1. Hezo taʼila wa omasi Yehowa na ahatö ia khöda?

 IʼANDRÖ khöda Yehowa enaʼö ahatö ita khönia. (Yak. 4:8) Omasi ia tobali Lowalangida, Amada, hegöi si Fahuwu khöda. Ifondrondrongo wangandröda ba itolo ita wanaögö abula dödö. Iʼogunaʼö göi organisasinia ba wamahaʼö hegöi ba wolumöʼö yaʼita. Hizaʼi, hadia zinangea tafalua enaʼö ahatö ita khö Yehowa?

2. Hewisa enaʼö tola ahatö ita khö Yehowa?

² Tola ahatö ita khö Yehowa na mangandrö ita khönia, tabaso ba taʼangerönusi Daromalinia. Na tafalua daʼö, itugu taʼomasiʼö ba taʼameʼegö tödö ia. Terou göi dödöda ba woloʼö niwaʼönia ba tafosumange ia börö me no sinangea itema daʼö. (Fam. 4:​11) Na itugu aboto ba dödöda Yehowa, itugu tafaduhusi tödö ia hegöi organisasi si no ihenaigö ba wanolo yaʼita.

3. Hadia nifalua Gafökha ba wamabali yaʼita khö Yehowa, ba hadia zanolo yaʼita enaʼö lö taröi Lowalangida hegöi organisasinia? (Sinunö 31:​13, 14)

³ Iforege Afökha ba wamabali yaʼita khö Yehowa, mendrua manö na alua khöda gabula dödö. Hadia nifaluania? Idaʼi-daʼi ba wamakiko faʼafaduhu dödöda khö Yehowa hegöi organisasinia. Hewaʼae simanö, tola talumöʼö ita. Na aro wamatida ba lö mangiwa waʼafaduhu dödöda khö Yehowa, lö irai taröi Lowalangida hegöi organisasinia.​—Baso Zinunö 31:13, 14.

4. Hadia nitutunöda ba artikel daʼa?

⁴ Ba artikel daʼa, tatutunö dania tölu dandrawa niʼasogö Zatana ba wamakiko faʼafaduhu dödöda khö Yehowa hegöi organisasinia. Tandrawa si tölu ngawalö andrö iʼasogö moroi baero mbanua niha Keriso. Hewisa wa möi famabalida khö Yehowa dandrawa andrö, ba hadia nifaluada ba wolawa yaʼia?

5. Hewisa gabula dödö möi famakiko waʼafaduhu dödöda khö Yehowa hegöi organisasinia?

⁵ Itaria alua khöda gabula dödö. Duma-dumania, göna ita folohi moroi ba nösi nomoda mazui aheta ita ba halöwöda. Hewisa gabula dödö simanö möi famakiko waʼafaduhu dödöda khö Yehowa ba ifabali ita khönia? Na no ara tataögö gabula dödö, tola manö taya wanötönada ba ide-ide dödöda. Iʼogunaʼö ginötö andrö Satana enaʼö aombö dödöda ba waʼomasi Yehowa khöda. Omasi Gafökha na tumbu ba wangera-ngerada wa börö Yehowa mazui organisasinia wa alua khöda gabula dödö. No irai alua zimane daʼö ba ndraono Gizaraʼeli ösa me so ira ba danö Miserai. Ba wamobörö, faduhu dödöra wa Yehowa zamataro Moze hegöi Aʼaroni ba wangefaʼö yaʼira moroi ba wangosawuyu. (2 Mo. 4:​29-​31) Hizaʼi ba gafuriata me ifakao ira Faraʼo, latahigö Moze hegöi Aʼaroni ba gabula dödöra andrö. Lamane, ”Börö-börö ami wa fatuwu khöma Waraʼo hegöi ira sohalöwö khönia. Hulö no mibeʼe wöda ba dangara ba wamunu yaʼaga.” (2 Mo. 5:​19-​21) Latahigö nono mbanua Lowalangi si lö faröi. Alimagö sibai! Na no ara ötaögö gabula dödö, hewisa enaʼö lö tebulö aro waʼafaduhu dödömö khö Yehowa hegöi organisasinia?

6. Hadia wamahaʼö si tola tahalö moroi khö Habakuki samaʼeleʼö sanandrösa ba wanaögö abula dödö? (Habakuki 3:​17-​19)

⁶ Tutunö ba wangandrö nösi dödöu khö Yehowa, ba andrö wanolo moroi khönia. Oya sibai gabula dödö nitaögö zamaʼeleʼö sotöi Habakuki. Samuza inötö, aombö dödönia alai na lö iʼameʼegö tödö ia Yehowa. Börö daʼö, itutunö nösi dödönia khö Yehowa ba wangandrö. Imane, ”He Yehowa, hawaʼara tö nasa uʼandrö wanolo moroi khöu? . . . Hana wa ötehegö alua wamakao?” (Hab. 1:​2, 3) Ifondrondrongo Yehowa wangandrö soroi ba dödö nifaʼema nono mbanuania si lö faröi andrö. (Hab. 2:​2, 3) Me no iʼangerönusi hewisa wangefaʼö Yehowa ono mbanuania, ifuli omuso dödö Habakuki. Faduhu dödönia wa iʼameʼegö tödö ia Yehowa ba itolo ia wanaögö abula dödö. (Baso Habakuki 3:​17-​19.) Hadia wamahaʼönia khöda? Na alua khöu gabula dödö, angandrö khö Yehowa, ba tutunö khönia nösi dödöu. Aefa daʼö, andrö wanolo moroi khönia. Na öfalua daʼö, tola faduhu dödöu wa hasambalö ibeʼe khöu waʼabölö Yehowa enaʼö so khöu waʼanau gölö. Ba na örasoi wanolo moroi khönia, itugu aro wamatimö.

7. Hadia nifalua zi fahatö khö Shirley, ba hadia zanolo yaʼia enaʼö lö taya wamatinia khö Yehowa?

⁷ Böi tebulö falua halöwö ba wamati. Daʼö nifalua dalifusöda ira alawe sotöi Shirley, si toröi ba Papua Nugini, me alua khönia gabula dödö. b Numana nösi nomonia, ba me luo daʼö itaria ambö zoguna khöra. So zi fahatö khönia sedöna mamakiko faʼafaduhu dödönia khö Yehowa. Imane, ”Öwaʼö göi itolo ndraʼugö eheha niʼamoniʼö moroi khö Lowalangi, ba hezo so ia? Lö manö saefa nösi nomou ba waʼanumana. Zaya-zaya gölö weʼamöimö manuriaigö.” Imane Shirley, ”Usofu khögu samösa, ’Hadia sindruhu-ndruhu iʼameʼegö tödö ndraʼaga Lowalangi mazui löʼö? Börö daʼö, iʼanemaiʼö mangandrö ndraʼo khö Yehowa ba ututunö khönia fefu zi so ba gera-eragu. Lö uböhöli wombaso Sura Niʼamoniʼö hegöi publikasida. Lö göi tebulö möi ndraʼo manuriaigö ba uʼondrasi gangowuloa.” Lö ara, ibörögö aboto ba dödönia wa irorogö nösi nomonia Yehowa. Lö irai olofo nösi nomonia ba omuso dödöra. Imane Shirley, ”Urasoi wa ifondrondrongo fefu wangandrögu Yehowa.” (1 Ti. 6:​6-8) Na lö tebulö öfalua halöwö ba wamati, lö hadöi abula dödö mazui faʼaombö dödö si tola mamabali yaʼugö khö Yehowa.

8. Hadia zi tola manö alua khö ndra talifusöda si so noro dödö ba organisasi Yehowa?

⁸ Laʼogunaʼö media hegöi jejaring sosial ira ududa ba wamazaewe falimosa mazui turia si lö sökhi sanandrösa khö ndra talifusöda si so noro dödö ba organisasi Yehowa. (Si. 31:13) So ösa ndra talifusöda si no labeʼe ba gurunga, ba lafobahulu ira wamalua si lö sökhi. No irai alua zimane daʼö me abad siföföna. Lafobahulu zinenge sotöi Faulo ba labeʼe ia ba gurunga. Hadia nifalua ndra talifusöda me luo daʼö?

9. Hadia nifalua niha Keriso ösa me so Waulo ba gurunga?

⁹ Laböhöli wanolo Faulo ira niha Keriso ösa me abad siföföna, me so ia ba gurunga ba Roma. (2 Ti. 1:​8, 15) Hadia mbörö? Hadia aila ira börö me ato zamotöi Faulo andre niha si lö sökhi? (2 Ti. 2:​8, 9) Mazui, hadia ataʼu ira ba lawaʼö tödöra alai dania na yaʼira nifakao aefa daʼa? Gofu hadia mbörö wa so khöra wangera-ngera simanö, khalaigö hawaʼafatö dödö Waulo. No oya wamakao si no itaögö ba itehegö nosonia salahi ndra talifusönia. (Hal. 20:​18-​21; 2 Ko. 1:8) Yalö irai tobali ita simane niha sondröi Faulo me moguna khönia wanolo! Hadia zinangea tatörö tödöda na tefakao ndra talifusöda si so noro dödö?

10. Hadia zinangea tatörö tödöda na tefakao ndra talifusöda si so noro dödö?

¹⁰ Böi olifu ita hana ba haniha mbörö wa tefakao ita. Imane 2 Timoteo 3:​12, ”Dozi sedöna moloʼö Keriso ba wamosumange Lowalangi soroi ba dödö, hasambalö göna ira folohi.” Tobali, lö tokea ita na si oföna ifakao Satana yaʼia daʼö ira talifusöda si so noro dödö. Ohitö dödönia enaʼö faröi ira khö Yehowa ba enaʼö ataʼu göi ita.​—1 Fe. 5:8.

11. Hadia wamahaʼö nihalöda moroi ba duma-duma Gonesiforo? (2 Timoteo 1:​16-​18)

¹¹ Böi böhöli wanolo ira talifusöu, ba böi faröi khöra. (Baso 2 Timoteo 1:​16-​18.) Me labeʼe Waulo ba gurunga, faböʼö nifalua zi samösa niha Keriso me abad siföföna sotöi Onesiforo. ”Lö aila ia hewaʼae no lakuru [Waulo].” Iʼodödögö wangalui Faulo. Ba me no isöndra, iʼalui lala ba wameʼe fanolo hewaʼae na tola manö teʼala waʼaurinia. Hadia wamahaʼönia khöda? Böi tataha wameʼe fanolo khö ndra talifusöda nifakao ha börö waʼataʼuda ba niha. Dataforege wamalua sabölö sökhi ba wangoʼawögö hegöi ba wanolo yaʼira. (Amd. 17:17) Moguna sibai khöra waʼomasi hegöi fanolo moroi khöda.

12. Hadia wamahaʼö nihalöda moroi khö ndra talifusöda si so ba Rusia?

¹² Angeragö hewisa ndra talifusöda ba Rusia me latolo ndra talifusö niʼomasiʼöra si no mubeʼe ba gurunga. Me so ösa zedöna muʼetuʼö huku, ato ndra talifusöda zi möi ba gödo zanguhuku ba wotuhini yaʼira. Hadia wamahaʼönia khöda? Na muböbögö zi lö duhu khö ndra talifusöda si so noro dödö, laraʼu mazui lafakao ira, böi ataʼu ita. Mangandrö ita salahira, taʼameʼegö tödö nösi nomora, ba taʼalui lala si tefaudu ba wanolo yaʼira.​—Hal. 12:5; 2 Ko. 1:​10, 11.

13. Hana wa tola aombö dödöda khö Yehowa hegöi organisasinia na so zangoʼaya yaʼita?

¹³ Tola manö laʼoʼaya ita ira si fahatö khöda, ira awöda wohalöwö mazui awöda sekola, börö me tafalua halöwö fanuriaigö mazui börö me tafaudugö waʼaurida ba goi-goi Yehowa sanandrösa ba gamuata. (1 Fe. 4:4) Tola manö lamane, ”Omasido wö sa gamuatamö, hizaʼi talafo abeʼe agamamö ba lö tefaudu na muʼogunaʼö ia iadaʼa.” Te so ösa zi lö fao tödö ba gamakhoita niʼoʼöda sanandrösa ba niha si no muʼefasi moroi ba mbanua niha Keriso. Tola manö lamane, ”Na duhu öʼomasiʼö niha böʼö, tatu tenga simane daʼö nifaluau.” Fehede simane daʼö tola manö iʼasogö khöda waʼaombö dödö sanandrösa ba goroisa Yehowa. Te manofu ita, ’Hadia talafo oya niʼandrö Yehowa andrö khögu? Hadia talafo abeʼe organisasinia?’ Na alua khöu zimane daʼö, hewisa enaʼö lö tebulö ahatö ndraʼugö khö Yehowa hegöi organisasinia?

14. Hadia nifaluada na so zangoʼaya yaʼita börö me tafaudugö waʼaurida ba goi-goi Yehowa? (Sinunö 119:​50-​52)

¹⁴ Böi böhöli wamalua goi-goi Yehowa. Lö faröi Yobi wamalua goi-goi Yehowa hewaʼae na laʼoʼaya ia. So samösa zi tenga sindruhu si fahuwu khö Yobi, iʼalui lala ba wamatumbuʼö ba dödö Yobi wa lö iʼameʼegö tödö ia Lowalangi hewaʼae na ifalua zatulö. (Yob. 4:​17, 18; 22:3) Hizaʼi, lö faduhu dödö Yobi ba walimosa andrö. Aboto ba dödönia wa atulö fefu goi-goi Yehowa ba ihalö gangetula ba woloʼö daʼö. Lö itehegö na so zamakiko faʼalöfaröinia. (Yob. 27:​5, 6) Hadia wamahaʼönia khöda? Böi aombösi tödö goi-goi Yehowa ha börö wangoʼaya. Angeragö hadia manö zi no irai alua ba waʼauriu. Te no asese örasoi wa itugu sökhi waʼauriu na öfalua hadia niwaʼö Yehowa. Böi böhöli wotuhini organisasi samalua goi-goi andrö. Na öfalua daʼö, lö hadöi si tola mamabali yaʼugö khö Yehowa hewaʼae na laʼosindruhugö wangoʼaya yaʼugö.​—Baso Zinunö 119:​50-​52.

15. Hadia mbörö wa laʼoʼaya Brizit?

¹⁵ Angeragö hadia zalua khö dalifusöda ira alawe moroi ba India sotöi Brizit. Laʼoʼaya ia ira ösi nomonia börö wamatinia. Lö ara me no aefa tebayagö ia idanö me döfi 1997, aheta ba halöwö woʼomonia si tenga Samaduhuʼö Yehowa. Börö daʼö, ihalö gangetula foʼomonia enaʼö findra ira fefu awö ndraononia alawe ba nomo zatuania si so ba mbanua böʼö. Hizaʼi, so wanandraigö sabölö ebua nitaögö Brizit. Börö me lö hadöi halöwö woʼomonia, iforege wohalöwö maʼö-maʼökhö ba wangalui soguna khöra. Inönö nasa, mato 350 kilometer waʼaröu mbanua niha Keriso sabölö ahatö ba nahiara. Sabu dödönia, lasaisi ia ira ösi nomo namania matuania börö wamatinia. Itugu abölö-bölö wanaisi nitaögönia irege lö tola löʼö findra zui nösi nomo Brizit. Ba zi lö mudöna-döna, mate woʼomonia. Aefa daʼö, mate göi samösa nononia alawi si 12 fakhe börö kanker. Enaʼö itugu monönö wangabu dödö Brizit, latahigö ia ira si fahatö khönia. Lawaʼö khönia wa lö alua fefu gabula dödönia andrö menaʼö na lö si tobali ia Samaduhuʼö Yehowa. Hewaʼae simanö, lö iböhöli wamaduhusi tödö Yehowa ba lö tebulö ahatö ia ba organisasinia.

16. Hadia manö howu-howu nitema Brizit börö me lö tebulö ahatö ia khö Yehowa hegöi organisasinia?

¹⁶ Börö me fandröndröu nomo Brizit moroi ba nahia gangowuloa, ifarou dödönia si samösa satua samasui enaʼö manuriaigö ia ba mbanua si toröi yaʼia, ba ifalua gangowuloa yomo ba nomonia. Ba wamobörö, abua khö Brizit wamalua daʼö. Hizaʼi, iʼoʼö manö wanuturu lala andrö. Manuriaigö ia, ifalua gangowuloa yomo ba nomonia, ba lö tebulö idöniaʼö wamahaʼö yomo ba nomo khö ndraononia alawe. Hadia mbuania? Oya wamahaʼö ba Zura Niʼamoniʼö nidöniaʼönia, ba ato nifahaʼönia si no mubayagö idanö. Me döfi 2005,  ibörögö wangai halöwö tobali perintis biasa. Itema howu-howu börö me faduhu dödönia khö Yehowa ba lö faröi ia ba organisasinia. Lö faröi ndraononia wangai halöwö khö Yehowa, ba iadaʼa so dombua mbanua niha Keriso ba mbanua andrö! Faduhu dödö Brizit wa Yehowa zameʼe khönia faʼabölö ba wanaögö fefu gabula dödönia hegöi fangoʼaya moroi ba nösi nomonia.

17. Hadia gangetula sinangea tahalö?

¹⁷ Omasi Zatana na faduhu dödöda wa hasambalö iröi ita Yehowa sagötö göna ita abula dödö, ba itugu tefakao waʼaurida na tatuhini organisasi Yehowa. Omasi Zatana na ataʼu ita ba ginötö laböbögö zi lö duhu khö ndra talifusöda si so noro dödö, lafakao mazui labeʼe ira ba gurunga. Iʼasogö göi wangoʼaya enaʼö aombö dödöda khö Yehowa hegöi organisasinia. Hewaʼae simanö, no anehe ita fefu dandrawa niʼogunaʼönia ba lö telimo ita. (2 Ko. 2:​11) Börö daʼö, halö gangetula ba wanimbagö falimosa Zatana, ba böi faröi khö Yehowa hegöi organisasinia. Törö tödöu, lö irai iröi ndraʼugö Yehowa. (Si. 28:7) Andrö, böi tehegö so zamabali yaʼugö khönia!​—Rom. 8:​35-​39.

18. Hadia nitutunöda ba artikel aefa daʼa?

¹⁸ Ba artikel daʼa, no tatutunö hadia manö dandrawa niʼasogö moroi baero mbanua niha Keriso. Hizaʼi, tola göi tetandraigö waʼafaduhu dödöda khö Yehowa hegöi organisasinia börö dandrawa moroi bakha ba mbanua niha Keriso. Hewisa enaʼö tola mofozu ita ba wanaögö abula dödö simane daʼö? Tatutunö dania wanema linia ba artikel aefa daʼa.