1-2. (a) Hana wa moguna laʼodaligö Yehowa niha si bohou mangowalu? (Sinunö 37:3, 4) (b) Hadia nitutunöda dania ba artikel daʼa?

HADIA mangowaluʼö ba zi lö ara tö, mazui hadia bohou mangowalu ndraʼugö? Na yaʼia, tatu ötötöna enaʼö ösöndra waʼomuso dödö wefao ba niha niʼomasiʼöu. Sindruhu sa, tenga zi lö hadöi abula dödö ba wongambatö, ba so ösa gangetula si tohude sinangea mihalö. Lala niʼogunaʼömi ba wangasiwai abula dödö hegöi ba wangai angetula, daʼö zotatugöi hawaʼomuso dödömi ba zi so miföna. Na miʼodaligö Yehowa, tola mihalö gangetula si fao faʼatua-tua, itugu aro wongambatömi, ba mirasoi waʼohahau dödö. Hizaʼi, na lö miʼoʼö mene-mene moroi khö Yehowa, tola manö alua ngawalö gabula dödö ba wongambatömi ba lö misöndra waʼohahau dödö.​—Baso Zinunö 37:3, 4.

² Hewaʼae na mufanandrösa artikel daʼa ba niha si bohou mangowalu, mututunö göi ba daʼa gabula dödö nitaögö fefu niha si no mongambatö. Ba artikel daʼa, tatutunö dania duma-duma ndra matua hegöi ira alawe si lö faröi nisura ba Zura Niʼamoniʼö. So ösa wamahaʼö nihalöda moroi ba duma-dumara si tola tafalua ba waʼaurida hegöi ba wongambatöda. Tatutunö göi dania duma-duma niha si no mongambatö ba götöda iadaʼa.

3-4. Hadia manö gabula dödö nitaögö niha si bohou mangowalu?

³ Te so ösa niha samarou tödö zi bohou mangowalu enaʼö lafalua hadia zi toʼölö lafalua niha ba ginötö andre. Duma-dumania, te laʼandrö khöra ira satuara hegöi si fahatö khöra  enaʼö so nonora ba waʼalio. Mazui, te lawaʼö khöra ira si fahuwu khöra hegöi ösi nomora ba wowöli omo awö gama-gama tanö böʼö enaʼö lasöndra waʼohahau dödö.

⁴ Na lö mangelama zi sambua fongambatö, tola manö iböbö ira foʼömö börö gangetula si no lahalö. Na alua daʼö, te moguna laduhugö wohalöwö enaʼö tola labuʼa fefu woʼömöra andrö. Börö me oya ginötö niʼogunaʼöra ba wohalöwö, lö hadöi saʼae inötöra wamalua famahaʼö samösa, famahaʼö zi sambua omo, hegöi fanuriaigö. Baero daʼö, enaʼö itugu ebua gefe nisöndrara ba lö aheta ira ba halöwöra, tola manö moguna ladouʼö ginötöra wohalöwö irege lö hadöi saʼae inötöra weʼamöi ba gangowuloa. Lua-luania, tebai saʼae ladouʼö wangai halöwö khö Yehowa.

5. Hadia wamahaʼö si tola öhalö moroi ba zalua khö Klaus hegöi Marisa?

⁵ Oya duma-duma sangoromaʼö wa lö tasöndra waʼohahau dödö na taforege ba wolohi faʼakayo. Nehegö atö zalua khö zi sambua fongambatö sotöi Klaus hegöi Marisa. * Me awena mangowalu ira, oya ginötö niʼogunaʼöra ba wohalöwö enaʼö lasöndra waʼohahau dödö. Hizaʼi, tenga sindruhu-ndruhu ohahau dödöra. Ifaduhuʼö Klaus, ”Tola masöndra gefe sebua töra moroi ba zoguna khöma. Hizaʼi, lö hadöi ohitö dödöma ba wamati. Sindruhunia, oya sibai gabula dödöma ba fawuka gera-erama.” Te no irai göi örasoi wa lö ösöndra waʼohahau dödö na öforege wolohi faʼakayo. Na daʼö nirasoimö, böi ide-ide dödömö. Na öfahaʼö ndraʼugö ba duma-duma niha böʼö, tola tobali fanolou daʼö ba wamalua fombulöʼö. Si oföna, datafaigi hadia wamahaʼö nihalö woʼomo ira matua moroi ba duma-duma Razo Yozafati.

6. Me alua gabula dödö sebua khö Razo Yozafati, hewisa woloʼönia mene-mene si so ba Gamaedola 3:5, 6?

⁶ Yaʼami foʼomo ira matua, hadia itaria mirasoi wa talafo abua noro dödömi? Na yaʼia, tola mifahaʼö ami ba duma-duma Razo Yozafati. Börö me no tobali ia razo, iʼonorogö tödö waʼohahau dödö nono mbanuania. Hewisa wamaluania noro dödö sebua andrö? Iforege Yozafati ba wolumöʼö ono mbanuania. Iʼaroʼö wamazökhi göli ba mbanua si so ba Yehuda ba ifataro ngawawa ndra saradadu sato si töra 1.160.000 faʼato. (2 Ng. 17:12-19) Ba gafuriata, alua gabula dödö sebua khö Yozafati. So ngawawa ndra saradadu sato moroi ba Gamoni, Moabi, hegöi banua si so ba hili Zeʼira si tohare ba wanuwö yaʼia, ösi nomonia, awö nono mbanuania. (2 Ng. 20:1, 2) Hadia nifalua Yozafati? Iʼandrö wanolo ba faʼabölö moroi khö Yehowa. Tefaudu nifaluania andrö ba mene-mene nisura ba Gamaedola 3:5, 6. (Baso.) No musura wangandrö nifaʼema Yozafati si fao fangide-ngideʼö ba 2 Ngaʼötö 20:5-12. Moroi ba wangandrönia, tola taʼila wa faduhu sibai dödö Yozafati khö Yehowa. Hewisa wameʼe Yehowa fanema li ba wangandrönia?

7. Hewisa wameʼe Yehowa fanema li ba wangandrö Yozafati?

 ⁷ Me ifaʼema goroisania Yehowa khö Yozafati, iʼodela zi samösa niha Lewi sotöi Yehazieli. Imane, ”Miʼiagö nahiami zamösana, miʼosindro ba mifaigi wangorifi moroi khö Yehowa.” (2 Ng. 20:13-17) Lö toʼölö mufalua daʼö ba wasuwöta. Hewaʼae simanö, tenga moroi ba niha gulidanö goroisa andrö, hizaʼi moroi khö Yehowa. Sindruhu-ndruhu faduhu dödö Yozafati khö Lowalanginia ba ifalua simane sibai niʼoroisi Yehowa. Me möi ia awö nono mbanuania fasuwö, tenga ira saradadu si no toʼölö nibeʼenia föna, hizaʼi ira sanunö si lö fangöna. Ifalua Yehowa hadia zi no ifabuʼu khö Yozafati ba ikalaisi fefu nudu andrö.​—2 Ng. 20:18-23.

8. Hadia wamahaʼö nihalö woʼomo ira matua moroi ba duma-duma Yozafati andrö?

⁸ Yaʼami foʼomo ira matua, tola mifahaʼö ami moroi ba duma-duma Razo Yozafati. No tebeʼe khömi noro dödö ba wangaʼasogö faʼohahau dödö ba nösi nomomi. Börö daʼö, miforege ba wolumöʼö hegöi ba wombönökhi soguna khöra. Na alua khömi gabula dödö, te miwaʼö tödömi wa tola miʼasiwai samösa daʼö. Hizaʼi, böi miʼodaligö waʼabölömi samösa. Miʼandrö wanolo moroi khö Yehowa. Mifaogö khömi woʼomomi na mangandrö ami. Mifahaʼö ami ba Zura Niʼamoniʼö hegöi publikasi nifaʼanö organisasi ba wangalui fanuturu lala moroi khö Yehowa. Aefa daʼö, mifalua mene-mene si no misöndra. Tola manö lö fao dödö niha böʼö ba gangetula si no mihalö si teʼodane-dane ba Zura Niʼamoniʼö. Te lawaʼö wa bodo sibai ami wangai angetula simane daʼö. Lawaʼö tödöra wa folumöʼö fondrege zi sökhi ba nösi nomomi yaʼia daʼö kefe hegöi okhöta. Hewaʼae simanö, böi olifu ami duma-duma Yozafati. Faduhu dödönia khö Yehowa ba iforomaʼö daʼö moroi ba nifaluania. Lö iröi razo si lö faröi andrö Yehowa, ba lö göi iröi ami. (Si. 37:28; Heb. 13:5) Hadia nasa zi tola lafalua ira niha si no mongambatö enaʼö lasöndra waʼohahau dödö?

9. Hadia zi tola taʼila sanandrösa khö Yesaya samaʼeleʼö hegöi foʼomonia?

⁹ Fangai halöwö khö Yehowa zabölö tohude ba wamaigi Yesaya hegöi foʼomonia. Yesaya andrö samösa samaʼeleʼö, ba tola manö no tebeʼe göi halöwö khö woʼomonia ba wamaʼema oroisa moroi khö Yehowa, börö me mufotöi ia ’ira alawe samaʼeleʼö’. (Yes. 8:1-4) Laʼosambuaʼö dödöra ba wangai halöwö khö Yehowa. No tobali ira duma-duma si sökhi ba niha Keriso si no mongambatö ba götöda andre.

10. Na lafahaʼö ira sanandrösa ba wamaʼeleʼö Zura Niʼamoniʼö, hana wa itugu aro gangetula zi sambua fongambatö ba wameʼe fondrege zi sökhi khö Yehowa?

¹⁰ Niha si no mongambatö tola laʼoʼö duma-duma Yesaya hegöi foʼomonia na labeʼe wondrege zi sökhi ba wangai halöwö khö Yehowa. Tola itugu aro wamatira khö Yehowa na lafahaʼö ira sanandrösa ba wamaʼeleʼö Zura Niʼamoniʼö hegöi faʼaluania. * (Tit. 1:2) Tola göi laʼangerönusi hadia zinangea lafalua ba wotuhini faʼalua wamaʼeleʼö Zura Niʼamoniʼö. Duma-dumania, latuhini waʼalua zi no ifaʼeleʼö Yesu wa hasambalö teturiaigö duria somuso dödö ba zi sagörö ulidanö fatua lö tohare gamozua andrö. (Mat. 24:14) Na faduhu dödö zi sambua fongambatö wa hasambalö alua zi no ifaʼeleʼö Sura Niʼamoniʼö,  itugu aro gangetula nihalöra ba wameʼe fondrege zi sökhi khö Yehowa.

11. Hadia manö zi tola ifalua Firisikila hegöi Akila, ba hadia mbörö?

¹¹ Niha si bohou mangowalu tola lafahaʼö ira moroi ba duma-duma Wirisikila hegöi Akila. Yaʼira andrö niha Yahudi si toröi ba mbanua Roma. No larongo duria somuso dödö sanandrösa khö Yesu ba tobali ira niha Keriso. Tatu manö, ohahau dödöra toröi ba Roma. Hizaʼi, tebulö waʼaurira me iʼoroisi Kaisaro Kalaudio ba niha Yahudi maʼafefu enaʼö laröi mbanua Roma. Angeragö atö hadia lua-luania khö Wirisikila hegöi Akila. Lö tola löʼö laröi mbanua si toröi yaʼira, laʼalui nomora si bohou, ba labörögö halöwöra ba wamazökhi tendra ba mbanua si bohou. Hadia lö saʼae labeʼe wondrege zi sökhi khö Yehowa börö waʼatebulö andrö? Te no öʼila wanema linia. Me no findra Akila hegöi Firisikila ba Gorindro, latolo mbanua niha Keriso si so ba daʼö ba falulu fohalöwö ira khö Waulo ba wamarou tödö ndra talifusöda. Ba gafuriata, findra ira ba mbanua böʼö si lö ato sanuriaigö. (Hal. 18:18-21; Rom. 16:3-5) Tatu manö, larasoi waʼomuso dödö ba faʼohahau dödö ba waʼaurira!

12. Hana wa moguna latatugöi gohitö dödöra ba wamati yaʼira si no mongambatö?

¹² Niha si no mongambatö tola laʼoʼö duma-duma Wirisikila hegöi Akila na laʼofönaiʼö Wamatörö Lowalangi. Moguna mifatunöisi hadia gohitö dödö somasi ami mikhamö. Abölö sökhi mifatunöisi daʼö me fakawa ami. Na no mitatugöi gohitö dödömi ba wamati ba miforege ba wogamö yaʼia, itugu asese mirasoi wanolo moroi khö Yehowa. (Sango. 4:9, 12) Nehegö atö duma-duma Russell hegöi Elizabeth. Imane Russell, ”Me fakawa ndraʼaga, matutunö hadia gohitö dödöma ba wamati.” Imane Elizabeth, ”Mafatunöisi daʼö, enaʼö ba gafuriata lö mahalö gangetula sanaisi yaʼaga ba wogamö ohitö dödöma andrö.” Iadaʼa, no findra Russell hegöi Elizabeth ba Mikronesia ba wangai halöwö ba mbanua si lö ato sanuriaigö.

13. Moloʼö Sinunö 28:7, hadia mbuania na faduhu dödöda khö Yehowa?

 ¹³ Simane Russell hegöi Elizabeth, ato zongambatö soʼöna-önaiʼö faʼaurira enaʼö abölö oya ginötöra ba wanuriaigö. Na latatugöi ira si sambua fongambatö gohitö dödöra ba wamati ba falulu fohalöwö ira ba wogamö yaʼia, oya mbua nitemara. Hasambalö larasoi wanolo moroi khö Yehowa, itugu teʼaroʼö wamatira khönia, ba lasöndra waʼomuso dödö.​—Baso Zinunö 28:7.

14. Hewisa wangoromaʼö zinenge sotöi Fetero hegöi foʼomonia wa lafaduhusi tödö mbuʼusa li nisura ba Mataiʼo 6:25, 31-34?

¹⁴ Niha si no mongambatö tola göi lafahaʼö ira moroi ba duma-duma zinenge sotöi Fetero hegöi foʼomonia. Me no falukha Wetero khö Yesu mato önö waŵa irugi döfi, moguna ihalö gangetula si tohude Fetero. Mohalöwö ia tobali si fagai ba wombönökhi soguna ba nösi nomonia. Börö daʼö, me iʼandrö Yesu ba woloʼö yaʼia hegöi ba wondröi halöwönia, moguna iʼangeragö nösi nomonia. (Luk. 5:1-11) Ba gafuriata, ihalö gangetula wefao khö Yesu ba wanuriaigö. No ihalö gangetula si fao faʼatua-tua! Faduhu göi dödöda wa ituhini gangetula Wetero andrö foʼomonia. Itutunö Sura Niʼamoniʼö wa no irai fao khönia woʼomonia ba wanuriaigö me no aefa tesusugi Yesu. (1 Ko. 9:5) Börö me no tobali duma-duma si sökhi woʼomonia, tatu lö alawö Wetero ba wameʼe mene-mene khö ndra foʼomo ira matua hegöi foʼomo ira alawe tanö böʼö. (1 Fe. 3:1-7) Faduhu dödö Wetero hegöi foʼomonia ba mbuʼusa li Yehowa wa hasambalö ibönökhi zoguna khöra na laʼofönaiʼö Wamatörö Lowalangi.​—Baso Mataiʼo 6:25, 31-34.

15. Hadia wamahaʼö si tola öhalö moroi ba duma-duma Tiago hegöi Esther?

¹⁵ Na no mangowalu ami ba zi hauga fakhe faʼara, hewisa enaʼö lö tebulö terou dödömi ba wondrouʼö halöwömi ba wamati? Tola mifahaʼö ami moroi ba duma-duma niha böʼö si no mongambatö. Duma-dumania, tola mibaso seri artikel ”Mereka Merelakan Diri”. Daʼö nifalua Tiago hegöi Esther, sambua fongambatö moroi ba Brasil. Me no labaso artikel simane daʼö, terou dödöra wangai halöwö ba mbanua si lö ato sanuriaigö. Itutunö Tiago, ”Me mabaso hewisa wanolo Yehowa ono mbanuania ba götöda andre, omasiga göi marasoi samösa wanolo hegöi fanuturu lala moroi khö Yehowa.” Ba gafuriata, findra ira ba Paraguay, ba mangai halöwö ira ba mbanua sangogunaʼö li Portugis iʼotarai me döfi 2014. Imane Esther, ”Sambua ayati sabölö omasiga yaʼia daʼö Efeso 3:20. Sagötö mangai halöwö ndraʼaga khö Yehowa, no hauga kali marasoi samösa wa atulö niwaʼö ba ayati andrö.” Ba zura nifaʼoheʼö Waulo ba mbanua niha Keriso ba Efeso, ifaduhuʼö wa hasambalö ibeʼe khöda Yehowa zi töra moroi ba niʼandröda. Sindruhu-ndruhu wa lö tebulö ifalua daʼö Yehowa!

16. Na laʼangeragö gohitö dödöra ba wamati, haʼökhö tola laʼandrö mene-mene yaʼira si bohou mangowalu?

¹⁶ Niha si bohou mangowalu tola lafahaʼö ira moroi ba duma-duma niha böʼö si lö tebulö mangodaligö Yehowa. Te so zongambatö si no mangai halöwö safönu inötö ba zi hauga wulu fakhe faʼara. Miʼandrö khöra mene-mene na miʼangeragö gohitö dödömi ba wamati. Daʼa lala tanö böʼö si tola mifalua ba wangoromaʼö wa faduhu dödömi khö Yehowa. (Amd. 22:17, 19) Tola göi latolo zi bohou mangowalu ira satua sokubaloi ba  wotatugöi hegöi ba wogamö ohitö dödö ba wamati.

17. Hadia zalua khö Klaus hegöi Marisa, ba hadia wamahaʼö si tola tahalö moroi ba zalua khöra?

¹⁷ Te no taʼera-era ba wondrouʼö halöwöda ba wamati. Hizaʼi, itaria lö alua daʼö simane nitötönada. Nehegö atö zalua khö Klaus hegöi Marisa si no mututunö moroi yawa. Me no tölu fakhe mangowalu ira, findra ira moroi ba nomora ba tobali ira sukarelawan ba wangotomosi gödo ndraha ba Finlandia. Ba gafuriata, awena laʼila wa tebai töra önö waŵa toröi ira ba daʼö. Ba wamobörö, afatö dödöra. Hizaʼi lö ara aefa daʼö, lakaoni ira ba wamahaʼö yaʼira ba li Arab. Iadaʼa, omuso dödöra wangai halöwö ba soi böʼö ba mbanua sangogunaʼö li Arab. Imane Marisa, ”Me luo daʼö, ataʼudo wamalua halöwö si lö irai ufalua ba zilalö, ba moguna sindruhu-ndruhu faduhu dödögu khö Yehowa. Hewaʼae simanö, urasoi wa lö tebulö itolo ndraʼaga Yehowa ba lala si lö irai madöna-döna. Me no alua khöma daʼö fefu, itugu aro wamatigu khö Yehowa.” Simane niʼilada ba zalua khöra andrö, tola faduhu dödöu wa hasambalö ifahowuʼö ndraʼugö Yehowa na sindruhu-ndruhu faduhu dödöu khönia.

18. Hadia zanolo niha si no mongambatö enaʼö lö tebulö faduhu dödöra khö Yehowa?

¹⁸ Fongambatö andrö no buala moroi khö Yehowa. (Mat. 19:5, 6) Omasi ia na omuso dödö niha si no mongambatö. (Amd. 5:18) Yaʼami si bohou mangowalu, miʼangeragö hadia zomasi ami mifalua ba waʼaurimi. Hadia miforege wangoromaʼö khö Yehowa wa miʼandrö saohagölö ba mbuala si no ibeʼe? Miʼangandrö khö Yehowa. Miʼalui goi-goi Zura Niʼamoniʼö si tola manolo yaʼami. Aefa daʼö, miʼoʼö mene-mene si no ibeʼe Yehowa. Na miʼosambuaʼö dödömi ba wangai halöwö khö Yehowa, tola faduhu dödömi wa hasambalö mitema howu-howu ba mirasoi waʼomuso dödö!