1. Hadia gohitö dödö si tola tatatugöi na no alawa ndröfida?

NA NO alawa ndröfida, te aombö dödöda wa lö saʼae oya zi tola tafalua khö Yehowa. Hewaʼae na lö saʼae abölö mbotoda simane me awuyu-wuyu ita, tola taʼogunaʼö waʼatua-tuada hegöi si no irai alua khöda ba wanolo ira talifusöda si bohou ebua. Buania, tola lafalua wondrege zi sökhi ba organisasi Yehowa ba latema noro dödö sabölö oya. Imane si samösa talifusöda si no ara tobali satua sokubaloi, ”Me lö saʼae oya zi tola ufalua börö me no alawa ndröfigu, uʼandrö sibai saohagölö börö me so ndra talifusöda si bohou ebua si tola mamalua halöwö nifaluagu ba zilalö.”

2. Hadia nitutunöda ba artikel daʼa?

² Ba artikel silalö, no tatutunö hadia mbua nitema ndra talifusöda si bohou ebua na fahuwu ira khö ndra talifusöda si no alawa döfi. Ba artikel daʼa, tatutunö hewisa lala ndra talifusöda si no alawa döfi ba wangoromaʼö fangide-ngideʼö, fangandrö saohagölö, ba faʼoböwö, hegöi ba wangoromaʼö wa aboto ba dödöra hezo ndrohu-ndrohu zi tola lafalua. Bua-bua andrö zanolo yaʼira enaʼö tola falulu fohalöwö ira khö ndra talifusöda si bohou ebua ba laʼasogö mbua si sökhi ba niha fefu si so ba mbanua niha Keriso.

3. Moloʼö Filifi 2:3, 4, hadia nifalua niha Keriso sangokhögö fangide-ngideʼö, ba hewisa wa tola möi fanolonia mbua-bua andrö?

³ Enaʼö tola latolo ndra talifusöda si bohou ebua, moguna laʼokhögö wangide-ngideʼö ira talifusöda si no alawa döfi. Ba wamaigi niha sangokhögö fangide-ngideʼö, abölö tohude niha böʼö moroi khönia. (Baso Wilifi 2:3, 4.) Na laʼokhögö mbua-bua andrö ira talifusöda si no alawa döfi, aboto ba dödöra wa tola mufalua zi sambua halöwö ba lala si faböʼö-böʼö, si tefaudu ba Zura Niʼamoniʼö. Börö daʼö, lö latötöna ba niha böʼö ba woloʼö  lala si no irai lafalua ba zilalö. (Sango. 7:10) Hewaʼae na oya zi no irai alua khöra si tola latutunö khö ndra talifusöda si bohou ebua, aboto ba dödöra wa tebulö zalua ba gulidanö andre, ba tola manö moguna lafahaʼö ira wangogunaʼö lala si bohou ba wamalua si sambua halöwö.​—1 Ko. 7:31.

4. Hadia mbua-bua niforomaʼö ndra talifusöda satua samasui si fakhili ba mbua-bua niforomaʼö niha Lewi?

⁴ Aboto ba dödö ndra talifusöda si no alawa döfi sangokhögö fangide-ngideʼö wa lö saʼae oya zi tola lafalua börö me no numalö ndröfira. Duma-dumania, angeragö atö ndra talifusöda sangai halöwö tobali satua samasui. Na no saʼae 70 fakhe ndröfira, laʼandrö khöra ba wamalua halöwö tanö böʼö. Tola manö abua khöra wamalua daʼö, börö me omuso sibai dödöra ba wanolo ira talifusöda. Laʼomasiʼö sibai halöwöra andrö, ba omasi göi ira na lö tebulö lafalua halöwö daʼö. Hizaʼi, aboto ba dödöra wa abölö sökhi na ira talifusöda sawuyu-wuyu zamalua halöwö daʼö. Laforomaʼö mbua-bua si sökhi simane niforomaʼö ndra niha Lewi me götö ndraono Gizaraʼeli me föna. Na no saʼae 50 fakhe ndröfira, moguna laböhöli wohalöwö ba nose Lowalangi. Hizaʼi, lö tebulö larasoi waʼomuso dödö gofu hadia halöwö nibeʼe khöra. Owölö-ölö ira wamalua halöwö si tola lafalua ba omasi ira latolo ndra si bohou ebua. (4 Mo. 8:25, 26) Ba götöda andre, na no saʼae 70 fakhe ndröfi ndra satua samasui, lö saʼae laʼondrasi mbanua niha Keriso misa. Hewaʼae simanö, oya nifaluara ba wanolo hegöi ba wamarou tödö ndra talifusöda ba mbanua niha Keriso nifataro yaʼira.

5. Hadia wamahaʼö si tola öhalö moroi ba duma-duma nibeʼe Dan hegöi Katie?

 ⁵ Nehegö atö duma-duma dalifusöda Dan, sangai halöwö tobali satua samasui ba zi 23 fakhe faʼara. Me no 70 fakhe ndröfinia, mufataro ia hegöi foʼomonia Katie tobali perintis istimewa. Hewisa wamaluara halöwöra si bohou andrö? Itutunö Dan wa abölö oya halöwönia iadaʼa! Ifalua noro dödönia ba mbanua niha Keriso, itolo ndra talifusöda ira matua enaʼö sinangea ira tobali enoni, ba ifomaha ndra talifusöda tanö böʼö ba wamalua fanuriaigö ba mbanua sebua hegöi ba gurunga. Yaʼami ira talifusöma si no alawa döfi, he na mangai halöwö ami safönu inötö mazui löʼö, oya zi tola mifalua ba wanolo niha böʼö. Hewisa lalami ba wamalua daʼö? Mifaudugö waʼaurimi ba waʼatebulö salua, mitatugöi gohitö dödö si bohou, ba miʼosambuaʼö dödömi ba zi tola mifalua, tenga ba zi tebai mifalua.

6. Hana wa moguna taʼila hezo ndrohu-ndrohu zi tola tafalua? Beʼe duma-duma.

⁶ Na aboto ba dödöda hezo ndrohu-ndrohu zi tola tafalua, lö taforege ba wamalua si töra moroi ba zi sagu khöda. Buania, lö tebulö tarasoi waʼomuso dödö ba owölö-ölö ita wohalöwö. Niha sangila hezo ndrohu-ndrohu zi tola ifalua, tola muʼamaedolagö ia simane niha solohe moto ba wanösö hili. Enaʼö tola isösö hili andrö, moguna iʼalösi gigi motonia. Sindruhu sa, tola manö alö waʼabölö-bölö wofanö motonia andrö, hizaʼi moguna ifalua daʼö enaʼö lö tebulö mofanö motonia. Simanö göi, niha sangila hezo ndrohu-ndrohu zi tola ifalua, aboto ba dödönia hawaʼara moguna ifalua wamaudugö hegöi fombulöʼö enaʼö lö tebulö mangai halöwö ia khö Yehowa hegöi ba wanolo niha böʼö.​—Fil. 4:5.

7. Hewisa wangoromaʼö Mbarasilai wa aboto ba dödönia hezo ndrohu-ndrohu zi tola ifalua?

⁷ Nehegö atö duma-duma Mbarasilai. Me no 80 fakhe ndröfinia, iʼandrö khönia Razo Dawido ba wohalöwö ba gödo razo. Hizaʼi, lö itema halöwö daʼö Barasilai. Aboto ba dödönia wa lö saʼae oya zi tola ifalua börö me no alawa ndröfinia. Börö daʼö, ifarou dödö Dawido ba wameʼe halöwö daʼö khö Gimihami, samösa ira matua sabölö awuyu-wuyu moroi khönia. (2 Sa. 19:35-37) Simane Barasilai, omasi ndra talifusöda si no alawa döfi ba wameʼe inötö khö ndra talifusöda si bohou ebua ba wangai halöwö khö Yehowa.

8. Me omasi ia ifazökhi gosali Lowalangi, hewisa wangoromaʼö Dawido wa aboto ba dödönia hezo ndrohu-ndrohu zi tola ifalua?

⁸ No göi ibeʼe khöda duma-duma si sökhi Dawido ba wangoromaʼö wa aboto ba dödönia hezo ndrohu-ndrohu zi tola ifalua. Omasi ia ifazökhi nomo Yehowa soroi ba dödö. Hewaʼae simanö, me iʼombakhaʼö khönia Yehowa wa tebeʼe noro dödö si tohude andrö khö nononia Selomo, fao dödö Dawido ba gangetula Yehowa ba iforege wotuhini halöwö daʼö. (1 Ng. 17:4; 22:5) Lö iwaʼö tödönia wa abölö sökhi na yaʼia zamalua halöwö daʼö ha börö me ’awuyu-wuyu nasa Zelomo ba lö oya zi no itörö’. (1 Ng. 29:1) Aboto ba dödö Dawido wa tola mofozu halöwö daʼö börö howu-howu moroi khö Yehowa, tenga börö waʼalawa ndröfi mazui faʼoya zi no itörö niha sondröniaʼö halöwö daʼö. Simane Dawido, lö mamalö lafalua halöwö ba wamati ira talifusöda si no alawa döfi hewaʼae na no tebulö halöwö nifaluara iadaʼa. Ba aboto ba dödöra wa hasambalö ifahowuʼö ndra talifusöda si bohou ebua Yehowa ba wamalua halöwö si no irai lafalua ba zilalö.

9. Hewisa wangoromaʼö zi samösa talifusöda si tobali Panitia Ndraha wa aboto ba dödönia hezo ndrohu-ndrohu zi tola ifalua?

⁹ Ba götöda andre, no göi ibeʼe duma-duma si  sökhi talifusöda Shigeo ba wangoromaʼö wa aboto ba dödönia hezo ndrohu-ndrohu zi tola ifalua. Me 1976, me no 30 fakhe ndröfinia, lafataro ia tobali Panitia Ndraha. Me 2004, tobali ia sondröniaʼö Panitia Ndraha. Ba gafuriata, aboto ba dödönia wa lö saʼae ikhamö faʼabölönia ba wamalua halöwö andrö. Börö daʼö, iʼohe daʼö ba wangandrö ba iʼangeragö hadia mbuania na mufataro dalifusöda sabölö awuyu-wuyu moroi khönia tobali sondröniaʼö Panitia Ndraha. Hewaʼae na tenga yaʼia saʼae zi tobali sondröniaʼö, lö tebulö mangai halöwö dalifusöda Shigeo tobali anggota Panitia Ndraha. Hadia wamahaʼö si tola tahalö moroi ba duma-duma Mbarasilai, Razo Dawido, hegöi Shigeo? Niha sangokhögö fangide-ngideʼö ba sangila hezo ndrohu-ndrohu waʼabölöra, laʼosambuaʼö dödöra tenga ba zoʼamböta ndra talifusöda si bohou ebua, hizaʼi ba waʼabölö niʼokhögöra. Ba wamaigira, ira talifusöda si bohou ebua andrö tenga si fahindri khöra, hizaʼi si falulu fohalöwö khöra.​—Amd. 20:29.

10. Hadia lala wangera-ngera sinangea laʼokhögö ira talifusöda si no alawa döfi sanandrösa khö ndra talifusöda si bohou ebua?

¹⁰ Laʼandrö sibai saohagölö ira talifusöda si no alawa döfi ba mbuala sebua böli si no ibeʼe Yehowa, yaʼia daʼö ira talifusöda si bohou ebua. Me ibörögö alö waʼabölöra, laʼandrö sibai saohagölö börö me so ndra talifusöda si bohou ebua sangokhögö faʼabölö ba somasi mamalua halöwö ba mbanua niha Keriso.

11. Moloʼö Ruti 4:13-16, hadia howu-howu nisöndra Naʼemi börö me itema wanolo moroi khö Ruti?

¹¹ Ba Zura Niʼamoniʼö, no ibeʼe khöda duma-duma si sökhi Naʼemi ba wanemaʼö fanolo moroi ba niha sawuyu-wuyu hegöi ba wangoromaʼö fangandrö saohagölö. Ba wamobörö, me no tobali lakha mbanua Ruti, iʼandrö khö  numönönia andrö Naʼemi enaʼö mangawuli ia ba nösi nomonia. Hizaʼi, börö me no aro dödö Ruti wefao khönia ba weʼamöi ba Mbetilekhema, omasi Naʼemi ba wanemaʼö fanolo moroi khönia. (Rut. 1:7, 8, 18) Buania, oya sibai howu-howu nitema ndra alawe si darua andre! (Baso Ruti 4:13-16.) Na laʼokhögö wangide-ngideʼö ira talifusöda si no alawa döfi, omasi ira laʼoʼö duma-duma nibeʼe Naʼemi.

12. Hewisa wangoromaʼö Waulo fangandrö saohagölö?

¹² Iʼandrö saohagölö sinenge sotöi Faulo me latolo ia niha böʼö. Duma-dumania, iʼandrö saohagölö ba niha Keriso si so ba Wilifi me labeʼe zoguna khönia ba mboto. (Fil. 4:16) Iʼandrö göi saohagölö me itolo ia Timoteo. (Fil. 2:19-22) Ba iʼandrö saohagölö khö Lowalangi me so ndra talifusönia sameʼe khönia famarou dödö me muʼohe ia ba Roma tobali niha gurunga. (Hal. 28:15) Faulo andrö niha sowölö-ölö, soʼanöröi tanö mato hauga ribu kilometer ba wanuriaigö hegöi ba wangaʼaroʼö banua niha Keriso. Hewaʼae simanö, so khönia wangide-ngideʼö ba omasi ia itema wanolo moroi khö ndra talifusönia tanö böʼö.

13. Hewisa wangoromaʼö ndra talifusöda si no alawa döfi wa laʼandrö saohagölö khö ndra talifusöda si bohou ebua?

¹³ Yaʼami ira talifusöma si no alawa döfi, oya lala si tola mifalua ba wangoromaʼö fangandrö saohagölö khö ndra talifusöda si bohou ebua. Na omasi ira lafasao ami, laʼöli zoguna khömi, mazui latolo ami ba wamalua halöwö tanö böʼö, temaʼö wanolo moroi khöra si fao fangandrö saohagölö. Böi olifu ami wa fanolo nibeʼera andrö no sambua lala niʼogunaʼö Yehowa ba wangoromaʼö faʼomasinia khömi. Tola manö göi tobali si fahuwu khömi ndra talifusöda sanolo yaʼami. Mitandraigö wanolo yaʼira tobali si fahuwu khö Yehowa ba mitutunö khöra waʼomuso dödö nirasoimi me miʼila wa ladouʼö halöwöra ba wamati ira talifusöda si bohou ebua. Mibeʼe ginötömi ba wanutunö khöra si no irai alua khömi ba zilalö. Na mifalua daʼö, no miforomaʼö wa lö ”mifamalö-malö wangandrö saohagölö” khö Yehowa börö me no idöni ndra si bohou ebua ba mbanua niha Keriso.​—Kol. 3:15; Yoh. 6:44; 1 Te. 5:18.

14. Hadia dandra wa oböwö Dawido?

¹⁴ Moroi ba duma-duma Razo Dawido, tola taʼila mbua-bua tanö böʼö sinangea laforomaʼö ira talifusöda si no alawa döfi, yaʼia daʼö faʼoböwö. Ebua sibai gefe hegöi gama-gama sebua böli nibeʼe Dawido ba wotuhini halöwö famazökhi osali. (1 Ng. 22:11-16; 29:3, 4) Ifalua daʼö hewaʼae na mufotöi dania gosali andrö osali Zelomo. Na lö saʼae faʼabölöda wefao ba halöwö famazökhi tomosa, tola tatuhini halöwö daʼö na tabeʼe dolo-tolo ndrohu-ndrohu zi sagu khöda. Tola göi tatolo ndra talifusöda si bohou ebua na tatutunö khöra zi no irai alua khöda ba zi hauga fakhe faʼara.

15. Hadia mbuala sebua böli nibeʼe Waulo khö Dimoteo?

¹⁵ Nehegö atö duma-duma waʼoböwö niforomaʼö zinenge sotöi Faulo. Iʼandrö khö Dimoteo wefao khönia ba halöwö utusan injil, ba oböwö sibai ia ba wamahaʼö ira matua sawuyu-wuyu andrö sanandrösa ba lala niʼogunaʼönia ba wanuriaigö hegöi ba wamahaʼö. (Hal. 16:1-3) Börö wamomaha moroi khö Waulo, tola mofozu Dimoteo ba wanuriaigö turia somuso dödö. (1 Ko. 4:17) Ba gafuriata, iʼogunaʼö wamahaʼö si no itema andrö Timoteo ba wamomaha niha böʼö.

16. Hana wa ifomaha niha böʼö talifusöda Shigeo?

¹⁶ Omasi ndra talifusöda si no alawa döfi ba wamahaʼö ira si bohou ebua ba wamalua halöwö si no irai lafalua ba zilalö. Lö ataʼu ira na lö hadöi saʼae si tola lafalua ba mbanua niha Keriso. Nehegö atö duma-duma dalifusöda Shigeo si no mututunö moroi yawa. Barö zi hauga  fakhe andre, ibeʼe wamomaha khö ndra Panitia Ndraha sabölö awuyu-wuyu moroi khönia. Ifalua daʼö ba wotuhini halöwö fanuriaigö ba soi nifataro yaʼia. Buania, me lö saʼae faʼabölönia wamalua halöwö tobali sondröniaʼö, tola tebeʼe halöwö daʼö khö dalifusöda si no ifomaha. No mangai halöwö dalifusöda Shigeo tobali Panitia Ndraha ba zi töra 45 fakhe faʼara, ba lö tebulö iʼogunaʼö hadia zi no ifahaʼö yaʼia ba wanolo ira talifusöda si bohou ebua. No sambua howu-howu ba gotalua nono mbanua Lowalangi na so ndra talifusöda somasi mamahaʼö niha böʼö simane Shigeo!

17. Simane nitutunö ba Luka 6:38, hadia zi tola labeʼe ba niha böʼö ira talifusöda si no alawa döfi?

¹⁷ Yaʼami ira talifusöma si no alawa döfi, no miforomaʼö wa lala waʼauri sabölö sökhi yaʼia daʼö ba wamosumange Yehowa si fao famati ba faʼalöfaröi. Moroi ba duma-duma nibeʼemi, no mifaduhuʼö ba dödöma wa moguna mafahaʼö ndraʼaga ba goi-goi Zura Niʼamoniʼö ba mafalua ia ba waʼaurima. No miʼila hewisa wamalua halöwö ba wamati ba zilalö. Hizaʼi, omasi ami mifaudugö lala niʼogunaʼömi ba waʼatebulö salua. Yaʼami ira talifusöma si no alawa döfi sawena tebayagö idanö, oya göi zi tola mifalua ba wanolo niha böʼö. Tola mitutunö waʼomuso dödö nirasoimi me ibörögö mifahaʼö ami sanandrösa khö Yehowa. Tatu omuso dödö ndra talifusöda si bohou ebua ba wamondrondrongo si no irai alua khömi hegöi famahaʼö si no mitema. Na ’lö tebulö mibeʼe ba niha’ wamahaʼö nihalömi moroi ba zi no irai alua khömi, hasambalö fahöna howu-howu nitemami moroi khö Yehowa.​—Baso Luka 6:38.

18. Hadia mbua nitema ndra talifusöda si no alawa döfi hegöi si bohou ebua na falulu fohalöwö ira khö nawöra?

¹⁸ Yaʼami ira talifusöma si no alawa döfi niʼomasiʼöma, na itugu fahuwu ami khö ndra talifusöda si bohou ebua, tola faoma mitolo nawömi. (Rom. 1:12) So khömi waʼatua-tua ba oya zi no mitörö ba waʼaurimi, tenga simane ira talifusöda si bohou ebua. Hizaʼi, abölö ira moroi khömi. Na falulu fohalöwö zi no alawa döfi khö ndra si bohou ebua simane si fahuwu, no lafolakhömi Namada sebua faʼomasi si so ba zorugo, ba tobali ira howu-howu ba mbanua niha Keriso.