1. Hadia geluahania tarorogö gera-erada? (2 Timoteo 4:5)

 TOLA tetandraigö waʼalöfaröida khö Yehowa hegöi organisasinia na alua khöda gabula dödö. Hewisa wanaögöda daʼö? Moguna tarorogö gera-erada ba böi arörö ita irege aro ita ba wamati. (Baso 2 Timoteo 4:5.) Tola tarorogö gera-erada na so khöda waʼahono dödö, taʼokhögö wangera-ngera satulö, ba taforege wamaigi hadia ia simane famaigi Yehowa. Na tafalua daʼö, lö tatehegö ifatörö wangera-ngerada nirasoi dödöda.

2. Hadia nitutunöda ba artikel daʼa?

² Ba artikel si no numalö, no tatutunö tölu dandrawa moroi baero mbanua niha Keriso. Ba artikel daʼa göi, tatutunö tölu dandrawa moroi bakha ba mbanua niha Keriso sanandraigö faʼalöfaröida khö Yehowa, yaʼia daʼö (1) na tarasoi wa lafalua khöda zi lö atulö ira talifusöda, (2) na labeʼe khöda degu-tegu, ba (3) na taforege wamaudugö faʼaurida na so waʼatebulö ba organisasi. Hewisa wondrorogöda fangera-ngerada ba lö faröi ita khö Yehowa hegöi organisasinia hewaʼae so dandrawa simane daʼö?

3. Hadia zi so ba wangera-ngerada na lafalua khöda zi lö atulö ira talifusöda?

³ Hadia no irai örasoi wa lafalua khöu zi lö atulö ira talifusöda, mendrua manö na daʼö ira talifusöda si so noro dödö simane satua sokubaloi? Tola manö tenga daʼö gohitö dödönia ba  wangafökhöiʼö tödömö. (Rom. 3:23; Yak. 3:2) Hizaʼi, afatö dödömö ba nifaluania. Te lö öʼila mörö ba woʼera-era daʼö. Ba ömane tödöu, ’Na sindruhu organisasi Lowalangi daʼa, ba hana wa simane daʼö nifaluania?’ Omasi Zatana na taʼokhögö wangera-ngera simane daʼö. (2 Ko. 2:11) Fangera-ngera si lö tefaudu simane daʼö tola möi famabalida khö Yehowa hegöi organisasinia. Na tarasoi wa lafalua khöda zi lö atulö ira talifusöda, hewisa lalada ba wondrorogö fangera-ngerada?

4. Hewisa wondrorogö Yosefo fangera-ngerania me lafalua khönia zi lö atulö, ba hadia wamahaʼönia khöda? (1 Moze 50:19-21)

⁴ Böi afökhö dödöu. Me awuyu-wuyu Yosefo, lafakao ia ira gaʼania. Fatuwu ira khönia ba so ösa ba gotaluara zomasi mamunu yaʼia. (1 Mo. 37:4, 18-22) Ba gafuriata, lafamawa ia tobali sawuyu. Lua-luania, itaögö wanandraigö sebua mato 13 fakhe waʼara. Tola manö tumbu ba dödö Yosefo hadia sindruhu-ndruhu iʼomasiʼö ia Yehowa. Tola göi iwaʼö tödönia wa no iröi ia Yehowa ba ginötö moguna khönia wanolo. Hizaʼi, lö hadöi fangera-ngera simane daʼö khö Yosefo. Lö göi abao dödönia. Lö tebulö irorogö wangera-ngerania irege so khönia waʼahono dödö. Iʼosambuaʼö dödönia ba gohitö dödö Yehowa, tenga ba gabula dödönia samösa. Hewaʼae na tola ilau mbalönia Yosefo khö ndra talifusönia, hizaʼi lö ilau daʼö. So khönia wanaha tödö, iforomaʼö khöra waʼomasi, ba iʼefaʼö zalara. (1 Mo. 45:4, 5; baso 1 Moze 50:19-21) Hadia wamahaʼönia khöda? Na so zamalua khöda si lö atulö, böi afökhö dödöda irege talawa Yehowa mazui tawaʼö tödöda wa no iröi ita. Moguna taʼangerönusi hewisa wanolonia yaʼita ba wanaögö abula dödö. Baero daʼö, na so niha böʼö samalua khöda si lö atulö, databologö dödöda khöra ”börö me oya ibalugö horö faʼomasi andrö”.—1 Fe. 4:8.

5. Hewisa wondrorogö Miqueas fangera-ngerania me irasoi wa so niha samalua khönia si lö atulö?

⁵ Angeragö duma-duma ba götöda iadaʼa simane salua khö dalifusöda Miqueas, b samösa satua sokubaloi si so ba Amerika Selatan. Itörö tödönia wa no irai irasoi hewisa me so ösa zatua sokubaloi samalua khönia si lö atulö. Imane, ”Lö irai simane daʼa waʼafawuka wangera-ngeragu ba zilalö. Lö sökhi-sökhi dödögu. Lö uʼila mörö ba zi bongi ba mowöi dawa hörögu börö me lö uʼila hadia zinangea ufalua.” Hizaʼi, lö tebulö iforege Miqueas ba wondrorogö fangera-ngerania hegöi nirasoinia. Asese iʼandrö geheha niʼamoniʼö hegöi faʼabölö khö Yehowa enaʼö tola anau gölönia. Iʼalui göi wanuturu lala ba publikasida si tola manolo yaʼia. Hadia wamahaʼönia? Na örasoi wa so ndra talifusöda samalua khöu si lö atulö, halö khöu waʼahono dödö hegöi fanaha tödö ba ngawalö wangera-ngera si lö tefaudu niʼokhögömö. Tola manö lö aboto ba dödömö hadia mbörö wa iwaʼö mazui ifalua khöu zimane daʼö. Angandrö khö Yehowa enaʼö itoloʼö ba wamaigi salua andrö simane famaigi niha böʼö. Na öfalua daʼö, tola öʼila wa lö hadöi tödö ndra talifusöda ba wamalua khöu si lö atulö, ba tola göi möi fanolomö enaʼö aoha khöu ba wangefaʼö salara. (Amd. 19:11) Törö tödömö wa iʼila zalua khömö andrö Yehowa ba ibeʼe khöu wanolo enaʼö tola anau gölömö.—2 Ng. 16:9; Sango. 5:8.

6. Hana wa moguna aboto ba dödöda wa degu-tegu moroi khö Yehowa andrö no tandra waʼomasinia khöda? (Heberaiʼo 12:5, 6, 11)

⁶ Ba ginötö itegu ita Yehowa, tola abu sibai dödöda. Na taʼosambuaʼö dödöda ba waʼafökhö nirasoida, tola manö tawaʼö tödöda wa lö tefaudu khöda degu-tegu nibeʼenia.  Lua-luania, olifu ita zi tohude andre: Degu-tegu andrö tandra wa iʼomasiʼö ita Yehowa. (Baso Heberaiʼo 12:5, 6, 11.) Na tatehegö ifatörö ita nirasoida andrö, no tabeʼe ginötö khö Zatana ba wamatörö yaʼita. Omasi ia na lö tatemaʼö degu-tegu ba fandröndröu ita moroi khö Yehowa hegöi banua niha Keriso. Na no labeʼe khöu degu-tegu, hewisa wondrorogöu fangera-ngerau?

7. (a) Simane niʼilada ba gambara, hewisa wangogunaʼö Yehowa Wetero me no aefa itema degu-tegu? (b) Hadia wamahaʼö si tola öhalö khö Wetero?

⁷ Temaʼö degu-tegu ba faudugö nifaluamö. Tenga ha sakali ibeʼe degu-tegu Yesu khö Wetero föna ndra sinengenia tanö böʼö. (Mrk. 8:33; Luk. 22:31-34) Tatu aila sibai Wetero. Hewaʼae simanö, lö faröi ia khö Yesu. Itemaʼö degu-tegu ba ifahaʼö ia ba zala si no ifalua. Börö daʼö, iʼameʼegö tödö Yehowa waʼalöfaröi niforomaʼö Wetero ba ibeʼe khönia noro dödö si tohude ba mbanua niha Keriso. (Yoh. 21:15-17; Hal. 10:24-33; 1 Fe. 1:1) Hadia wamahaʼönia khöda? Tola tatema mbua ba degu-tegu nibeʼe khöda na lö taʼosambuaʼö dödöda ba waʼaila nirasoida, ba tafaudugö nifaluada. Na tafalua daʼö, moguna ita khö Yehowa hegöi khö ndra talifusöda.

8-9. Me itema degu-tegu Bernardo, hadia nirasoinia ba wamobörö, ba hadia zanolo yaʼia ba wombulöʼö fangera-ngerania?

⁸ Datatutunö hadia zalua khö zi samösa talifusöda ira matua sotöi Bernardo ba Mozambik. No irai labeʼe khönia degu-tegu, ba laheta ia tobali satua sokubaloi. Hewisa dödönia ba wamobörö? Imane, ”Abao dödögu börö me lö omasido degu-tegu nibeʼe khögu andrö.” Aombö dödönia, hewisa dania wamaigi ndra talifusöda yaʼia ba gangowuloa. Imane, ”Moguna khögu ginötö mato hauga waŵa ba wangatulöʼö fangera-ngeragu ba zalua andre irege tola ufuli ufaduhusi tödö Yehowa hegöi organisasinia.” Hadia zanolo Bernardo ba wamaudugö lala wangera-ngerania?

⁹ Ifaudugö lala wangera-ngerania Bernardo. Imane, ”Me tobali ndraʼo satua sokubaloi, uʼogunaʼö Heberaiʼo 12:7 ba wanolo niha böʼö enaʼö laʼokhögö lala wangera-ngera satulö sanandrösa ba degu-tegu moroi khö Yehowa. Iadaʼa, usofu khögu samösa, ’Haʼökhö moguna ayati daʼa?’ Moguna fefu ba nono mbanua Yehowa, ba farahu ndraʼo ba daʼö.” Aefa daʼö, so göi nifaluania enaʼö tola ifuli faduhu dödönia khö Yehowa hegöi organisasinia. Asese ibaso ba iʼangerönusi Zura Niʼamoniʼö. Hewaʼae na  aombö dödönia sanandrösa ba wamaigi ndra talifusöda yaʼia, hizaʼi falulu fohalöwö ia khöra ba wanuriaigö ba ibeʼe mbua gera-erania ba gangowuloa. Ba gafuriata, ifuli lafataro ia tobali satua sokubaloi. Simane Bernardo, böi osambuaʼö dödöu ba waʼaila nirasoimö na no labeʼe khöu degu-tegu, hizaʼi temaʼö daʼö ba faudugö hadia nifaluau. c (Amd. 8:33; 22:4) Na öfalua daʼö, yafaduhu dödöu wa hasambalö ifahowuʼö ndraʼugö Yehowa börö me lö faröiʼö khönia hegöi organisasinia.

10. Hadia waʼatebulö sanandraigö faʼalöfaröi ndraono Gizaraʼeli?

¹⁰ Tola tetandraigö waʼalöfaröida na so waʼatebulö ba organisasi. Na lö omasi ita wanemaʼö yaʼia, tola tobali daʼö famabalida khö Yehowa. Nehegö waʼatebulö salua ba ndraono Gizaraʼeli. Fatua lö hadöi Oroisa Moze, högö yomo ba nomo zamalua halöwö gere. Lafazökhi naha wanunu sumange ba labeʼe zumange khö Yehowa salahi nösi nomora. (1 Mo. 8:20, 21; 12:7; 26:25; 35:1, 6, 7; Yob. 1:5) Hizaʼi me no so Goroisa Moze, lö lafalua saʼae halöwö andrö högö yomo ba nomo börö me no ituyu nösi nomo Gaʼaroni Yehowa tobali ere ba wameʼe sumange. Iʼotarai daʼö, na so högö yomo ba nomo zamalua halöwö gere na tenga moroi ba nösi nomo Gaʼaroni ia, hasambalö muhuku mate. d (3 Mo. 17:3-6, 8, 9) Hadia daʼa mbörö wa mamadaö Gora, Datano, Abiramo hegöi si 250 zondröniaʼö mado Gizaraʼeli khö Moze hegöi Aʼaroni? (4 Mo. 16:1-3) Lö taʼila sibai. Hizaʼi, moroi ba daʼa taʼila wa lö mofozu Gora hegöi awönia tanö böʼö ba wondrorogö faʼalöfaröira khö Yehowa. Na so waʼatebulö salua ba organisasi si tola manandraigö faʼalöfaröimö, hadia nifaluamö?

11. Hadia wamahaʼö nihalöda moroi ba duma-duma niha Lewi ngaʼötö Gahati?

¹¹ Tuhini soroi ba dödö na so waʼatebulö ba organisasi. Sagötö wofanö ndraono Gizaraʼeli ba danö si mate, tebeʼe halöwö si tohude ba ngaʼötö Gahati. Ero findra ndraono Gizaraʼeli, ngaʼötö Gahati zolohe tawöla amabuʼula föna niha sato. (4 Mo. 3:29, 31; 10:33; Yos. 3:2-4) No halöwö si tohude sibai daʼö! Hizaʼi, me no toröi ndraono Gizaraʼeli ba Danö Amabuʼula, faböʼö saʼae zalua. Lö saʼae mufawuʼa-wuʼa Dawöla. Me mamatörö Zelomo tobali razo, tebulö halöwö ngaʼötö Gahati. So ösa nifataro tobali sanunö, sanaro bawa göli, ba tanö böʼönia sanaro naha wangiröʼö. (1 Ng. 6:31-33; 26:1, 24) Lö irai tesura ba Zura Niʼamoniʼö wa so ngaʼötö Gahati si kökö-kökö mazui laʼandrö halöwö sabölö sökhi. Omasi ira wamalua halöwö si bohou, hewaʼae na abölö tohude halöwöra ba zilalö. Hadia wamahaʼönia? Moguna soroi ba dödö tatuhini na so waʼatebulö ba organisasi Yehowa, mendrua manö na molua-lua daʼö ba halöwöda. Okhögö waʼomuso dödö gofu hadia ia halöwö nibeʼe khöu. Törö tödöu, wa tola ebua mbölimö föna Yehowa tenga börö halöwöu, hizaʼi börö me öʼoʼö nifakhoinia.—1 Sa. 15:22.

12. Hadia nirasoi Zaina me aheta ia moroi ba Mbetieli?

¹² Angeragö duma-duma Zaina, samösa dalifusöda ira alawe moroi ba Timur Tengah. No irai mangai halöwö ia ba Mbetieli ba zi 23 fakhe faʼara ba omasi sibai ia halöwö daʼö. Hizaʼi, ba gafuriata mufataro ia tobali perintis istimewa. Imane, ”Tokea sibai ndraʼo ba waʼatebulö halöwögu. Uwaʼö tödögu wa lö saʼae  moguna ndraʼodo andre, ba lö göi aetu usofu khögu samösa hadia zalagu.” So göi ösa ndra talifusöda ba mbanua niha Keriso sonönö faʼafökhö dödönia ba lamane khönia, ”Lö lahetaʼö menaʼö ba Mbetieli na sökhi wohalöwömö.” Ara maʼifu ginötö irasoi waʼabu dödö Zaina irege meʼe ia ero bongi. Hizaʼi imane, ”Lö irai utehegö so ba dödögu waʼaombö dödö sanandrösa ba organisasi hegöi faʼomasi Yehowa khögu.” Hewisa Zaina ba wondrorogö fangera-ngerania?

13. Hadia nifalua Zaina ba wanimbagö fangera-ngera si lö tefaudu?

¹³ Tola itimbagö Zaina wangera-ngera si lö tefaudu niʼokhögönia. Hewisa lalania? Ibaso artikel si so ba publikasida soʼamakhaita ba gabula dödönia. Duma-dumania, itema mbua börö me ibaso artikel ”Saudara Dapat Mengatasi Perasaan Kecil Hati” ba Menara Pengawal 1 Mbaŵa si Dua 2001. Itutunö ba daʼö duma-duma zanura Sura Niʼamoniʼö sotöi Mareko si no irai morasoi faʼide-ide dödö börö me no tebulö halöwö nibeʼe khönia. Imane Zaina, ”Salua khö Mareko andrö tobali dalu-dalu ia khögu ba wanaögö faʼafatö dödö.” Lö göi tebulö ahatö Zaina khö ndra awö-awönia. Fariawö ia ba lö ihakhösi tödö ia samösa. Aboto ba dödönia wa eheha niʼamoniʼö zondröniaʼö organisasi Yehowa ba laʼameʼegö tödö sibai ia ira talifusöda sondröniaʼö. Iʼila göi wa fefu gangetula nifazökhi organisasi Lowalangi moguna ia ba wotuhini Famatörö Yehowa.

14. Hadia waʼatebulö ba organisasi si lö fatema khö Vlado, ba hana wa tola ituhini daʼö ba gafuriata?

¹⁴ Samösa zatua sokubaloi si no 73 fakhe si so ba Slovenia sotöi Vlado, no irai lö fatema ba dödönia me so waʼatebulö. Muʼosambuaʼö mbanua niha Keriso si farahu yaʼia ba mbanua niha Keriso tanö böʼö, ba lö saʼae laʼogunaʼö Balai Mbanua Lowalangi niʼogunaʼöra ba zilalö. Imane Vlado, ”Lö aboto ba dödögu hadia mbörö wa lö saʼae laʼogunaʼö Balai si baga-baga andrö. Afatö dödögu börö me bohou maʼehaogö Balai daʼö. Mohalöwö ndraʼo tobali tuka geu ba so ösa gama-gama nifazökhigu ba nahia gangowuloa andrö. Aefa daʼö, börö me no muʼosambuaʼö mbanua niha Keriso, oya waʼatebulö si lö tefaudu khöma yaʼaga sanuriaigö si no alawa döfi.” Hadia zanolo Vlado ba wotuhini faʼatebulö andrö? Imane, ”Faduhu dödögu wa hasambalö tatema howu-howu na tatuhini waʼatebulö salua ba organisasi.  Sindruhunia, daʼö zamaʼanö yaʼita na so waʼatebulö sabölö ebua ba zi so miföna.” Hadia abua khöu wamaudugö faʼaurimö börö me no muʼosambuaʼö mbanua niha Keriso si farahu yaʼugö ba mbanua niha Keriso tanö böʼö, mazui börö me so waʼatebulö ba halöwömö? Yafaduhu dödömö wa hasambalö aboto ba dödö Yehowa nirasoimö. Na ötuhini waʼatebulö salua simane daʼö, ba lö faröi ndraʼugö khö Yehowa hegöi organisasi niʼogunaʼönia, hasambalö ötema howu-howu.—Si. 18:25.

15. Hewisa wondrorogöda fangera-ngerada na so dandrawa moroi bakha ba mbanua niha Keriso?

¹⁵ No ahatö gamozua götö danö, ba tola manö so dandrawa bakha ba mbanua niha Keriso si tola manandraigö faʼalöfaröida khö Yehowa. Börö daʼö, moguna tarorogö wangera-ngerada. Na örasoi wa lafalua khöu zi lö atulö ira talifusöda, böi abao dödöu. Na labeʼe khöu degu-tegu, böi osambuaʼö dödöu ba waʼaila nirasoimö, temaʼö mene-mene ba faudugö nifaluamö. Na so waʼatebulö salua ba organisasi Yehowa si tola molua-lua ba waʼaurimö, temaʼö daʼö soroi ba dödö ba oʼö wanuturu lala andrö.

16. Hewisa enaʼö lö tebulö waʼafaduhu dödöu khö Yehowa hegöi organisasinia?

¹⁶ Tola örorogö waʼafaduhu dödöu khö Yehowa hegöi organisasinia hewaʼae na tetandraigö waʼalöfaröimö. Ba wamalua daʼö, moguna örorogö wangera-ngeramö. Eluahania, moguna öʼokhögö waʼahono dödö, fangera-ngera satulö, ba öfaigi hadia ia moloʼö famaigi Yehowa. Fahaʼö ndraʼugö ba angerönusi duma-duma niha si no tesura ba Zura Niʼamoniʼö si no mofozu ba wanaögö abula dödö si fagölö. Angandrö khö Yehowa enaʼö ibeʼe khöu wanolo. Böi tebulö fariawö ndraʼugö ba mbanua niha Keriso. Gofu hadia ia zalua, tebai ifabali ndraʼugö Satana khö Yehowa hegöi organisasinia.—Yak. 4:7.