ARTIKEL WAMAHAʼÖ 46
Itolo Ita Yehowa Enaʼö Anau Gölöda si Fao Faʼomuso Dödö
”Ebolo dödö Yehowa khömi ba wombaloi, ba ifalua daʼö ba wangoromaʼö faʼahakhö dödönia khömi.”—YES. 30:18.
SINUNÖ 3 Faʼabölöma, Fanötönama, Faʼaro Dödöma
NITUTUNÖ a
1-2. (a) Hadia wanofu-nofu nitutunöda? (b) Hadia zangoromaʼö wa omasi sibai Yehowa ba wanolo yaʼita?
TOLA itolo ita Yehowa enaʼö anau gölöda ba gabula dödö salua khöda ba lö tebulö omuso dödöda ba wamosumange yaʼia. Hewisa wanolonia yaʼita? Hewisa enaʼö tatema mbua moroi ba wanolo nihenaigönia khöda? Tasöndra wanema li ba wanofu-nofu andre ba artikel daʼa. Hizaʼi fatua lö tabeʼe wanema linia, datatutunö wanofu andre: Hadia sindruhu-ndruhu omasi Yehowa wanolo yaʼita?
2 Tola tasöndra wanema linia ba zura nifaʼoheʼö zinenge sotöi Faulo ba niha Heberaiʼo. Imane, ”Yehowa zanolo yaʼo; lö ataʼu ndraʼo. Hadia zi tola lafalua niha khögu?” (Heb. 13:6) Moloʼö sambua karya referensi, ngawua wehede ’sanolo’ niʼogunaʼö ba ayati daʼa manandrösa ia ba niha si fagohi ba wameʼe fanolo ba niha siʼao sangandrö tolo. Khalaigö hewisa me fagohi Yehowa ba wanolo ono mbanuania si göna abula dödö. Daʼa zangoromaʼö wa omasi sibai Yehowa ba wanolo yaʼita. Börö wanolo Yehowa, andrö wa anau gölöda wanaögö abula dödö si fao faʼomuso dödö.
3. Hadia manö lala niʼogunaʼö Yehowa ba wanolo yaʼita?
3 Hadia manö lala niʼogunaʼö Yehowa ba wanolo yaʼita? Enaʼö taʼila wanema linia, datafareso mbuku Yesaya. Hadia mbörö? Börö me oya wamaʼeleʼö nisura Yesaya soguna ba nono mbanua Lowalangi iadaʼa. Baero daʼö, asese göi iʼogunaʼö Yesaya ngawua wehede salio aboto ba dödöda ba woʼamaedolagö Yehowa. Duma-dumania ba Yesaya faza 30. Ba faza daʼö, iʼogunaʼö duma-duma si sökhi Yesaya ba wanutunö hewisa wanolo Yehowa yaʼita (1) ifondrondrongo ba ibeʼe wanema li ba wangandröda, (2) ibeʼe khöda wanuturu lala ba (3) ibeʼe khöda howu-howu iadaʼa hegöi ba zi so miföna. Datazara-zara wanutunö si tölu lala andrö.
IFONDRONDRONGO WANGANDRÖDA YEHOWA
4. (a) Hadia niwaʼö Yehowa sanandrösa ba niha Yahudi ba götö Yesaya, ba hadia zalua khöra ba gafuriata? (b) Hadia dötönafö nibeʼe Yehowa ba niha si lö faröi? (Yesaya 30:18, 19)
4 Ba ayati 1 moroi ba Yesaya faza 30, iwaʼö Yehowa wa niha Yahudi andrö ’iraono sagabeʼe högö’ irege ”monönö horöra”. Imane nasa, ”Yaʼira andrö soi samadaö, . . . si lö mamondrongo oroisa Yehowa.” (Yes. 30:1, 9) Börö daʼö, ifaʼeleʼe Yesaya wa itehegö tefakao ira Yehowa. (Yes. 30:5, 17; Yer. 25:8-11) Ba sindruhu sa daʼö zalua. Teʼoloiʼö ira ba Mbabilona. Hizaʼi, so ösa nono mbanua Yehowa si lö faröi ba gotalua niha Yahudi andrö. Börö daʼö, iʼombakhaʼö khöra Yesaya dötönafö nifabuʼu Yehowa, yaʼia daʼö samuza inötö dania ifuli mangawuli ira ba Yeruzalema. (Baso Yesaya 30:18, 19.) Ba daʼö göi zalua. Iheta ira Yehowa moroi ba waniboʼö ba Mbabilona, hizaʼi lö iʼanemaiʼö alua daʼö. Imane Yesaya, ”Ebua dödö Yehowa ba wombaloi.” Eluahania, moguna ginötö ba niha si lö faröi ba wombaloi. Me no aefa 70 fakhe teʼoloiʼö ndraono Gizaraʼeli ba Mbabilona, awena mangawuli ira ba Yeruzalema. (Yes. 10:21; Yer. 29:10) Omuso sibai dödöra me mangawuli ira ba mbanua si tumbu yaʼira. Abula dödöra ba zilalö no tobali faʼowua-wua dödöra iadaʼa.
5. Hadia zi faduhu dödöda nisura ba Yesaya 30:19?
5 Iadaʼa, tobali fondrara dödöda ngawua wehede andre, ”Hasambalö ahakhö dödönia khömi na miʼandrö wanolo.” (Yes. 30:19) Ifaduhuʼö khöda Yesaya wa hasambalö ifondrondrongo Yehowa na muʼao ita khönia ba wangandrö fanolo. Imane nasa, ”Me no irongo, iʼanemaiʼö itema.” Ngawua wehede daʼa zamasugi ba dödöda wa omasi sibai Namada ba terou dödönia ba wanolo yaʼita. Börö me taʼila daʼa, andrö wa tola anau gölöda si fao faʼomuso dödö.
6. Hezo taʼila wa ifondrondrongo Yehowa wangandrö nono mbanuania zamösana?
6 Hadia wamahaʼö tanö böʼö si tola tahalö moroi ba ayati daʼa? Hasambalö ifondrondrongo Yehowa wangandrö nono mbanuania zamösana. Hezo tola taʼila daʼö? Ba faosatö siföföna ba Yesaya faza 30, iʼogunaʼö Yesaya ngawua wehede ”khömi” börö me ifanandrösa wehedenia Yehowa ba nono mbanuania si sambua ngawawa. Hizaʼi ba ayati 19, sindruhunia ifanandrösa wehedenia andrö ba nono mbanuania zamösana. Imane ba li sindruhunia, ”Lö saʼae meʼe ndraʼugö”; ”hasambalö ahakhö dödönia ndraʼugö”; ”na öʼandrö wanolo . . . iʼanemaiʼö itema.” Börö me Ama sebua faʼomasi Yehowa, andrö wa lö imane khö nononia sorasoi faʼide-ide dödö, ’Enaʼö abölö ndraʼugö simane talifusöu matua mazui talifusöu alawe.’ Sindruhunia, iʼameʼegö tödö ita zamösana Yehowa ba ifondrondrongo göi gangandröwada.—Si. 116:1; Yes. 57:15.
Hadia geluaha wehede Yesaya me imane, ”Böi mitehegö molombase [Yehowa]”? (Faigi ngenoli si 7)
7. Hadia nifalua Yesaya hegöi Yesu ba wangoromaʼö wa moguna taforege wangandrö?
7 Ba ginötö mangandrö ita khö Lowalangi ba tatutunö khönia zalua khöda, tola manö iʼanemaiʼö ibeʼe khöda wanema li, yaʼia daʼö ibeʼe khöda waʼabölö enaʼö tola anau gölöda. Na lö alio taya gabula dödöda, moguna asese mangandrö ita khö Yehowa enaʼö ibeʼe khöda waʼabölö. Daʼö nitötönania khöda. Oroma daʼö ba ngawua wehede nisura Yesaya, ”Böi mitehegö molombase [Yehowa].” (Yes. 62:7) Hadia geluahania? Na asese mangandrö ita khö Yehowa, no amaedola lö tatehegö khönia wolombase. Tefaudu ngawua wehede Yesaya andrö ba duma-duma niʼogunaʼö Yesu sanandrösa ba wangandrö nisura ba Luka 11:8-10, 13. Ba daʼö ifarou ita Yesu enaʼö ’taforege’ ba ’böi taböhöli wangandrö’ eheha niʼamoniʼö. Tola göi taʼandrö khö Yehowa enaʼö ibeʼe khöda wanuturu lala ba wangai angetula si tefaudu.
IBEʼE KHÖDA WANUTURU LALA YEHOWA
8. Me mböröta, hewisa waʼalua ngawua wehede nisura ba Yesaya 30:20, 21?
8 Baso Yesaya 30:20, 21. Me lafaʼuʼu mbanua Yeruzalema ira saradadu Mbabilona ba zi döfi a matonga, tefakao sibai niha ba mbanua andrö. Famakao nitaögöra andrö no amaedola göra sero maʼökhö. Hizaʼi, moloʼö ayati 20 ba 21, fawuʼu li Yehowa ba niha Yahudi wa hasambalö iʼefaʼö ira na lafalalini gera-erara ba labulöʼö gamuatara. Baero daʼö, fawuʼu li Yesaya wa hasambalö ifahaʼö nono mbanuania Yehowa ba lala wamosumange satulö börö me yaʼia andrö ”Samahaʼö Fondrege zi Sökhi”. Alua ngawua wehede daʼö me teʼefaʼö ndraono Gizaraʼeli moroi ba waniboʼö. Sindruhu tobali Samahaʼö Fondrege zi Sökhi khöra Yehowa, ba börö wanuturu lala moroi khönia andrö wa mofozu ira ba wamalua famosumange satulö. Iadaʼa, taʼandrö sibai göi saohagölö börö me Yehowa andrö Samahaʼö Fondrege zi Sökhi khöda.
9. Hewisa wamahaʼö Yehowa yaʼita?
9 Ifagölösi ita Yesaya simane iraono sekola nifahaʼö Yehowa, ba so dombua lala niʼogunaʼönia. Si oföna, imane Yesaya, ”Öʼila dania Zamahaʼö Fondrege zi Sökhi andrö.” Muʼamaedolagö Yehowa andrö simane samahaʼö si zizio föna ndraono sekolania. No töi sebua khöda börö me Lowalangi zamahaʼö yaʼita! Iʼodela organisasinia ba wameʼe khöda famahaʼö, ba taʼandrö sibai saohagölö ba daʼö. Fanuturu lala nitemada ba gangowuloa, ba gangowuloa ba zi sambua wilayah, ba gangowuloa ba zi sambua regional, ba publikasi, ba JW Broadcasting® hegöi tanö böʼönia, no tobali fanolo khöda enaʼö anau gölöda si fao faʼomuso dödö ba mbaŵa si lö sökhi andre.
10. Hewisa enaʼö tarongo li Lowalangi ’moroi furida’?
10 Itutunö Yesaya lala si dua niʼogunaʼö Yehowa ba wameʼe fanuturu lala. Imane, ”Örongo li daʼa moroi furimö.” Muʼamaedolagö Yehowa simane samahaʼö si so tanö furi ndraono sekolania. Inehe-nehegö ba ifatunö khöra hezo lala sinangea latörö. Iadaʼa, tola göi tarongo li Lowalangi moroi furida. Hewisa lalania? Fehede Lowalangi nisura ba Zura Niʼamoniʼö ba götö föna amaedola li si hede moroi furida. Börö daʼö, na tabaso Zura Niʼamoniʼö no amaedola tafondrondrongo li Lowalangi moroi furida.—Yes. 51:4.
11. Enaʼö anau gölöda si fao faʼomuso dödö, hadia zinangea tafalua ba hadia mbörö?
11 Hewisa enaʼö tatema mbua moroi ba wanuturu lala nibeʼe Yehowa ba organisasinia hegöi ba Daromalinia? Datatutunö zi dombua ngawalö nifatunö Yesaya. Si oföna, ”Daʼa lala.” Si dua, ”Mitörö lala andrö.” (Yes. 30:21) Lö ibönö na ha asala aboto ba dödöda lala daʼö. Hizaʼi moguna göi ’tatörö lala andrö’. Tola tafahaʼö ita sanandrösa ba gohitö dödö Yehowa moroi ba Daromalinia nitutunö organisasinia. Tafahaʼö göi ita hewisa enaʼö tola tafalua gohitö dödönia andrö. Na tafalua zi dombua ngawalö andrö, tola anau gölöda wamosumange Yehowa ba lö tebulö tarasoi waʼomuso dödö. Faduhu dödöda wa hasambalö ifahowuʼö ita Yehowa.
IFAHOWUʼÖ ITA YEHOWA
12. Teʼodane-dane ba Yesaya 30:23-26, hewisa wamahowuʼö Yehowa ono mbanuania?
12 Baso Yesaya 30:23-26. Alua wamaʼeleʼö andre ba niha Yahudi sangawuli ba Gizaraʼeli me no aefa teʼoloiʼö ira ba Mbabilona. Fahöna howu-howu nitemara, he soguna ba mboto hegöi ba wamati. Fahöna zoguna khöra bongi maʼökhö ibeʼe Yehowa. Ba sabölö tohude moroi ba daʼö, fahöna göi zoguna khöra ba wamati, irege tola ifuli labörögö zui wamosumange Yehowa ba lala satulö. Fefu howu-howu ba wamati nitemara ba ginötö daʼö, abölö tohude ia moroi ba howu-howu si no irai latema ba zilalö. Simane niʼilada ba ayati 26, itugu monönö haga ba wamati nibeʼe Yehowa khöra. Eluahania, itugu aboto ba dödö nono mbanua Yehowa Daromalinia. (Yes. 60:2) Howu-howu Yehowa andrö zanolo ono mbanuania enaʼö anau gölöra wamosumange yaʼia si fao ’faʼowua-wua dödö.’—Yes. 65:14.
13. Hewisa waʼalua wamaʼeleʼö sanandrösa ba wamohouni famosumange satulö iadaʼa?
13 Hadia no alua wamaʼeleʼö sanandrösa ba wamohouni famosumange satulö ba götöda iadaʼa? Noa! Iʼotarai me 1919, zuta niha niʼefaʼö moroi ba Mbabilona Sebua yaʼia daʼö agama sofaya ba zi sagörö ulidanö. Teʼohe ira ba waradaiso wamati, nahia sabölö sökhi moroi ba danö amabuʼula me götö ndraono Gizaraʼeli. (Yes. 51:3; 66:8) Hadia waradaiso wamati andrö?
14. Hadia waradaiso wamati andrö, ba haniha zi toröi ba daʼö iadaʼa? (Faigi Geluaha Ngawua Wehede.)
14 Iʼotarai me 1919, no larasoi ira niha nibayoini hewisa waʼauri ba waradaiso wamati andrö. b Ba gafuriata, niha sangokhögö tötönafö faʼauri ba gulidanö yaʼia daʼö ’biri-biri tanö böʼö’, larasoi göi waradaiso wamati ba fahöna howu-howu nitemara moroi khö Yehowa.—Yoh. 10:16; Yes. 25:6; 65:13.
15. Hezo so waradaiso wamati andrö?
15 Hezo so waradaiso wamati andrö? So nono mbanua Yehowa ba zi sagörö ulidanö. Börö daʼö, faradaiso wamati andrö göi so ia ba zi sagörö ulidanö. Gofu hezo toröi ita ba gulidanö andre, tola farahu ita ba waradaiso wamati na lö tebulö tatuhini wamosumange satulö.
Hewisa ita zamösana ba wonönö faʼasökhi waradaiso wamati? (Faigi ngenoli si 16-17)
16. Hewisa enaʼö lö tebulö taʼila waʼasökhi waradaiso wamati andrö?
16 Enaʼö lö tebulö so ita ba waradaiso wamati, moguna taʼameʼegö tödö mbanua niha Keriso si so ba zi sagörö ulidanö. Börö daʼö, dataʼosambuaʼö dödöda ba zi sökhi nifalua ndra talifusöda, tenga ba walömoʼahonoara. (Yoh. 17:20, 21) Hana wa moguna daʼö? Angeragö duma-duma daʼa. Oya ngawalö döla geu ba kabu si sökhi. Hizaʼi, moguna taʼosambuaʼö dödöda ba waʼasökhi kabu andrö, tenga ba daʼunö si falemba misa ba döla geu. Simane daʼö göi ba waradaiso wamati, oi faböʼö-böʼö gamuata ndra talifusöda si so ba daʼö. (Yes. 44:4; 61:3) Böi tefangoloi dödöda ba walömoʼahonoada samösa hegöi niha böʼö irege lö taʼila hawaʼasökhi mbanua niha Keriso safönu fahasara dödö ba zi sagörö ulidanö.
17. Hadia nifaluada zamösana ba wondrorogö fahasara dödö ba mbanua niha Keriso?
17 Hadia nifaluada zamösana ba wondrorogö fahasara dödö ba mbanua niha Keriso? Moguna tobali ita niha solohe faʼatulö ba gotalua ndra talifusöda. (Mat. 5:9; Rom. 12:18) Ero tafalua daʼö, no tanönö waʼasökhi waradaiso wamati. Böi olifu ita wa Yehowa zondröni niha enaʼö fao ira ba waradaiso wamati ba lafalua wamosumange satulö. (Yoh. 6:44) Hasambalö omuso dödö Yehowa me inehegö wamorege nifaluada ba wondrorogö faʼatulö hegöi fahasara dödö ba gotalua nono mbanuania sebua böli!—Yes. 26:3; Hag. 2:7.
18. Hadia zinangea taʼangerönusi ba hadia mbörö?
18 Hewisa enaʼö tatema mbua moroi ba howu-howu nihenaigö Yehowa? Moguna taʼangerönusi wamahaʼö nisöndrada ba Daromali Lowalangi hegöi ba publikasi si teʼodane-dane ba Zura Niʼamoniʼö. Daʼö zanolo yaʼita ba wangoromaʼö bua-bua niha Keriso ba samarou tödöda enaʼö faoma ’taʼomasiʼö nawöda simane ösi nomoda’. (Rom. 12:10) Na taʼangerönusi howu-howu nitemada iadaʼa, itugu aro wahuwusada khö Yehowa. Ba na taʼangerönusi howu-howu nifabuʼu Yehowa ba zi so miföna, lö taya wanötönada ba lö taböhöli wamosumange yaʼia sagötö faʼara. Daʼö mbörö wa lö tebulö omuso dödöda wamosumange Yehowa.
FOROMAʼÖ WAʼANAU GÖLÖ
19. (a) Moloʼö Yesaya 30:18, hadia nifalua Yehowa dania? (b) Hadia zanolo yaʼita enaʼö anau gölöda si fao faʼomuso dödö?
19 Iʼoʼawögö ita dania Yehowa na ihori gulidanö si lö sökhi andre. (Yes. 30:18) Faduhu dödöda wa Yehowa andrö ”Lowalangi Satulö”, ba lö itehegö na talafo ara mamatörö gulidanö Zatana andre. (Yes. 25:9) Börö daʼö, moguna tabaloi Yehowa ba wamalua daʼö irege tedudugö dania gulidanö Zatana andrö. Hizaʼi, gasa-gasa daʼö, datahalö gangetula ba woʼameʼegö tödö mbuala nibeʼenia khöda, yaʼia daʼö fangandrö, tafahaʼö ita ba Daromalinia ba tafalua daʼö. Taʼangerönusi göi howu-howu nibeʼenia khöda. Na tafalua daʼö, itolo ita Yehowa enaʼö anau gölöda si fao faʼomuso dödö ba wamosumange yaʼia.
SINUNÖ 142 Tötönaföda Böi Taʼefasi
a Ba artikel daʼa, tatutunö tölu ngawalö lala niʼogunaʼö Yehowa ba wanolo ono mbanuania enaʼö anau gölöra ba wanaögö abula dödö salua si fao faʼomuso dödö. Tafahaʼö ita dania ba Yesaya faza 30 sanandrösa ba wanolo andrö. Famahaʼö andre zamasugi ba dödöda wa moguna sibai mangandrö ita khö Yehowa, tafahaʼö ita ba Daromalinia, ba taʼangerönusi howu-howu nitemada iadaʼa hegöi ba zi so miföna.
b ELUAHA NGAWUA WEHEDE: ”Faradaiso wamati” eluahania nahia sahono tödö ba wamati, si tola tarasoi yaʼita ono mbanua Yehowa. Ba nahia daʼa, fahöna gö ba wamati ba teʼefaʼö göi ita moroi ba walimosa agama sofaya. Tola göi tafalua halöwö sangaʼasogö faʼowua-wua dödö, yaʼia daʼö ba wanuriaigö turia somuso dödö sanandrösa ba Wamatörö Lowalangi. Tola fahuwu ita khö Yehowa, ba tarasoi göi waʼatulö ba gotalua ndra talifusöda, sanolo yaʼita enaʼö anau gölöda ba wanaögö abula dödö si fao faʼomuso dödö. No so ita ba waradaiso wamati me ibörögö tafosumange Yehowa ba lala satulö ba taforege wamalua sabölö sökhi ba woloʼö yaʼia.