1-2. Hadia ziheu nifaʼeleʼö Hagaʼi salua ba götöda andre?

”HA BARÖ zi hauga menit, ahori adudu fefu nahia wogale hegöi tomosa sagatua.” ”Ataʼu sibai fefu niha . . . Ato zangumaʼö wa ha mato dua menit alua daʼö. Hizaʼi ba worasoigu, hulö ara sibai waʼaluania.” Daʼö wehede nifaʼema niha me no aefa alua ndruru danö ba Nepal me döfi 2015. Na no irai alua khöu zangaʼasogö faʼataʼu simane daʼö, tola manö tebai öʼolifugö zalua andrö.

² Ba götöda andre, no alua ziheu si faböʼö moroi ba ziheu tanö böʼö, ba alua ia tenga ha ba zi sambua banua mazui soi. Barö zi hauga wulu fakhe andre, no ifaheu fefu soi si so ba gulidanö Yehowa. No ifaʼeleʼö zalua andrö Hagaʼi samaʼeleʼö. Imane, ”Daʼa niwaʼö Yehowa samatörö saradadu zorugo: ’Ba zi lö ara tö, ufuli ufaheu sakali tö mbanua si yawa, ulidanö, asi awö danö.’”​—Hag. 2:6.

3. Hadia gamaehuta ziheu nitutunö Hagaʼi ba ndruru danö salua ba gulidanö?

³ Me iwaʼö Hagaʼi wa hasambalö ifaheu ngawalö soi Yehowa, tenga daʼö geluahania wa sindruhu-ndruhu alua ndruru danö ba iʼasogö waʼatekiko. Sindruhunia, so mbua si sökhi niʼasogönia. Imane Yehowa, ”Ufaheu dania ngawalö soi, ba möi bakha ba nomo andre fefu gama-gama sebua böli moroi ba ngawalö soi. Ufönui nomo daʼa lakhömigu.” (Hag. 2:7) Hewisa waʼalua wamaʼeleʼö daʼa me götö Hagaʼi? Hewisa göi waʼaluania ba götöda iadaʼa? Ba artikel daʼa, tatutunö wanema li moroi ba wanofu-nofu daʼö, ba tatutunö göi hewisa enaʼö tola fao ita ba wamaheu ngawalö soi ba götöda andre.

4. Hana wa ifatenge Hagaʼi Yehowa?

⁴ No ibeʼe Yehowa khö Hagaʼi halöwö si tohude sinangea ifalua. Nehegö atö waö-waö salua me götö daʼö. Me mangawuli ndra niha Yahudi moroi ba Mbabilona numalö ba Yeruzalema me döfi 537 SM, te no fao khöra Hagaʼi. Me no ofeta ndra samosumange Yehowa si lö faröi andrö ba Yeruzalema, iʼanemaiʼö labörögö wamazökhi omo Lowalangi, mazui osali. (Esr. 3:8, 10) Hizaʼi, lö ara aefa daʼö, alua khöra wangabu dödö. Börö me so wanaisi moroi ba niha si so ba zi fasuira, ide-ide dödöra ba laböhöli wamazökhi tomosa andrö. (Esr. 4:4; Hag. 1:1, 2) Börö daʼö, me döfi 520 SM, ifatenge Hagaʼi Yehowa ba wanolo niha Yahudi enaʼö ifuli mohiʼa dödöra ba wamazökhi osali. *​—Esr. 6:14, 15.

5. Hana wa tefarou sibai dödö nono mbanua Yehowa ba duria nifaʼema Hagaʼi?

⁵ Ifaʼema wamarou dödö Hagaʼi ba niha Yahudi enaʼö teʼaroʼö wamatira khö Yehowa. Si fao faʼabarani, imane ba niha Yahudi sorasoi faʼide-ide dödö, ”Imane Yehowa, ’He yaʼami ono mbanua soi daʼa, miʼaroʼö dödömi ba miʼohalöwö. Börö me fao ndraʼo khömi,’ iwaʼö Yehowa samatörö saradadu zorugo.” (Hag. 2:4) Tatu tefarou sibai dödöra me larongo ngawua wehede ”Yehowa samatörö saradadu zorugo”. Ato sibai ndra malaʼika si so barö wamatörö Yehowa. Börö daʼö, moguna laʼodaligö ia ira niha Yahudi enaʼö mofozu ira ba wamalua halöwö nibeʼenia.

6. Hadia zalua na no ifaheu ngawalö soi Yehowa simane nifaʼeleʼö Hagaʼi?

⁶ Ifatenge Hagaʼi Yehowa ba wangombakhaʼö ba niha Yahudi wa hasambalö ifaheu ngawalö soi. Famaʼeleʼö andre zi tobali famarou dödö ba niha Yahudi sorasoi faʼide-ide dödö ba samöhöli ba wamazökhi osali. Tefaduhuʼö ba dödöra wa hasambalö ifaheu soi fondrege zabölö me götö daʼö Yehowa, yaʼia daʼö Feresia. Hadia zalua na no ifalua daʼö Yehowa? Si oföna, hasambalö mofozu nono mbanua Lowalangi ba wangasiwai halöwö famazökhi osali. Aefa daʼö, hasambalö fao khöra niha moroi ba soi böʼö ba wamosumange Yehowa ba gosali sawena mufuli mufazökhi. Tatu tefarou sibai dödö nono mbanua Yehowa me larongo duria andrö!​—Zak. 8:9.

7. Hadia halöwö nifaluada ba götöda andre? Tutunö.

⁷ Hewisa waʼalua wamaʼeleʼö Hagaʼi ba götöda iadaʼa? Sakali tö, ifuli ifaheu ngawalö soi Yehowa, ba tola fao ita ba wamalua halöwö daʼö. Angeragö atö: Me döfi 1914, no ifataro Yesu Keriso Yehowa tobali Razo ba Wamatörönia si so ba zorugo. (Si. 2:6) Ba ngaluo daʼö, tefasindro Wamatörö Lowalangi. No turia si lö sökhi daʼö ba wamaigi ndra samatörö si so ba gulidanö. Me luo daʼö göi, no teʼasiwai ”ginötö si no mutatugöi ba soi böʼö” wa lö hadöi samatörö si tobali salahi Yehowa ba gulidanö. (Luk. 21:24) Börö daʼö, iʼotarai me döfi 1919, lafatunö ba niha fefu ira Samaduhuʼö Yehowa wa ha Famatörö Lowalangi zameʼe fanötöna ba niha gulidanö. Tefaheu ngawalö soi börö me taturiaigö ’duria somuso dödö sanandrösa ba Wamatörö Lowalangi’.​—Mat. 24:14.

8. Moloʼö Sinunö 2:1-3, hadia nifalua niha sato moroi ba ngawalö soi me larongo duria nifaʼemada?

⁸ Hadia nifalua niha me larongo duria nifaʼemada? Ato ba gotaluara zanimbagö. (Baso Zinunö 2:1-3.) Lö ahono-hono dödö niha moroi ba ngawalö soi. Ba wamaigira, turia nifaʼemada sanandrösa ba Wamatörö  Lowalangi andrö tenga ”turia somuso dödö”. So ösa zamatörö si lö manehegö halöwö fanuriaigö nifaluada! Lö omasi ira latemaʼö Zamatörö si no ifataro Yehowa. Hewaʼae lawaʼö wa lafosumange Lowalangi, lö omasi ira na aheta khöra kuaso si no laʼokhögö. Börö daʼö, simane ira samatörö me götö Yesu, laforege ira samatörö ba götöda andre ba wolawa Samatörö si no ibayoini Yehowa. Daʼö mbörö wa lasuwö ndra soloʼö khönia si lö faröi.​—Hal. 4:25-28.

9. Hadia nifalua Yehowa ba niha sanimbagö turia nifaʼemada?

⁹ Hadia nifalua Yehowa ba niha sanimbagö turia nifaʼemada? Ibeʼe khöda wanema li Sinunö 2:10-12, ”Börö daʼö miʼatua-tuaʼö ami, yaʼami razo-razo; ba mitema degu-tegu, yaʼami sanguhuku ba gulidanö. Mifosumange Yehowa si fao faʼataʼu, misuno ia si fao faʼahöli-höli dödö. Mifosumange nono andrö faböi mofönu Lowalangi ba lö tehori ami, börö me alio sibai wönunia si hola-hola. Omuso dödö niha solumöʼö yaʼira khönia.” Si fao faʼasökhi dödö, ibeʼe ginötö ba niha si faʼudu khöda Yehowa ba wamalalini era-erara hegöi ba wanemaʼö Famatörö Lowalangi. Hizaʼi, lö ara tö ahori ginötö nibeʼenia. No so ita iadaʼa ba ”ngaluo safuria” ba lö ara tö tohare gamozua götö daʼa. (2 Ti. 3:1; Yes. 61:2) Börö daʼö, tebai laradö-radö ira niha sato ba wangokhögö faʼaboto ba dödö sanandrösa ba zindruhu hegöi ba wangai angetula ba wamosumange Yehowa.

10. Moloʼö Hagaʼi 2:7-9, hadia mbua si sökhi me no mufaheu ngawalö soi?

¹⁰ Sagötö alua nifaʼeleʼö Hagaʼi sanandrösa ba wamaheu ngawalö soi, so ösa niha somasi manemaʼö. Itutunö Hagaʼi wa börö me no mufaheu ngawalö soi, möi ”gama-gama sebua böli [niha satulö tödö] moroi ba ngawalö soi” ba wamosumange Yehowa. * (Baso Hagaʼi 2:7-9.) Ifaʼeleʼö göi Yesaya hegöi Mikha wa daʼö dania zalua ”ba ngaluo safuria”.​—Yes. 2:2-4; Mi. 4:1, 2.

11. Hadia nifalua zi samösa talifusöda ira matua me awena sibai irongo duria sanandrösa ba Wamatörö Lowalangi?

 ¹¹ Nehegö atö hadia zalua khö dalifusöda ira matua sotöi Ken, sangai halöwö iadaʼa ba gödo sebua, me lafaʼema khönia duria samaheu ulidanö. Itörö nasa tödönia hewisa sibai me awena irongo duria sanandrösa ba Wamatörö Lowalangi, te mato 40 fakhe silalö. Imane Ken, ”Me awena sibai urongo zindruhu moroi ba Daromali Lowalangi, uʼandrö sibai saohagölö me tola uʼila wa no so ita iadaʼa ba ngaluo safuria. Aboto ba dödögu wa moguna uheta ndraʼo moroi ba gulidanö si tebai muʼodaligö andre ba uʼoʼawögö Yehowa, enaʼö tola omuso dödönia khögu ba uʼokhögö waʼauri si lö aetu. Ulau mangandrö khö Yehowa ba iʼanemaiʼö ufalua hadia zi no ufahaʼö yaʼo. Lö saʼae utuhini gulidanö daʼa, ba iʼanemaiʼö ulumöʼö ndraʼo ba Wamatörö Lowalangi si tebai mufaheu.”

12. Sagötö ngaluo safuria andre, hewisa wa tola möi gama-gama sebua böli moroi ba ngawalö soi ba gosali ba wamati khö Yehowa?

¹² Sagötö ngaluo safuria, itugu ato niha somasi mamosumange Yehowa. Me döfi 1914, ha mato hauga ribu waʼatoda. Hizaʼi iadaʼa, no töra walu zuta waʼato ndra samosumange Yehowa, ba so göi hauga zuta niha tanö böʼö si fao khöda ba Wanörö Tödö Faʼamate Yesu. Daʼa zangoromaʼö wa no ifahowuʼö nono mbanuania Yehowa. Sindruhu-ndruhu wa no möi ”gama-gama sebua böli moroi ba ngawalö soi” ba golayama gosali ba wamati khö Yehowa, yaʼia daʼö famosumange satulö si no ifaʼanö. Baero daʼö, tefolakhömi göi döi Yehowa me laforege ira samosumange yaʼia ba wamohouni amuatara.​—Ef. 4:22-24.

13. Hadia wamaʼeleʼö tanö böʼö sangoromaʼö wa hasambalö itugu tedou dania waʼato zamosumange Yehowa? (Faigi gambara ba guli majalah.)

¹³ Ba Yesaya faza 60, no göi mufaʼeleʼö wa hasambalö itugu tedou dania waʼato zamosumange Yehowa. Duma-dumania, imane ba ayati 22, ”Fondrege zi lö ato tobali saribu, ba fondrege zide-ide tobali soi sabölö. Yaʼo Yehowa zamangaösö daʼö ba ginötönia.” Börö me ato niha sawena tobali samosumange Yehowa, so zalua sahöli-höli dödöda. Yaʼira si no amaedola ”gama-gama sebua böli”  andre, hasambalö laʼogunaʼö waʼabölö hegöi faʼatua-tuara wefao ba halöwö fanuriaigö ’turia somuso dödö sanandrösa ba Wamatörö Lowalangi’. Buania, simane si no ifaʼeleʼö Yesaya, tola tebeʼe ba nono mbanua Yehowa ’zoguna niʼasogö fefu soi’. (Yes. 60:5, 16) Börö wanolo moroi ba ndra matua hegöi ira alawe sebua böli andrö, tola mufalua halöwö fanuriaigö ba zi 240 soi ba mufazökhi publikasida ba zi töra 1.000 ngawalö li.

14. Hadia gangetula sinangea lahalö iadaʼa ira niha gulidanö maʼafefu?

¹⁴ Börö me lö ara tö tohare gamozua götö daʼa, mufaheu niha gulidanö ba wamangaösö yaʼira enaʼö lö laradö-radö ba wangai angetula: Hadia omasi ira latuhini Wamatörö Lowalangi, mazui abölö lafaduhusi tödö wamatörö niha gulidanö? Daʼö gangetula sinangea lahalö ira niha gulidanö maʼafefu. Yaʼita ira samosumange Yehowa, taʼoʼö huku nitatugöi ndra samatörö ba soi si toröi yaʼita. Hewaʼae simanö, lö faʼawö dambai ita sanandrösa ba politik. (Rom. 13:1-7) Aboto ba dödöda wa ha Famatörö Lowalangi zi tola mangasiwai abula dödö niha gulidanö. Tenga moroi ba gulidanö daʼa Wamatörö andrö.​—Yoh. 18:36, 37.

15. Simane nitutunö ba mbuku Wamaʼeleʼö, hadia wanandraigö nitaögö nono mbanua Lowalangi?

¹⁵ Iʼombakhaʼö khöda buku Wamaʼeleʼö wa hasambalö tetandraigö waʼalöfaröi nono mbanua Lowalangi ba ngaluo safuria. Hasambalö göna ita fanaisi hegöi folohi. Lafaso ita ira samatörö enaʼö talulu waʼaurida khöra ba lafakao ita na lö tatuhini ira. (Fam. 13:12, 15) Hasambalö lafaso fefu niha ”ba wanema tandra ba dangara kambölö mazui ba gangangora, he niha si toʼölö manö mazui niha si tehöngö, niha si kayo mazui si numana, ba niha niʼefaʼö mazui sawuyu”. (Fam. 13:16) Me götö föna, mubeʼe dandra khö ndra sawuyu enaʼö oroma haniha zokhö yaʼira. Simanö göi, muʼandrö dania ba niha fefu enaʼö labeʼe zi no amaedola ’dandra ba dangara mazui ba gangangora’. Eluahania, muʼandrö khöra enaʼö laforomaʼö moroi ba lala wangera-ngera hegöi ba nifaluara wa latuhini ndra samatörö ba gulidanö.

16. Hana wa moguna taʼaroʼö waʼalöfaröida khö Yehowa iadaʼa?

¹⁶ Hadia omasi ita tatema dandra andrö ba talulu waʼaurida khö ndra samatörö ba gulidanö? Na tatimbagö daʼö, hasambalö göna ita famakao ba tola manö teʼala waʼaurida. Imane buku Wamaʼeleʼö, ”Samösa lö si tola mowöli mazui mamawa na lö hadöi tandra daʼö.” (Fam. 13:17) Hizaʼi, aboto ba dödö nono mbanua Lowalangi wa hasambalö ihori fefu niha sanemaʼö tandra andrö Yehowa, simane nitutunö ba Wamaʼeleʼö 14:9, 10. Moroi na latemaʼö dandra andrö, lasura ba dangara ngawua wehede: ”Okhöta Yehowa.” (Yes. 44:5) Börö daʼö, daʼa ginötönia khöda ba wangaʼaroʼö faʼalöfaröida khö Yehowa. Na tafalua daʼö, hasambalö omuso dödö Yehowa ba wamaduhuʼö wa okhötania ita!

17. Hadia zinangea tatörö tödöda sanandrösa ba waʼebolo dödö Yehowa?

¹⁷ Sagötö ngaluo safuria andre, lö tebulö iforomaʼö waʼebolo dödö Yehowa. Lö omasi ia na so niha nihori. (2 Fe. 3:9) Ibeʼe ginötö ba niha fefu ba wamalalini era-erara hegöi ba wamosumange yaʼia. Hizaʼi, tenga sagötö faʼara iforomaʼö waʼebolo dödö. Fefu niha si lö omasi motuhini Famatörö Lowalangi hasambalö alua khöra zimane salua khö Waraʼo me götö Moze. Imane Yehowa khö Waraʼo, ”Sindruhunia tola manö uʼogunaʼö waʼabölögu ba wanguhuku yaʼugö hegöi ono mbanuau faoma  fökhö sabölö-bölö. Hasambalö ahori ami ba gulidanö. Hizaʼi, utehegö nasa auri ndraʼugö enaʼö tola uforomaʼö waʼabölögu ba enaʼö teʼombakhaʼö döigu ba zi sagörö ulidanö.” (2 Mo. 9:15, 16) Ba gafuriata, hasambalö aboto ba dödö niha fefu wa lö hadöi Lowalangi sindruhu baero Yehowa. (Hez. 38:23) Hewisa wa tola alua daʼö?

18. (a) Hadia wamaheu tanö böʼö si faböʼö ba nitutunö Hagaʼi 2:6, 20-22? (b) Hezo tola taʼila wa hasambalö ifuli alua wamaʼeleʼö Hagaʼi ba zi so miföna?

¹⁸ Ngaotu fakhe me no mate Hagaʼi, itutunö sinenge sotöi Faulo wa hasambalö ifuli alua ba zi so miföna wamaʼeleʼö si so ba Hagaʼi 2:6, 20-22. (Baso.) Imane Faulo, ”Iadaʼa no fawuʼu li ia, ’Sakali tö nasa ufuli ufaheu, tenga ha ulidanö saʼae, hizaʼi banua si yawa.’ Ngawua wehede ’sakali tö nasa’, daʼö zangoromaʼö wa ihori Lowalangi fefu zi no muheu andrö si tenga nifazökhi dangania irege lö taya zi lö muheu.” (Heb. 12:26, 27) Faböʼö wamaheu nitutunö ba daʼa faoma nitutunö ba Hagaʼi 2:7. Famaheu daʼa eluahania faʼatekiko irugi sagötö faʼara salua ba niha sanimbagö faʼasinangea Yehowa ba wamatörö, simane nifalua Waraʼo.

19. Hadia zi lö muheu, ba hezo tola taʼila daʼö?

¹⁹ Hadia zi lö muheu mazui si lö tehori? Imane Faulo, ”Börö me tatema Wamatörö si tebai muheu, dataforege wanema faʼasökhi dödö sebua moroi khö Lowalangi, sanolo yaʼita ba wamalua halöwö niʼamoniʼö si faudu ba zomasi ia, si fao faʼataʼu ba famosumange.” (Heb. 12:28) Börö daʼö, na no aefa alua wamaheu safuria, ha Famatörö Lowalangi zi lö muheu ba si lö irai adudu irugi zi lö aetu!​—Si. 110:5, 6; Dan. 2:44.

20. Hadia gangetula sinangea lahalö ira niha gulidanö, ba hewisa wanoloda yaʼira?

²⁰ Hatö maʼifu tö ginötö! Fefu niha moguna lahalö gangetula: Hadia lö tebulö lafalua gisö-isö dödö si so ba gulidanö andre irege tehori ira? Mazui, hadia omasi ira lafosumange Yehowa ba labulöʼö lala waʼaurira irege tola laʼokhögö waʼauri si lö aetu? (Heb. 12:25) Na möi ita manuriaigö, tola tatolo niha böʼö ba wangai angetula si tohude andre. Börö daʼö, dataforege enaʼö itugu ato niha nitoloda ba wangai angetula ba wotuhini Famatörö Lowalangi. Yalötebulö tatörö tödöda wehede Zoʼaya yaʼita Yesu Keriso me imane, ”Ba teturiaigö dania Wamatörö Lowalangi andrö, turia somuso dödö ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre.”​—Mat. 24:14.