1. Hadia nitötöna Yehowa khöda?

OMASI sibai Yehowa wangoromaʼö faʼomasi si lö faröi. (Hos. 6:6) Itötöna göi khöda enaʼö tafalua zimane daʼö. Andrö wa iʼoroisi khö Mikha samaʼeleʼö enaʼö ’taʼomasiʼö waʼomasi si lö faröi’. (Mi. 6:8, nis.) Hizaʼi, enaʼö terou dödöda wamalua daʼö, moguna ua taʼila hadia geluahania waʼomasi si lö faröi.

2. Hadia geluaha waʼomasi si lö faröi?

² Ba Mbuku Niʼamoniʼö Famoʼeluaha Gulidanö si Bohou, so mato 200 kali tesöndra ngawua wehede ”faʼomasi si lö faröi”. Daʼa geluaha waʼomasi si lö faröi moloʼö ”Eluaha Ngawua Wehede Zura Niʼamoniʼö”: ”Faʼomasi niforomaʼö börö mbuʼusa li, faʼalöfaröi, faʼaduhu hegöi famaböbö saro. Asese muʼogunaʼö ngawua wehede daʼa ba wangoromaʼö faʼomasi Lowalangi ba niha, ba faʼomasi daʼa tola göi ifalua niha ba nawönia niha.” No duma-duma fondrege zi sökhi khöda Yehowa ba wangoromaʼö faʼomasi si lö faröi. Ba artikel daʼa, tatutunö dania hewisa wangoromaʼö Yehowa faʼomasinia si lö faröi ba niha gulidanö. Ba artikel aefa daʼa, tatutunö göi hewisa woloʼöda duma-duma Yehowa ba wangoromaʼö faʼomasi si lö faröi khö ndra talifusöda.

3. Hadia niʼombakhaʼö Yehowa khö Moze sanandrösa khönia?

³ Lö ara me no aheta ndraono Gizaraʼeli moroi ba Miserai, ifatunö Yehowa khö Moze sanandrösa ba döinia hegöi amuatania. Imane, ”Yehowa, Lowalangi sahakhö tödö Yehowa andrö ba si sökhi böwö, lö alio mofönu ba fahöna waʼomasi si lö faröi ba faʼaduhu, sangoromaʼö faʼomasi si lö faröi ba niha si hauga ribu faʼato. Iʼefaʼö zala, olalöwa, horö.” (2 Mo. 34:6, 7)  Iʼogunaʼö ngawua wehede si sökhi sibai Yehowa ba wangombakha khö Moze hadia mbörö wa no sahöli-höli dödö waʼomasinia si lö faröi andrö. Datatutunö.

4-5. (a) Hewisa wanutunö Yehowa sanandrösa khönia? (b) Hadia manö wanofu-nofu nitutunöda dania?

⁴ Tenga ha asala iwaʼö Yehowa wa so khönia waʼomasi si lö faröi, hizaʼi iwaʼö wa ”fahöna [khönia] waʼomasi si lö faröi”. No göi irai mutötöi ngawua wehede simane daʼö ba zi önö ayati tanö böʼö ba Zura Niʼamoniʼö. (4 Mo. 14:18; Neh. 9:17; Si. 86:15; 103:8; Yoe. 2:13; Yon. 4:2) Ba ayati daʼö fefu, ha khö Yehowa manandrösa ngawua wehede andrö, tenga ba niha gulidanö. Tatu ahöli-höli dödöda me no hauga kali itötöi ngawua wehede andrö Yehowa ba wanutunö sanandrösa khönia. Daʼö zangoromaʼö wa tohude sibai waʼomasi si lö faröi andrö ba wamaigi Yehowa. * Andrö wa imane Razo Dawido, ”He Yehowa, irugi mbanua si yawa faʼomasimö si lö faröi . . . Ebua mböli waʼomasimö si lö faröi, yaʼugö Lowalangi! Lalumöʼö ira niha gulidanö barö lumö gafimö.” (Si. 36:5, 7) Simane Dawido, hadia sindruhu-ndruhu taʼandrö saohagölö ba waʼomasi si lö faröi niforomaʼö Lowalangi?

⁵ Enaʼö itugu aboto ba dödöda hadia geluaha waʼomasi si lö faröi, datatutunö wanofu si dombua andre: Haʼökhö iforomaʼö Yehowa waʼomasinia si lö faröi? Ba hadia manö mbua nitemada me no iforomaʼö Yehowa waʼomasinia si lö faröi?

6. Haʼökhö iforomaʼö Yehowa waʼomasinia si lö faröi?

⁶ Haʼökhö iforomaʼö Yehowa waʼomasinia si lö faröi? Lö idozigö niha gulidanö maʼafefu ba wangoromaʼö faʼomasinia si lö faröi. Iforomaʼö daʼö ha ba niha si fahuwu khönia. Lö faröi Lowalangida khö ndra si fahuwu khönia. Ibeʼe khöra dötönafö sahöli-höli dödö ba zi so miföna, ba lö tebulö iʼomasiʼö ira.

7. Hewisa wangoromaʼö Yehowa faʼomasi ba niha gulidanö maʼafefu?

⁷ No iforomaʼö Yehowa waʼomasi ba niha gulidanö maʼafefu. Imane Yesu khö zi samösa ira matua sotöi Nikodemo, ”Simanö sa waʼomasi Lowalangi nösi gulidanö, itehegö Nononia si ha sambua, enaʼö lö tekiko dozi samati khönia, ba lasöndra waʼauri si lö aetu.”​—Yoh. 3:1, 16; Mat. 5:44, 45.

8-9. (a) Hana wa iforomaʼö Yehowa waʼomasinia si lö faröi ba nono mbanuania? (b) Hadia nitutunöda iadaʼa?

⁸ Simane si no tatutunö no mege, iforomaʼö waʼomasi si lö faröi Yehowa ha ba niha si  fahuwu khönia, yaʼia daʼö ono mbanuania. Oroma daʼö moroi ba wehede Razo Dawido hegöi Danieli samaʼeleʼö. Duma-dumania, imane Dawido, ”Böi böhöli wangoromaʼö faʼomasi si lö faröi ba niha sangila yaʼugö.” Imane nasa, ”Lö tebulö waʼomasi si lö faröi moroi khö Yehowa sagötö faʼara ba niha sangataʼufi yaʼia.” Imane Danieli, ”He Yehowa Lowalangi sindruhu, . . . sangoromaʼö faʼomasi si lö faröi ba niha sangomasiʼö yaʼia ba soloʼö oroisania.” (Si. 36:10; 103:17; Dan. 9:4) Moroi ba daʼö taʼila wa iforomaʼö waʼomasinia si lö faröi Yehowa ba nono mbanuania, börö me laʼila haniha ia, lafosumange ia, laʼomasiʼö ia, ba laʼoʼö goroisania. Iforomaʼö waʼomasinia si lö faröi ha ba niha samosumange yaʼia ba lala satulö.

⁹ Fatua lö tobali ita samosumange Yehowa, no tarasoi waʼomasi niforomaʼönia ba niha gulidanö maʼafefu. (Si. 104:14) Hizaʼi iadaʼa, me no tobali ita samosumange yaʼia, tarasoi göi waʼomasinia si lö faröi. Ifaduhuʼö ba dödö nono mbanuania Yehowa, ”Lö irai tebulö waʼomasigu khöu.” (Yes. 54:10) Simane nirasoi Dawido samösa, ”tohude nono mbanuania si lö faröi ibeʼe Yehowa”. (Si. 4:3) Börö daʼö, hadia zinangea tafalua? Barö wanuturu lala moroi khö Yehowa, ibeʼe mene-mene daʼa si samösa sanura sinunö, ”Gofu haniha zatua-tua, ba iʼameʼegö tödö daʼa ba ihaogö woʼangeragö faʼomasi si lö faröi niforomaʼö Yehowa.” (Si. 107:43) Datatutunö zi tölu lala niʼogunaʼö Yehowa ba wangoromaʼö faʼomasinia si lö faröi ba hadia mbuania khöda.

10. Hadia mbua nitemada me lö tebulö iforomaʼö Yehowa waʼomasinia si lö faröi sagötö faʼara? (Sinunö 31:7)

¹⁰ Lö tebulö iforomaʼö Yehowa waʼomasinia si lö faröi sagötö faʼara. No mutötöi ngawua wehede daʼa ba zi 26 kali ba Zinunö 136. Imane ba ayati si oföna, ”Miʼandrö saohagölö khö Yehowa börö me si sökhi tödö ia; lö tebulö waʼomasinia si lö faröi sagötö faʼara.” (Si. 136:1) Iʼotarai ayati 2 ofeta 26, mufuli mutötöi ngawua wehede ”börö me lö tebulö waʼomasinia si lö faröi sagötö faʼara”. Ngawua  wehede daʼö zamaduhuʼö ba dödöda wa lö irai tebulö waʼomasi Lowalangi ba nono mbanuania. Na tabaso fefu nösi zinunö andrö, tatu ahöli-höli sibai dödöda me taʼila hadia manö zi lö tebulö ifalua Yehowa ba wangoromaʼö faʼomasinia si lö faröi. Tatu teʼaroʼö sibai dödöda me taʼila wa lö iröi nono mbanuania Yehowa. Lö iböhöli wangomasiʼö niha samosumange yaʼia ba fao ia khöra, mendrua manö ba ginötö si basaki. Buania khöda: Börö me taʼila wa lö irai iröi ita Yehowa, tola teʼabölöʼö ita ba tarasoi waʼomuso dödö. Daʼö zanolo yaʼita enaʼö tola tataögö ngawalö gabula dödö ba lö tebulö tafosumange Yehowa.​—Baso Zinunö 31:7.

11. Moloʼö Sinunö 86:5, hadia zamarou tödö Yehowa ba wangefaʼö sala?

¹¹ Faʼomasi si lö faröi zamarou tödö Lowalangi ba wangefaʼö sala. Na no ifalalini gera-erania si samösa niha samalua horö sebua ba iböhöli gamuatania andrö, terou dödö Yehowa wangefaʼö salania börö waʼomasinia si lö faröi. Imane Dawido sanandrösa khö Yehowa, ”Lö ihuku ita moloʼö horö si no tafalua, mazui isulöni khöda simane faʼebua zala nifaluada.” (Si. 103:8-11) No irasoi samösa Dawido hawaʼabu dödöda na itahi-tahigö ita tödöda side-ide. Hizaʼi, no irasoi göi wa Yehowa andrö Lowalangi ”sangefaʼö sala”. Hadia zamarou tödö Yehowa ba wangefaʼö sala? So wanema linia ba Zinunö 86:5. (Baso.) Simane niwaʼö Dawido ba wangandrönia, terou dödö Yehowa ba wangefaʼö sala börö me fahöna waʼomasinia si lö faröi ba niha soʼangaröfili töinia.

12-13. Na itahi-tahigö ita tödöda side-ide börö horö si no tafalua ba zilalö, hadia zi tola möi fanoloda?

¹² Na tafalua zala, no sinangea na maniasa ita. Sindruhunia, sökhi na tarasoi zimane daʼö. Tola tobali famarou dödöda daʼö ba wamalalini era-era hegöi ba wombulöʼö amuatada. Hizaʼi, so ösa nono mbanua Lowalangi sorasoi wa lö tebulö itahi-tahigö ira tödöra side-ide börö horö si no lafalua ba zilalö. Hewaʼae na sindruhu-ndruhu no lafalalini gera-erara, lawaʼö tödöra wa lö omasi Yehowa wangefaʼö horöra. Na daʼö nirasoimö, hadia zi tola möi fanolomö? Moguna öʼangerönusi wa omasi sibai Yehowa wangoromaʼö faʼomasi si lö faröi ba nono mbanuania.

 ¹³ Buania khöda: Hewaʼae na lö moʼahonoa ita, tola taʼokhögö dödö side-ide si lö sinegu ba tarasoi waʼomuso dödö ba wamosumange Yehowa. Hadia mbörö? Börö me ”tola iʼefaʼö fefu horöda do Nononia Yesu”. (1 Yo. 1:7) Na ide-ide dödöu börö zala si no irai öfalua, törö tödöu wa omasi Yehowa wangefaʼö salamö na no öfalalini gera-eramö. Itutunö Dawido wa moʼamakhaita waʼomasi Yehowa si lö faröi ba wangefaʼönia sala. Imane, ”Simane banua si yawa, abölö alawa ia moroi ba danö, simanö göi waʼebua waʼomasi si lö faröi niforomaʼö Lowalangi ba niha sangataʼufi yaʼia. Simane otalua gatumbukha faoma aekhula simane daʼö waʼaröu wangefaʼönia olalöwada.” (Si. 103:11, 12) Sindruhu-ndruhu wa omasi Yehowa ’wameʼe fangefa soroi ba dödö’.​—Yes. 55:7.

14. Hewisa wanutunö Dawido wa ilumöʼö ita faʼomasi si lö faröi moroi khö Lowalangi?

¹⁴ Faʼomasi si lö faröi moroi khö Lowalangi zolumöʼö yaʼita ba wamati. Imane Dawido ba wangandrönia khö Yehowa, ”Khöu ulumöʼö ndraʼo; yaʼugö zangefaʼö yaʼo ba waʼatosasa. Ifasui ndraʼo faʼomuso dödö börö me yaʼugö zangefaʼö yaʼo. . . . Niha si faduhu tödö khö Yehowa ifasui ia faʼomasi si lö faröi andrö khönia.” (Si. 32:7, 10) Me götö föna, tola telumöʼö niha si toröi ba zi sambua banua börö me so göli samasui banua andrö. Simane öli andrö, no ifasui ba ilumöʼö ita faʼomasi si lö faröi moroi khö Yehowa enaʼö lö tekiko wahuwusada khönia. Faʼomasinia si lö faröi göi zamarou tödönia ba wondröni yaʼita khönia.​—Yer. 31:3.

15. Hana wa tola mufagölösi waʼomasi si lö faröi moroi khö Yehowa simane nahia folumöʼö hegöi baʼa-baʼa?

¹⁵ Iʼogunaʼö gamaedola tanö böʼö Dawido ba wangoromaʼö hewisa wolumöʼö Lowalangi ono mbanuania. Imane, ”Yaʼugö zi tobali nahia folumöʼö khögu si lö ametaʼuö, Lowalangi sangoromaʼö faʼomasi si lö faröi.” Imane göi Dawido sanandrösa khö Yehowa, ”Iʼomasiʼö ndraʼo ba yaʼia mbaʼa-baʼagu, sangefaʼö yaʼo ba sawatögu ba wolumöʼö yaʼo, balusegu ba nahia wolombasegu.” (Si. 59:17; 144:2) Hana wa tola mufagölösi waʼomasi si lö faröi moroi khö Yehowa simane nahia folumöʼö hegöi baʼa-baʼa? Sagötö tobali ita samosumange Yehowa, hasambalö ilumöʼö ita enaʼö lö tekiko wahuwusada khönia gofu hezo so toröi ita. Ba Zinunö 91, so ösa ayati sanutunö daʼö ba wangaʼaroʼö faʼafaduhu dödöda. Imane sanura sinunö andrö, ”Umane dania khö Yehowa, ’Sawatögu ndraʼugö ba baʼa-baʼagu.’”(Si. 91:1-3, 9, 14) Iʼogunaʼö göi ngawua wehede simane daʼö Moze ba woʼamaedolagö folumöʼö moroi khö Yehowa. (Si. 90:1, nis.) Baero daʼö, lö ara fatua lö mate ia, iʼogunaʼö ngawua wehede si sökhi sibai ba wanutunö sanandrösa ba daʼö. Imane, ”Lowalangi andrö nahia folumöʼö iʼotarai mböröta, ituwu ndraʼugö faoma taʼionia si lö tebulö.” (5 Mo. 33:27) Moroi ba ngawua wehede ”ituwu ndraʼugö faoma taʼionia si lö tebulö”, hadia wamahaʼö si tola tahalö sanandrösa khö Yehowa?

16. Hadia manö mbua nitemada? (Sinunö 136:23)

¹⁶ Na faduhu dödöda wa lö tebulö ilumöʼö ita Yehowa, tola tarasoi waʼahono dödö. Hizaʼi itaria, tola manö tarasoi waʼide-ide dödö ba lö taʼila tatimbagö lala wangera-ngera simane daʼö. Na daʼö nirasoida, hewisa wanolo Yehowa yaʼita? (Baso Zinunö 136:23.) Hasambalö ituwu ita faoma taʼionia ba ihaogö-haogö wanolo yaʼita ba wolawa faʼide-ide dödö andrö. (Si. 28:9; 94:18) Buania khöda: So dombua mbua nitemada börö me taʼila wa tola taʼodaligö Lowalangi. Si oföna, tola faduhu dödöda wa so nahia folumöʼöda gofu  hezo toröi ita. Si dua, tola tarasoi wa iʼameʼegö tödö ita Amada safönu faʼomasi.

17. Hadia zi faduhu dödöda? (Sinunö 33:18-22)

¹⁷ Simane si no tatutunö, tola faduhu dödöda wa hasambalö itolo ita Yehowa na göna ita abula dödö enaʼö lö faröi ita khönia. (2 Ko. 4:7-9) Imane Yeremia samaʼeleʼö, ”Börö waʼomasi si lö faröi khö Yehowa, andrö wa lö tehori ita. Lö irai aetu waʼahakhö dödönia.” (Nge. 3:22) Tola faduhu dödöda wa lö tebulö iforomaʼö khöda Yehowa waʼomasinia si lö faröi börö me imane Sura Niʼamoniʼö, ”Hörö Yehowa zondrorogö niha samosumange yaʼia, sanötöna faʼomasinia si lö faröi.”​—Baso Zinunö 33:18-22.

18-19. (a) Hadia zinangea tatörö tödöda? (b) Hadia nitutunöda ba artikel aefa daʼa?

¹⁸ Hadia zinangea tatörö tödöda? Fatua lö tobali ita samosumange Yehowa, no tarasoi waʼomasi niforomaʼönia ba niha gulidanö maʼafefu. Hizaʼi iadaʼa, me no tobali ita samosumange yaʼia, tarasoi göi waʼomasinia si lö faröi. Faʼomasinia si lö faröi andrö zamarou tödönia ba wolumöʼö yaʼita. Hasambalö ifalua zi no ifabuʼu khöda. Omasi ia enaʼö lö tebulö ahatö ita khönia ba mofozu waʼaurida. (Si. 46:1, 2, 7) Börö daʼö, gofu hadia gabula dödö nitaögöda, hasambalö ibeʼe khöda waʼabölö Yehowa enaʼö lö faröi ita khönia.

¹⁹ No tatutunö hadia manö lala niʼogunaʼö Yehowa ba wangoromaʼö faʼomasinia si lö faröi ba nono mbanuania. Omasi göi ia na faoma taforomaʼö waʼomasi si lö faröi khö ndra talifusöda. Hewisa wamaluada daʼö? Tatutunö wanema linia ba artikel aefa daʼa.