—w21.10, ngaʼörö 25-26.

Hewisa wa tola möi fanoloda 3 Moze faza 19 irege tola ’taʼamoniʼö ita ba ngawalö gamuatada’? (1 Fe. 1:15)

Ba ayati daʼö, te itötöi Fetero ngawua wehede nisura ba 3 Moze 19:2. Ba mbuku 3 Moze faza 19, tola taʼila hadia manö lala sinangea tafalua ba wangamoniʼö amuatada ba waʼauri sero maʼökhö.—w21.12, ngaʼörö 3-4.