1-2. (a) Moloʼö Amaedola 16:31, hewisa zinangeania wamaigida ira talifusöda si no alawa döfi? (b) Hadia manö wanofu-nofu niʼaluida fanema li ba artikel daʼa?

BA ZI sambua taman ba Arkansas, Amerika Serikat, tola tasöndra berlian tou ba danö. Hizaʼi, börö me lö mudekha berlian andrö, hulö gara si toʼölö ia ba wamaigida. Lua-luania, me laʼila berlian andrö ira niha sato, lö aboto ba dödöra wa no kara sebua böli daʼö ba maʼifu na adöni dödöra.

² Simane berlian andrö, no sebua böli ndra talifusöda si no alawa döfi. Itutunö Taromali Lowalangi wa hulö dakula si sökhi huwara andrö. (Baso Gamaedola 16:31; 20:29) Hizaʼi, tola manö lö taʼameʼege tödö ira. Sindruhunia, na tafahaʼö ita khöra, tola tasöndra zabölö ebua böli moroi ba berlian. Ba artikel daʼa, so tölu wanofu niʼaluida fanema li: Hana wa no sebua böli ndra talifusöda si no alawa döfi ba wamaigi Yehowa? Hadia noro dödö nibeʼe Yehowa khöra ba organisasinia? Hadia zinangea tafalua enaʼö tola tatema mbua moroi ba duma-dumara?

3. Simane nitutunö ba Zinunö 92:12-15, hana wa no sebua böli ndra talifusöda si no alawa döfi ba wamaigi Yehowa?

³ Ba wamaigi Yehowa, no sebua böli ndra talifusöda si no alawa döfi. Aboto ba dödönia haniha ira zindruhunia, ba iʼameʼegö tödö mbua-buara si sökhi. Omuso göi dödönia na latutunö khö ndra si bohou ebua waʼaboto ba dödö nisöndrara sagötö mangai halöwö ira khö Yehowa si fao faʼalöfaröi. (Yob. 12:12; Amd. 1:1-4) Iʼameʼegö tödö göi waʼanau gölöra Yehowa. (Mal. 3:16) Hewaʼae oya gabula dödöra, lö tebulö aro wamatira khönia. Iʼotarai me awena lafahaʼö ira ba zindruhu, itugu aro wanötönara  sanandrösa ba zi so miföna. Iʼomasiʼö ira Yehowa börö me lö tebulö laturiaigö döinia irugi ’ba waʼatuara’.—Baso Zinunö 92:12-15.

4. Hadia manö zi tobali fondrara dödö khö ndra talifusöda si no alawa döfi?

⁴ Na no numalö ndröfimö, yafaduhu dödöu wa lö olifu Yehowa halöwö nifaluau ba zilalö. (Heb. 6:10) Omuso dödönia khöu börö me owölö-ölö ndraʼugö ba wotuhini halöwö fanuriaigö. Anau gölöu ba wanaögö ngawalö gabula dödö sabua. Öʼoʼö goi-goi Zura Niʼamoniʼö, öfalua noro dödö si tohude nibeʼe khöu ba organisasi Yehowa, ba öfomaha göi niha böʼö. Öfaudugö göi waʼaurimö ba wombulöʼö nifalua organisasi Yehowa. Ötuhini ba öfarou dödö ndra talifusöda sangai halöwö safönu inötö. Iʼomasiʼö ndraʼugö Yehowa börö waʼalöfaröimö khönia. No ifabuʼu wa ”lö iröi ndra enoninia si lö faröi”! (Si. 37:28) Ifaduhuʼö göi ba dödöu wa ’hasambalö irorogö ndraʼugö irege afusi mbu högömö’. (Yes. 46:4) Börö daʼö, böi irai so ba dödöu wa lö moguna ndraʼugö ba organisasi Yehowa ha börö me no numalö ndröfimö. Sindruhunia, no sebua böli ndraʼugö!

5. Hadia zinangea latörö tödöra ira talifusöda si no alawa döfi?

⁵ Oya zi tola lafalua ira talifusöda si no alawa döfi ba organisasi Yehowa. Hewaʼae na lö saʼae abölö ira simane ba zilalö, oya zi no latörö ba waʼaurira. Börö daʼö, lö tebulö ibeʼe khöra Yehowa ngawalö noro dödö, simane niʼilada dania moroi ba duma-duma nono mbanua Yehowa me götö föna hegöi ba götöda iadaʼa.

6-7. Beʼe duma-duma moroi ba Zura Niʼamoniʼö sanandrösa ba niha si no alawa döfi sanema howu-howu börö me lö faröi ira khö Yehowa.

⁶ Ba Zura Niʼamoniʼö, tola tasöndra duma-duma nono mbanua Yehowa si lö faröi ba wamosumange yaʼia irugi ba waʼatuara. Duma-dumania, me mato 80 fakhe ndröfi Moze, ibörögö mangai halöwö ia khö Yehowa tobali samaʼeleʼö hegöi sondröniaʼö iraono Gizaraʼeli. Me töra 90 fakhe ndröfi Danieli, lö tebulö iʼogunaʼö ia Yehowa tobali samaʼeleʼö khönia. Me töra 90 fakhe ndröfi zinenge sotöi Yohane, iʼogunaʼö ia Yehowa ba wanura buku Wamaʼeleʼö.

 ⁷ Ba Zura Niʼamoniʼö, ato nono mbanua Yehowa si lö faröi niʼolifugöda börö me lö tehöngö ira. Hewaʼae simanö, iʼameʼegö tödö ira Yehowa ba ifahowuʼö waʼalöfaröira. Duma-dumania Simeoni, nifotöi ”niha satulö ba sangataʼufi Lowalangi”. (Luk. 2:22, 25-35) Lö oya nitutunö Zura Niʼamoniʼö sanandrösa khönia, hizaʼi iʼila Yehowa haniha ia zindruhunia. Börö daʼö, ibeʼe khönia döi si sökhi ba wamalukhaisi Yesu me ono sawuyu hegöi ba wamaʼeleʼö hadia zalua khö nono andrö awö ninania. Angeragö göi duma-duma zamaʼeleʼö sotöi Ana, si no tobali lakha mbanua. Hewaʼae na no 84 fakhe ndröfinia, ”lö iböhöli weʼamöi ba gosali”. Börö me owölö-ölö ia weʼamöi ba gangowuloa, ifahowuʼö ia Yehowa irege tola falukha ia khö Yesu me ono sawuyu. No sebua böli Zimeoni hegöi Ana ba wamaigi Yehowa.—Luk. 2:36-38.

8-9. Hadia nifalua zi samösa talifusöda ira alawe ba organisasi Yehowa me no tobali ia lakha mbanua?

⁸ Ba götöda iadaʼa, ato ndra talifusöda si no alawa döfi si tobali duma-duma si sökhi khöda. Nehegö atö zalua khö zi samösa talifusöda ira alawe sotöi Lois Didur. Awena 21 fakhe ndröfinia me ibörögö mangai halöwö ia tobali perintis istimewa ba Kanada. Ba gafuriata, fao ia khö woʼomonia John ba halöwö famasui ba zi hauga fakhe faʼara. Aefa daʼö, mangai halöwö ira ba Mbetieli Kanada ba zi töra 20 fakhe faʼara. Me 58 fakhe ndröfi Lois, lakaoni ira ba wangai halöwö ba Ukraina. Hadia nifaluara? Hadia so ba dödöra wangumaʼö wa no numalö ndröfira ba wangai halöwö ba soi böʼö? Löʼö. Latema halöwö andrö, ba mufataro John tobali Panitia Ndraha ba soi daʼö. Me no mate John fitu fakhe aefa daʼö, ihalö gangetula Lois enaʼö lö tebulö mangai halöwö ia ba soi andrö. Iadaʼa, 81 fakhe ndröfi Lois. Lö faröi ia ba wangai halöwö khö Yehowa ba Mbetieli Ukraina, ba laʼomasiʼö ia ira talifusöda si so ba daʼö.

⁹ Ato ndra talifusöda ira alawe si no tobali lakha mbanua simane Lois sorasoi wa ambö laʼameʼegö tödö ira iadaʼa, tenga simane me auri nasa woʼomora. Hewaʼae simanö, lö tebulö wa no sebua böli ndra talifusöda andrö. Iʼomasiʼö ira Yehowa börö me lö tebulö latuhini woʼomora ba zi hauga fakhe faʼara, ba lö faröi ira irugi iadaʼa ba wamosumange yaʼia. (1 Ti. 5:3) Baero daʼö, lafarou göi dödö ndra talifusöda si bohou ebua.

10. Hadia duma-duma si sökhi niforomaʼö Tony?

¹⁰ No sebua böli ndra talifusöda si no alawa döfi si toröi ba panti jompo mazui nirorogö ba nomo. Nehegö atö zalua khö zi samösa talifusöda ira matua sotöi Tony, si toröi ba panti jompo. Me baŵa si Walu 1942, tebayagö ia idanö ba Pennsylvania, Amerika Serikat, me 20 fakhe ndröfinia. Lö ara me no tebayagö ia idanö, laʼandrö khönia wefao ba dinas militer. Börö me itimbagö daʼö, no irai labeʼe ia ba gurunga ba zi dua fakhe a matonga faʼara. Fao ira  woʼomonia Hilda ba wangebuaʼö iraonora si darua ba zindruhu. Ba zi hauga fakhe, mangai halöwö ia ba zi tölu banua niha Keriso tobali pengawas umum (mufotöi daʼö iadaʼa sondröniaʼö boto zatua sokubaloi). No göi ira tobali ia sondröniaʼö angowuloa ba zi sambua wilayah. Idöniaʼö wamahaʼö ba Zura Niʼamoniʼö hegöi angowuloa nifalua ba gurunga. Iadaʼa, no 98 fakhe ndröfinia, ba lö iböhöli wangai halöwö khö Yehowa. Lö tebulö ibeʼe wondrege zi sökhi khö Yehowa ba falulu fohalöwö ia khö ndra talifusöda ba mbanua niha Keriso si farahu yaʼia.

11. Hewisa lalada ba wangoromaʼö wa taʼameʼegö tödö ndra talifusöda si no alawa döfi?

¹¹ Hewisa wangoromaʼöda wa taʼameʼegö tödö ndra talifusöda si no alawa döfi si toröi ba panti jompo mazui nirorogö ba nomo? Na tola, labeʼe khöra wanolo ira satua sokubaloi, duma-dumania ba weʼamöi manuriaigö, ba wangondrasi angowuloa, mazui ba wamondrondrongo waö-waö halöwö nifalua ba daʼö. Tola taforomaʼö wa taʼameʼegö tödö ira, na möi ita tafalukhaisi ira mazui fahuhuo ita khöra ba video call. Moguna göi taʼameʼegö tödö sibai ndra talifusöda si no alawa döfi, si toröi ba nahia si fandröndröu moroi ba mbanua niha Keriso si farahu yaʼira. Böi taʼolifugö ira. Te so ösa moroi ba gotaluara zorasoi wa abua khöra mazui alawö ira wanutunö si no irai alua ba waʼaurira. Hizaʼi, oya mbua nitemada na tabeʼe ginötöda ba wanofu-nofu khöra hegöi ba wamondrondrongo faʼomuso dödö si no irai larasoi ba organisasi Yehowa.

12. Hadia zi tola tasöndra ba mbanua niha Keriso si farahu yaʼita?

¹² Ba mbanua niha Keriso si farahu yaʼita, te so ndra talifusöda si no alawa döfi si tola tobali duma-duma si sökhi khöda. Hizaʼi, awena taʼila daʼö na tabeʼe ginötöda fariawö khöra. Nehegö atö zalua khö zi samösa talifusöda ira alawe sotöi Harriette. Ba zi hauga wulu fakhe faʼara, mangai halöwö ia khö Yehowa ba mbanua niha Keriso si farahu yaʼia ba New Jersey, Amerika Serikat. Ba gafuriata, findra ia ba nomo nononia alawe. Ba mbanua niha Keriso si bohou, tola laʼila ira talifusöda si so ba daʼö wa no sebua böli ia börö me no laforege enaʼö aboto ba dödöra haniha ia. Ba wamarou tödö ndra talifusöda, itutunö hewisa wamalua halöwö fanuriaigö me awena ifahaʼö ia ba zindruhu te me döfi 1925. Me luo daʼö, lö tebulö iʼohe mbundra nifö ero na möi ia manuriaigö börö me iʼila wa tola manö laraʼu ba labeʼe ia ba gurunga ba zi lö idöna-döna. Me döfi 1933, dua kali labeʼe ia ba gurunga ba zi samigu faʼara. Lö tebulö ituhini ia foʼomonia si tenga Samaduhuʼö Yehowa. Me so ia ba gurunga, foʼomonia zondrorogö iraonora si datölu. Tatu manö, sinangea na taʼameʼegö tödö ndra talifusöda si no alawa döfi simane Hariette!

13. Hana wa no sebua böli ndra talifusöda si no alawa döfi ba organisasi Yehowa?

¹³ No sebua böli ndra talifusöda si no alawa döfi ba organisasi Yehowa. No laʼila samösa hewisa wamahowuʼö Yehowa yaʼira hegöi organisasinia ba lala si faböʼö-böʼö. Oya göi wamahaʼö si tola lahalö moroi ba zala si no irai lafalua. Yaʼaboto ba dödöu wa yaʼira andrö ”umbu waʼatua-tua”. Börö daʼö, halö wamahaʼö moroi ba waö-waö waʼaurira. (Amd. 18:4) Na öbeʼe ginötöu enaʼö itugu aboto ba dödöu haniha ira, itugu aro wamatiu ba oya wamahaʼö si tola öhalö!

14. Moloʼö 5 Moze 32:7, hadia zinangea lafalua ira si bohou ebua?

¹⁴ Moguna öbörögö wahuhuosa khö ndra talifusöda si no alawa döfi. (Baso 5 Moze 32:7.) Sindruhu sa, tola manö ambö laʼila-ila niha, no ladaʼi-daʼi wofanö, ba no ide-ide lira na fahuhuo. Hewaʼae simanö, omasi ira ba  wamalua halöwö ba wamati, ba no laʼokhögö ”döi si sökhi” föna Yehowa. (Sango. 7:1) Törö tödöu hadia mbörö wa no sebua böli ira ba wamaiginia. Böi tebulö fosumange ira. Oʼö duma-duma Gelisa, samorege enaʼö lö tebulö fao ia khö Gelia. Ba ngaluo safuria wefaora, tölu kali imane Elisa, ”Faya wa no sauri ndraʼugö na fabalido khöu.”—2 Ra. 2:2, 4, 6.

15. Hadia manö zi tola tasofu khö ndra talifusöda si no alawa döfi?

¹⁵ No öforomaʼö wa öʼameʼegö tödö ndra talifusöda si no alawa döfi na manofu-nofu ndraʼugö khöra. (Amd. 1:5; 20:5; 1 Ti. 5:1, 2) Tola öbeʼe khöra wanofu-nofu simane daʼa: ”Me awuyu-wuyu ndraʼugö, hadia zamaduhuʼö ba dödöu wa no ösöndra zindruhu?” ”Hadia zi no irai alua khöu sangahatöʼö yaʼugö khö Yehowa?” ”Hadia zanolo yaʼugö enaʼö lö tebulö omuso dödöu ba wangai halöwö khö Yehowa?” (1 Ti. 6:6-8) Aefa daʼö, haogö wamondrondrongo na latutunö khöu hadia zi no irai alua ba waʼaurira.

16. Hadia mbuania khö ndra talifusöda si no alawa döfi hegöi khö ndra talifusöda si bohou ebua na faoma fahuhuo ira khö nawöra?

¹⁶ Yaʼami ira talifusöma si bohou ebua, na fahuhuo ami khö ndra talifusöda si no alawa döfi, tola faoma tefarou dödömi. (Rom. 1:12) Itugu faduhu dödömi wa irorogö nono mbanuania si lö faröi Yehowa, ba larasoi göi ira talifusöda si no alawa döfi wa muʼomasiʼö ira. Hasambalö omuso dödöra ba wanutunö hewisa wamahowuʼö Yehowa yaʼira.

17. Hana wa itugu molakhömi ndra talifusöda si no alawa döfi ba wamaigi Yehowa?

¹⁷ Si toʼölönia, taya waʼasökhi zikhala zi samösa niha na no numalö ndröfinia. Hizaʼi ba wamaigi Yehowa, itugu numalö ginötö, itugu molakhömi nono mbanuania si lö faröi. (1 Te. 1:2, 3) Hadia mbörö? Börö me omasi ira latema wamomaha hegöi fanolo moroi ba geheha niʼamoniʼö ba wondrouʼö bua-bua si sökhi. Na itugu aboto ba dödöda ndra talifusöda si no alawa döfi, taʼameʼegö tödö ira, ba tafahaʼö ita khöra, tola itugu taʼila wa no sebua böli ira!

18. Hadia nitutunöda ba artikel aefa daʼa?

¹⁸ Tola itugu aro mbanua niha Keriso na laʼameʼegö tödö ndra talifusöda si no alawa döfi ira si bohou ebua. Hizaʼi, tenga ha daʼö manö. Moguna göi laʼameʼegö tödö ndra si bohou ebua ira talifusöda si no alawa döfi. Ba artikel aefa daʼa, tatutunö hewisa wangoromaʼö ndra talifusöda si no alawa döfi wa laʼameʼegö tödö ndra si bohou ebua ba mbanua niha Keriso.