1. Hadia wanofu si tola manö tumbu ba dödöda?

HADIA itaria aombö dödöu na öʼangeragö zalua ba zi so miföna, simane fangohori agama sofaya, famakao niʼasogö Gogi moroi ba Magogi, hegöi fasuwöta ba Hamagedo? Hadia no irai manofu-nofu dödöu, ’Na alua fefu zi hokha mbuda andrö, hadia lö tebulö uforomaʼö waʼalöfaröi?’ Na tumbu ba dödöu wanofu simane daʼö, tola tobali fanolou wehede Yesu nisura ba ayati si tobali dane-dane wamahaʼö ba artikel daʼa. Imane Yesu khö ndra nifahaʼönia, ”Böi fawuka dödömi. Miʼamati.” (Yoh. 14:1) Na aro wamatida, daʼö zanolo yaʼita enaʼö lö mangiwa dödöda ba wanaögö salua ba zi so miföna.

2. Hewisa enaʼö tola aro wamatida, ba hadia nitutunöda ba artikel daʼa?

² Tola taʼaroʼö wamatida ba wanaögö salua ba zi so miföna na taʼangeragö hadia zinangea tafalua na tetandraigö wamatida iadaʼa. Na taʼangeragö daʼö, tola taʼila hadia nasa zinangea taʼaroʼö ba wamatida. Ero mofozu ita ba wanaögö fanandraigö, itugu aro wamatida ba tefaʼanö ita ba wanaögö fanandraigö ba zi so miföna. Ba artikel daʼa, tatutunö dania öfa ngawalö zalua khö ndra nifahaʼö Yesu sangoromaʼö wa moguna ladouʼö wamatira. Tatutunö göi hewisa wangoromaʼöda faʼanau gölö na alua khöda zimane daʼö iadaʼa, ba hewisa wamaʼanöda yaʼita ba wanaögö salua ba zi so miföna.

3. Simane nisura ba Mataiʼo 6:30, 33, hadia nitutunö Yesu sanandrösa ba wamati?

³ No sinangea na omasi zi samösa högö yomo ba nomo ba wangaʼasogö balazo, nukha, hegöi omo khö woʼomonia awö ndraononia. Hizaʼi, tenga saoha wamalua daʼö ba ginötö si basaki andre. So ösa ndra talifusöda saheta ba halöwö, ba abua khöra ba wanöndra halöwö tanö böʼö hewaʼae na owölö-ölö  ira. So göi zanimbagö halöwö nibeʼe khöra börö me lö tefaudu ba goi-goi Zura Niʼamoniʼö. Na alua khöda zimane daʼö, moguna aro wamatida wa hasambalö itolo ita Yehowa ba wangaʼasogö soguna ba nösi nomoda. No ihaogö itutunö daʼa Yesu khö ndra nifahaʼönia me ifaʼema Huhuo ba Hili. (Baso Mataiʼo 6:30, 33.) Na sindruhu-ndruhu faduhu dödöda wa lö iröi ita Yehowa, tola taʼosambuaʼö dödöda ba wamalua halöwö khönia. Na taʼila hewisa wanolo Yehowa yaʼita ba wangaʼasogö soguna khöda, tola itugu ahatö ita khönia ba aro wamatida.

4-5. Hadia zanolo si sambua ösi nomo me aombö dödöra ba zoguna khöra?

⁴ Nehegö atö hadia zalua ba nösi nomo dalifusöda Miguel si toröi ba Venezuela. No larasoi samösa hewisa wanolo Yehowa yaʼira me aombö dödöra ba zoguna khöra. Ba zilalö, tola lasöndra zoguna khöra börö me mohalöwö ira ba kabu niʼokhögöra samösa. Hizaʼi samuza inötö, tohare mato hadauga ndra matua solohe fana ba worabu tanöra, ba lafofanö ira moroi ba daʼö. Imane Miguel, ”No mafiza danö khö nawöma, hizaʼi lö ebolo. Ba daʼö mohalöwö ndraʼaga iadaʼa. Ero maʼökhö, uʼandrö tolo khö Yehowa enaʼö iʼasogö zoguna khöma maʼökhö daʼö.” Abua khöra wangalui soguna khöra. Hewaʼae simanö, sindruhu-ndruhu mamati ira wa hasambalö itolo ira Amada sebua faʼomasi ba wombönökhi soguna khöra ero maʼökhö. Buania, owölö-ölö nösi nomo dalifusöda Miguel weʼamöi ba gangowuloa hegöi ba wanuriaigö. Laʼofönaiʼö wotuhini Famatörö Lowalangi ba waʼaurira, ba iʼasogö zoguna khöra Yehowa.

⁵ Me alua khöra waʼabasaki, iʼosambuaʼö dödönia Miguel hegöi foʼomonia Yurai ba woʼangerönusi hewisa lala Yehowa ba wanolo yaʼira. Me luo daʼö, iʼogunaʼö ndra talifusöda Yehowa ba wangaʼasogö soguna khöra mazui ba wanolo Miguel ba wanöndra halöwönia. Baero daʼö, iʼogunaʼö göi gödo ndraha Yehowa ba wameʼe soguna khöra. Lö irai iröi ira Yehowa. Buania, itugu aro wamati nösi nomora. Me no izara-zara wanutunö hewisa wanolo Yehowa yaʼira, imane onora siaʼa sotöi Yoselin, ”Sindruhu-ndruhu tefarou sibai dödöma me maʼila hewisa me itolo ndraʼaga Yehowa. Yaʼia andrö si fahuwu khögu ba faduhu dödögu wa hasambalö itolo ndraʼo.” Imane nasa, ”Abula dödö nitaögöma zi tobali fanolo khöma ba wanaögö abula dödö salua ba zi so miföna.”

6. Hewisa lalamö ba wangaʼaroʼö famatiu na abua khöu wombönökhi soguna khöu?

⁶ Hadia abua khöu wombönökhi soguna khöu? Na yaʼia, tatu manö basaki zalua khöu iadaʼa. Hewaʼae simanö, tola öʼogunaʼö ginötö daʼö ba wangaʼaroʼö famatiu. Angandrö khö Yehowa, aefa daʼö baso ba angerönusi wehede Yesu nisura ba Mataiʼo 6:25-34. Angeragö duma-duma salua ba götöda andre sangoromaʼö wa iʼasogö Yehowa zoguna ba niha sowölö-ölö mamalua halöwö ba wamati.  (1 Ko. 15:58) Na öfalua daʼö, tola itugu faduhu dödöu wa hasambalö itolo ndraʼugö Amada Yehowa simane fanolonia niha böʼö. Aboto ba dödönia hadia zoguna khöu, ba iʼila hewisa lala ba wombönökhi yaʼia. Na no örasoi samösa wanolo moroi khö Yehowa, hasambalö itugu aro wamatiu irege tola anau gölöu ba wanaögö fanandraigö sabölö ebua ba zi so miföna.​—Hab. 3:17, 18.

7. Moloʼö Mataiʼo 8:23-26, hewisa wa tetandraigö wamati ndra nifahaʼö me alua ”mbade sabölö-bölö”?

⁷ No irai itolo ndra nifahaʼönia Yesu enaʼö aboto ba dödöra hadia nasa zinangea laʼaroʼö ba wamatira. Samuza inötö, me so ira yawa ba dundraha, alua mbade sabölö-bölö ba zi lö mudöna-döna irege möi yawa nidanö ba dundraha. (Baso Mataiʼo 8:23-26.) Hizaʼi, no mörö Yesu me luo daʼö. Me lasusugi ia ira nifahaʼönia ba laʼandrö tolo khönia, isofu khöra, ”Hana wa ataʼu ami, yaʼami sambö famati?” Moguna aboto ba dödö ndra nifahaʼö sataʼu andrö wa aoha khö Yehowa wolumöʼö Yesu hegöi si fao khönia. Hadia wamahaʼönia khöda? Na aro wamatida, tola tobali fanolo khöda daʼö ba wanaögö ’bade sabölö-bölö’ hegöi abula dödö si no amaedola mbade.

8-9. Hewisa me tetandraigö wamati Anel, ba hadia zanolo yaʼia?

⁸ Nehegö atö hadia zalua khö dalifusöda ira alawe si lö sangowalu sotöi Anel moroi ba Puerto Riko. Itugu teʼaroʼö wamatinia me no itaögö gabula dödö sebua, yaʼia daʼö ’bade sabölö-bölö’. Me döfi 2017, alua Topan Maria irege tekiko nomonia ba aheta ia moroi ba halöwönia. Imane Anel, ”Me alua daʼö, urasoi waʼaombö-aombö dödö. Hizaʼi, ufahaʼö ndraʼo wangodaligö Yehowa. Lö uböhöli wangandrö, ba lö utehe ifakiko ndraʼo faʼaombö-aombö dödögu andrö.”

⁹ Itutunö Anel hadia nasa zanolo yaʼia ba wanaögö abula dödönia, yaʼia daʼö foloʼö. Imane, ”Börö me uʼoʼö wanuturu lala moroi ba organisasi Yehowa, urasoi waʼahono dödö. Iʼogunaʼö ndra talifusöda Yehowa ba wanolo yaʼo. Laʼaroʼö wamatigu ba labeʼe zoguna khögu.” Imane nasa, ”Oya nibeʼe Yehowa khögu töra moroi ba niʼandrögu, ba itugu aro wamatigu.”

10. Hadia zinangea öfalua ba wanaögö ’bade sabölö-bölö’?

¹⁰ Hadia so ”mbade sabölö-bölö” ba waʼauriu iadaʼa? Tola manö tefakao ndraʼugö börö me no alua bencana alam. Mazui, tola manö alua khöu gabula dödö si no amaedola mbade sabölö-bölö. Duma-dumania, göna ndraʼugö fökhö sabölö-bölö irege taya wanötönau ba lö öʼila hadia zinangea öfalua. Te itaria örasoi waʼaombö-aombö dödö. Hizaʼi, böi tehegö ifakiko waʼafaduhu dödöu khö Yehowa. Ondrasi Yehowa ba wangandrö soroi ba dödö. Enaʼö aro wamatiu, angerönusi hadia zi no irai ifalua khöu Yehowa ba zilalö.  (Si. 77:11, 12) Yafaduhu dödöu wa lö irai iröi ndraʼugö Yehowa sagötö faʼara.

11. Hana wa moguna taʼoʼö niwaʼö ndra sondröniaʼö?

¹¹ Hadia nasa zanolo yaʼita enaʼö tola tataögö gabula dödö? Simane niwaʼö Anel, moguna taforomaʼö woloʼö. Fahaʼö ndraʼugö ba wamaduhusi tödö niha nifaduhusi tödö Yehowa hegöi Yesu. Itaria, lö fao dödöda ba wanuturu lala nibeʼe ndra sondröniaʼö yaʼita. Hewaʼae simanö, ifahowuʼö ita Yehowa na so khöda woloʼö. No taʼila moroi ba Daromalinia hegöi ba zalua ba nono mbanuania si lö faröi wa tola telumöʼö waʼaurida na moloʼö ita. (2 Mo. 14:1-4; 2 Ng. 20:17) Na öʼangerönusi fefu daʼö, tola itugu terou dödöu woloʼö fanuturu lala nibeʼe organisasi Yehowa, he iadaʼa hegöi ba zi so miföna. (Heb. 13:17) Baero daʼö, lö ataʼu ndraʼugö na tohare wamakao sabölö-bölö ba zi lö ara tö.​—Amd. 3:25.

12. Moloʼö Luka 18:1-8, hewisa wa tola möi fanoloda wamati ba wanaögö falöʼatulö?

¹² Aboto ba dödö Yesu wa tola tetandraigö wamati ndra nifahaʼönia na alua khöra walöʼatulö. Enaʼö anau gölöra ba wanaögö daʼö, ibeʼe khöra Yesu gamaedola nisura ba mbuku Luka. Itutunö khöra sanandrösa ba waö-waö lakha mbanua si lö tebulö mangandrö faʼatulö khö zangetuʼö huku si lö atulö. Faduhu dödönia wa hasambalö itolo ia sangetuʼö huku andrö na lö iböhöli wamaʼema angandröwania. Ba gafuriata, tefondrondrongo gangandröwania. Hadia wamahaʼönia khöda? Yehowa andrö tenga Lowalangi si lö atulö. Börö daʼö imane Yesu, ”Hasambalö iʼasogö waʼatulö ba niha nifilinia Lowalangi, si lö mamöhöli feʼao khönia bongi maʼökhö.” (Baso Luka 18:1-8.) Imane nasa, ”Na tohare Nono niha, hadia isöndra wamati simane daʼö ba gulidanö?” Na alua khöda walöʼatulö, moguna taforomaʼö waʼebolo dödö hegöi faʼanau gölö. Daʼö zangoromaʼö wa no taʼokhögö wamati saro, simane niʼokhögö lakha mbanua andrö. Na aro wamatida, tola faduhu dödöda wa alio ara hasambalö itolo ita Yehowa. Moguna göi faduhu dödöda wa mofaʼabölö wangandröda. Itaria, ibeʼe Yehowa wanema li ba wangandröda ba lala si lö tadöna-döna.

13. Me alua walöʼatulö ba zi sambua ösi nomo, hewisa wa möi fanolora wangandrö?

¹³ Nehegö atö zalua khö dalifusöda ira alawe sotöi Vero si toröi ba Republik Demokratik Kongo. Samuza inötö, me tohare ndra saradadu ba wanuwö banuara, moloi Vero, foʼomonia si tenga Samaduhuʼö Yehowa, hegöi onora si 15 fakhe. Me moloi ira, so ösa ndra saradadu sanaha ba sametaʼu yaʼira wa hasambalö labunu ira. Me ibörögö meʼe Vero, iʼebuakö linia ononia ba wangandrö, ba itötöi döi Yehowa mato hauga kali enaʼö lö ataʼu mamania. Me no aefa mangandrö ia, manofu khönia gumandru zaradadu andrö, ”Haniha zamahaʼö yaʼugö wangandrö?” Imane, ”Mamagu. Iʼogunaʼö duma-duma wangandrö  nisura ba Mataiʼo 6:9-13.” Imane kumandru andrö, ”Tola mofanö ndraʼugö hegöi ira satuamö. Yaʼilumöʼö ami Yehowa Lowalangimi!”

14. Hadia zi tola manandraigö famatida, ba hadia zanolo yaʼita enaʼö anau gölöda?

¹⁴ Duma-duma andrö zamahaʼö yaʼita enaʼö lö taʼaohasi ba dödö wangandrö. Hizaʼi, hewisa na lö iʼanemaiʼö tefondrondrongo wangandröu mazui lö tebeʼe khöu wanema li ba lala sahöli-höli dödö? Simane lakha mbanua ba gamaedola Yesu, böi böhöli wangandrö. Yafaduhu dödöu wa lö irai iröi ndraʼugö Lowalangida. Hasambalö ifondrondrongo wangandröu ba ginötönia, ba lala somasi ia. Böi böhöli wangandrö eheha niʼamoniʼö khö Yehowa. (Fil. 4:13) Böi olifu ndraʼugö wa fahöna howu-howu nibeʼe Yehowa khöu ba zi lö ara tö irege olifu ndraʼugö gabula dödöu ba zilalö. Na anau gölöu wanaögö abula dödö börö wanolo moroi khö Yehowa, itugu teʼaroʼö wamatiu ba tola ötaögö gabula dödö salua ba zi so miföna.​—1 Fe. 1:6, 7.

15. Simane nitutunö ba Mataiʼo 17:19, 20, hadia gabula dödö nitaögö ndra nifahaʼö Yesu?

¹⁵ Itutunö Yesu khö ndra nifahaʼönia wa tola lataögö gabula dödö na so khöra wamati. (Baso Mataiʼo 17:19, 20.) Samuza inötö, tebai lafofanö malaʼika si lö sökhi hewaʼae no irai mofozu ira wamalua daʼö ba zilalö. Hana wa tebai lafalua daʼö? Itutunö khöra Yesu wa moguna ladouʼö nasa wamatira. Aefa daʼö, iwaʼö khöra wa tola lafawuʼa hili, yaʼia daʼö abula dödö sebua, na aro wamatira! Iadaʼa, alua göi khöda gabula dödö sebua simane faʼebua hili.

16. Hewisa wa möi fanolo Geydi wamati me alua khönia gabula dödö sebua?

¹⁶ Nehegö atö zalua khö dalifusöda ira alawe sotöi Geydi, moroi ba Guatemala. No labunu woʼomonia sotöi Edi me mangawuli ira moroi ba gangowuloa. Hewisa wa möi fanolo Geydi wamatinia ba wanaögö abula dödönia sebua andrö? Imane, ”Börö me mangandrö ndraʼo, tola utouʼö noro dödögu khö Yehowa irege urasoi waʼahono dödö. Uʼila samösa wa iʼameʼegö tödö ndraʼo Yehowa me iʼodela nösi nomogu hegöi si fahuwu khögu ba mbanua niha Keriso. Alö waʼabu dödögu börö me lö uböhöli wamalua halöwö khö Yehowa. Tola göi tobali fanolo khögu daʼö enaʼö lö talafo ubusi tödö ngaluo mahemolu. Moroi ba zalua andrö, ufahaʼö ndraʼo wa tola utaögö gofu hadia ia gabula dödö salua ba zi so miföna börö wanolo moroi khö Yehowa, Yesu, hegöi organisasinia.”

17. Hadia zinangea tafalua na göna ita abula dödö simane faʼebua hili?

¹⁷ Hadia abu dödöu börö me no mate niha niʼomasiʼöu? Beʼe ginötöu ba wombaso waö-waö Zura Niʼamoniʼö sanandrösa ba niha nisusugi, enaʼö aro wamatiu ba dötönafö fanusugi. Hadia abu dödöu börö me so nösi nomou niʼefasi moroi ba mbanua niha  Keriso? Fahaʼö ndraʼugö enaʼö faduhu dödöu wa no fondrege zi sökhi degu-tegu nibeʼe Yehowa. Ero na alua khöu gabula dödö, ogunaʼö ginötö daʼö ba wangaʼaroʼö famatiu. Tutunö fefu nösi dödöu khö Yehowa. Böi tebulö ahatö ndraʼugö khö ndra talifusöda. (Amd. 18:1) Falua gofu hadia zanolo yaʼugö ba wangokhögö faʼanau gölö, hewaʼae na itaria meʼe ndraʼugö na itörö tödöu zalua khöu. (Si. 126:5, 6) Böi böhöli weʼamöi ba gangowuloa, falua halöwö fanuriaigö hegöi fombaso Sura Niʼamoniʼö. Baero daʼö, böi tebulö öʼosambuaʼö dödöu ba howu-howu sahöli-höli dödö si no ihenaigö khöu Yehowa ba zi so miföna. Na örasoi hewisa wanolonia yaʼugö, tola itugu aro wamatiu.

18. Hadia nifaluau na öʼila wa ambö aro wamatiu?

¹⁸ Moroi ba lala wanaögöu abula dödö salua khöu ba zilalö hegöi iadaʼa, te öʼila wa ambö aro wamatiu. Hizaʼi, böi ide-ide dödöu. Ogunaʼö ginötö daʼa ba wangaʼaroʼö famatiu. Angandrö simane nifalua ndra sinenge Yesu sangumaʼö, ”Douʼö wamatima.” (Luk. 17:5) Baero daʼö, angerönusi duma-duma si no tatutunö ba artikel daʼa. Simane salua khö Miguel hegöi Yurai, törö tödöu fefu wanolo nibeʼe Yehowa. Simane Anel hegöi ono dalifusöda Vero, böi tebulö angandrö khö Yehowa, mendrua manö na alua khöu gabula dödö sebua. Ba simane Geydi, yaʼaboto ba dödöu wa tola iʼodela nösi nomou hegöi si fahuwu khöu Yehowa ba wanolo yaʼugö. Na ötemaʼö wanolo moroi khö Yehowa ba wanaögö abula dödö salua khöu iadaʼa, itugu faduhu dödöu wa hasambalö itolo ndraʼugö ba wanaögö abula dödö salua khöu ba zi so miföna.

19. Hadia nifaduhusi tödö Yesu, ba hadia göi nifaduhusiu tödö?

¹⁹ No itutunö Yesu khö ndra nifahaʼönia hadia nasa zinangea ladouʼö ba wamatira. Hizaʼi, lö irai aombö dödönia wa tola lataögö gabula dödö salua khöra ba zi so miföna börö wanolo moroi khö Yehowa. (Yoh. 14:1; 16:33) Baero daʼö, faduhu dödönia wa tola teʼorifi ngawawa sato moroi ba wamakao sabölö-bölö börö me aro wamatira. (Fam. 7:9, 14) Hadia farahu ndraʼugö ba gotaluara? Börö wanolo Yehowa, tola farahu ndraʼugö ba daʼö na öforege ba wangaʼaroʼö famatiu iadaʼa!​—Heb. 10:39.